Na tusi atu le aposetolo o Paulo iā Timoteo, o lē sa avea foʻi ma toeaina: “Ou te matuā fai atu iā te oe i luma o le Atua ma Keriso Iesu, ma agelu ua filifilia, ina ia tausia nei faatonuga e aunoa ma le muaʻi faia o se faaiʻuga po o le faailoga tagata.”—1 Timo. 5:21.

Ina ia iloa po o ai e faasino i ai agelu filifilia, o le a tatou talanoaina muamua po o ai i latou e lē aofia ai i lenā vaega. E manino mai, e lē faasino atu i le 144,000. I le taimi na tusi atu ai Paulo iā Timoteo, e leai se isi o le ʻaufaauuina ua faatūina aʻe i le lagi. Talu ai e leʻi avea le ʻauaposetolo ma isi o le ʻaufaauuina o ni foafoaga agaga, e lē faasino atu la “agelu ua filifilia” iā i latou.—1 Kori. 15:​50-54; 1 Tesa. 4:​13-17; 1 Ioa. 3:2.

E lē faasino atu foʻi “agelu ua filifilia,” i agelu na lē usiusitaʻi i le taimi o le Lolo. Na aufaatasi atu na agelu iā Satani ma avea ai o ni temoni lea e teena e Iesu. (Kene. 6:2; Luka 8:​30, 31; 2 Pete. 2:4) I le lumanaʻi, o le a taofia i latou i le tō e lē gata mo le 1,000 tausaga, ma mulimuli ane faaumatia faatasi ma le Tiapolo.—Iuta 6; Faaa. 20:​1-3, 10.

E foliga mai la o “agelu ua filifilia” e faasino atu i agelu i le lagi o loo lagolagoina le “Atua ma Keriso Iesu,” auā o loo taʻua faatasi i latou i le 1 Timoteo 5:21.

E faitau afe ma afe agelu faamaoni. (Epe. 12:​22, 23) Ae e foliga mai e lē tutusa o latou tofiga e fai i le taimi e tasi. (Faaa. 14:​17, 18) O se faataʻitaʻiga, e na o le toʻatasi le agelu na faatonuina e faaumatia le ʻautau a Asuria e toʻa 185,000. (2 Tu. 19:35) Atonu e toʻatele agelu ua tofia e ʻao ese mai i le Malo o Iesu, o mea uma e māfua ai ona tausuai, ma tagata e solitulafono.’ (Mata. 13:​39-41) O isi agelu atonu o loo “aoaoina ē ua filifilia” mo le lagi. (Mata. 24:31) A o isi ua faatonuina e ʻleoleo i tatou i o tatou ala uma.’—Sala. 91:11; Mata. 18:10; faatusatusa i le Mataio 4:11; Luka 22:43.

E foliga mai la o “agelu ua filifilia” o loo taʻua i le 1 Timoteo 5:​21, ua tofia faapitoa e fesoasoani i tagata o le Atua. I le siʻomaga o le mau, na fautuaina ai e Paulo toeaina i le auala e taulima ai o latou tiute tauave, ma e ao i le faapotopotoga ona faaalia le faaaloalo i toeaina. Na tatau i toeaina ona faia o latou tiute tauave “e aunoa ma le muaʻi faia o se faaiʻuga po o le faailoga tagata,” ma ia ʻalofia le faia o faaiʻuga e aunoa ma le mafaufau lelei. O le māfuaaga na tāua ai ona latou mulimuli i le fautuaga a Paulo, ona o loo latou faia o latou tiute tauave “i luma o le Atua ma Keriso Iesu, ma agelu ua filifilia.” E manino mai la, ua tofia nisi agelu e fesoasoani i faapotopotoga, e pei o le saunia o le puipuiga, vaavaaia le galuega talaʻi, ma faamatala atu iā Ieova mea o loo latou mātauina.—Mata. 18:10; Faaa. 14:6.