Ia Fai Ieova ma Ou Faatuatuaga

“O oe lava o loʻu faamoemoega, le Alii e Ieova, o loʻu faatuatuaga oe talu ina ou tama itiiti.”—SALAMO 71:5.

1. O le ā le luʻi na fesagaʻi ma le tama talavou leoleo mamoe o Tavita?

E SILI atu i le iva futu le maualuga o Koliata. E lētioa lava a palaaai fitafita uma o Isaraelu e tau ma lenā tagata! I taeao ma afiafi o aso taʻitasi mo le tele o vaiaso, na fāifai ai e lenei tagata Filisitia tinoese le itu taua a Isaraelu, ma luʻia i latou e auina atu se toa malosi la te tau. Na oo ina maua le tagata o le a faafetaiaʻia le luʻi, peitaʻi e lē o se toa malosi, ae o se tama talavou. Na matuā faatauvaa le tino o le tama talavou leoleo mamoe o Tavita, pe a fua i le maualuga o le tagata o le a la fetaiaʻi. O le mea moni, atonu na sili atu foʻi le mamafa o ofutau ma auupega a Koliata na i lo Tavita! Ae ui i lea, na faafetaiaʻia pea e lenei tama talavou le tagata tinoese, ma faapea ona lauiloa ai ma le lē mafaagaloina o ia o se alii loto tele.—1 Samuelu 17:1-51.

2, 3. (a) Aiseā na mafai ai e Tavita ona faafetaiaʻia ma le lē fefe Koliata? (e) O ā auala e lua o le a tatou talanoaina, e tatau ona faatino ina ia fai ai Ieova ma o tatou faatuatuaga?

² Aiseā na loto tele ai Tavita? Seʻi manatu i upu na tusi e Tavita i tausaga mulimuli ane ai: “O oe lava o loʻu faamoemoega, le Alii e Ieova, o loʻu faatuatuaga oe talu ina ou tama itiiti.” (Salamo 71:5) Ioe, talu ina o tama itiiti Tavita, na tuu atoatoa lona faatuatuaga iā Ieova. Na faapea atu o ia a o fetaiaʻi ma Koliata: “Ua e sau iā te aʻu ma le pelu, ma le tao, ma le tao leoleo; a o aʻu, ou te alu atu iā te oe i le suafa o Ieova o ʻau, o le Atua o le itu taua a Isaraelu ua e fāifai i ai.” (1 Samuelu 17:45) Na tuu le faatuatuaga o Koliata i le tele o lona malosi ma ana auupega, ae na fai Ieova ma faatuatuaga o Tavita. Ona na ʻau le Alii Silisili Ese i le aoao o mea i lana itu, aiseā la o le a fefe ai fua Tavita i lenei tagata faatauvaa, e ui i lona maualuga ma le lelei o ana auupega?

³ A o e faitau i le tala iā Tavita, pe e te taumanatu ea e faapea, maʻimau e pe ana malosi foʻi  lou faatuatuaga iā Ieova? E lē taumatea e toʻatele i tatou e manatu faapena. Seʻi o tatou iloiloina la ni auala se lua e mafai ona tatou faatinoina ina ia fai ai Ieova ma o tatou faatuatuaga. Muamua, e moomia ona tatou iloa ma puleaina se faafitauli masani e faalavelavea ai lo tatou faatuatuaina o Ieova. Lua, e moomia ona tatou iloa po o ā mea e aofia ai i le faatuatuaina o Ieova.

Foʻia o se Faafitauli Taatele i le Avea o Ieova ma o Tatou Faatuatuaga

4, 5. Aiseā e faigatā ai i le toʻatele o tagata ona avea le Atua ma o latou faatuatuaga?

⁴ O le ā ua taofia ai tagata mai le avea o le Atua ma o latou faatuatuaga? E masani lava ona lē mautonu tagata i le pogai ua tutupu ai mea leaga. Ua aʻoaʻoina le toʻatele o tagata e faapea e tuuaʻia le Atua i mafatiaga. A tupu se faalavelave, atonu e fai mai faifeʻau ua “amia” e le Atua ē ua maliliu ai e latou te faatasi i le lagi. E lē gata i lea, e aʻoaʻo atu e le tele o taʻitaʻi lotu le manatu e faapea ua tuupōina e le Atua so o se mea e tulaʻi mai—e aofia ai faalavelave taʻitasi ma mea leaga uma—o loo tutupu i le lalolagi nei. E faigatā ona tuu lo tatou faatuatuaga i se Atua pe afai e lē alofa faapena. O loo faatauasoina e Satani mafaufau o tagata lē talitonu, ma o loo vilivilitaʻi ina ia salalau atu “aʻoaʻoga [uma] a temoni.”—1 Timoteo 4:1; 2 Korinito 4:4.

⁵ E manaʻo Satani ina ia aua neʻi fai Ieova ma o tatou faatuatuaga. E lē manaʻo le fili o le Atua ina ia tatou iloa le pogai moni o mafatiaga o tagata. Pe afai ua uma ona tatou aʻoaʻoina māfuaaga faale-Tusi Paia ua ala ai ona iai mafatiaga, e manaʻo la Satani ina ia galo iā i tatou. O lea la, e lelei pe a tatou iloiloina mai lea taimi i lea taimi, pogai e tolu ua ala ai ona iai mafatiaga i le lalolagi. O le faia faapea, ua tatou faamautinoa ai i o tatou loto e lē tuuaʻia Ieova i faafitauli ua tatou fesagaʻia i le olaga.—Filipi 1:9, 10.

6. O le ā se tasi o māfuaaga o loo taʻua i le 1 Peteru 5:8 ua ala ai ona mafatia tagata?

⁶ O se tasi o māfuaaga ua ala ai ona mafatia tagata, ona e manaʻo Satani e lepetia le faamaoni o auauna maelega a Ieova. Na taumafai Satani e lepetia le faamaoni o Iopu. E leʻi taulau ana taumafaiga ae e leʻi faavaivai ai foʻi. Ona o le alii o lenei lalolagi, ua saʻili ai o ia e “ʻaina” pe faatamaʻia auauna faamaoni a Ieova. (1 Peteru 5:8) E aofia ai foʻi ma i tatou taʻitoʻatasi! E manaʻo Satani e taofia la tatou auauna atu iā Ieova! O le māfuaaga lenā ua ia faapogaia ai sauāga. E ui lava e matuitui sauāga, ae e anoanoaʻi māfuaaga e ao ai ona tatou onosai pea. Pe a tatou onosai, ua tatou saosaolaumea ai i le faamaonia o le pepelo o Satani ma faafiafiaina ai Ieova. (Iopu 2:4; Faataoto 27:11) A o faamalosiau mai Ieova iā i tatou ina ia onosai i sauāga, ua atili ai ona avea o ia ma o tatou faatuatuaga.—Salamo 9:9, 10.

7. O le ā ua tatou iloa mai le Kalatia 6:7, e tusa ai ma le māfuaaga o mafatiaga?

⁷ O le māfuaaga lona lua o mafatiaga, o loo maua i le mataupu silisili lenei: “O le mea e lūlūina e le tagata, o le mea lava lea e seleseleina mai ai e ia.” (Kalatia 6:7) I nisi taimi, e lūlū tagata e ala i le faia o filifiliga leaga ma latou selesele ai ni iʻuga e mafatia ai. Atonu latou te filifili e ave ma le lē mafaufau taavale ma iʻu ai i se faalavelave. O le toʻatele o tagata e filifili e taumafa tapaa, e oo ina maua ai i le maʻi fatu po o le kanesa. O ē e filifili e faia feusuaʻiga lē mamā e mafai ona mafatia ona e ono faaleagaina ai a latou faiā faaleaiga, e leaga ai faalogona, e mafai ona maua ai i faamaʻi pipisi ona o feusuaʻiga po o se maʻitaga foʻi e leʻi faatalitalia. E ono tuuaʻia e tagata le Atua mo na mafatiaga, peitaʻi e tuuaʻia i latou lava ona o le leaga o a latou filifiliga.—Faataoto 19:3.

8. E pei ona taʻua i le Failauga 9:11, aiseā ua mafatia ai tagata?

⁸ O le māfuaaga lona tolu mo mafatiaga, o loo taʻua i le Failauga 9:11: “Ua ou toe iloa foʻi i lalo o le lā, ua lē sini i le tausinioga ē ua tele vavave, ua lē mālō i le taua ē ua malosi, ua lē i ai foʻi i ē ua popoto le mea e ʻai, ua lē i ai i ē ua faautauta le oloa tele, ua lē i ai foʻi i ē ua atamamai le alofaina mai; a o le tausaga ma le mea e tupu ai e oo iā te i latou uma.” I nisi taimi, ona ua pau lava o loo iai tagata i se mea ma ua faafuaseʻi ai ona tupu se faalavelave. E ui lava i mea tatou te lelei ai pe vaivai ai foʻi, ae e ono oo mai faafuaseʻi mafatiaga ma le oti i so o se tasi o i tatou ma i so o se taimi foʻi. O se faaaʻoaʻoga, a o soifua Iesu, na solo ai se olo i Ierusalema ma maliliu ai  tagata e toʻa 18. Na faapea atu Iesu e leʻi faasalaina e le Atua na tagata mo ni agasala na latou faia muamua. (Luka 13:4) E lē tuuaʻia Ieova mo na mafatiaga.

9. O le ā ua lē malamalama i ai le toʻatele e uiga i mafatiaga?

⁹ E tāua le malamalama i nisi o pogai ua ala ai ona mafatia tagata. Peitaʻi, e iai se manatu e faigatā ona malamalama i ai le toʻatele. O le manatu lenei: Aiseā ua faataga ai e Ieova le Atua mafatiaga?

Aiseā ua Faataga ai e Ieova Mafatiaga?

10, 11. (a) E tusa ai ma le Roma 8:19-22, o le ā ua tupu i “mea uma lava na faia”? (e) E faapefea ona tatou iloa, po o ai na faatoʻilaloina mea uma na faia i le iʻu vale?

¹⁰ Tatou te maua se faamalamalamaga i lenei mataupu tāua, i le tusi a le aposetolo o Paulo i Kerisiano i Roma. Na tusi o ia e faapea: “O loo faatalitali mea uma na faia ma le naunau i le faaalia mai o atalii o le Atua. Auā ua faatoʻilaloina mea uma na faia i le iʻu vale, (e lē o lona loto lea, a e peitaʻi ona o ia na na faatoʻilaloina ai,) ma le faamoemoe ia tuusaunoa ia lava mea na faia ia lē faapologaina e le iʻu vale, a e oo i le saʻolotoga o le fanau a le Atua e manuia ai. Auā ua tatou iloa, ua oi faatasi, ma oono faatasi mea uma lava na faia, ua oo mai lava i ona pō nei.”—Roma 8:19-22.

¹¹ Ina ia malamalama i nei fuaiupu, e moomia ona tali muamua ni fesili tāua. O se faaaʻoaʻoga, O ai na faatoʻilaloina mea uma na faia i le iʻu vale? Ua fai mai isi o Satani; ae ua fai mai isi o Atamu. Peitaʻi, e lē mafai e Satani po o Atamu ona faatoʻilaloina mea i le iʻu vale. Aiseā? Auā o le auala e faatoʻilaloina ai mea uma na faia i le iʻu vale, o “le faamoemoe.” Ioe, ua folasia mai e lē ua faia le faatoʻilaloina, le faamoemoe mo tagata faamaoni ina ia mulimuli ane “tuusaunoa . . . ia lē faapologaina e le iʻu vale.” E lē mafai e Atamu po o Satani ona aumaia se faamoemoe faapena. E na o Ieova lava e mafai. Ua manino la, o ia foʻi lenā na faatoʻilaloina mea uma na faia i le iʻu vale.

12. O le ā se manatu fenumiaʻi ua iai e faatatau i “mea uma lava na faia,” ma o le ā le tali saʻo?

¹² O le ā ua faasino i ai le faaupuga “mea uma lava na faia”? Ua fai mai isi tagata o “mea uma lava na faia” ua faasino atu i foafoaga uma i le lalolagi e aofia ai manu ma laau. Ae faamata e mafai ona faamoemoe manu ma laau e maua “le saʻolotoga o le fanau a le Atua e manuia ai”? E leai. (2 Peteru 2:12) O lea la, na o tagata ua faasino atu i ai le faaupuga “mea uma lava na faia.” O i latou na ua aafia i le agasala ma le oti ona o le fouvalega i Etena ma o loo matuā moomia se faamoemoe.—Roma 5:12.

13. O ā āuga ua oo i tagata ona o le fouvalega i Etena?

¹³ O ā āuga ua oo i tagata ona o lenā fouvalega? Na faamatalaina e Paulo āuga i upu nei:  iʻu vale. * E tusa ai ma se tasi tusi, o nei upu o loo faamatala ai “le iʻu vale o se mea ua lē taunuu le fuafuaga na ala ai ona faia.” Na faia tagata ina ia ola e faavavau, e galulue faatasi o se ʻauaiga lelei atoatoa e autasi ma tausia le parataiso i le lalolagi. Na i lo lea, e saasaa lo latou soifua ma ua tumu i tigā ma toʻatugā. E pei ona taʻua e Iopu, “o le tagata ua fanau mai i le fafine, ua saasaa ona aso, mona ua tumu i le atuatuvale.” (Iopu 14:1) Ioe, o se tulaga iʻu vale!

14, 15. (a) O le ā le faamaoniga o le faamasinotonu o Ieova i le faasalaina o tagata? (e) Aiseā na faapea mai ai Paulo e lē o le “loto” o mea na faia na māfua ai ona faatoʻilaloina?

¹⁴ Seʻi o tatou talanoa la i le fesili tāua lenei: Aiseā na faatoʻilalo ai e “lē na te faamasinoina le lalolagi uma,” tagata ina ia ola i ni olaga e tigā ma tumu i faanoanoaga? (Kenese 18:25) Pe e tonu lana faaiʻuga na fai? Ia manatua le mea na faia e o tatou uluaʻi mātua. Ina ua la fouvale faasaga i le Atua, na la ʻau atu ai iā Satani lea na luʻia le pule silisili ese a Ieova. E ala i a la gaoioiga, na la lagolagoina ai le manatu e faapea, e taulau manuia tagata e aunoa ma le taʻitaʻiga a Ieova pe a pule i latou iā i latou lava, i lalo o le taʻitaʻiga a se foafoaga agaga fouvale. Ina ua faasalaina le ʻaufouvale, na tuu atu ai e Ieova le mea na la mananaʻo i ai. Na Ia faatagaina tagata e pule i latou iā i latou lava i lalo o le taʻitaʻiga a Satani. O lea la, na matuā tonu lava le faaiʻuga ina ia faatoʻilaloina tagata i le iʻu vale faatasi ai ma le faamoemoe!

¹⁵ O le mea moni, e lē o le “loto” lenā o mea na faia. Ua tatou fananau mai ua avea i tatou ma pologa i le agasala ma le iʻu vale e aunoa ma sa tatou filifiliga i lenā tulaga. Ae ona o le alofa mutimutivale o Ieova, na ia faatagaina ai Atamu ma Eva e faaauau ona ola ma fai a la fanau. E ui lava ua faatoʻilaloina i tatou i le iʻu vale o le agasala ma le oti ona ua tatou tupuga mai iā i laʻua, ae ua iā i tatou le avanoa e fai ai le mea lea e leʻi faia e Atamu ma Eva. E mafai ona tatou faalogo iā Ieova ma tatou iloa ai le tonu ma le lelei atoatoa o lana pule silisili ese, a o pulega a tagata e aunoa ma le taʻitaʻiga a Ieova e oo ai i mafatiaga, le atuatuvale ma le iʻu vale. (Ieremia 10:23; Faaaliga 4:11) Ua atili foʻi ona leaga le tulaga o mea ona o taaʻiga a Satani. Ua faamaonia le moni o na manatu i le talafaasolopito o tagata.—Failauga 8:9.

16. (a) Aiseā tatou te mautinoa ai e lē tuuaʻia Ieova i mafatiaga o tatou vaaia i le lalolagi i aso nei? (e) O le ā le faamoemoe ua saunia ma le alofa e Ieova mo tagata faamaoni?

¹⁶ E manino la, na tonu ma talafeagai le faatoʻilaloina e Ieova o tagata i le iʻu vale. Po o lona uiga la, o Ieova e faapogaia faiga iʻu vale ma mafatiaga lea ua tatou pagatia ai i aso nei? Seʻi manatu foʻi i se alii faamasino e na te tuuina atu se faasalaga tonu i se pagota. Atonu e matuā puapuagatia le pagota a o tuli lana faasalaga, ae faamata e saʻo pe a tuuaʻia e lenei pagota le alii faamasino mo le pogai o ona mafatiaga? E mautinoa lava e leai! E lē gata i lea, e lē mafai ona faapogaia e Ieova le amioleaga. Ua faapea mai le Iakopo 1:13: “E lē mafai ona faaosoosoina o le Atua i mea leaga, e lē faaosooso atu foʻi o ia i se tasi.” Ia tatou manatua foʻi, na tuuina atu e Ieova lenā faasalaga ma “le faamoemoe.” Ua faia ma le alofa e Ieova sauniuniga ina ia mafai ai e tagata faamaoni e tupuga mai iā Atamu ma Eva, ona vāai i le mutaaga o faiga iʻu vale ma olioli ai “i le saʻolotoga o le fanau a le Atua e manuia ai.” O le a lē toe popole tagata faamaoni e oo i le faavavau, i le toe paʻūʻū atu o mea uma na faia i se tulaga pagatia o le iʻu vale. O le tonu o le auala ua tauaaoina ai e Ieova le tulaga o mea, ua matuā faamausalī ai le saʻo o lana pule silisili ese.—Isaia 25:8.

17. O ā aafiaga e ao ona oo iā i tatou pe a tatou toe autaluina pogai o mafatiaga ua iai i le lalolagi i aso nei?

¹⁷ A o tatou autaluina pogai o mafatiaga o tagata, pe e talafeagai ona tatou tuuaʻia Ieova ona o le amioleaga, po o le faavaivaia ai foʻi o lo tatou faatuatuaina o ia? E leai, auā o lenei suʻesuʻega ua tatou ioe ai i le moni o upu a Mose e faapea: “O le Papa, e sao lava lana galuega; auā e tonu ona ala uma lava; o le Atua faamaoni, e lē o  iā te ia se amiolētonu, o le amiotonu ma le amio saʻo lava ia.” (Teuteronome 32:4) A o tatou mafaufau loloto i manatu nei, ia fai ma toe iloilo mai lea taimi i lea taimi, lo tatou iloa e uiga i nei manatu. O le faia faapea, o le a mafai ai ona tatou teena taumafaiga a Satani ina ia faapogaia lo tatou masalosalo, pe a tatou fetaiaʻi ma puapuaga. Ae faapefea le auala lona lua lea na taʻua i le amataga o le suʻesuʻega? O le ā e aofia ai i le faatuatuaina o Ieova?

Le Uiga o le Faatuatuaina o Ieova

18, 19. O ā faaupuga o faaaogā e le Tusi Paia e faalaeiau ai i tatou ina ia faatuatua iā Ieova, peitaʻi o ā taofi lē saʻo o isi tagata?

¹⁸ Ua timaʻi mai le Afioga a le Atua: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” (Faataoto 3:5, 6) Ioe, o ni faaupuga matagofie e faamalosiau ai. E mautinoa e leai lava se isi i le aoao o mea, e sili atu ona maufaatuatuaina na i lo o lo tatou Tamā pele i le lagi. E ui i lea, e faigofie ona faitau i upu o i le tusi o Faataoto, ae atonu e faigatā le faatinoga.

¹⁹ O le toʻatele o tagata e lē o saʻo lo latou taofi e uiga i le faatuatuaina o Ieova. Ua manatu nisi, o le faatuatuaina o Ieova ua na o se lagona fiafia pe toʻafimālie e masani ona alu aʻe i le loto. E foliga mai e talitonu isi e faapea, o le faatuatuaina o le Atua o lona uiga e mafai ona tatou faatalitali e puipuia i tatou e le Atua mai so o se toʻatugā, ia aumaia se mapusaga i o tatou faafitauli uma, ma na te foʻiaina luʻi tatou te fesagaʻia i aso faisoo e tusa ma lo tatou manaʻo—i le taimi lava lenā! Peitaʻi, e lē moni manatu na. O le faatuatuaina o se tasi, e sili atu i se lagona masani ma e aofia ai le iloa lelei o le tulaga moni o se mea. I tagata matutua, o le faatuatuaina o se tasi e aofia ai le faia o faaiʻuga ua uma ona mafaufau lelei ma fefulifulisaʻi ai.

20, 21. O le ā e aofia ai i le faatuatuaina o Ieova? Ia faataʻitaʻi.

²⁰ Seʻi toe tagaʻi foʻi i le Faataoto 3:5. O loo faaeseese mai ai le faatuatua iā Ieova ma le faalagolago i o tatou lava atamai, o loo fautua mai e lē mafai ona tatou faatinoina mea na e lua i le taimi e tasi. Po o lona uiga la, e lē mafai ona tatou faaaogāina o tatou lava atamai e mafaufau ai? E leai, auā foʻi na foaʻi mai e Ieova lenā atamai e mafaufau ai, ma e finagalo o ia ina ia tatou faaaogāina lenā atamai e auauna ai iā te ia. (Roma 12:1) Ae o le ā tatou te faalagolago i ai pe a faia a tatou filifiliga? Pe a faapea e lē o ōgatusa o o tatou mafaufauga ma le finagalo o Ieova, faamata tatou taliaina le atamai o Ieova lea e sili atu ona maualuga na i lo i tatou? (Isaia 55:8, 9) O le faatuatuaina o Ieova o lona uiga, e taʻitaʻia e Ieova o tatou mafaufauga.

²¹ O se faataʻitaʻiga: Seʻi manatu i se tamaitiiti o nofo i le nofoa i tua o se taavale, a o ona mātua o loo i le pito i luma. O loo ave e lona tamā le taavale. A faapea e tulaʻi mai se faafitauli a o alu le malaga—po o saʻo le auala e ui ai, po o faalētonu le tau po o le tulaga o le auala—o ā uiga o le a faaalia e le tamaitiiti usiusitai lea na te faatuatuaina ona mātua? Pe na te faatonuina lona tamā e tusa ai ma le auala e ave ai le taavale? Faamata e masalosalo i faaiʻuga a ona mātua pe faatautee atu foʻi pe a fai i ai ona mātua e faamau pea lona fusipaʻu? E leai, e masani lava ona faatuatuaina e le tamaitiiti ona mātua i le auala e feagai ai ma faafitauli, e ui e lē lelei atoatoa i laʻua. E lelei atoatoa lo tatou Tamā o Ieova. E tatau la ona tatou faatuatuaina atoatoa o ia, aemaise pe a tatou fesagaʻi ma tulaga faigatā!—Isaia 30:21.

22, 23. (a) Aiseā e ao ai ona tatou faatuatuaina Ieova pe a fesagaʻi ma faafitauli, ma e faapefea ona tatou faia lenā mea? (e) O le ā o le a talanoaina i le mataupu o sosoo mai?

 ²² Peitaʻi, ua faapea mai le Faataoto 3:6 e ao ona tatou ‘manatua Ieova i o tatou ala uma,’ ae e lē na o taimi tatou te fesagaʻi ai ma tulaga faigatā. O lea la, o filifiliga tatou te faia i aso faisoo i le olaga, e ao ona faaalia ai lo tatou faatuatuaina o Ieova. Afai e tulaʻi mai ni faafitauli, e lē tatau ona tatou lotovaivai ai ma popolevale pe teena foʻi le taʻitaʻiga a Ieova e tusa ai ma le auala sili e feagai ai ma faafitauli. E ao ona tatou vaai i puapuaga o avanoa na tatou te lagolagoina ai le pule silisili ese a Ieova, e fesoasoani e faamaonia ai le pepelo o Satani ma ia atiina aʻe ai le usiusitai ma isi uiga e fiafia i ai Ieova.—Eperu 5:7, 8.

²³ E mafai ona faaalia lo tatou faatuatuaina o Ieova po o ā lava toʻatugā tatou te fetaiaʻi. Tatou te faaalia lenā faatuatua e ala iā tatou tatalo ma le auala tatou te saʻili ai i le Afioga a Ieova ma lana faalapotopotoga mo taʻiala. Peitaʻi, o ā auala patino e faaalia ai tatou te faatuatuaina Ieova pe a fesagaʻi ma faafitauli e tulaʻi mai i le lalolagi i aso nei? O le a tatou talanoaina le fesili lenā i le mataupu o sosoo mai.

[Faamatalaga pito i lalo]

E Faapefea Ona E Tali?

• E faapefea ona faaalia e Tavita na fai Ieova ma ona faatuatuaga?

• O ā pogai e tolu o mafatiaga o tagata i aso nei, ma aiseā e lelei ai ona autalu na manatu mai i lea taimi i lea taimi?

• O le ā le faasalaga na faia e Ieova i tagata, ma aiseā na tonu ai lenā faasalaga?

• O le ā e aofia ai i le faatuatuaina o Ieova?

[Fesili mo le Suʻesuʻega]

[Ata i le itulau 8]

Na fai Ieova ma faatuatuaga o Tavita

[Ata i le itulau 10]

Na faaalia e Iesu e faapea e lē tuuaʻia Ieova ina ua solo se olo i Ierusalema