Taʻitaʻiga Lelei—O Fea Tatou te Maua Ai?

“E TAITASI fale ma saunia e se tasi,” o le tala lea a le Tusi Paia, “a o le na te saunia mea uma lava o le Atua lea.” (Eperu 3:4; Faaaliga 4:11) Talu ai o le Atua moni, o Ieova, o Ia o Lē na Faia i tatou, ‘e silafia foʻi la e ia le mea na faia aʻi i tatou.’ (Salamo 103:14) E atoatoa lelei lona silafia i itu uma tatou te lape ai faapea foʻi o tatou manaʻoga. Ma e talu ai o ia o se Atua alofa, o lona finagalo foʻi la ia faamalieina na manaʻoga. (Salamo 145:16; 1 Ioane 4:8) E aofia ai i o tatou manaʻoga le mauaina o se taʻitaʻiga lelei.

E ala mai i le perofeta o Isaia, na folafola ai e Ieova e faapea: “Faauta, ua ou avatua o ia e fai ma molimau i le nuu, o le taʻimua [taʻitaʻi] ma le pule i le nuu.” (Isaia 55:4) O le vaifofō i le faalētonu tau taʻitaʻiga i aso nei e aofia ai le iloaina po o ai lenei Taʻitaʻi—ua tofia e Lē Ona le Malosi Uma Lava—ma taliaina lana taʻitaʻiga. O ai la lenei Taʻitaʻi ma le Pule na valoia mai? O ā ni ona agavaa i le avea ai ma taʻitaʻi? O fea o le a ia taʻitaʻiina atu i ai i tatou? O le ā e ao ona tatou faia ina ia manuia ai mai lana taʻitaʻiga?

Ua Taunuu le Taʻitaʻi Folafolaina

Pe tusa ma le 2,500 tausaga ua mavae, na faaali mai ai le agelu o Kaperielu i le perofeta o Tanielu ma taʻu mai iā te ia: “Ia e iloa foi  ma e manatunatu, e afua mai i le oo atu o le poloaiga ia toe faia ma ia atiina ae Ierusalema, e oo atu i le Mesia le Alii [“Taʻitaʻi,” NW], e fitu vaiasosa ma vaiasosa e onogafulu ma le lua, e toe faia le ala tele ma le pa i ona po lava o le puapuaga.”—Tanielu 9:25.

E manino lava, sa logoina e le agelu Tanielu e uiga i se taimi patino mo le afio mai o le Taʻitaʻi ua filifilia e Ieova. O le a aliali mai “le Mesia le Taʻitaʻi” i le iʻuga o vaiasosa e 69, po o tausaga e 483, lea e faitau mai le 455 T.L.M., ina ua faaoo atu le poloaʻiga e toe fausia Ierusalema. * (Neemia 2:1-8) O le ā na tupu i le iʻuga o lenā vaitaimi? Ua faamatala mai e le tusitala Evagelia o Luka e faapea: “O le tausaga e tasi le sefulu ma le lima i le nofoaiga a Tiperio Kaisara, sa pule Ponotio Pilato i Iutaia, o Herota foi o le tupu ia o Kalilaia [29 T.A.], . . . ua oo ane ai le afioga a le Atua ia Ioane le atalii o Sakaria i le vao. Ona alu atu ai lea o ia i le itu uma o Ioritana, ua talaʻi atu le papatisoga o le salamo ina ia faamagaloina agasala.” I lenā taimi, sa “faatalitali le nuu” i le Mesia le Taʻitaʻi. (Luka 3:1-3, 15) E ui ina ō ifo le motu o tagata iā Ioane, peitaʻi e lē o ia o lenā Taʻitaʻi.

Ona oo lea pe tusa o Oketopa i le 29 T.A., na alu ane ai Iesu le Nasareta iā Ioane ina ia papatisoina. Ona molimau ai lea o Ioane, ua faapea mai: “Na ou iloa le Agaga ua afio ifo mai le lagi, peiseai se lupe, ua nofo i ona luga. Ou te lei iloa o ia, peitai o ia na auina mai aʻu e papatiso i le vai, na fetalai mai o ia ia te au, O le e te iloa le Agaga ua afio ifo i ai, ma nofo i luga ia te ia, o ia lava lea na te papatiso i le Agaga Paia. Ua ou vaaia foi, ma ou molimau o ia lava le Alo o le Atua.” (Ioane 1:32-34) I le taimi o le papatisoga o Iesu, na avea ai o ia ma Taʻitaʻi faauuina—le Mesia, po o le Keriso.

Ioe, o lē na folafolaina mai o le a avea ma “taʻitaʻi ma le pule i le nuu” na faamaonia le faasino atu iā Iesu Keriso. Ma pe a tatou iloiloina ona uiga i le avea ai o se taʻitaʻi, e faigofie ona tatou iloa ai le silisili atu o lana taʻitaʻiga na i lo mea o loo moomia i aso nei mo se taʻitaʻi e sili ona lelei.

Le Mesia—O se Taʻitaʻi e Sili Ona Lelei

O se taʻitaʻi lelei, e na te aumaia taʻiala manino ma fesoasoani i tagata o loo ia vaavaaia ina ia iā i latou se uiga mautinoa ma le tomai, lea e mafai ai ona latou foʻia ma le manuia faafitauli. ‘Ua avea le iai o nei mea o se vala e tāua tele mo se taʻitaʻi ina ia taulau manuia i lenei senituri lona 21,’ o le faamatalaga lea a le tusi, 21st Century Leadership: Dialogues With 100 Top Leaders. Sa uigaese le lelei ona sauniunia e Iesu o lana ʻaufaalogologo ina ia mafai ona latou taulimaina tulaga o aso taʻitasi! Seʻi manatu foʻi i lana lauga sa sili ona taʻutaʻua—le Lauga i luga o le Mauga. O upu o lenā lauga o loo faamauina i le Mataio mataupu e 5-7, ua avea o ni fautuaga e sili ona aogā mo i tatou.

Mo se faaaʻoaʻoga, seʻi manatu i le fautuaga a Iesu i le foʻiaina o feeseeseaʻiga. Na ia fetalai mai: “Pe afai foi e te avatu lau taulaga i le fata faitaulaga, ona e manatua ai lea ua i lou uso se mea e tiga ai o ia ia te oe, ina tuu ia i lea mea o lau taulaga i luma o le fata faitaulaga, a e alu oe ia muai faalelei i lou uso, i le e sau ai, ma avatu lau taulaga.” (Mataio 5:23, 24) O le tausolomua i le faatupuina o le filemu ma isi e tatau lava ona faamuamua—e sili atu foʻi ona tāua na i lo le faatinoina o se tiute tau tapuaʻiga, e pei o le ofoina atu o meaalofa i luga o le fata faitaulaga i Ierusalema e pei ona sa tāpā mai e le Tulafono Faa-Mose. Pe a lē faia faapea, o le a lē taliaina foʻi e le Atua le tapuaʻiga. E tutusa lava le aogā o fautuaga a Iesu i aso nei, e pei foʻi ona sa iai i senituri ua mavae.

Na fesoasoani foʻi Iesu i lana ʻaufaalogologo ina ia latou ʻalofia le mailei o amioga lē mamā faaleituaiga. Na ia timaʻi mai iā i latou: “Ua outou faalogo, na fai mai i e anamua, Aua e te mulilua. A ou te fai atu aʻu ia te outou, ai se vaai atu i le fafine ina ia manao i ai, ua uma ona mulilua ma ia i lona loto.” (Mataio 5:27, 28) Maʻeu le fetaui o lenei lapataʻiga! Aiseā e amata ai fua ona tatou agaʻi atu i le itu e ono faia ai le mulilua, e ala i le faatupu aʻe o ni mafaufauga i na mea? Na fetalai Iesu, o le loto e puna mai ai le faitaaga ma le mulilua. (Mataio 15:18, 19) O  se mea atamai lo tatou leoleomaluina o o tatou loto.—Faataoto 4:23.

O loo iai foʻi i le Lauga i luga o le Mauga se fautuaga e sili ona lelei e tusa ai o le alofa atu o se tasi i ona fili, le faaalia o le limafoaʻi, le iai o le vaaiga saʻo i meafaitino ma mea faaleagaga, ma isi mea faapena. (Mataio 5:43-47; 6:1-4, 19-21, 24-34) Na faaalia foʻi e Iesu i lana aofia le auala e saʻili atu ai i le fesoasoani a le Atua, e ala i le aʻoaʻoina o i latou i le auala e tatalo ai. (Mataio 6:9-13) Ua faamalosia ma sauniunia e le Mesia o lē Taʻitaʻi ona soo ina ia latou faafetaiaʻia faafitauli o loo masani ai tagata.

I le Lauga i luga o le Mauga, e faaono ona amata ai e Iesu ana fetalaiga i le faaupuga “ua outou faalogo, na fai mai” po o le “sa fai mai foi,” peitaʻi na ia faaofi mai ai loa ma se isi manatu, i lona fetalai mai “a ou te fai atu aʻu ia te outou.” (Mataio 5:21, 22, 27, 28, 31-34, 38, 39, 43, 44) E faaalia ai i lenā mea, e iai se auala sa masani ona amioaʻi ai lana ʻaufaalogologo, e tusa ai o uputuu tuugutu a le ʻau Faresaio. Peitaʻi o lea ua faasino atu nei e Iesu iā i latou se isi faiga e ese mai—le faiga lea sa atagia mai ai le agaga moni o le Tulafono Faa-Mose. O lona uiga o lea sa faailoa atu e Iesu se suiga o le a iai, ma na ia faia i se auala e faigofie ai mo ona soo ona latou taliaina. Ioe, sa uunaʻia e Iesu tagata ina ia latou faia ni suiga tetele i o latou olaga, i le faaleagaga faapea i le itu tau amio. O se faailoga lenei o se taʻitaʻi moni.

I se tusi taʻiala mo le faatinoina o le matātā tau pule, o loo taʻua ai le faigatā tele ona faia o se suiga faapena. O loo faapea mai: “O le tagata [taʻitaʻi] lea e manaʻo e fai le suiga, e manaʻomia ona iā te ia lagona mataalia o le tagata faigaluega mo le lautele, le faautautaga mamao a se fomaʻi o le mafaufau, le malosi finafinau o se tagata tamoʻe i le malafoni, le uiga maumauaʻi o se taʻifau malosi, le uiga o le ola faalagolago e pei o se tagata ua ola faamonike, faapea ma le uiga onosai o se tagata paia. Ae tusa lava foʻi po ua iā te ia na uiga uma, ae lē o iai lava se faamautinoaga faapea o le a taulau manuia ana taumafaiga.”

Ua taʻua e se mataupu na faaulutalaina “Taʻitaʻiga: Pe Iai ea se Tāua o Uiga?” e faapea: “E tatau i taʻitaʻi ona amioaʻi i le tulaga lea o loo latou mananaʻo e amioaʻi mai ai tagata o loo i lalo o la latou taʻitaʻiga.” Ioe, o se taʻitaʻi lelei e na te faatinoina mea o loo ia aʻoaʻoina atu. Maʻeu le moni o lenā manatu i le tulaga sa iai Iesu Keriso! Ioe, sa ia aʻoaʻo atu i ē na latou faatasi ina ia lotomaulalo, ae sa ia faataatia foʻi se lesona faaaʻoaʻo o lenā mea mo i latou, e ala i lona mulumuluina o o latou vae. (Ioane 13:5-15) E leʻi na ona ia aauina atu o ona soo e talaʻi le tala lelei o le Malo o le Atua, ae na matuā faamalosi foʻi o ia lava i le faia o lenā galuega. (Mataio 4:18-25; Luka 8:1-3; 9:1-6; 10:1-24; Ioane 10:40-42) Ma e tusa ai o le tali atu i se taʻitaʻiga, na faataatia foʻi e Iesu se faaaʻoaʻoga. Na ia faapea mai e uiga iā te ia lava: “E le mafai e le Atalii ona fai o se mea, na o ia lava; a o mea na te vaai atu i le Tamā o faia.”—Ioane 5:19.

O le talanoaga ua taʻua i luga o mea na fetalai i ai Iesu, ma ia faia, ua faaalia manino mai ai e faapea, o ia o le Taʻitaʻi e sili ona lelei. O le mea moni, e sili mamao atu o ia na i lo o tapulaa uma lava faaletagata mo se taʻitaʻiga lelei. E lelei atoatoa Iesu. I lona mauaina o le ola e lē mafai ona toe oti ina ua mavae lona maliu ma lona toetū, ua soifua ai nei o ia e faavavau. (1 Peteru 3:18; Faaaliga 1:13-18) O ai se taʻitaʻi faaletagata e mafai ona tutusa atu ni ona agavaa i nei agavaa?

O le ā e Ao Ona Tatou Faia?

I le avea ma Tupu o lo o pule o le Malo o le Atua, o le a faatotō mai ai e le Mesia le Taʻitaʻi ia faamanuiaga i tagata usiusitai. E tusa ai o lenei manatu, ua folafola mai e le Tusi Paia: “E tumu le lalolagi i le malamalama o Ieova, e pei ona ufitia o le iliti tai i le suāsami.” (Isaia 11:9) “O e agamalu, e fai mo latou le nuu; e faafiafia foi i latou ia te i latou ona o le manuia e tele.” (Salamo 37:11) “E taitasi ma nofo i lalo o lona vine, ma lalo o lona mati; e leai foi se na te faamatau mai.” (Mika 4:4) “E ia te i latou le Atua lava. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:3, 4.

 O loo fesagaʻi le lalolagi i aso nei ma se faalētonu i le tulaga tau taʻitaʻiga. Peitaʻi ane, o Iesu Keriso, o loo ia taʻitaʻiina atu o ē agamalu i se lalolagi fou filemu, o inā o le a autasi ai tagata usiusitai i le tapuaʻiga iā Ieova le Atua ma agaʻi atu ai lava i le lelei atoatoa. Maʻeu le matuā tāua o lo tatou faaaluina o se taimi e mauaina ai le poto e uiga i le Atua moni ma lana Taʻitaʻi na ia tofia, ma gaoioi ai e ōgatusa ma lenā poto!—Ioane 17:3.

O se tasi o viiviiga e sili ona lelei e mafai ona tatou faia i se tagata, o le faataʻitaʻi atu lea iā te ia. Po ua lē tatau ea la ona tatou taumafai e faataʻitaʻi atu i le Taʻitaʻi sili i le talafaasolopito o le tagata—o Iesu Keriso? E mafai faapefea ona tatou faia lenā mea? O le ā se aafiaga o le a iai i o tatou olaga pe a taliaina lana taʻitaʻiga? O nei fesili faatasi ma isi fesili, o le a talanoaina i mataupu e lua o loo sosoo mai.

[Faamatalaga pito i lalo]

[Ata i le itulau 4]

Na valoia e Tanielu le afio mai o le Taʻitaʻi ua filifilia e le Atua

[Ata i le itulau 7]

O aʻoaʻoga a Iesu na sauniunia ai tagata mo le faafoeina o faafitauli o le olaga

[Ata i le itulau 7]

O le a taʻitaʻi atu e Iesu tagata usiusitai i se lalolagi fou filemu