Lalolagi—Po ua na o se Nofoaga e Tofotofoina Ai?

MAʻEU se mapusaga! Ua pasi lana suʻega. O le teine aʻoga lea sa fesagaʻi ma faigatā mo le lua vaiaso o suʻega na mulimuli ane ia mauaina se lipoti e faafiafiaina ai. Ua mafai nei ona ia see atu i le galuega sa manaʻo lava i ai.

E toʻatele tagata latou te manatu faapena i le olaga i le lalolagi. Latou te manatu faapea o se uluaʻi tofotofoga lea e ao i tagata uma ona oo i ai. O i latou e “pasi” i le tofotofoga e see atu i se mea e sili atu ona lelei i se Olaga i Tala Atu o Lenei Olaga. O le mea moni, o se tulaga faanoanoa, pe afai o le olaga i le taimi nei—lea e manatu i ai le toʻatele ua na o le tau lava ina ola—o le mea lea e sili ona lelei e mafai ona faatalitalia e tagata. E ui ina soifua mālōlōina ma tamaoaiga mo se vaitaimi umi o lona olaga, ae na mātauina e le tagata o le Tusi Paia o Iopu e faapea: “O le tagata ua fanau mai i le fafine, ua saasaa ona aso, mona ua tumu i le atuatuvale.”—Iopu 14:1.

I le toe taʻua o le manatu o le toʻatele, na taʻua ai e le New Catholic Encyclopedia e faapea: “O le mamalu i le lagi o le taunuuga lea ua finagalo i ai le Atua mo tagata. . . . O le fiafia o le tagata e mafai ona taatia mai i lona mauaina o le parataiso i le lagi.” I se suʻesuʻega talu ai nei a le Ekalesia a Keriso i le Iunaite Setete na faaalia ai o le 87 pasene o i latou na tali mai, e talitonu faapea e foliga mai latou te ō i le lagi pe a feoti.

E toʻatele i latou e lē o ni Kerisiano o loo faamoemoe foʻi e tuua le lalolagi mo se nofoaga e sili atu ona lelei pe a feoti. Mo se faataʻitaʻiga o Musalimi, latou te faamoemoe e ō atu i se parataiso i le lagi. E talitonu tagata o vaega faalotu o le Laufanua Mamā (Pure Land) a le lotu Puta i Saina ma Iapani faapea e ala mai i le taʻua soo o “Amitabha,” o le igoa o le Puta o le Malamalama e Lē Gata Mai, o le a latou toe fanaufouina mai ai i le Laufanua Mamā, po o le Parataiso i Sisifo, lea o le a latou nonofo ai i le fiafiaga silisili.

O le mea e faateʻia ai, e lē o aumaia i le Tusi Paia, le tusi pito sili ona lautele lona faaliliuina ma le faasalalauina i le lalolagi, faapea o le lalolagi o se nofoaga e sola ese atu ai, pe i se uiga faapea o se nofoaga e nofosauni ai mo le olaga. Mo se faataʻitaʻiga, o loo taʻua faapea: “E fai lava le nuu mo tagata amiotonu, e nonofo ai pea i latou.” (Salamo 37:29) I le Tusi Paia o loo maua ai foʻi le faamatalaga taʻutaʻua a Iesu e faapea: “E faamanuiaina ē agamalu: auā e ao ona fai ma o latou tofi le lalolagi.”—Mataio 5:5, King James Version.

O le manatu lautele faapea o lo tatou soifuaga faalelalolagi e lē tumau ua faauiga ai faapea o le oti o le faitotoʻa lena i se isi olaga e tumu i le fiafia. Afai o lea, o lona uiga la e mautinoa o le oti o se faamanuiaga. Ae pe e vaai ea faapena tagata i le oti, po o latou taumafai ina ia faaumiumi lenei olaga? O mea ua tutupu e faaalia ai pe a oo ina olioli tagata i se soifua mālōlōina lelei ma saogalemu, latou te lē mananaʻo e feoti.

E ui i lea, talu ai ua faatumulia le olaga i le lalolagi i le leaga ma puapuaga, ua tumau ai la le vaaiga a le toʻatele faapea ua na o le lagi le nofoaga e maua ai le filemu ma le fiafiaga moni. Pe o le lagi ea ua na o se nofoaga fiafia ma filemu, e matuā auliuligia mai le leaga ma le feʻainaʻi? Ma po o le lagi ea ua na o lea se nofoaga e maua ai se Olaga i Tala Atu o Lenei Olaga? Atonu e faateʻia oe i tali a le Tusi Paia. Faamolemole ia faaauau pea ona faitau.