Po o E Atiina Aʻe ni Faalogona Ofo

PE UA e mātauina, e masani lava ona faapogaia e tusitala o le Tusi Paia, faalogona ofo pe a latou talanoa e faatatau i galuega ma uiga o le Atua? Na fai mai le faisalamo: “Na faia aʻu e ala ai ona . . . ofo tele ai.” (Salamo 139:14) Na tusi le perofeta o Isaia: “Ieova e, o loʻu Atua lava oe; ou te faaneenee iā te oe; ou te vivii atu i lou suafa; auā ua e faia mea e ofo ai.” (Isaia 25:1) Manatu foʻi i faalogona ofo o loo faaalia i upu a le aposetolo o Paulo: “Auē! le loloto o le tamaoaiga o le poto atoa ma le silafaga a le Atua.”—Roma 11:33.

Ua faamatalaina e se lomifefiloi le upu “ofo” o se “faalogona e faapogaia ona o se mea e leʻi faatalitalia, o se mea e lē masani ai, po o se mea e lē mafaamatalaina aemaise o le maofa ona o le manaia o se mea, po o le fia iloaina o se mea, ma isi faalogona faapena.” (The Oxford Encyclopedic English Dictionary)

O se fiafiaga le vaai atu i foliga ofo o tamaiti pe a latou vāai, paʻi pe faalogo foʻi i se mea e fou iā i latou! Ae pagā lea, a faasolo ina matua se tagata, e masani lava ona mou atu na faalogona ofo lea e maua mai i le fia iloaina o se mea, po o le ofo foʻi ona o ni mea fou.

E ui i lea, na malolosi faalogona ofo o le ʻautusitala o le Tusi Paia ia na taʻua i luga. Ua autausagā ona iā i latou faalogona faapena. Aiseā? Na latou atiina aʻe faalogona ofo e ala i le mafaufau loloto i galuega a le Atua. Na tatalo le faisalamo: “Ou te manatu i aso anamua; ou te manatunatu i mea uma na e faia; ou te mafaufau i galuega [“e ofo ai,” The New English Bible] a ou aao.”—Salamo 143:5.

O se mea e fiafia ai ona o loo iai foʻi i tagata tapuaʻi o le Atua i aso nei, lenei lava faalogona ofo! Po o iā te oe lenei faalogona ofo? O e atiina aʻe lenā faalogona?