Talavou e, e Lē Faagaloina e Ieova a Outou Galuega!

“E lē amiolētonu le Atua, na te lē faagalogaloina la outou galuega ma le alofa ua outou faaali mai ai i lona suafa, auā na outou auauna i le ʻau paia, i lē o loo outou auauna i ai.”—EPERU 6:10.

1. E faapefea ona faaalia e le tusi o Eperu ma Malaki e tāua iā Ieova lau auaunaga?

PE SA e faatinoina ea se gaoioiga agalelei mo se uō ae leai se faailoaina mai o lona lotofaafetai? Pe afai e manatu māmā se tasi pe na te matuā faagaloina foʻi se galuega agaalofa sa faia mo ia, o se mea e matuā tigā lea iā te oe. Maʻeu le eseese pe a tatou avatu le auaunaga ma le lotoatoa iā Ieova! Ua faapea mai le Tusi Paia: “E lē amiolētonu le Atua, na te lē faagalogaloina la outou galuega ma le alofa ua outou faaali mai ai i lona suafa, auā na outou auauna i le ʻau paia, i lē o loo outou auauna i ai.” (Eperu 6:10) Seʻi manatunatu po o le ā le uiga o lenā mea. Pe afai e faagaloina e Ieova mea sa e faia ma mea o loo faaauau ona e faia i lana auaunaga, e manatu o ia o se gaoioiga lē amiotonu lea i lana itu ma o se agasala. Maʻeu se Atua lototalisapaia!—Malaki 3:10.

2. O le ā ua avea ai le auaunaga iā Ieova o se mea e tāua moni?

 ² Ua e maua se faaeaga tāua e tapuaʻi ma auauna ai i lenei Atua lotofaafetai. Pe a faatusatusa atu le ono miliona o ou uso talitonu ma le ono piliona o tagata i le lalolagi atoa, o le mea moni o se faaeaga lē laumaua lea ua iā te oe. Ae e lē gata i lea, o lou faalogo ma tali atu i le feʻau o le tala lelei, o le faamaoniga lenā o le fiafia o le finagalo o Ieova iā te oe. Ae peitaʻi, na fetalai Iesu e faapea: “E lē mafai se tasi ona sau iā te aʻu, pe a lē tosina mai e le Tamā ua auina mai aʻu.” (Ioane 6:44) Ioe, e fesoasoani Ieova i tagata taʻitoʻatasi ina ia maua aogā o le taulaga a Keriso.

Ia Lotofaafetai mo Lou Faaeaga Faapitoa

3. Na faaalia faapefea e atalii o Koru lo latou agaga talisapaia mo le faaeaga o le auauna iā Ieova?

³ E pei ona sa talanoaina i le mataupu na muamua atu, ua e maua se faaeaga faapitoa o le faafiafiaina lea o le finagalo o Ieova. (Faataoto 27:11) O le mea lenei e lē tatau ona e manatu māmā i ai. Na faaalia e atalii o Koru lo latou agaga talisapaia mo le faaeaga o le auauna iā Ieova i se tasi o a latou salamo faagaeeina. Tatou te faitau ai e faapea: “E sili le aso e tasi i ou lotoa i lo le afe. E sili loʻu manaʻo ia aʻu tū i le faitotoʻa o le fale o loʻu Atua, i le manaʻo e mau i fale ie o ē amio leaga.”—Salamo 84:10.

4. (a) O le ā atonu ua māfua ai ona vaai nisi i le tapuaʻiga iā Ieova faapea e faasāsā? (e) I le ā le auala ua faaalia ai o loo naunau Ieova e silasila mai ma tauia ana auauna?

⁴ Pe o lou lagona ea lenā e faatatau i lou faaeaga o le auauna i lou Tamā faalelagi? Ma le mautinoa, atonu e iai taimi e foliga mai ai o le tapuaʻi iā Ieova ua faasāsā ai lou saʻolotoga. O le mea moni, o le ola e tusa ai ma mataupu silisili o le Tusi Paia e manaʻomia ai sina faataulagaina o oe lava. Ae e le gata i lea, po o le a lava le mea e finagalo i ai Ieova iā te oe e fai, e mo lou lelei. (Salamo 1:1-3) E lē gata i lea, e silafia e Ieova au taumafaiga ma faaalia lona agaga talisapaia mo lou faamaoni. O le mea moni, na tusi le aposetolo o Paulo e faapea, o Ieova e “na te tauia mai o ē matuā saʻili iā te ia.” (Eperu 11:6) O loo silasila Ieova mo ni avanoa na te faia ai faapea. Na taʻua e se perofeta amiotonu i Isaraelu anamua e faapea: “O fofoga o Ieova e fetaufetuliaʻi i le lalolagi uma, na te fesoasoani iā te i latou o ē ua sao o latou loto iā te ia.”—2 Nofoaiga a Tupu 16:9.

5. (a) O le ā se tasi o auala e sili ona lelei e mafai ona e faaalia ai ua sao lou loto iā Ieova? (e) Aiseā atonu e foliga mai ai e faigatā ona e talanoa atu i isi e uiga i lou faatuatua?

⁵ O se tasi o auala e sili ona lelei e faaalia ai ua sao lou loto iā Ieova, o le talanoa lea i isi e uiga iā te ia. Pe sa e maua ea se avanoa e talanoa atu ai i nisi o au aumea i le aʻoga e uiga i lou faatuatua? Muamua, o lou taumafai e faia faapea atonu e te lagona ai le popole, ma o lenā mea e faapogaia ai le fefe. Atonu o le a e fesili e faapea: ‘E faapefea pe afai latou te toē mai iā te aʻu? Ae faapefea pe a latou manatu e ese lava laʻu tapuaʻiga?’ Na faailoa mai e Iesu e lē o tagata uma  o le a faalogo i le feʻau o le Malo. (Ioane 15:20) Ae ui i lea, e lē o le uiga o lenei mea faapea o le a e ola ai i se olaga tauemua ma teena e tagata. I le isi itu, e toʻatele talavou Molimau ua latou maua se tasi e naunau e faalogo ma ua latou maua le faaaloalogia mai i a latou aumea, ona o lo latou pipii mau atu i o latou talitonuga.

“O le a Fesoasoani Ieova iā te Oe”

6, 7. (a) Na mafai faapefea e se teine e 17 tausaga ona molimau atu i ana aumea i le aʻoga? (e) O le ā ua e aʻoaʻoina mai le mea na tupu iā Jennifer?

⁶ Ae faapefea ona e maua le lototele e tautala atu ai e uiga i lou faatuatua? Pe a fesili atu tagata iā te oe e uiga i lau tapuaʻiga, aiseā e te lē tali saʻo atu ai ma le faamaoni? Seʻi manatu i le mea na tupu iā Jennifer e 17 tausaga o lē na faapea mai: “Sa ou iai i le mālōlōga o le aoauli i le aʻoga. O teine ia sa matou laulau faatasi na talanoa i mea tau i tapuaʻiga, ma sa fesili mai se tasi o teine iā te aʻu po o le ā laʻu lotu.” Pe sa popole ea Jennifer i le avatuina o se tali? Sa ia faailoa mai, “ioe, talu ai sa ou lē mautinoa po o le ā le ituaiga tali o le a ou mauaina.” O lea la, o le ā le mea sa faia e Jennifer? Sa ia faaauau mai e faapea: “Na ou fai i teine o aʻu o se tasi o Molimau a Ieova. I le taimi muamua na foliga mai sa faateʻia i latou. E foliga mai, sa iai lo latou manatu, o Molimau a Ieova o ni tagata e ese lava i latou. O lea na uunaʻia ai i latou e fesili mai iā te aʻu, ma sa mafai ona ou faamalamalamaina nisi o manatu sesē sa iā i latou. E ui lava ina ua mavae lenā aso, ae o loo ō mai pea nisi teine mai i lea taimi i lea taimi iā te aʻu ma fai mai ni fesili.”

⁷ Pe sa faanoanoa ea Jennifer ona o le mauaina o le avanoa e tautala ai e uiga i ona talitonuga? E matuā leai lava! Ua ia faapea mai: “Sa matuā faafiafiaina lava aʻu ina ua māeʻa le mālōlōga o le aoauli i lenā aso. O le taimi nei, ua iai i na teine se manatu lelei, po o ai moni lava Molimau a Ieova.” E faigofie lava le fautuaga a Jennifer: “Ia vave fai sau tatalo, pe afai e faigatā ona e molimau atu i aumea i le aʻoga po o faiaʻoga. O le a fesoasoani Ieova iā te oe. O le a faafiafiaina oe pe afai e te faaaogā tatau lou faaeaga e avatu ai se molimau.”—1 Peteru 3:15.

8. (a) Sa faapefea ona fesoasoani le tatalo iā Neemia ina ua ia fetaiaʻi ma se tulaga sa ia leʻi faatalitalia? (e) O ā nisi o tulaga i le aʻoga atonu e te manaʻomia ai ona ofo atu se tatalo puupuu lē leoa iā Ieova?

⁸ Mātau le fautuaga a Jennifer, ‘ia vave ona fai sau tatalo’ iā Ieova pe a maua se avanoa e fai atu ai se molimau e uiga i lou faatuatua. O le mea tonu lava lenā sa faia e Neemia le tautū uaina a le tupu o Peresia o Aretaseta, ina ua ia fesagaʻi ma se tulaga sa leʻi faatalitalia. Sa vaaia foliga faanoanoa o Neemia ina ua taʻu atu i ai le tala e uiga i le tulaga o loo iai i Iutaia ma iloa le faatafunaina o pa ma puipui o Ierusalema. Na mātauina e le tupu foliga popole o Neemia, o lea sa ia fesili atu ai loa po o iai se mea o faalētonu. A o ia leʻi tali atu, sa tatalo Neemia mo se taʻitaʻiga. O lea sa ia talosaga atu ai loa ma le lototele mo se faatagaga e toe foʻi ai i Ierusalema ma fesoasoani e toe fausia le aai lea ua faatafunaina. Sa taliaina e Aretaseta le talosaga a Neemia. (Neemia 2:1-8) O le ā le lesona mo oe? Pe afai e te popole pe a tulaʻi mai se avanoa e avatu ai se molimau e uiga i lou faatuatua, aua lava neʻi galo ona fai sau tatalo lē leoa. Na tusi mai Peteru e faapea: “Ia tuuina atu iā te ia [Ieova] mea uma tou te popole ai, auā o loo manatu mai o ia iā te outou.”—1 Peteru 5:7; Salamo 55:22.

‘Ia Saunia Pea Lava e Tali Atu’

9. Sa faapefea ona mafai e Lea e 13 ona tausaga ona tufaina atu kopi e 23 o le tusi Ua Fesili Mai Talavou?

⁹ Seʻi manatu i se isi mea na tupu. I le taimi o le mālōlōga o le aoauli i le aʻoga, sa faitauina ai e Lea e 13 ona tausaga le tusi Fesili ua Fesili Mai ai Talavou—Tali e Aogā. * Ua ia faapea mai: “Sa matamata mai isi iā te aʻu ma e leʻi umi lava ae lolofi mai loa le toʻatele ua tūtū ma matamata mai i oʻu tua. Na amata ona latou tuufesili mai po o le ā e faatatau i ai le tusi.” E uma ane le aso, e toʻafā teine sa fesili atu iā Lea mo se kopi o le tusi Ua Fesili Mai Talavou. E leʻi umi ae faailoa atu e nei teine mea o loo i nei tusi i isi, ona mananaʻo foʻi lea o i latou e maua ni a latou tusi. I nai vaiaso mulimuli ane ai, na tufa atu ai e Lea  kopi e 23 o le tusi Ua Fesili Mai Talavou i ana aumea i le aʻoga ma a latou uō. Pe sa faigofie ea mo Lea ona tautala atu ina ua amata ona fesili atu isi e uiga i le tusi sa ia faitauina? E mautinoa e leai! Ua ia taʻutino mai: “Sa ou popole i le taimi muamua. Ae peitaʻi, sa ou tatalo, ma ou iloa ai o loo faatasi mai Ieova iā te aʻu.”

10, 11. Sa mafai faapefea e se teine talavou Isaraelu ona fesoasoani i se taʻitaʻiʻau Suria ina ia aʻoaʻo e uiga iā Ieova, ma o ā suiga sa faia e lenei taʻitaʻiʻau mulimuli ane?

¹⁰ O le mea na tupu iā Lea atonu e faamanatu atu ai iā te oe le tulaga talitutusa sa fesagaʻi ma se teine talavou Isaraelu, o lē na ave faatagataotauaina i Suria. Sa lepela le taʻitaʻiʻau a Suria o Naamanu. Atonu o le avā a Naamanu sa ia amataina le talanoaga lea na uunaia ai le teine talavou lenei e tautala atu e uiga i lona faatuatua. Na ia faapea mai: “Se anoa! ana i ai loʻu alii i le perofeta o i Samaria, po ua faateʻaina e ia lona lepela.”—2 Tupu 5:1-3.

¹¹ O le iʻuga ona o le lototele o lenei teine talavou, na oo ai ina iloa e Naamanu “e leai se atua i le lalolagi uma, ua na o i Isaraelu lava.” Na ia filifili ai loa o le a ia ‘lē toe faia se taulaga mū po o se isi taulaga i atua ese, na o Ieova lava.’ (2 Tupu 5:15, 17) E mautinoa sa faamanuia Ieova i le lototele o lenā teine talavou. E  mafai ma o le a ia faia foʻi faapena mo talavou i aso nei. Sa faapena foʻi le mea na tupu iā Lea. Na oo ina faalatalata ane nisi o ana aumea i le aʻoga ma faapea ane ua fesoasoani le tusi Ua Fesili Mai Talavou i a latou amio. Ua faapea mai Lea: “Sa ou fiafia, talu ai ua ou iloa sa ou fesoasoani i isi ina ia aʻoaʻo atili e uiga iā Ieova ma suia o latou olaga.”

12. E mafai faapefea ona faamalosia oe e tali atu e uiga i lou faatuatua?

¹² E mafai foʻi ona tupu se mea faapena iā te oe e pei o Jennifer ma Lea. Ia mulimuli i le fautuaga a Peteru, o lē na tusi mai e faapea, o le avea ma Kerisiano e tatau ona “saunia pea lava outou e tali atu ma le agamalu ma le āva iā i latou uma o ē fesili mai iā te outou i le uiga o le faamoemoe o loo iā te outou.” (1 Peteru 3:15) E mafai faapefea ona e faia lenā mea? Ia faaaʻoaʻo i Kerisiano o le uluaʻi senituri o ē na tatalo iā Ieova ina ia fesoasoani iā i latou e talaʻi “ma le lototele.” (Galuega 4:29) O lea la, ia lototele e talanoa atu i isi e uiga i ou talitonuga. Atonu o le a faateʻia oe i ni iʻuga lelei e maua mai ai. E le gata i lea, o le a e faafiafiaina ai le finagalo o Ieova.

Vitiō ma Mataupu Faaleaʻoaʻoga

13. O ā ni avanoa sa faaaogā tatau e nisi talavou e avatu ai se molimau? (Tagaʻi i pusa i itulau e 20 ma le 21.)

¹³ E toʻatele talavou sa latou faamatalaina atu lo latou faatuatua i aumea i le aʻoga po o faiaʻoga e ala i le faaaogāina o ata vitiō. O nisi taimi, ua avea ia mataupu o le aʻoga ma avanoa e aumaia ai le viiga iā Ieova. Mo se faaaʻoaʻoga, o ni tama se toʻalua e taʻi 15 o la tausaga, o i laʻua o ni Molimau a Ieova, sa tuuina atu iā i laʻua se galuega e fai e la te tusia se lipoti e faatatau i se lotu se tasi o le lalolagi, ma o se mataupu o tala faasolopito o le lalolagi i le vasega. Sa ʻau faatasi i laʻua e tusia le la lipoti e faatatau i Molimau a Ieova, e faavae i le tusi Jehovah’s Witnesses—Proclaimers of God’s Kingdom. * Sa tatau foʻi ona la faamatalaina atu le la lipoti mo le lima minute i luma o le vasega. Ina ua  māeʻa, sa tele fesili a le faiaʻoga ma tamaiti aʻoga na fai ma sa tūtū ai pea i laʻua i luma o le vasega mo le isi 20 minute. Mo ni nai vaiaso ina ua mavae lenā mea, sa faaauau pea e a la aumea i le vasega ona tuufesili e faatatau i Molimau a Ieova!

14, 15. (a) Aiseā o se mailei ai le fefe i tagata? (e) Aiseā e tatau ai ona e lagona le mautinoa pe a e talanoa atu i isi e uiga i ou talitonuga?

¹⁴ E pei ona faaalia i mea na tutupu, e mafai ona e maua faamanuiaga e ala i lou taʻuina atu i isi e uiga i ou talitonuga o se Molimau a Ieova. Aua le faatagaina le fefe i tagata e taofia ai oe mai i lou faaeaga ma lou olioli e fesoasoani i isi ina ia latou iloa Ieova. Ua faapea mai le Tusi Paia: “O le fefe i tagata e tupu ai le mailei; a o lē faatuatua iā Ieova e faamamaluina o ia.”—Faataoto 29:25.

¹⁵ Ia manatua, o le avea o oe ma se talavou Kerisiano, o loo iā te oe se mea o loo matuā manaʻomia lava e au aumea, o le olaga e sili ona lelei i le taimi nei ma le folafolaga o le ola e faavavau i le lumanaʻi. (1 Timoteo 4:8) Ae o le mea e faateʻia ai i le Iunaite Setete, atonu e te mafaufau o tagata i le lautele e faalēano mai ma pūpū atu i mea masani o le olaga, ae ua faaalia e se tasi o suʻesuʻega na fai e faapea, e lē itiiti ifo i le ʻafa o talavou e manatu mamafa i lotu, ma o le tasi vae tolu latou te faapea mai o le faatuatuaga faalelotu o se “aafiaga sili” lea i o latou olaga. Atonu o le tulaga lea e talitutusa ma le tele o isi vaega i le lalolagi. O lea la, atonu, e fiafia au aumea i le aʻoga e faalogo po o le ā o loo e fai atu ai e uiga i le Tusi Paia.

Ia Faalatalata Atu iā Ieova i le Avea ai o se Talavou

16. O le ā e aofia ai i le faafiafiaina o le finagalo o Ieova e ese mai i le talanoa atu i isi e uiga iā te ia?

¹⁶ O le mea moni, o le faafiafiaina o le finagalo o Ieova e aofia ai se mea e sili atu i le na o le talanoa e uiga iā te ia. E manaʻomia foʻi ona ōgatusa lau amio ma ana faatulagaga. Na tusi mai faapea le aposetolo o Ioane: “O lenei lava le alofa i le Atua, ia tatou tausi i ana poloaʻiga; e lē mamafa foʻi ana poloaʻiga.” (1 Ioane 5:3) O le a e iloa le moni o lenei mea pe afai e te faalatalata atu iā Ieova. E mafai faapefea ona e faia lenā mea?

17. E faapefea ona e faalatalata atu iā Ieova?

¹⁷ Ia faaalu se taimi e faitau ai le Tusi Paia ma lomiga faale-Tusi Paia. O le tele o lou aʻoaʻoina e uiga iā Ieova, o le faigofie foʻi lenā ona e usitai ma talanoa atu i isi e uiga iā te ia. Na fetalai Iesu e faapea: “Ua au mai mea lelei e le tagata amio lelei i mea lelei ua teu i lona loto . . . auā o le tele o mea i le loto e tautala mai ai lona gutu.” (Luka 6:45) O lea la, ia faatumu lou loto i mea lelei. Aiseā e lē faatutū ai ni ou sini e tusa ai ma lenei tulaga? Atonu e mafai ona e faaleleia au sauniuniga mo sauniga a le faapotopotoga i le vaiaso a sau. O le isi ou sini e sosoo ai, o le faia lea o se tali puupuu e sau mai le loto. O le mea moni, e tāua foʻi ona e faatatauina mea ua e aʻoaʻoina.—Filipi 4:9.

18. E ui ina e mafatia i nisi o teteega, ae o le ā e mafai ona e mautinoa?

¹⁸ O faamanuiaga e maua mai i le auauna iā Ieova e umi ona tumau ma e faavavau. O le mea moni, atonu i nisi taimi o le a e tofo ai i ni teteega po o faifaiga ona o le avea ma se tasi o Molimau a Ieova. Ae seʻi mafaufau foʻi iā Mose. Ua faapea mai le Tusi Paia: “Sa faanaunau o ia i le taui.” (Eperu 11:24-26) O le a mafai foʻi ona e mautinoa o le a tauia oe e Ieova mo au taumafaiga e aʻoaʻo ma talanoa e uiga iā te ia. O le mea moni, o le a ia lē “faagalogaloina la outou galuega ma le alofa ua outou faaali mai ai i lona suafa.”—Eperu 6:10.

[Faamatalaga pito i lalo]

Pe E te Manatua?

• Aiseā e mafai ai ona e mautinoa e tāua iā Ieova lau auaunaga?

• O ā auala ua taulau manuia ai nisi i le molimau atu i le aʻoga?

• E mafai faapefea ona faamalosia oe e molimau atu i au aumea i le vasega?

• E mafai faapefea ona e faalatalata atu iā Ieova?

[Fesili mo le Suʻesuʻega]

[Pusa/Ata i le itulau 20]

E Vivii Foʻi Tamaiti iā Ieova!

E oo lava i tamaiti laiti, e mafai ona latou avatu se molimau i le aʻoga. Seʻi manatu i nei mea na tutupu.

Sa faitau e Amber e sefulu ona tausaga ma e i le vasega lima le tusi e uiga i osofaʻiga a le ʻAu Nasi i tagata Siū i le taimi o le Taua Lona Lua a le Lalolagi. Sa filifili Amber e aumai le vitiō o le Purple Triangles i lona faiaʻoga. Na faateʻia le faiaʻoga ina ua ia iloaina sa sauāina foʻi Molimau a Ieova i lalo o pulega faa-Nasi. Sa faaalia ai loa e le faiaʻoga le vitiō i le vasega atoa.

I le valu o ona tausaga, sa tusia ai e Alexa se tusi i lana vasega ma faamatala i ai le māfuaaga e lē mafai ai ona ia auai atu i lo latou faamanatuina o le Kirisimasi. Na matuā faagaeetia le faiaʻoga, o lea na ia fai atu ai iā Alexa e faitau leotele lana tala i luma o lana vasega ma isi foʻi vasega e lua! Sa ia faapea mai i le faaiʻuga: “Na aʻoaʻoina aʻu ina ia ou faaalia le faaaloalo i isi e ese o latou talitonuga mai iā te aʻu ma ou te faafetai atu iā te outou mo le faaalia o le faaaloalo i laʻu filifiliga ou te lē faamanatuina le Kirisimasi.”

E leʻi leva lava ona amata Eliki i le vasega muamua, ae ona aveina loa i le aʻoga le tusi, o Laʻu Tusi o Tala o Le Tusi Paia ma fesili mo se faatagaga e faaali ai i lana vasega. Na faapea mai lana faiaʻoga: “Ua ou maua le tonu lelei. Aiseā e te lē faitauina ai se tala i le vasega?” Sa faia faapea e Eliki. Ina ua māeʻa lenā, sa ia valaaulia loa i latou uma o ē mananaʻo i ni tusi ina ia sii i luga o latou lima. E toʻasefulu valu tamaiti e aofia ai ma le faiaʻoga, sa latou faia faapea! Ua manatu Eric ua iai nei lana oganuu faapitoa e molimau ai.

Na faaalia le lotofaafetai o Whitney e iva tausaga mo le polosiua Molimau a Ieova ma Aʻoaʻoga. * Ua ia faapea mai: “E masani lava ona ave e loʻu tinā le polosiua lenei i oʻu faiaʻoga i tausaga taʻitasi, ae peitaʻi o le tausaga nei sa ou faia lava e aʻu. O le fesoasoani a lenā polosiua, na mafai ai e loʻu faiaʻoga ona filifilia aʻu e avea ma le ‘tamaititi faapitoa o le vaiaso.’”

[Faamatalaga pito i lalo]

[Pusa/Ata i le itulau 21]

O Avanoa ua Faaaogā e Nisi e Talanoa Atu ai e Uiga i lo Latou Faatuatua

Pe a tofia e tusia se lipoti po o ni suʻesuʻega i mataupu o le aʻoga,o nisi ua filifilia se mataupu e mafai ona avatu ai se molimau

O nisi o talavou latou aveina i o latou faiaʻoga se vitiō po o se lomiga e faatatau i se mataupu o loo talanoaina i le vasega

Pe a faitauina e nisi talavou le Tusi Paia po o se lomiga faale-Tusi Paia i taimi o mālōlōga a le aʻoga, e masani ona faalatalata atu i ai isi talavou ma ni fesili

[Ata i le itulau 18]

O i latou o ē agavaa e mafai ona fesoasoani e toleni talavou e auauna iā Ieova