Ua Avea le Talaʻiga o se Galuega Mataʻina

“Ua susulu malosi mai le lā. E foliga mai e lē gata le auala maugā. Ina ua foʻia le tele o toʻatugā, na matou taunuu i lo matou sini: o se nuu maotua lava. Na liua le vaivai i le olioli ina ua tali leleia i matou i le fale muamua na matou tuʻituʻi atu i ai. E uma ane le aso, ua matou ofoina lomiga uma sa matou aumai ma ua amata ni suʻesuʻega faale-Tusi Paia. Na faaalia le naunau o tagata e faalogo. Ae ui i lea, ua oo i le taimi e tatau ona matou tuua ai i latou, ma na folafola atu o le a matou toe foʻi mai.”

O MEA na e masani ona tutupu i se vaega o faifeʻau paeonia i Mekisikō. Na naunau i latou nei e faia se sao maelega i le faataunuuga o le faatonuga a Iesu Keriso i ona soo e faapea: “E fai foʻi outou ma molimau iā te aʻu . . . e oo lava i tuluʻiga uma o le lalolagi.” (Galuega 1:8) I Mekisikō, sa faatulaga ai se tauiviga faapitoa mo le talaʻiga e taʻua o ni malaga faapaeonia, ina ia mafai ona oo atu i oganuu e leʻi tofiaina i se faapotopotoga ma e seāseā mauaina le tala lelei o le Malo le Atua. E masani lava, o nei oganuu e mamao ma e faigatā ona oo i ai. E mafai foʻi ona avatu le fesoasoani i faapotopotoga o loo tumamao ese o loo telē la latou oganuu o loo talaʻia.

Ina ia filifili po o fea vaipanoa o le atunuu o le a galueaʻiina e nei malaga faapaeonia, e iloilo e le ofisa o le lālā a Molimau a Ieova manaʻoga o le oganuu. * Pe a māeʻa ona faia lenā mea, ona tofia loa lea o vaega o paeonia faapito latou te galueaʻiina le oganuu. E saunia taavale e talafeagai lelei ma auala gaoā ma omoomo. E faaaogā na taavale e fai ma potu e teu ai lomiga ma momoe ai foʻi pe a talafeagai.

Tali Fiafia Atu

Iā Oketopa 1996, na faalautele atu ai le valaaulia i isi tagata talaʻi o le tala lelei, ina ia faia se sao i lenei gaioioiga faatasi ma paeonia faapito. O tagata talaʻi o le Malo aemaise foʻi paeonia sauatoa o ē na lotomalilie e auauna i le mea o loo tele ai le manaʻoga, sa auai i le tauiviga i vala eseese. O nisi na tofia i faapotopotoga o loo latalata ane ina ia mafai ona tausia le oganuu ma atiina aʻe le naunau o tagata na maua i le talaʻiga. Sa taliaina e le toʻatele o tagata talaʻi talavou ma paeonia lenei valaaulia ma na faaʻoaina ai i latou i mea na tutupu e faalaeiauina ai.

O se faaaʻoaʻoga, na filifili Abimael, o se talavou Kerisiano sa iai sana galuega totogi lelei i se kamupani o telefoni feaveaʻi, e fai sona sao i le galuega talaʻi i na vaipanoa maotua. Ina ua iloa e pule o le galuega o le a faamavae o ia, sa latou ofoina atu se tulaga maualuga ma toe sii lona totogi. Sa tauanau malosi o ia e tagata faigaluega i lo latou maumauaʻi mai e faapea, o se avanoa e lē laumaua ma o se mea valea pe a ia teena le ofo. Ae ui i lea, sa tumau pea le manatu o Abimael e lagolago le tauiviga faapitoa mo le talaʻiga mo le tolu masina. Ina ua māeʻa lenā auaunaga fiafia, na filifili ai loa Abimael e nofo po o le a lava le umi i se faapotopotoga maotua i le mea o loo tele ai le manaʻoga mo tagata talaʻi o le Malo. Ua maua nei sana galuega faatauvaa ma ua aʻoaʻoina o ia ina ia ola i se olaga faigofie.

O se isi mea na tupu, sa faimalaga Julissa i le pasi mo le 22 itula ina ia oo atu i le oganuu ua tofia i ai o ia. Sa ia misia le pasi mulimuli o le aso i le vaega faaiʻu o lana faigāmalaga, ae sa iai i inā se pikiapu e felaʻuaʻia tagata faigaluega. Na matuā lototele Julissa ma fai atu iā i  latou pe mafai ona latou malaga faatasi. O le mea moni, ona e na o ia le tamaʻitaʻi o loo faatasi ma nei tamāloloa e toʻatele, sa matuā popole ai lava o ia. Ina ua amata ona ia talaʻi atu i se tama talavou, na ia iloa ai, o ia o se tasi o Molimau a Ieova! Na faapea mai Julissa: “E ese mai i lenā, o le ave taavale o le pikiapu, o se toeaina o le faapotopotoga lea e tofia atu i ai aʻu ou te galue ai!”

Na Faia Foʻi se Sao a Tagata Matutua

Sa lē mo na o talavou lenei tauiviga. E masani lava ona manaʻo ia Adela, o se tuafafine matua, e faaaluina le tele o le taimi i le galuega talaʻi. Ina ua valaaulia o ia e auai i lenei tauiviga faapitoa mo le galuega talaʻi, sa ia maua ai loa le avanoa e faia ai faapea. Na ia faapea mai: “Na ou matuā olioli i loʻu tofiga, o lea sa ou talanoa ai loa i toeaina o le faapotopotoga ina ia faataga aʻu ou te nofo i inā po o le a lava le umi. Ua faafiafiaina aʻu ona e ui lava ina ou matua, ae o loo oʻu aogā pea iā Ieova.”

Na faapena foʻi ona uunaia Mareta e 60 tausaga o lona soifua e fai sona sao i le tauiviga, ona o le lotofaafetai mo Ieova ma le alofa mo ona uso a tagata. Na lē mafai e la latou vaega ona oo atu i tagata uma, ona o le mamao ma le leaga o auala e oo ai i le oganuu, o lea sa ia faatauina ai loa se taavale e faaaogā e paeonia. Ona o le foaʻi a le tuafafine, na mafai ai ona galueaʻiina nisi oganuu se tele ma tufa atu ai upu moni o le Tusi Paia i le tele o tagata.

Se Tali Fiafia Mai

O le sini o i latou na auai i lenei tauiviga faapitoa mo le galuega talaʻi o le ‘faia o soo.’ Sa sili ona lelei ni iʻuga na maua mai i lenei vala. Na maua e tagata e nonofo i oganuu maotua upu moni faasaoola mai i le Tusi Paia. (Mataio 28: 19, 20) E tele ni suʻesuʻega faale Tusi Paia sa amataina. O nei suʻesuʻega na faia e tagata talaʻi e nonofo i le vaipanoa lea, po o le ʻaufaievagelia o ē nonofo i le oganuu. I nisi tulaga, ua faatulaga ai ni vaega o tagata talaʻi, ae i nisi vaega ua faatūina ai nisi o faapotopotoga laiti.

Sa faaaogāina e Magdaleno ma ana aumea ia auala mo femalagaaʻiga i le lautele, ina ia oo atu ai i le oganuu maotua lea e tofia i ai i latou. Sa latou faaaogā le avanoa e talaʻi ai i le ave taavale a o faimalaga atu. “Na taʻu mai e le tamāloa iā i matou o le vaiaso na teʻa, na asiasi mai ai Molimau i lona fale a o toesea o ia. Ina ua ia toe foʻi ane, sa toe faamatala e lona aiga iā te ia mea sa latou faalogo i ai. Na matou faamatala atu iā te ia, e lē o i matou o ni tagata mai i le vaipanoa lea e latalata ane ae o i matou e ō mai  i nisi setete o le atunuu, ina ia lagolagoina le tauiviga faapitoa mo le galuega talaʻi ma e totogi e le tagata lava ia lona pasese. Sa faagaeetia le ave taavale ma faapea mai o le a amata ona ia suʻesuʻe le Tusi Paia faatasi ma lona aiga i le vaiaso lava lenā. Sa ia lagolagoina le galuega e ala i le lē totogiina o ma pasese.”

Sa faagaeetia foʻi Magdaleno i le tali ane a tagatānuu moni o le setete maugā o Chiapas. “Ua oo iā i maʻua ma laʻu avā le tulaga lea o le tufa atu o le feaʻu o le Malo i se vaega o talavou e 26 o ē auai i le lotu Peripereane. Sa faalogologo ma le faaeteete i latou uma mo le 30 minute. Na latou faaaogā a latou Tusi Paia, ma sa mafai ai ona ma avatu se molimau māeʻaeʻa e uiga i fuafuaga a Ieova. O le toʻatele o tagata e iai a latou lava Tusi Paia i le gagana Tzeltal.” O lea na amataina ai ni suʻesuʻega e agaʻigaʻi i luma faale-Tusi Paia.

Ua Faaitiitia Teteega

Sa iai se vaipanoa i Chiapas e leʻi toe galueaʻiina i le feaʻu o le Tusi Paia mo le sili atu i lua tausaga, ona o teteega mai i nisi tagata. Na mātauina e Teresa o se faievagelia faataimi atoa, le fefefe o nisi Molimau e ō atu e talaʻi i lenā nuu. “Ae o se mea e faateʻia ai, sa naunau tagata e faalogo. E fetaui le uma o la matou talaʻiga, ae amata loa ona timu tetele mai. Na suʻe se mea matou te malu ai mai le timu, ae na faaulufaleina i matou e se tasi e suafa iā Sebastián i lona maota o sē sa faaalia le agaga talimālō. A o matou iai i inā, sa ou fesili ai pe sa asiasi atu ni Molimau iā te ia. Ina ua ia tali mai e leai, na ou molimau loa iā te ia ma amata se suʻesuʻega faale-Tusi Paia e faaaogā ai le tusi o Le Poto e Taʻitaʻia ai i le Ola e Faavavau. * Ina ua uma la matou talanoaga, na ʻaiʻoi mai ai ma loimata ia Sebastián ina ia toe foʻi atu e suʻesuʻe ma ia.”

Na lipotia mai foʻi e se isi vaega o paeonia sa asiasi i Chiapas e faapea: “Matou te faafetai i le fesoasoani a Ieova ua mafai ona matou maua ai ni iʻuga lelei. I le vaiaso muamua, e 27 ni suʻesuʻega na amata ai; ae i le vaiaso lona lua, na matou valaaulia ai tagata ina ia matamata i la matou vitiō The Bible—Its Power in Your Life, ma e 60 na auai. Sa fiafia uma tagata na matamata i ai. I le faaiʻuga, sa matou fuafua ai loa e amata se vaega o suʻesuʻega tautusi i inā. O se mea e faateʻia ai, e lua vaega sa faatuina i lenei nuu.

“Ina ua māeʻa ona matou galulue i oganuu tofia, na matou toe foʻi e asia ma faamalosia tagata lotofiafia i le nuu ma vaai po o faapefea mai vaega o suʻesuʻega tautusi. Sa matou valaauliaina i latou i le lauga lautele ma le suʻesuʻega o Le Olomatamata. Peitaʻi, sa leai se nofoaga telē e fai ai sauniga. O lē na ia ofoina mai lona fale e fai ai suʻesuʻega a vaega sa ia  faasino atu i le pito i tua i fafo o lona fale ma faapea mai: ‘E mafai ona fai sauniga i le pito i tua.’”

O le faaiʻuga o le vaiaso lava lenā, o paeonia sa asiasi ane faatasi ai ma tagata lotofiafia na matuā naunau e fesoasoani e tapena le fanua ina ia mafai ona faaaogā mo sauniga. E 103 ē sa auai i le sauniga muamua. I le taimi nei e 40 suʻesuʻega faale-Tusi Paia o loo faia i lenā nuu.

“Se Mea Matagofie na Tupu”

E ese mai i iʻuga lelei sa maua mai i le galuega talaʻi, ae na maua foʻi e i latou o ē sa auai i le galuega faaevagelia ia ni aogā. Na faaalia mai e María, o se talavou paeonia sa auai i se tasi o nei tauiviga ona lagona e faapea: “E lua ni māfuaaga lelei o le mea na tupu. Ua faateleina ai loʻu fiafia i le galuega talaʻi, ma ua vavalalata ai la ma faiā ma Ieova. Matou te lagona le vaivai pe a matou aʻea se mauga. Pe a uma ona matou ole atu iā Ieova mo se fesoasoani, matou te iloa le moni o le mea o fai mai ai le Isaia 40:29-31 e faapea: ‘O ē faatalitali iā Ieova, e toe faafouina lo latou malosi.’ Sa matou taunuu i inā ma faia suʻesuʻega ma tagata o ē na talileleia mai i matou.”

Na taʻu mai e Claudia, o se isi paeonia talavou e 17 tausaga e faapea: “Ua ou maua le tele o aogā. Ua aʻoaʻoina ai aʻu ina ia maua le tomai i le faiva, ua aumaia ai iā te aʻu le olioli tele, ma taʻitaʻiina atu ai aʻu i le faataatitiaina o oʻu sini faaleagaga. Ua ou taʻumatuaina ai foʻi faaleagaga. I lo matou fale, e faia e loʻu tinā mea uma lava mo aʻu. Ae i le taimi nei, ona ua tele mea ua ou iloa, o lea ua tele ai foʻi mea e mafai ona ou faia. O se faaaʻoaʻoga, e masani lava ona ou ʻai filifili i meaʻai. Ae i le taimi nei, ua ou faamasani i tulaga eseese, ua ou lē toe faitio ai e uiga i meaʻai. Ua fesoasoani lenei ituaiga o auaunaga iā te aʻu e ati aʻe ai ni faauōga lelei. E matou te fefaasoaaʻi a matou mea uma ma fesoasoani le tasi i le isi.”

O se Seleselega e Olioli Ai

O ā ni iʻuga o lenei taumafaiga faapitoa? I le amataga o le 2002, e 28,300 nisi paeonia sa auai i lenei malaga faapaeonia. Na latou faia le sili atu i le 140,000 suʻesuʻega faale-Tusi Paia, ma tuuina atu le silia i le lua miliona itula i le galuega talaʻi. Ina ia fesoasoani i tagata e aʻoaʻoina upu moni o le Tusi Paia, sa latou tufaina ai le toeitiiti lava 121,000 tusi ma e latalata atu i le 730,000 mekasini. O se tulaga e masani ai i nisi paeonia le faia o suʻesuʻega faale-Tusi Paia e 20 pe sili atu foʻi.

Sa matuā lotofaafetai ē na talia le feʻau mo taumafaiga faaopoopo sa faia, ina ia faaoo atu ai iā i latou le feʻau o le Tusi Paia. E ui lava i lo latou tulaga mativa, ae sa maumauaʻi nisi ina ia talia e tagata talaʻi a latou foaʻi tauofo. E masani lava ona ofo atu e se tinā e lē tagolima ua 70 tausaga o lona soifua se mea i paeonia e asiasi ane iā te ia. E tutulu o ia pe a latou lē taliaina. Na taʻu atu foʻi e se aiga lima vaivai i faievagelia faataimi atoa e faapea sa faapitoa lava ona tuu fua o le moa mo i latou, ma sa tauanauina i latou ina ia ave fuāmoa.

Sa sili atu ona tāua i na tagata lotofaamaoni lo latou talisapaia o mea faaleagaga. O se faataʻitaʻiga, e tolu ma le ʻafa itula e savali ai se tamaʻitaʻi talavou ina ia auai i sauniga faa-Kerisiano, ma e lē taitai ona ia misia nei sauniga. O se tinā matua lotofiafia, e ui lava e iai sona faafitauli i ona tuli, ae e lua itula e faimalaga atu ai o ia ina ia maua faatonuga mai i le Tusi Paia i le asiasiga a le ovasia femalagaaʻi. O nisi e leiloa faitau ma tusitusi na mananaʻo e aʻoaʻoina i latou ia iloa ona faitau ma tusitusi, ina ia mafai ai ona aogā iā i latou aʻoaʻoga a le Tusi Paia. Sa tauia a latou taumafaiga.

I le tusi o Galuega na faamatalaina ai e Luka le faaaliga na vaaia e le aposetolo o Paulo e faapea: “O le tasi tagata Maketonia ua tū mai, ma ʻaiʻoi mai iā te ia, ua faapea mai, Sau ia i Maketonia, ma fesoasoani mai iā te i matou.” Sa loto malie Paulo e talia le valaaulia. E toʻatele ua tali mai i le agaga lava lea e tasi i aso nei i nofoaga mamao o Mekisikō, ma faaavanoaina i latou e folafola le tala lelei “e oo lava i tuluʻiga o le lalolagi.”—Galuega 1:8; 16:9, 10.

[Faamatalaga pito i lalo]

[Ata i le itulau 9]

O le toʻatele o Molimau i Mekisikō sa faia se sao i le tauiviga faapitoa mo le talaʻiga