Pe e Ao Ona E Talitonu i Ai?

SA TAUMAFAI le tamaitiiti aʻoga e 12 tausaga e malamalama i tulafono faavae mo le ituaiga matematika lea e taʻua o le algebra. Na tuuina atu e lona faiaʻoga i le vasega se galuega faamatematika sa foliga mai e saʻo.

Na amata i lona faapea mai: “O le x=y ma ia tutusa ia mataʻitusi uma ma le 1.”

Na manatu le tamaitiiti aʻoga, ‘e foliga mai e talafeagai.’

Peitaʻi, ina ua māeʻa laina e fā na foliga mai o se galuega faigofie, na tuu mai ai loa e le faiaʻoga se iʻuga e faateʻia ai: “O lona uiga la, 2=1!”

Ua ia luʻia ana tamaiti aʻoga ua fenuminumiaʻi i le faapea atu: “Aumai ni faamaoniga e iloa ai e sesē le tali lena.”

Ona e faatapulaa le poto na maua e lenei tamaitiiti aʻoga talavou e uiga i algebra, na te lē o iloa lava la pe faapefea ona faamaonia e sesē le tali. O laasaga uma lava o le galuega o loo talafeagai lelei. Pe ao la ona ia talitonu i lenei faaiʻuga e faateʻia ai? Aemaise ai, e sili atu le iloa ma le atamai o lona faiaʻoga i le matematika na i lo ia. O le mea moni la e lē tatau ona ia faia faapea! Na ia manatu ifo faapea, ‘E lē manaʻomia ona ou faamaonia le sesē o lana galuega na fai. Ae ua taʻu mai e loʻu mafaufau ia te aʻu e lē fetaui lenei faaiʻuga.’ (Faataoto 14:15, 18) Na ia iloa o le a lē mafai e lona faiaʻoga po o se tasi foʻi o ana uō i le vasega ona faafesuiaʻia le lua tālā mo se tālā se tasi!

I se taimi mulimuli ane, na maua ai e le tamaitiiti aʻoga le mea o loo sesē i le galuega. O le taimi lea, ua na aʻoaʻoina ai mai le mea na tupu se lesona tāua. E tusa lava pe tuuina mai e se tagata e maoaʻe lona poto se manatu ua fuafuaina lelei ma e foliga mai e lē mafesiligia lona saʻo, e lē manaʻomia mo le tagata faalogologo ona talitonu i se taunuuga valea ona pau lava le māfuaaga ua na lē maua se faamaoniga e sesē ai le manatu i lena taimi. Sa mulimuli moni lava le tamaitiiti aʻoga i le mataupu silisili e ese ma le aogā o loo maua i le 1 Ioane 4:1—ina ia aua le vave talitonu i mea uma e te faalogo i ai, e tusa lava foʻi pe foliga mai e sau mai se puna e aloaʻia.

E lē o le uiga o lea mea faapea o le a e faaua maaa mai le iloaina o manatu lē faavaea. O se measesē le lē amanaʻia o faamatalaga lea e mafai ona faasaʻoina ai se vaaiga sesē. Ae e lē tatau foʻi ona ‘vave luluina lou loto’ pe a feagai ai ma omiga mai se tasi e foliga mai e maoaʻe sona poto po o lana pule foʻi. (2 Tesalonia 2:2) O le mea moni, sa fai e le faiaʻoga sana togafiti i ana tamaiti aʻoga. E ui i lea, e lē āfaina tele nisi o mea i nisi o taimi. E mafai e tagata ona matuā faia ni “togafiti leaga ua saunia e faasese ai.”—Efeso 4:14; 2 Timoteo 2:14, 23, 24.

Pe e Saʻo Lava i Taimi Uma Tagata ua Lava le Poto Masani?

E tusa lava po o le ā le maoaʻe o lo latou poto o loo iai, ae o so o se tagata ua lava le poto masani i so o se matātā, e ono feteenaʻi a latou auala ma fesuisuiaʻi o latou manatu. Seʻi fai ma faaaʻoaʻoga le felafolafoaʻiga o loo faaauau pea e uiga i le malamalamaga faafomaʻi i le māfuaaga autū o faamaʻi. Na tusi se polofesa i mataupu faafomaʻi o le Harvard University e faapea: “E tusa ai o le māfuaaga o maʻi, ua mapuna aʻe ai se fefinauaʻiga i le vā o saienitisi po o lē fea e tāua, po o maʻi na fanau mai ma le tagata, po o le siʻosiʻomaga ma le soifuaga lautele.” O i latou e manatu o gaoioiga a tagata e māfua mai i ni puna e lē mafai e se tasi ona pulea, ua talitonu malosi faapea e mautinoa le iai o se sao o loo faia e o tatou sela fanau i le auala e aafia ai tatou i faamaʻi eseese. Peitaʻi, ua finau mai isi faapea o le siʻosiʻomaga ma le ituaiga o olaga, o vala tetele ia e māfua ai so o se mea i tagata. Na vave lava ona sii mai e itu uma e lua ia suʻesuʻega ma faamaumauga o fuainumera e lagolago ai o latou manatu. E ui i lea, o loo faaauau pea le felafolafoaʻiga.

 O manatu o tagata sa lauiloa ona o lo latou atamamai, na faapea ona faamaonia pea lava pea le sesē e ui lava o mea na latou aʻoaʻoina sa foliga mai i lena taimi e lē mafesiligia le saʻo. Na faamatalaina e le faifilosofia o Bertrand Russell ia Aristotle faapea o se tasi e “sili ona malolosi ana taaʻiga mai le ʻaufaifilosofia uma.” E ui i lea, na faailoa mai foʻi e Russell faapea o le tele lava o aʻoaʻoga a Aristotle e “matuā sesē” lava. Na ia tusi e faapea: “A o faagasolo lenei vaitaimi e foliga mai ai o taulau manuia uma lava i le faasaienisi, i le malamalama, pe i filosofia, ua faia e ui e tetee atoatoa i ai soo o Aristotle.”—History of Western Philosophy.

‘Le Mea ua Faaigoa Pepelo o le Poto’

E foliga mai na feiloaʻi atu uluaʻi Kerisiano i le toʻatele o ē sa avea ma soo o le ʻaufaifilosofia lauiloa a Eleni e pei o Socrates, Plato, ma Aristotle. Na manatu tagata sa lelei a latou aʻoaʻoga i lena vaitaimi ia i latou lava faapea e sili atu lo latou atamai faalemafaufau na i lo le toʻatele o Kerisiano. E lē toʻatele ni soo o Iesu na manatu i ai e “popoto e tusa ma le manatu o lenei lalolagi.” (1 Korinito 1:26, LF) O le mea moni, o i latou na aʻoaʻoina i filosofia o na vaitaimi sa latou manatu faapea, o mea ia sa talitonu i ai le ʻau Kerisiano e “faavalevalea” pe e “matuā leai se aogā.”—1 Korinito 1:23; Phillips.

Afai sa e iai faatasi ma na uluaʻi Kerisiano, pe o le a faateʻia ea oe i finauga ina ia faatalitonu ai isi a le vaega fai manatu atamamai toʻaitiiti o na aso pe maofa foʻi i le auala e faaalia ai lo latou atamai? (Kolose 2:4) O le a leai se māfuaaga mo lena mea, e tusa ai ma le manatu o Paulo. Na ia faamanatu atu i Kerisiano faapea e silasila Ieova i le “poto o e popoto” ma le “atamai o e atamamai” o le valea lena i na aso. (1 Korinito 1:19) Na ia fesili mai e faapea: “O le ā ua iai i le faifilosofia, le tusitala, ma lē faimanatu o lenei lalolagi e faaalia ai lo latou atamamai?” (1 Korinito 1:20, Phillips) E ui lava i le maoaʻe o o latou mafaufau, ae leʻi aumaia e le ʻaufaifilosofia, le ʻautusitala, ma le ʻaufaimanatu o aso o Paulo se tali moni i faafitauli o tagata.

O lea e ao ai i Kerisiano ona aʻoaʻo ia ʻalofia le mea na taʻua e le aposetolo o Paulo o ‘finauga ua faaigoa pepelo o le poto.’ (1 Timoteo 6:20, LT ) O le māfuaaga na taʻua ai e Paulo lena poto e “pepelo” ona sa lē iai i lena poto le vala tāua e tasi—o se puna o faamatalaga mai le Atua e mafai ona faatusatusa atu i ai a latou aʻoaʻoga ina ia mafai ona tofotofoina. (Iopu 28:12; Faataoto 1:7) O le leai o se puna faapena, ma i le taimi lava foʻi e tasi ua faatauasoina ai e le taufaasesē sili o Satani, o i latou e pipii mau atu i lena poto e leai lava ma se faamoemoe latou te ono maua le mea moni.—1 Korinito 2:6-8, 14; 3:18-20; 2 Korinito 4:4; 11:14; Faaaliga 12:9.

Le Tusi Paia—Se Taʻiala Faagaeeina

E leʻi masalosalo ia uluaʻi Kerisiano ua faaalia e le Atua lona finagalo, ana fuafuaga, ma mataupu silisili i le Tusi Paia. (2 Timoteo 3:16, 17) O lenei mea ua puipuia ai i latou mai le ‘faapologaina i le poto le aoga e faasese ai, e tusa ma le uputuu a tagata.’ (Kolose 2:8) O le tulaga faapena o loo iai foʻi i aso nei. Pe a faatusatusa atu manatu fenuminumiaʻi ma le feteenaʻi o tagata, ua saunia e le Afioga faagaeeina a le Atua se faavae mautū lea e mafai ona faavae ai o tatou talitonuga. (Ioane 17:17; 1 Tesalonia 2:13; 2 Peteru 1:21) Pe a aunoa ma lea ona tuua ai lea o i tatou i se tulaga e lē mafai ai ona tatou ati aʻe se mea e mautū i luga o manatu lē maufaatuatuaina ma lē tumau o aʻoaʻoga ma filosofia a tagata.—Mataio 7:24-27.

E ono fai mai faapea nisi: ‘Ae seʻi faatali a. Pe e lē saʻo ea faapea o mea moni a le faasaienisi ua na taʻusesēina le Tusi Paia ma o lea la ua lē toe faatuatuaina ai e pei lava o filosofia fesuisuiaʻi a tagata?’ Mo se faaaʻoaʻoga, na taʻutino mai Bertrand Russell e faapea “e ao ia Copernicus, Kepler, ma Galileo ona tetee atu ia Aristotle faapena foʻi ma le Tusi Paia i le faavaeina o le manatu faapea e lē o le lalolagi le ogatotonu o le vateatea.” (O upu faasisipa o ā matou.) Ma mo se faaaʻoaʻoga, pe lē moni ea faapea i aso nei, o loo maumauaʻi ai pea nisi tagata o loo aʻoaʻo le Tusi Paia faapea na foafoaina le lalolagi i aso e ono taʻi 24 itula, e ui lava o loo faailoa mai e mea moni uma faapea o le lalolagi lava ia ua faitau piliona tausaga le umi talu ona iai?

O le mea moni lava ia, e lē o faapea mai le Tusi Paia o le lalolagi o le ogatotonu lea o le vateatea. O le aʻoaʻoga lena a taʻitaʻi lotu lava latou  o ē latou te lē pipii mau atu i le Afioga a le Atua. O le tala i le Kenese e faatatau i le foafoaga ua faamaonia ai le faitau piliona o tausaga talu ona iai le lalolagi ma e lē o faatapulaa mai ai aso taʻitasi faalefoafoaga e taʻi 24 itula. (Kenese 1:1, 5, 8, 13, 19, 23, 31; 2:3, 4) O se saʻiliʻiliga faamaoni i le Tusi Paia ua faaalia ai faapea e ui e lē o se tusi o faamatalaga faasaienisi, ae e mautinoa foʻi e lē faapea e “matuā leai sona aogā.” O le mea moni, e matuā ōgatusa lelei ma le faasaienisi ua faamaonia. *

Le “Tomai e Fefulisaʻi Ai”

E ui o le toʻatele o soo o Iesu o tane ma fafine e lē taualoa, e foliga mai foʻi e lē maualuluga ni a latou aʻoaʻoga, ae sa latou maua se tasi mea aogā mai le Atua e mafai ona latou faaaogā. E ui lava i le eseese o o latou tupuaga, ae sa tuuina atu ia i latou uma le tomai e fefulisaʻi ai ma tomai e mafaufau ai. Na faalaeiau e le aposetolo o Paulo ona uso Kerisiano ina ia faaaogā atoatoa o latou “tomai e fefulisaʻi ai” (NW ) ina “ia [latou] suesue pe se a le finagalo o le Atua, o mea ua lelei, ma le mālie, ma le atoatoa.”—Roma 12:1, 2.

Faatasi ai ma lo latou “tomai e fefulisaʻi ai” mai le Atua, na iloa ai ma le manino e uluaʻi Kerisiano faapea o so o se filosofia po o se aʻoaʻoga e lē ōgatusa ma le Afioga a le Atua ua faaalia mai sa lē aogā lea. O le mea moni, i nisi o vala, o tane atamamai o o latou aso sa latou “taofi i le upu moni” ma lē amanaʻia ia faamaoniga sa ia i latou faapea e iai se Atua. Na tusi le aposetolo o Paulo e faapea: “Ua vālea i latou, a o faafiapopoto i latou.” Ona ua latou teena le mea moni e uiga i le Atua ma ana fuafuaga, “ua faavaleleaina i latou i lo latou taumasalosaloga, ua faapouliuligia foi o latou loto vālea.”—Roma 1:18-22; Ieremia 8:8, 9.

O ē faapea mai o i latou e atamamai e masani lava ona manatu faapea “E leai se Atua” po o le “E lē tatau ona faatuatuaina le Tusi Paia” po o le “E lē o aso nei e ‘gata ai.’” O manatu faapena, o le valea lena i fofoga o le Atua e pei lava o le faaiʻuga lea “2=1.” (1 Korinito 3:19) Po o le ā lava le tulaga po o le pule o loo tauaveina e se tagata, ae e lē tau manaʻomia ona e taliaina a latou faaiʻuga pe afai latou te tetee i le Atua, lē amanaʻia lana Afioga, ma e lē tusa ai ma le mafaufau talafeagai. O lona uiga la, o le ala atamai o le faaauau pea lea ona “tuu le faamaoni i le Atua, a o le pepelo i tagata uma lava.”—Roma 3:4.

[Faamatalaga pito i lalo]

[Faamatalaga i le itulau 31]

Pe a faatusatusa atu i manatu femoumouaʻi o tagata, o loo saunia e le Tusi Paia se faavae mautū e talitonu i ai

[Faamatalaga i Ata]

Agavale, Epicurus: Photograph taken by courtesy of the British Museum; pito i luga ogatotonu, Plato: National Archaeological Museum, Athens, Greece; taumatau, Socrates: Roma, Musei Capitolini