Talaʻi Ina ia Faia Soo

“Ua faalogo atu Akula ma Pisila iā te ia [Apolo], ona la ave lea iā te ia, ma faamatala atu atili le ala o le Atua iā te ia.” —Galuega 18:26.

1. E ui lava sa ‘malosi lona loto,’ ae o le ā sa manaʻomia e Apolo?

NA MĀTAUINA e Pisila ma Akula, o se ulugalii Kerisiano i le uluaʻi senituri, ia Apolo a o faia sana lauga i le sunako i le aai o Efeso. Sa uaʻi atu le aofia iā Apolo ona o ana upu faagaeeloto ma lona tomai e faatalitonuina ai isi. Sa “malosi foʻi lona loto” ma “matuā aʻoaʻo atu ma le saʻo i mea e uiga iā Iesu.” Peitaʻi, ua faamaonia o Apolo e “na o le papatisoga a Ioane ua iloa e ia.” Sa saʻo le mea na talaʻi atu e Apolo e uiga iā Keriso ae sa tapulaa lona iloa. O le faalavelave sa lē atoatoa lona malamalama iā Keriso. Na manaʻomia e Apolo ona faateleina lona iloa i le matafaioi a Iesu Keriso i le faataunuuina o le finagalo o Ieova.—Galuega 18:24-26.

2. O le ā le luʻi na feagai ma Pisila ma Akula?

 ² E leʻi faatalatū Pisila ma Akula e ō atu e fesoasoani iā Apolo ina ia avea ma sē e tausi i “mea uma” na faatonuina e Keriso. (Mataio 28:19, 20) Ua faapea mai le tala “ona la ave lea iā te ia, ma faamatala atu atili le ala o le Atua iā te ia.” Peitaʻi, sa iai mea moni e faatatau i le tulaga o Apolo sa ono musuā ai nisi Kerisiano e aʻoaʻoina o ia. O ā na mea moni? O le ā ua tatou aʻoaʻoina mai taumafaiga a Pisila ma Akula ina ia talanoaina le Tusi Paia ma Apolo? E mafai faapefea i le toe autaluina o lenei tala ona fesoasoani iā i tatou e taulaʻi atu ai i le amataina o suʻesuʻega faale-Tusi Paia i aiga?

Uaʻi Atu i Manaʻoga o Tagata

3. Aiseā na lē avea ai le talaaga o Apolo e taofia ai Pisila ma Akula mai le aʻoaʻoina o ia?

³ Na tupuga mai Apolo i Iutaia, ae na soifua aʻe i le aai o Alesania. O Alesania o le laumua lea o Aikupito i na ona pō, o le taulaʻiga o aʻoaʻoga maualuluga, ma sa taʻutaʻua ona o lona faletusi matagofie. E toʻatele le faitau aofaʻi o tagata Iutaia i le aai e aofia ai ma tagata atamamai. O lea, o le faaliliuga o Tusitusiga Paia Eperu e taʻua o le Septuagint sa faia i inā. E lētioa a “poto i Tusi” ia Apolo! O Akula ma Pisila sa fai fale ie. Pe na avea ea le mau upu o Apolo ma māfuaaga e matamumuli ai e fesoasoani atu iā te ia? E leai. Ona o lo la alolofa na la manatu i le tagata, o ona manaʻoga ma le auala e la te fesoasoani ai iā te ia.

4. O fea ma na faapefea ona maua e Apolo le fesoasoani na manaʻomia?

⁴ Po o le ā lava le mau upu o Apolo, ae na ia manaʻomia lava ni faatonuga. O le fesoasoani na ia manaʻomia e lē maua i so o se iunivesite peitaʻi, e maua mai i uso talitonu o le faapotopotoga Kerisiano. E leʻi umi, ae maua loa e Apolo aogā mai ni faamatalaga, ia na atili faasaʻoina ai lona malamalamaga e faatatau i le faatulagaga a le Atua mo le faaolataga. Ua taʻua e faapea: “Ona la [Pisila ma Akula] ave lea iā te ia, ma faamatala atu atili le ala o le Atua iā te ia.”

5. O le ā e mafai ona e faapea mai ai e uiga i le itu faaleagaga o Pisila ma Akula?

⁵ Sa matuā malolosi faaleagaga ia Pisila ma Akula ma mauaa lo la faatuatua. E lē taumatea na ‘saunia pea lava laʻua e tali atu iā i latou uma o ē fesili mai iā i laʻua i le uiga o lo la faamoemoe’ e tusa lava po o se tagata mauʻoa, mativa, atamai po o se pologa. (1 Peteru 3:15) Na mafai e Akula ma lana avā ona “vaevaetonuina le upu moni.” (2 Timoteo 2:15) E manino mai, o i laʻua o ni tagata filigā i le aʻoaʻoina o le Tusi Paia. Na matuā pāʻia le loto o Apolo i aʻoaʻoga e faavae i le ‘afioga a le Atua, lea o loo matuā galue foʻi,’ ma iai se aafiaga i le loto.—Eperu 4:12.

6. E faapefea ona tatou iloa na faagaeetia Apolo ona o le fesoasoani na ia maua?

⁶ Sa faagaeetia Apolo i faaaʻoaʻoga a ona faiaʻoga ma na avea ai o ia o se tasi e sili atu ona lelei i le faia o soo. Sa faaaogā ma le uigā lona malamalamaaga i le galuega o le faalauiloaina atu o le tala lelei, aemaise lava i tagata Iutaia. Sa manuia tele lana galuega i le faatalitonuina o tagata Iutaia e uiga iā Keriso. O le ‘poto i Tusi,’ na mafai ai ona ia faamaonia iā i latou e faapea na tepa taulaʻi atu perofeta anamua i le afio mai o Keriso. (Galuega 18:24) Ua faaopoopo mai le tala e faapea ona alu lea o Apolo i Akaia “ona fesoasoani tele lea o ia i ē na faatuatua ona o le alofa tunoa. Auā ua finau mauaʻi o ia i tagata Iutaia ma le faamalosi i luma o le nuu, ua faasino atu i Tusi, o Iesu o le Keriso lea.”—Galuega 18:27, 28.

Aʻoaʻoina Mai Faaaʻoaʻoga a Isi Faiaʻoga

7. Na faapefea ona avea Pisila ma Akula o ni faiaʻoga lelei?

⁷ Na faapefea ona avea Pisila ma Akula o ni faiaʻoga lelei o le Afioga a le Atua? E ese mai i lo laʻua filigā i suʻesuʻega totino ma le auai i sauniga ae na fesoasoani tele foʻi lo laʻua aumea vavalalata atu iā Paulo. E 18 masina na nofo ai Paulo i le fale o Pisila ma Akula i Korinito. Sa latou galulue faatasi i le faia ma le toe faaleleia o fale ie. (Galuega 18:2, 3) E lē taumatea na matuā loloto ma matagofie  talanoaga faale-Tusi Paia na latou faia. Maʻeu se faalaeiauina ai o i laʻua i lo la itu faaleagaga ona o le auaufaatasi ma Paulo! Ua faapea mai le Faataoto 13:20: “O lē latou te feoaʻi ma tagata popoto, e poto lava ia.” Na iai se aafiaga lelei i a latou masaniga faaleagaga ona o aumea lelei.—1 Korinito 15:33.

8. O le ā na aʻoaʻoina mai e Pisila ma Akula mai le mātauina o le faiva a Paulo?

⁸ Ina ua mātauina e Pisila ma Akula ia Paulo a o talaʻia le Malo, na la iloa ai gaoioiga a se faiaʻoga lelei. Ua faapea mai le tala i le Galuega e uiga iā Paulo “ua lauga foʻi o ia i le sunako [i Korinito] i lea sapati ma lea sapati, ma pulunaunau atu iā Iutaia atoa ma Eleni.” Mulimuli ane, ina ua faatasi mai Sila ma Timoteo iā te ia, “ona tinoū lea o le loto o Paulo, ua taʻutino atu i tagata Iutaia o Iesu o le Keriso lea.” Na mātauina e Pisila ma Akula na faaautū le talaʻiga a Paulo i se isi nofoaga e sili ona lelei, i se fale e lata ane i le sunako, ona sa silafia e Paulo e itiiti sina naunau o sui o le sunako. O i inā na fesoasoani ai Paulo iā Kiripo o “le pule i le sunako,” ina ia avea ma soo. E lē taumatea, na iloa e Pisila ma Akula o le faia o lea tagata ma soo na maua ai āuga lelei i le oganuu ma na fuatele mai ai. Ua faapea mai le tala: “O Kiripo foʻi . . . ua faatuatua i le Alii o ia ma lona aiga uma; e toʻatele foʻi tagata Korinito o ē na faalogo ua faatuatua i latou, ma ua papatisoina.”—Galuega 18:4-8.

9. O le ā le auala na gaoioi ai Pisila ma Akula e tusa ma le faaaʻoaʻoga a Paulo?

⁹ Sa faataʻitaʻia e isi ʻautalaʻi o le Malo ia faaaʻoaʻoga a Paulo i le faiva i le fanua, e pei ona sa faia e Pisila ma Akula. Na timaʻi le aposetolo i isi Kerisiano e faapea: “Ia outou faaaʻoaʻo mai iā te aʻu, pei o aʻu iā Keriso.” (1 Korinito 11:1) Ina ia ōgatusa ma le faaaʻoaʻoga a Paulo, na fesoasoani ai Pisila ma Akula iā Apolo ina ia atili saʻo lona malamalamaaga i aʻoaʻoga faa-Kerisiano. O le faia faapea, na mafai ai e Apolo ona fesoasoani atu i isi. E lē taumatea na fesoasoani Pisila ma Akula i le faia o soo i Roma, Korinito ma Efeso.—Galuega 18:1, 2, 18, 19; Roma 16:3-5.

10. O le ā ua e aʻoaʻoina mai le Galuega mataupu e 18 e fesoasoani ai iā te oe i le galuega o le faia o soo?

¹⁰ O le ā ua tatou aʻoaʻoina mai i lo tatou iloiloina o le Galuega mataupu e 18? E pei lava ona sa faaaʻoaʻo Akula ma Pisila iā Paulo, e mafai foʻi ona faaleleia lo tatou tomai e faia soo e ala i le mulimuli i faaaʻoaʻoga a faiaʻoga lelei o le Afioga a le Atua. E mafai ona auaufaatasi atu iā i latou o ē “tinoū” ma “taʻutino atu” po o le molimau atu i isi. (Galuega 18:5) E tatou te mātauina le auala latou te pāʻia ai loto o tagata i auala atamai e faatalitonuina ai isi. O na tomai e fesoasoani lea iā i tatou i le faia o soo. Pe a tatou suʻesuʻe ma se tasi i le Tusi Paia, e mafai ona tatou fautuaina o ia ina ia valaaulia nisi o lona aiga po o tuaoi i le suʻesuʻega. E mafai foʻi ona tatou fesili atu iā te ia ina ia faailoa mai isi e mafai ona  tatou ofo atu i ai se suʻesuʻega faale-Tusi Paia. —Galuega 18:6-8.

Saʻili ni Auala Ina e Faia ai Soo

11. O fea e mafai ona maua ai soo fou?

¹¹ Sa saʻili Paulo ma le ʻauuso Kerisiano ina ia faia soo e ala i le talaʻiga mai i lea fale i lea fale, i maketi, i femalagaaʻiga ma i so o se mea. Pe e mafai ona faalautele atu lau auaunaga i le fanua i le avea ai o se tagata faigaluega maelega o le Malo o loo saʻili ia faia soo? Pe mafai ona e faaaogāina lelei avanoa uma ina ia saʻili ai i ē ua tatau ai ma talaʻi atu iā i latou? O ā nisi o auala ua maua ai e le ʻautalaʻi o le tala lelei ia soo? Seʻi o tatou iloilo muamua le molimau i le telefoni.

12-14. Ina ia faaalia aogā o le molimau i le telefoni, ia faamatala se mea na tupu iā te oe po o se tasi o mea o taʻua i palakalafa nei.

¹² A o molimau mai i lea fale i lea fale i Pasili, na tuuina atu ai e se Kerisiano o lē o le a tatou faaigoaina iā Maria se savali i se fafine talavou sa nofo i se fale mautotogi. I le faaaogāina o le ulutala o le savali e fai ma faatomuaga, na fesili atu ai Maria e faapea, “Pe e te manaʻo e fia iloa atili e faatatau i le Tusi Paia?” Na tali mai le fafine e faapea: “Ou te fiafia i ai. Ae o le faalavelave o aʻu o se faiaʻoga, ma ou te pisi i le faia o lesona.” Na faamatala atu e Maria e mafai ona la iloiloina ni mataupu o le Tusi Paia i le telefoni. Na tuu e le fafine le numera o lana telefoni iā Maria, ma i le afiafi lava lenā na amata ai le suʻesuʻega i le telefoni e faaaogāina ai le polosiua O le ā e Manaomia e le Atua Mai ia i Tatou? *

¹³ A o molimau atu i telefoni, na teʻi se faifeʻau faataimi atoa i Aitiope ina ua ia talanoa atu i se tamāloa ae faalogo atu o loo vevesi le aiga. Na faapea mai le tamāloa e toe vili atu i se isi taimi. Na toe vili atu i ai, ae faatoese mai le tamāloa e faapea o le taimi muamua lea sa telefoni atu ai, sa la misa ma lana avā. Na faaaogā e le tuafafine lenei faamatalaga e avea o se avanoa, e faasino atu ai i taʻiala atamai o loo aumaia i le Tusi Paia mo le taulimaina o faafitauli faaleaiga. Na ia taʻu atu i le tamāloa e faapea, o le tele o aiga ua mafai ona fesoasoani i ai Le Ala e Maua ai le Fiafia i le Aiga, o se tusi na lomia e Molimau a Ieova. Ina ua mavae ni nai aso talu ona uma ona ave le tusi, ona toe telefoni atu ai lea o le tuafafine i le tamāloa. Na ia faamatala mai e faapea: “Ua faasaoina e lenei tusi laʻu faaipoipoga!” O le mea moni, sa ia faia se talanoaga ma lona aiga ma faamatala atu i ai manatu lelei na ia faitauina mai le tusi. Na amata ai se suʻesuʻega faale-Tusi Paia, ma e leʻi umi ae amata loa ona auai e lē aunoa le tamāloa i sauniga faa-Kerisiano.

¹⁴ Ua faapea mai se tagata talaʻi o le Malo i Tenemaka o lē na amata ona faia se suʻesuʻega faale-Tusi Paia e ala i le molimau i le telefoni: “Na faalaeiau aʻu e le ovasia o le auaunaga ina ia ou auai i le molimau atu i le telefoni. I le amataga, na ou faatalatū ma faapea atu: ‘Ou te lē fiafia i ai.’ Peitaʻi, i se tasi aso  na ou maua ai le loto tele ma amata ona vili le tagata muamua. Na tali mai e Sonia ma ina ua māeʻa se talanoaga puupuu, na ia loto malie e maua atu ni lomiga faale-Tusi Paia. I se tasi afiafi na ma talanoa ai i le mataupu e uiga i le foafoaga, ma sa ia manaʻo ai e faitau i le tusi Life—How Did It Get Here? By Evolution or by Creation? * Na ou fai i ai e manaia pe a ma feiloaʻi ma talanoaina le mataupu. Na ia malie i ai. Na sauni Sonia mo le suʻesuʻega ina ua ou asiasi i ai, ma o loo faia a ma suʻesuʻega i vaiaso taʻitasi talu mai lenā taimi.” Na faaiʻu mai faapea lo tatou tuafafine Kerisiano: “Na ou tatalo i le tele o tausaga mo se suʻesuʻega faale-Tusi Paia, peitaʻi ou te leʻi faatalitalia e maua se suʻesuʻega e ala i le molimau i le telefoni.”

15, 16. O ā mea na tutupu e mafai ona e faamatalaina e faaalia ai le aogā o le mataala i auala eseese e amata ai suʻesuʻega faale-Tusi Paia?

¹⁵ O le toʻatele ua olioli i le taulau manuia talu ai le faatatauina o fautuaga ina ia molimau atu i tagata i so o se mea. I le Iunaite Setete, na paka ai le taavale a se tuafafine Kerisiano i autafa o se taavale laʻu oloa i le mea e paka ai taavale. Ina ua vaai mai le fafine o loo i le taavale laʻu oloa i le tuafafine, ona amata loa lea ona faamatala atu e le tuafafine la tatou galuega tauaʻoaʻoga o le Tusi Paia. Na faalogo le fafine, oso mai i fafo i lana taavale ma savali atu i le taavale a le tuafafine. Na ia faapea atu: “Ua ou fiafia lava ina ua ta talanoa. Ua umi ou te leʻi toe mauaina sa outou lomiga faale-Tusi Paia. Ae lē gata i lea, ua ou toe manaʻo e toe fai saʻu suʻesuʻega. Pe mafai ona fai se ta suʻesuʻega?” Sa faia e lea tuafafine se gaoioiga lelei ina ia talaʻi atu ai le tala lelei.

¹⁶ O se mea na tupu i se tasi tuafafine i le Iunaite Setete ina ua ia asiasi i se falemaʻi mo tagata matutua. Na ia talanoa atu i le pule o lea nofoaga ma taʻu atu i ai e fiafia e fesoasoani i manaʻoga faaleagaga o tagata matutua o loo nonofo i le falemaʻi. Na toe faaopoopo atu le tuafafine e faapea, e fiafia foʻi e faia se suʻesuʻega faale-Tusi Paia e aunoa ma se totogi ma i latou uma o ē fia auai. Na faatagaina o ia e lea pule e asiasi i potu o tagata matutua eseese. E leʻi umi, ae ia faia loa se suʻesuʻega faale-Tusi Paia e faatolu i le vaiaso ma tagata matutua e toʻa 26, o se tasi ua auai e lē aunoa i sauniga.

17. O le ā se faafeiloaʻiga e masani ona lelei tele i le amataina o suʻesuʻega faale-Tusi Paia?

¹⁷ Ua mauaina e nisi o ē faalauiloa le Malo ni iʻuga lelei i le ofoina tuusaʻo o se suʻesuʻega faale-Tusi Paia. I se tasi taeao, na faia ai se taumafaiga faapitoa a se faapotopotoga e 105 tagata talaʻi, ina ia ofo atu se suʻesuʻega faale-Tusi Paia i tagata taʻitoʻatasi latou te feiloaʻi i ai i aiga. E toʻa 86 tagata talaʻi na auai i le auaunaga i le fanua, ma na latou amataina ni suʻesuʻega faale-Tusi Paia fou se 15 ina ua uma le lua itula i le galuega talaʻi.

Saʻilia Pea Ē Tatau Ai

18, 19. O le ā le faatonuga tāua a Iesu e ao ona tatou manatuaina, ma ina ia faataunuuina lenā mea o le ā e ao ona tatou maumauaʻi e fai?

¹⁸ Talu ai o loo e faalauiloa atu le Malo, atonu e te fiafia e faataʻitaʻia fautuaga ua taʻua i lenei mataupu. Peitaʻi, e atamai foʻi ona iloa aganuu a se atunuu pe a e iloilo auala eseese e molimau atu ai. Ae o le laualuga o na mea uma, seʻi o tatou manatua le faatonuga a Iesu  ina ia saʻilia i latou e tatau ai ma fesoasoani iā i latou na, ia avea ma soo.—Mataio 10:11; 28:19.

¹⁹ Ina ia taulau lenā fuafuaga, e ao ona tatou “vaevaetonuina le upu moni.” E mafai ona tatou faia faapea e ala i le faaaogāina o faamatalaga e faatalitonu ai isi ua faavae i le Tusi Paia. O le a fesoasoani lea auala iā i tatou e pāʻia ai loto o ē fiafia mai ma uunaʻia ai i latou e gaoioi. E mafai ona fai so tatou sao i le fesoasoani i isi ina ia avea ma soo o Iesu Keriso, a o tatou tatalo ma faalagolago atu iā Ieova. Maʻeu le tauia o lenei galuega! O lea, seʻi o tatou ‘taumafai ina ia avea i tatou ma ē ua fiafia mai i ai le Atua,’ o ē faalauiloa le Malo ma faamamaluina Ieova, ma o ē e talaʻi faatasi ma le faamoemoe o le faia o soo.—2 Timoteo 2:15.

[Faamatalaga pito i lalo]

Pe E te Manatua?

• Aiseā na manaʻomia ai ona faamatala atili atu iā Apolo le ala o le Atua?

• I ā auala na faaaʻoaʻo ai Pisila ma Akula iā Paulo?

• O le ā ua e aʻoaʻoina mai le Galuega mataupu e 18 e faatatau i le galuega o le faia o soo?

• E faapefea ona e saʻilia avanoa e faia ai soo?

[Fesili mo le Suʻesuʻega]

[Ata i le itulau 18]

Sa “faamatala atili atu le ala o le Atua” e Pisila ma Akula iā Apolo

[Ata i le itulau 20]

Na oo ina atamai Apolo i le faia o soo

[Ata i le itulau 21]

Na talaʻi Paulo i so o se mea na ia alu i ai

[Ata i le itulau 23]

Ia saʻili avanoa e talaʻi atu ai