Lipoti a Ē Faalauiloa le Malo

Iʻuga Fiafia Ona o le Onosai ma le Finafinau

NA VALOIA e Iesu o le a “maalili foʻi le alofa o le toʻatele o tagata” i ona aso e gata ai. Ona o lea, ua lē ano ai le toʻatele o tagata i le tala lelei o le Malo i le tele o atunuu o le lalolagi i aso nei. Ua feitai foʻi isi tagata i lotu.—Mataio 24:12, 14.

E ui i lenā tulaga, ae o loo taulau taumafaiga a tagata talaʻi o le Malo e tusa ai o lenā luʻi, ona o lo latou faatuatua ma le onosai e pei ona faaalia mai i se mea na tupu i le Malo o Czech.

Na talanoa atu ni Molimau a Ieova se toʻalua i se tinā e ui na te leʻi tatalaina le faitotoʻa o lona fale. A o faaauau le talanoaga, na tatala faavaiti e le tinā le faitotoʻa ma seʻi atu mekasini o le Olomatamata ma le Ala Mai! lea o loo ofoina e le ʻautalaʻi. Na faafetai atu i ai le tinā ma tapuni loa le faitotoʻa. Na taumānatu le ʻautalaʻi pe la te toe foʻi e asia lenei tinā. Na fai le tonu a se tasi o i laʻua lea o se paeonia po o se faifeʻau faataimi atoa, e toe foʻi e asi le tinā peitaʻi, na toe tupu le mea lava lea na muamua tupu, ma na faaauau pea lea tulaga mo le tausaga atoa.

Na filifili le paeonia e sui le auala e talanoa atu ai ma faapea ona tatalo ai iā Ieova. O le isi taimi na ofoina ai e le paeonia ia mekasini i le tinā, na faaalia ai e le paeonia uiga faaleuō ma fesili atu i ai: “O ā mai oe? Na e fiafia e faitau i mekasini?” E leai se tali a le tinā i le taimi muamua, peitaʻi ina ua asiasi pea i ai, na amata ona suia ona uiga. I se tasi aso, na tatala faava tele ai e le tinā le faitotoʻa ae na puupuu la laʻua talanoaga.

Ona o le musuā o le tinā e talanoa i le faitotoʻa, na fai ai le tonu a le paeonia e tusi sana tusi i le tinā ma faamatala i ai le māfuaaga o ana asiasiga ma le auala e fai ai se suʻesuʻega faale-Tusi Paia e aunoa ma se totogi. Ona o lona onosai pea, na mafai ai ona amata e le paeonia se suʻesuʻega faale-Tusi Paia ma le tinā, ina ua mavae le tausaga ma le ʻafa o asia pea o ia. Na faalaeiauina le paeonia ina ua fai i ai e le tinā se tala na te leʻi faatalitalia e faapea: “O le taimi lava na e sau ai ma mekasini, o le taimi foʻi lenā na ou talitonu ai i le Atua.”

O le mea moni, o le onosai ma le finafinau, e maua ai ni iʻuga fiafia i le galuega talaʻi o le Malo ma le faia o soo.—Mataio 28:19, 20.