Lipoti a Ē e Faalauiloa le Malo

Fesoasoani Ina ia Faatumauina le Paia o le Toto

I LE lalolagi atoa ua faaalia ai e auauna a Ieova lo latou faamaoni i le Atua i le faapaiaina o le toto. (Galuega 15:28, 29) Ua saunia e le vasega o le auauna faamaoni ma le mafaufau se fesoasoani mo le ʻauuso Kerisiano. (Mataio 24:45-47) Seʻi o tatou tilofaʻia la po o a iʻuga na maua mai i Filipaina.

Ua lipotia mai e le lālā i Filipaina e faapea: “I le 1990 na faailoa mai ai iā i matou o le a iai ni sui mai le lālā i Brooklyn o le a faimalaga mai e faia se seminā i inei i Filipaina. Sa valaaulia uso uma mai lālā eseese i Asia e aofia ai Korea, Taiwan ma Hong Kong. O le fuafuaga, ina ia fesoasoani i le faavaeina o se Auaunaga o Faamatalaga Faafomaʻi i a latou lālā ma faatulaga ai se Komiti o Fesootaʻiga Faafomaʻi. I Filipaina, na faavaeina muamua ai lava ni Komiti o Fesootaʻiga Faafomaʻi i ni aai autu se fā. E faia e sui o lenei Komiti ni taumafaiga e faafesootaʻi ai fomaʻi e lotomalilie e galulue faatasi ma i tatou, e tusa ai ma le faatulagaga faa-Kerisiano e faatatau i le toto. E latou te fesoasoani foʻi i uso pe a tulaʻi mai ni faafitauli e aofia ai le toto.

Sa filifilia Remegio e auauna i le Komiti o Fesootaʻiga Faafomaʻi i Baguio. A o faagasolo taimi, sa amata ai ona mātauina e fomaʻi lenei auaunaga. Sa manatuaina e Remegio se tasi o mea na tupu ina ua faia se fono a ni fomaʻi ma le Komiti o Fesootaʻiga Faafomaʻi, i le fia silafiaina o le auala e taulimaina ai gasegase Molimau e aunoa ma le faaaogāina o le toto. Ua ia faapea mai: “Sa amata ona fesili mai fomaʻi, sa ou lagona le tautoʻai ona sa faigatā tele fesili sa latou fesili mai ai.” Sa ia tatalo iā Ieova mo se fesoasoani e taulimaina ai lenei luʻi. Ua faaauau mai Remegio e faapea: “Ina ua uma fesili taʻitasi, sa sii i luga aao o isi fomaʻi ma latou faamatala mai le auala na latou foʻia ai lea lava tulaga e tasi.” Sa faaalia e Remegio le fiafia mo le fesoasoani, aemaise lava ona o lea sa faia le felafolafoaʻiga o fesili ma tali mo le lua itula.

E 21 le aofaʻi o komiti o loo iai i le taimi nei i le atunuu atoa, faatasi ai ma le aofaʻi o uso e 77 o loo auauna i nei komiti. Ua faapea mai se Molimau e fomaʻi tau i le soifua mālōlōina e suafa iā Danilo: “E mautinoa lelei e fomaʻi e faapea o a latou maʻi Molimau o loo lagolagoina e se faalapotopotoga e alolofa tele iā i latou. Sa iai se fomaʻi na ia faaalia le lē manaʻo e faia se taotoga a se uso pe a le tuiina le toto. Peitaʻi sa tumau pea lenei uso. Sa faia le taotoga ma sa taulau manuia. Ua lipotia mai e le Auaunaga o Faamatalaga Faafomaʻi e faapea: “Sa matuā maofa le fomaʻi i le vave ona toe malosi o le uso. Ua ia faapea mai: ‘E tusa ai ma lenei mea sa tupu, a iai se isi o lo outou vaega e manaʻomia lenei ituaiga o taotoga e lē faaaogāina ai le toto, ou te matuā lotomalie e faia le taotoga.’”