E Inosia e Ieova Faiga Faa‘ole‘ole
E Inosia e Ieova Faiga Faaʻoleʻole
‘Aua neʻi faaʻoleʻole le tasi i le tasi.’—MALAKI 2:10.
1. O le ā o loo manaʻomia e le Atua mai iā i tatou ina ia tatou maua ai le ola e faavavau?
PE E te fia maua le ola e faavavau? Afai e te talitonu i lenā faamoemoe e pei ona folafolaina mai i le Tusi Paia, atonu la o le a e tali mai, ‘O lea lava.’ Ae afai e te manaʻo e foaʻi atu iā te oe e le Atua le ola e lē uma i lana lalolagi fou, e tatau la ona e ausiaina mea o loo ia manaʻomia. (Failauga 12:13; Ioane 17:3) Pe ua talafeagai ea ona faatalitalia tagata e lē lelei atoatoa e faia faapea? Ioe, auā o loo fetalai mai Ieova i le faamatalaga lenei e faalaeiauina ai: “O le alofa ou te loto i ai, a e le o le taulaga; ia iloa foi le Atua e sili lea i loʻu manatu i taulaga mu.” (Hosea 6:6) O lea la, e oo lava i tagata e lē lelei atoatoa e mafai ona ausia mea e manaʻomia e le Atua.
2. Na faapefea ona taufaaʻoleʻole le toʻatele o tagata Isaraelu iā Ieova?
2 Peitaʻi, e lē o mananaʻo tagata uma e fai le finagalo o Ieova. O loo faaalia i le Hosea e faapea e oo lava i le toʻatele o tagata Isaraelu, e latou te leʻi mananaʻo e faia faapea. Na latou malilie o se nuu, ina ia osia se feagaiga po o se maliega, e usitaia tulafono a le Atua. (Esoto 24:1-8) Peitaʻi e leʻi umi lava ae latou ‘solia le feagaiga’ e ala lea i lo latou solia o ana tulafono. O le māfuaaga lea na fetalai mai ai Ieova, o na Isaraelu ua latou “pepelo [“faaʻoleʻole,” NW]” iā te ia. (Hosea 6:7) Talu mai lenā taimi, o le tulaga foʻi lenā ua iai le tele o tagata. Ae e inosia e Ieova faiga taufaaʻoleʻole, pe faia iā te ia, pe e faia iā i latou o ē e alolofa ma auauna iā te ia.
3. O le ā o le a iloiloina i lenei suʻesuʻega?
3 E lē na o Hosea le perofeta na faamaninoina mai le silafaga a le Atua e faatatau i faiga taufaaʻoleʻole, ma o le vaaiga lenā e ao ona tatou taliaina pe afai tatou te fia maua se soifuaga fiafia. I le mataupu na muamua atu, na amata mai ai la tatou iloiloga o le feʻau faavaloaga a Malaki mai le mataupu muamua o lana tusi. O lea la seʻi tatou suʻe i le mataupu e lua o lenā tusi, ma o le a mātauina le auala o loo iloiloina atili ai le silafaga a le Atua e faatatau i faiga faaʻoleʻole. E ui o loo talanoaina e Malaki le tulaga sa iai tagata o le Atua i le tele o tausaga talu ona mavae lo latou toe faafoʻisia mai i Papelonia, ae o loo iai se tāua o lenei mataupu lona lua mo i tatou i lenei vaitaimi.
Faitaulaga ua Taʻusalaina
4. O le ā le lapataʻiga a Ieova i faitaulaga?
4 E amata le mataupu e 2 i le taʻusalaina e Ieova o faitaulaga ona o lo latou lē tumau i ona ala amiotonu. Afai e latou te lē utagiaina lana fautuaga ma faasaʻoina o latou ala, e mautinoa o le a oo iā i latou se iʻuga mataʻutia. Mātau le faamatalaga i uluaʻi fuaiupu e lua: “Ua ia te outou le au faitaulaga lenei poloaiga. Afai tou te le faalogo mai, afai foi tou te le mafaufau ina ia aumaia le viiga i loʻu igoa, ua fetalai mai ai Ieova o ʻau, ona ou auina atu ai lea o le faafanoga ia te outou, ma ou faafanoina mea tou te manuia ai.” Ana faapea e aʻoaʻoina ma tausisia e faitaulaga tulafono a le Atua, semanū e faamanuiaina i latou. Ae o lea o le a oo mai iā i latou le faafanoina ma le malaia ona o lo latou lē amanaʻiaina o le finagalo o le Atua. E oo lava i faamanuiaga e latou te avatua o le a lē taulau.
5, 6. (a) Aiseā ua sili ai ona tuuaʻia faitaulaga? (e) Na faapefea ona faaalia mai e Ieova lona ʻinoʻino i faitaulaga?
5 Aiseā na faapitoa ai lava ona tuuaʻia faitaulaga? O loo manino ona faamatalaina i le fuaiupu e 7: “O laugutu o le faitaulaga e tausia ai le poto, latou te sailia foi le tulafono ai lona gutu; auā o le sāvali o ia a Ieova o ʻau.” I le silia ma le afe tausaga muamua atu, na taʻua ai i tulafono a le Atua ia na avatu iā Isaraelu e ala atu iā Mose e faapea, e i faitaulaga le matafaioi o le ‘aʻoaʻo atu i le fanauga a Isaraelu o tulafono uma na fetalai mai ai Ieova.’ (Levitiko 10:11) O le tulaga faanoanoa ona i se taimi mulimuli ane na taʻua ai e lē na tusia le 2 Nofoaiga Tupu 15:3 e faapea: “Ua tele lava aso ua aunoa ai Isaraelu ma le Atua moni, ma ua aunoa ma se faitaulaga e aʻoaʻo atu, ua aunoa foi ma le tulafono.”
6 I le taimi o Malaki, i le senituri lona lima T.L.M., e faapena foʻi le tulaga sa iai le faiva a le ʻauositaulaga. Sa lē taulau ona latou aʻoaʻoina atu le Tulafono a le Atua i tagata. Sa tatau ai la ona faamasinoina i latou. Mātau le malosi o le aʻoaʻiga na tuuina atu e Ieova iā i latou. Ua faapea mai le Malaki 2:3: ‘Ou te faasalalauina foi le otaota o manu i o outou mata, o le otaota o taulaga o a outou tausamiga.’ Pagā se aʻoaʻiga ina a mamafa! O otaota o manu ia sa faaaogā e osi ai taulaga, sa tatau ona ave i tua o le togālauapi e susunu ai. (Levitiko 16:27) Ae ina ua fetalai atu Ieova o le a faasalalau otaota o manu i o latou mata, ua faaalia manino mai ai lona ʻinoʻino ma lona lē taliaina o a latou taulaga faapea ma i latou o loo ofoina atu ia taulaga.
7. Aiseā na toʻatamaʻi ai Ieova i ē na aʻoaʻoina atu le Tulafono?
7 I senituri muamua atu, a o leʻi oo i le taimi o Malaki, na tofia ai e Ieova sā Levī e tausia le fale fetafaʻi, ma mulimuli ane ai, le malumalu ma lona auaunaga paia. O i latou o faiaʻoga i le nuu o Isaraelu. O le faataunuuina o lo latou tofiga o le a maua ai le ola ma le filemu mo i latou atoa ai ma le nuu. (Numera 3:5-8) Peitaʻi na mou ese atu le mataʻu i le Atua lea sa iai muamua i sā Levī. O lea, na fetalai atu ai Ieova iā i latou: ‘Ua outou o ese i le ala, ma outou faatausuai i e toatele i le tulafono; ua leaga ia te outou le feagaiga a Levi . . . [Ua] outou le tausi i oʻu ala.’ (Malaki 2:8, 9) Talu ai lo latou lē taulau e aʻoaʻo atu le upu moni, faatasi ai ma la latou faaaʻoaʻoga leaga, na latou faasesēina ai le tele o tagata Isaraelu. O le mea lea na tonu ai lava le toʻasa o Ieova iā i latou.
Tausisia o Tapulaa a le Atua
8. Po ua faigatā tele mo tagata ona tausisia tapulaa a le Atua? Faamatala.
8 Ia aua lava neʻi o tatou manatu e faapea e tatau ona alofagia ma faamagaloina na sā Levī ona ua na o ni tagata e lē lelei atoatoa, ma e lē faatalitalia o le a mafai ona latou tausisia tapulaa a le Atua. O le mea moni e mafai e tagata ona tausisia poloaʻiga a le Atua, auā e lē o faatalitalia e Ieova mai iā i latou se mea e sili atu na i lo le mea ua latou mafaia. Atonu sa iai ni faitaulaga i lenā taimi sa mafai ona latou tausisia tapulaa a le Atua, ma e leai se masalomia o le mafai ona faia faapea e lē na mulimuli ane—o Iesu, le “faitaulaga sili,” e silisili. (Eperu 3:1) E matuā moni ona faatatauina upu nei iā te ia: “O le mataupu o le faamaoni [“tulafono o le upu moni,” NW] sa i lona gutu lea; na le iloa foi se mea le tonu i ona laugutu; na savavali faatasi ma aʻu i le amio filemu ma le amio saʻo; na ia faaliliuina foʻi ē toatele nai le amioletonu.”—Malaki 2:6.
9. O ai ua latou talaʻia atu ma le faamaoni le upu moni i lo tatou vaitaimi?
9 I se uiga tutusa, ua silia nei ma le senituri talu ona auauna uso faauuina o Keriso, o i latou o iai le faamoemoe i le lagi, e avea ma “le au ositaulaga paia, e avatu taulaga faaleagaga e mālie i le Atua.” (1 Peteru 2:5) O loo latou taulamua i le talaʻiina o upu moni o le Tusi Paia i isi. Ina ua goto i lou loto upu moni o loo latou aʻoaʻoina atu, pe e te lē o mātauina ea mai mea o tutupu iā te oe le iai moni o le tulafono o le upu moni i o latou gutu? Ua latou fesoasoani e liliu ese mai le toʻatele i aʻoaʻoga sesē faalotu, ma o lea ua faitau miliona ai i latou i le lalolagi aoao ua aʻoaʻoina upu moni mai le Tusi Paia ma ua iai le faamoemoe o le ola e faavavau. Ua iai foʻi la iā i latou nei le avanoa matagofie e aʻoaʻo atu ai le tulafono o le upu moni i le faitau miliona o isi tagata e leʻi iloaina.—Ioane 10:16; Faaaliga 7:9.
Māfuaaga e Ao ai Ona Mataala
10. Aiseā e ao ai ona tatou mataala?
10 Ae ui i lea, ua iā i tatou māfuaaga e mataala ai. E mafai ona tatou misia lesona o loo i le Malaki 2:1-9 pe a tatou lē mataala. Po o tatou mataala ea ina ia aunoa o tatou laugutu ma se amiolētonu? Mo se faaaʻoaʻoga, pe mafai moni ea e tagata o o tatou aiga ona talitonuina mea tatou te fai atu ai? Ae ā o tatou uso ma tuafāfine i le faapotopotoga? E faigofie lava i se tasi ona ati aʻe le masaniga e faaupuina faamatalaga ina ia foliga e saʻo, ae o loo faasesēina ai isi. Ia, po o le faatele foʻi po o le natia o ni mea e tusa ai o se mataupu faapisinisi. Pe faamata o le a lē silafia ea e Ieova na faiga? Afai tatou te mulimuli i na faiga, pe faamata e na te taliaina taulaga o viiga mai o tatou laugutu?
11. O ai faapitoa e tatau ona mataala?
11 E tusa ai o uso o loo iai le faaeaga e aʻoaʻo atu le Afioga a le Atua i le faapotopotoga i aso nei, e ao ona avea le Malaki 2:7 ma lapataʻiga. O loo faapea mai o o latou laugutu “e tausia ai le poto, [o tagata] latou te sailia foi le tulafono” ai o latou gutu. E mamafa le tiute tauave ua iai i na faiaʻoga, auā o loo faailoa mai i le Iakopo 3:1 “e atili ai ona faasalaina” i latou. E ui e latou te aʻoaʻo atu ma le olaola ma le aasa, e ao lava ona faavae lelei a latou aʻoaʻoga mai le Afioga tusia a le Atua ma le aʻoaʻoga o loo ala mai i le faalapotopotoga a Ieova. O le faia faapea o le a latou ‘mafaia [“agavaa,” NW] ai e aʻoaʻoina isi.’ O lea ua fautuaina ai i latou: “Ia e taumafai ina ia avea oe ma le ua fiafia mai i ai le Atua, o le faigaluega e leai se mea e mā ai, na te talaʻitonuina le upu moni.”—2 Timoteo 2:2, 15, LF.
12. O le ā e ao ona manatunatu lelei i ai i latou e aʻoaʻo atu?
12 Afai tatou te lē manatunatu lelei, tatou te ono faaopoopoina ni o tatou lava talitonuga po o ni manatu totino i a tatou aʻoaʻoga. O le a avea lenā tulaga o se vala e matuā tofoina ai lava se tagata e iai le mautinoa i ana lava faaiʻuga, e tusa lava pe e lē ōgatusa ma aʻoaʻoga a le faapotopotoga a Ieova. Peitaʻi ua faaalia mai e le Malaki mataupu e 2 e faapea, e ao ona tatou faatalitalia o le a tausisi atu i latou e aʻoaʻo i le faapotopotoga i le poto mai le Atua, ae lē o ni manatu o le tagata lava ia, lea e mafai ona faatausuai ai le ʻauuso. Na fetalai Iesu e faapea: “Ai se na te faatausuai se tasi o i latou nei e faatauvaa o e faatuatua ia te au, e lelei i lea tagata pe ana nonoa se maaolo tele i lona ua, ma faagotoina o ia i le moana loloto.”—Mataio 18:6.
Faaipoipo Atu i se Tasi e Lē Upu Moni
13, 14. O le ā se tasi o faiga faaʻoleʻole na taʻua e Malaki?
13 E amata mai i le fuaiupu e 10 o le Malaki mataupu e 2 ma faasolo mai ai ona taʻu saʻo mai ai faiga faaʻoleʻole. E lua ni faiga e iai so la fesootaʻiga ua taulaʻi atu i ai faamatalaga a Malaki, lea sa ia faaaogā soo ai le upu “faaʻoleʻole.” Muamua, ia mātau o loo faatomua le fautuaga a Malaki i fesili nei: “E le ua toatasi ea le Tamā o i tatou uma lava. E le faia ea i tatou e le Atua e toatasi? Pe se a le mea ua tatou faaʻoleʻole ai le tasi i le tasi i lo tatou soli o le feagaiga a o tatou tamā?” Ona faaopoopo mai lea i le fuaiupu e 11 e faapea o faiga faaʻoleʻole a Isaraelu ua tusa lea ma le solia ai o “mea ua paia ia Ieova.” O le ā le mea matuiā naʻuā ua latou faia? O loo taʻu mai e le fuaiupu lenā se tasi o faiga sesē: Ua latou ‘fai avā i le afafine o le atua ese.’
14 I se isi faaupuga, o nisi tagata Isaraelu, o ē o se vaega o le nuu sa tuuina atu iā Ieova, ua faaipoipo atu i ē e lē tapuaʻi iā te ia. Ina ia iloa le māfuaaga ua matuā matuiā ai lenā faiga, ua faamanino mai e fuaiupu o le mataupu. Ua taʻu mai e le fuaiupu e 10 e faapea e tasi lo latou tamā. E lē o faasino iā Iakopo (lea na toe faaigoa iā Isaraelu), e lē o uiga foʻi iā Aperaamo, po o Atamu. O loo faaalia i le Malaki 1:6 e faapea o Ieova lo latou ‘tamā e toʻatasi.’ Sa iai sana faiā ma le nuu o Isaraelu, o i latou o se vaega i le feagaiga sa faia ma o latou tamā. O se tasi o tulafono i lenā feagaiga o loo faapea mai: “Aua le fetaiai gafa ma i latou, aua le avatu lou afafine mā lona atalii, aua foi neʻi e au mai lona afafine mā lou atalii.”—Teuteronome 7:3.
15. (a) O le a faapefea ona taumafai nisi e taʻuleleia le faaipoipo atu i sē e lē upu moni? (e) Ua faapefea ona faaali mai e Ieova lona finagalo e tusa ai o le faaipoipoga?
15 Atonu e manatu nisi i aso nei e faapea: ‘O le tagata lea ua ou fiafia pe faananau i ai e matuā lelei lava. Atonu e sau se taimi o le a ia taliaina ai le tapuaʻiga moni.’ O mafaufauga faapea ua faamaonia ai le lapataʻiga faagaeeina: “E sili le faaʻoleʻole o le loto i mea uma, ma ua matuā leaga lava.” (Ieremia 17:9) Na faailoa mai ai i le Malaki 2:12 le vaaiga a le Atua e tusa ai o le faaipoipo atu i sē e lē talitonu e faapea: “E vavaeeseina e Ieova le tagata ua faia lena mea.” O lea la, ua uunaʻia ai Kerisiano ina ia faaipoipo “tau lava i le ua i le Alii.” (1 Korinito 7:39) E tusa ai o le faatulagaga faa-Kerisiano, e lē o “vavaeeseina” se uso po o se tuafafine ona o le faaipoipo atu i se e lē upu moni. E ui i lea, afai e tumau pea le lē talitonu o lea tagata, faamata o le ā o le a tupu iā te ia pe a aumaia e le Atua le faaumatiaga o lenei faiga o mea lea ua toeitiiti lava oo mai?—Salamo 37:37, 38.
Faileagaina o le Paaga a se Tasi
16, 17. O le ā le faiga faaʻoleʻole na faia e nisi?
16 Na sosoo ai ma le taʻua e Malaki o le faaʻoleʻole lona lua: o le faileagaina lea o le paaga a se tasi, aemaise lava i le tatalaina o le faaipoipoga ona o se māfuaaga faatauvaa. Ua faapea mai le fuaiupu e 14 o le mataupu e 2: “O Ieova, o ia ua fai ma molimau ia te oe ma lau avā sa e fai a o ē taulealea, o lē ua e faaʻoleʻole i ai; a o ia sa lua mafuta [“lau paaga,” NW], o le avā foi o ia o lau feagaiga.” Na pei e ‘liloia i loimata’ le fata faitaulaga a Ieova ona o le faaʻoleʻole o tane Iutaia i a latou avā. (Malaki 2:13) Sa faaaogā e nei tane ni māfuaaga e lē tonu e tatala ai a latou faaipoipoga, ma tuuesea ai a latou avā na fai a o tauleleʻa, o se tulaga na lē tatau ona faia, atonu ina ia faaipoipo ai i ni fafine talavou po o fafine latou te lē tapuaʻi faatasi. Sa faatagaina lenā tulaga e faitaulaga lē faamaoni! Ae, ua folafola mai i le Malaki 2:16, “Ou te ʻinoʻino i le alei [“talaga faaipoipoga,” NW] ua fetalai mai ai Ieova le Atua o Isaraelu.” Na faaalia e Iesu mulimuli ane e faapea e na o le pau lava le māfuaaga mo se talaga faaipoipoga o le a mafai ai ona saʻoloto le paaga e leʻi agasala e toe faaipoipo, o le amio lē mamā.—Mataio 19:9.
17 Seʻi o tatou manatunatu i upu a Malaki, ma vaai po o faapefea ona faatupu e na upu le faalogona agaalofa i loto, e pei ona masani ai. O loo ia taʻua ‘lau paaga ma le avā o lau feagaiga.’ O tane uma na faasino i ai lenei fuaiupu sa faaipoipo ma sē e la te tapuaʻi faatasi, o se fafine Isaraelu, i le filifilia o ia e avea ma aumea faapelepele, o se paaga mo le olaga atoa. Atonu o le taimi lea o loo taufai talavou uma ai i laʻua, ae e lē avea le mavae atu o le taimi ma faasolo atu ina matutua ma tulaga o le a faalēaogāina ai le feagaiga na la faia, le feagaiga lea o le faaipoipoga.
18. O ā ni faiga i aso nei ua faatatau i ai le fautuaga a Malaki?
18 E matuā talafeagai foʻi i aso nei le fautuaga e tusa ai o na mataupu. O se tulaga e faanoanoa ai ona ua lē amanaʻiaina e nisi ia taʻiala a le Atua e faatatau i le faaipoipo atu tau lava o lē o i le Alii. Ua faapena foʻi le tulaga o i latou e lē o taumafai pea e faatumauina le māfana o a latou faaipoipoga. Na i lo lea, ua latou faia ni faamolemolega ma faatino le tulaga e inosia e le Atua e ala i le tatalaina o le faaipoipoga, ae e lē o lagolagoina e le Tusi Paia, ina ia faaipoipo atu ai i se isi tagata. O lo latou faia faapea, ua latou ‘faatiga ai ia Ieova.’ I le vaitaimi o Malaki, o i latou na lē amanaʻiaina fautuaga a le Atua, sa iā i latou se manatu faamaualuga e faapea e lē o tonu Ieova i ona manatu. E tusa ua latou faapea mai, “O ifea le Atua, o lē faamasino?” O se manatu e matuā leaga tele lea manatu! Tau ina ia aua lava neʻi tatou aafia i lenā manatu.—Malaki 2:17.
19. E mafai faapefea e tane ma avā ona maua le agaga o le Atua?
19 Ae o se vala e lelei, ona sa faailoa mai e Malaki le iai o ni tane sa leʻi faia ni faiga faaʻoleʻole i a latou avā. Sa iā i latou se vaega ‘o totoe o le agaga paia o le Atua.’ (Fuaiupu 15) O le tulaga e faafiafiaina ai ona o loo tele tane faapena i le faapotopotoga a le Atua o loo ‘ava ia latou avā.’ (1 Peteru 3:7) E latou te lē faileagaina a latou avā e ala i upu po o le faaoolima, o le a latou lē faamalosia le faia o feusuaʻiga matagā, ma o le a latou lē taʻufaatauvaaina a latou avā e ala i le fefaatosinaaʻi ma isi fafine pe e ala i le matamata i ata ma faamatalaga o faiga matagā faaleituaiga. Ua fiafia foʻi le faalapotopotoga ona o loo iai le tele o avā Kerisiano faamaoni o loo tumau i le Atua ma ana tulafono. Ua iloa e nei tane ma nei fafine mea e inosia e le Atua, ma ua latou manatunatu ma ola e tusa ai ma ia mea. Ia faaauau ona faapei o i latou, i le ‘anaana i le Atua o lo tatou pule’ ma faamanuiaina e ala i lona agaga paia.—Galuega 5:29.
20. O le ā le taimi ua lalata mai mo tagata uma lava?
20 Ua lē o toe mamao ona faamasinoina lea e Ieova lenei lalolagi atoa. E tatau i tagata uma ona tali atu iā te ia e tusa ai ma ona talitonuga ma ana mea na fai. “O lenei, e taitasi i tatou ma tala i lana amio i le Atua.” (Roma 14:12) O se fesili e faatupu manatu e tulaʻi mai i le taimi lenei e faapea: O ai o le a sao i le aso o Ieova? O le a talanoaina lenā matua i le mataupu lona tolu, ma o le mataupu faaiʻu foʻi lea o lenei faasologa.
E Mafai Ona E Faamatalaina?
• O le ā le māfuaaga autū na ala ai ona aʻoaʻia e Ieova faitaulaga i Isaraelu?
• Aiseā ua lē faigatā tele ai mo Kerisiano ona tausia tapulaa a le Atua?
• Aiseā e ao ai ona tatou manatunatu totoʻa i le auala tatou te aʻoaʻo atu ai i aso nei?
• O ā faiga e lua sa sili ona inosia e Ieova?
[Fesili mo le Suʻesuʻega]
[Ata i le itulau 15]
Na aʻoaʻia faitaulaga i le taimi o Malaki ona o lo latou lē tausisia o ala o Ieova
[Ata i le itulau 16]
E ao ona tatou manatunatu totoʻa e tusa ai o le aʻoaʻoina atu o ala o Ieova, ae aua le aʻoaʻoina atu o tatou lava manatu
[Ata i le itulau 18]
Na taʻusalaina e Ieova tane Isaraelu na faateʻa i a latou avā ona o ni māfuaaga faatauvaa ae faaipoipo atu i fafine faapaupau
[Ata i le itulau 18]
O Kerisiano i aso nei e faamaoni i a latou feagaiga tau faaipoipoga