1. Aiseā e tatou te olioli ai ma mitamita o ni Molimau a Ieova?

MAʻEU lo tatou olioli ma mitamita i le avea o i tatou o ni Molimau a Ieova! O loo tatou tauaveina le suafa o le Atua ma ola e tusa ai ma lenā igoa, e ala i le faia o se sao i le galuega talaʻi ma le faia o isi ma soo. E tatou te maua le fiafia pe a tatou fesoasoani i se tasi, ua ʻsaunia lona loto mo le ola e faavavau’ ina ia avea ma soo. (Galu. 13:48) E tatou te fiafia foʻi e pei o Iesu na “matuā fiafia . . . o ia i le agaga paia,” ina ua foʻi mai ona soo ma se tala fiafia e faatatau i la latou talaʻiga.​—Luka 10:1, 17, 21.

2. E faapefea ona faaalia e tāua iā i tatou la tatou faiva?

² E matuā tāua iā i tatou la tatou faiva. Na faalaeiauina e le aposetolo o Paulo Timoteo e ʻuaʻi totoʻa atu iā te ia lava ma lana aʻoaʻo atu.’ Na faapea atili atu Paulo: “O le faia faapea e faaolaina ai oe lava atoa ma i latou o faalogo iā te oe.” (1 Timo. 4:16) O lea, e toʻatele tagata e tatau ona tatou talaʻi i ai ina ia faaolaina. E tatou te uaʻi totoʻa iā i tatou lava ona o i tatou o tagatānuu o le Malo o le Atua. E tatou te mananaʻo e gaoioi i taimi uma ina ia viiviia ai Ieova ma ia ōgatusa ma le tala lelei o loo tatou talaʻia. (Fili. 1:27) E tatou te uaʻi totoʻa atu i la tatou aʻoaʻo atu, e ala i le sauniuni lelei mo le talaʻiga ma tatalo mo le faamanuia a Ieova a o leʻi talaʻi atu i isi.

3. O le ā le tali mai a nisi i le feʻau o le Malo o loo tatou talaʻia? Aumai se faaaʻoaʻoga.

³ E ui e tatou te faia le mea e sili e talaʻi ai i la tatou oganuu, ae atonu e itiiti pe leai foʻi nisi e talilelei mai i le feʻau o le Malo o loo tatou talaʻia. Seʻi mātau le mea na tupu i le uso o Georg Lindal. E na o ia lava na talaʻi i le atunuu o Iceland mai i le 1929 i le 1947. E faitau afe lomiga na ia tufaina atu, peitaʻi e leai ma se tasi na taliaina le upu moni. Na ia tusi mai: “O nisi e foliga na tetee i le upu moni ae o le toʻatele e leʻi ano i ai.” Na taunuu  atu foʻi misionare na aʻoaʻoina i le aʻoga o Kiliata, ma faalautele atu le galuega. Peitaʻi, faatoʻā tuuina atu iā Ieova ma papatisoina nisi mai lenā atunuu, i le pe ā ma le iva tausaga mulimuli ane ai. *

4. O ā o tatou faalogona pe a lē talilelei mai tagata i le tala lelei o le Malo?

⁴ E tatou te lotovaivai pe a lē talilelei mai tagata i la tatou talaʻiga. Atonu e pei o tatou faalogona o faalogona o Paulo, na ʻmatuā mafatia ma tigā tele lona loto’ ona e toʻatele tagata Iutaia na teena Iesu o le Mesia na folafolaina. (Roma 9:1-3) Ae faapefea pe afai e te tatalo faatauanau iā Ieova ina ia fesoasoani i lau tagata aʻoga, ae lē o agaʻigaʻi i luma ma ua manaʻomia ai ona faamuta lana suʻesuʻega? Ae ā pe afai e te leʻi faia lava se suʻesuʻega a se tasi ma agavaa ai e papatiso? Pe e tatau ona e tuuaʻia oe ma faapea ai e lē o faamanuia Ieova i lau faiva? E lua ni fesili o le a tatou taliina i lenei suʻesuʻega: (1) O le ā e fua i ai le taulau manuia o le faiva a se tasi? (2) O ā tulaga moni e tatau ona tatou faatalitalia i la tatou talaʻiga?

5. Aiseā e ono lē taulau ai mea uma e tatou te mananaʻo e faia mo Ieova?

⁵ Ua faamatalaina i le Tusi Paia le tagata e na te faia le finagalo o le Atua: “E taulau manuia mea uma e na te faia.” (Sala. 1:3) Peitaʻi, e lē uiga ai o le a taulau manuia mea uma e tatou te mananaʻo e faia mo Ieova. “Ua tumu i le atuatuvale” olaga o tagata ona e tatou te lē lelei atoatoa. (Iopu 14:1) E lē gata i lea, atonu e taulau mo sina taimi tagata tetee, i le taofia o le faia o la tatou galuega talaʻi i le auala masani. (1 Kori. 16:9; 1 Tesa. 2:18) O lea la, o le ā e fua i ai e Ieova le taulau manuia o la tatou faiva? Seʻi o tatou iloiloina nisi o mataupu silisili o le Tusi Paia, ina ia tali ai lenā fesili.

6. E faapefea ona fua e Ieova le taulau manuia o la tatou faiva?

⁶ E silasila Ieova i a tatou taumafaiga ma lo tatou tumau. E lē fuaina e Ieova le taulau manuia o la tatou faiva i le tali mai a tagata. Ae pe a tatou talaʻi ma le maelega ona e tatou te alolofa iā te ia, ua tatou taulau manuia la i lana silafaga. Na tusi Paulo: “Auā e lē amiolētonu le Atua e na te lē faagalogalo ai la outou galuega, ma le alofa ua outou faaali mai i lona suafa,  auā ua outou auauna i le ʻaupaia, ma o loo outou auauna pea i ai.” (Epe. 6:10) E manatua e Ieova a tatou taumafaiga ma lo tatou alofa mo ia, e tusa lava pe lē talilelei mai tagata. O lea la, ua moni ai upu a Paulo i le faapotopotoga i Korinito: “E lē iʻuvale a outou galuega fitā i le Alii,” e tusa lava pe e lē tali mai tagata e pei ona e manaʻo ai.​—1 Kori. 15:58.

7. O le ā e tatou te aʻoaʻoina mai i le auala na faamatala ai e le aposetolo o Paulo lana faiva?

⁷ Na taulau manuia le aposetolo o Paulo o se  misionare i le faatutūina o faapotopotoga fou i le tele o aai. Ae ina ua luʻia lona agavaa o se faifeʻau a Keriso, e leʻi taulaʻi atu Paulo i le toʻatele o tagata na fesoasoani i ai e avea ma Kerisiano. Peitaʻi, na faamaonia e Paulo le sesē o tuuaʻiga a i latou na faasilisilia i latou lava ina ua tusi atu: “Ua sili aʻu . . . galuega.” (2 Kori. 11:23) Ia tatou faaaʻoaʻo iā Paulo ma ia manatua, e sili atu ona tāua iā Ieova a tatou taumafaiga fitā ma lo tatou tumau.

8. O le ā e tatau ona tatou manatua e faatatau i la tatou faiva?

⁸ E faafiafiaina Ieova i la tatou faiva. Na auina atu e Iesu ona soo e toʻa 70 e talaʻi le feʻau o le Malo. Ae ina ua uma la latou talaʻiga, na latou “toe foʻi mai . . . ma le olioli.” Aiseā na latou olioli ai? Na latou faapea mai: “Ua usiusitaʻi mai foʻi temoni iā i matou ona o lou suafa.” Peitaʻi, na faasaʻo e Iesu o latou manatu i lona fetalai atu: “Aua neʻi o outou olioli i lenei mea, ina ua usiusitaʻi agaga iā te outou. Ae ia olioli ona ua tusia o outou igoa i le lagi.” (Luka 10:17-20) Na silafia e Iesu, e lē o taimi uma e tutupu ai ni mea mataʻina faapena i le latou faiva. O le mea moni, e tatou te lē iloa pe toʻafia i latou na faalogo i le talaʻiga a le ʻausoo na avea ma soo o Iesu. Na manaʻomia ona maua e le ʻausoo le olioli i mea na latou faataunuuina i le galuega talaʻi, ae o le mea e sili ona tāua o lo latou iloa ua latou faafiafiaina Ieova ona o a latou taumafaiga maumauaʻi.

9. I le Kalatia 6:7-9, o le ā e tatou te maua pe a tatou tumau i la tatou faiva?

⁹ Pe a tatou tumau i la tatou faiva, o le a tatou maua ai le ola e faavavau. A o tatou faia le mea e sili e aʻoaʻo ma talaʻi ai le tala lelei, ua tatou ʻlūlū foʻi la e tusa ma le agaga’ ma ua tatou faataga le agaga paia o le Atua e taʻitaʻia o tatou olaga. Pe a tatou lē “fiu” ma “lē faavaivai,” ua faamautinoa mai e Ieova, o le a tatou selesele i le ola e faavavau, e tusa lava pe tatou te leʻi fesoasoani i se soo fou e tuuina atu ma papatisoina.​—Faitau le Kalatia 6:7-9.

10. O le ā e fua i ai le tali mai a tagata i la tatou galuega?

¹⁰ E faalagolago le tali mai a tagata i tulaga o ō latou loto. Na faamatala e Iesu lenei upu moni i lana talafaatusa e faatatau i le tagata na lūlū fatu i eleele eseese, ae na o le tasi le eleele na ola ai fatu ma fua mai. (Luka 8:5-8) Na fetalai Iesu o eleele eseese e faaāta mai ai tagata lea e eseese auala e tali mai ai o latou loto ʻi le upu a le Atua.’ (Luka 8:11-15) E pei i tatou o le tagata lūlū fatu, e lē mafai ona tatou pulea le fua mai o a tatou galuega, ona e faalagolago lava i loto o tagata e tatou te talaʻi i ai. O la tatou matafaioi o le lūlū pea o fatu lelei o le feʻau o le Malo. Na faapea mai Paulo, “e maua e tagata taʻitoʻatasi lona lava taui e tusa ma ana galuega,” ae e lē tusa ma le iʻuga o ana galuega.​—1 Kori. 3:8.

11. Aiseā na taulau manuia ai Noa o ʻsē e talaʻi le amiotonu’? (Tagaʻi i le ata i le faavaa.)

¹¹ Na feagai foʻi uluaʻi Molimau a Ieova ma tagata e lē fia faalogo. O se faataʻitaʻiga, na avea Noa o “lē e talaʻi le amiotonu” mo le tele o tausaga. (2 Pete. 2:5) E mautinoa na manaʻo Noa ia talileleia e tagata lana talaʻiga. Ae e leʻi fetalai Ieova o le a tupu se mea faapena. Ina ua faatonuina e le Atua Noa e fau le vaa, na ia fetalai atu: “E ao ona e ulu atu i totonu o le vaa, o oe ma ou atalii ma lau avā, ma avā a ou atalii.” (Kene. 6:18) Pe a fua i le vaa na faatonuina e le Atua Noa e fau ma mea e mafai ona ofi ai, atonu la na iloa e Noa, e lē toʻatele ni tagata e talilelei mai i lana talaʻiga. (Kene. 6:15)  Ae ua tatou iloa e leai ma se isi i lenā lalolagi sauā na talileleia le talaʻiga a Noa. (Kene. 7:7) Pe na manatu Ieova e leai se aogā o le talaʻiga a Noa? E leai. Na silasila le Atua iā Noa o se tagata talaʻi taulau manuia, ona na faamaoni e fai le galuega na tuu atu iā te ia.​—Kene. 6:22.

12. Na faapefea ona maua e le perofeta o Ieremia le olioli i lana auaunaga, e ui i teteega ma le lē ano mai o tagata?

¹² Na fesagaʻia foʻi e le perofeta o Ieremia mo le tele o tausaga teteega ma le lē ano mai o tagata. O lea na matuā lotovaivai ai Ieremia ma manaʻo e faamuta lana auaunaga, ona o le ulagia ma le faalumaina o ia e tagata tetee. (Iere. 20:8, 9) Ae e leʻi fiu ai Ieremia. Na faapefea ona foʻia ona manatu sesē ma maua ai le olioli i lana auaunaga? E lua ni mea tāua na taulaʻi ai o ia. Muamua, o le feʻau a le Atua na taʻu atu e Ieremia i tagata, na aofia ai “se lumanaʻi ma se faamoemoe.” (Iere. 29:11) Lua, na tuu atu e Ieova iā Ieremia e na te tauaveina lona suafa. (Iere. 15:16) O loo tatou taʻu atu foʻi i lenei lalolagi pogisa se feʻau o le faamoemoe, ma o loo tatou tauaveina foʻi le suafa o Ieova o ni ana Molimau. Pe a tatou taulaʻi atu i na mea tāua e lua, o le a tatou maua la le olioli, po o le ā lava le tali mai a tagata.

13. O le ā e tatou te aʻoaʻoina mai i le talafaatusa a Iesu i le Mareko 4:26-29?

¹³ E faasolosolo ona tuputupu aʻe faaleagaga se tasi. Na aʻoaʻo e Iesu lenei upu moni i lana talafaatusa i le tagata lūlū fatu na moe. (Faitau le Mareko 4:26-29.) Na faasolosolo ona fua mai galuega a le tagata lūlū fatu, ma e lē o se mea e mafai ona ia pulea. Atonu e pei foʻi i tatou o lenā tagata lūlū fatu. E lē mafai ona tatou iloa iʻuga o le faia o isi ma soo mo se taimi, ona e faasolosolo le tuputupu aʻe o le fatu, ma e tuputupu aʻe i ni vaega. E lē mafai e se faifaatoʻaga ona faamalosia le tuputupu aʻe o ana meatotō e tusa ai ma lona manaʻo. E lē mafai foʻi la ona tatou faamalosia le tuputupu aʻe faaleagaga o a tatou tagata aʻoga o le Tusi Paia, i le vave e tatou te mananaʻo ai. O lea, aua le fiugofie pe lotovaivai pe a umi se taimi e lē fua mai lau tagata aʻoga e pei ona e manaʻo ai. O le faia o isi ma soo e manaʻomia ai le onosaʻi, e pei o le galueaʻiina o se faatoʻaga e umi se taimi e faatali ai faatoʻā fua mai.​—Iako. 5:7, 8.

14. O le ā se faaaʻoaʻoga e iloa ai, e ono umi se taimi faatoʻā faalogo mai tagata i la tatou talaʻiga?

¹⁴ I nisi vaipanoa, e umi se taimi e tatou te faatali ai faatoʻā fua mai le galuega talaʻi. Seʻi mātau le mea na tupu ia Gladys ma Ruby Allen, * o se ʻauso teine na tofia o ni paeonia sauatoa i se taulaga i le itumalo o Quebec i Kanata, i le 1959. O omiga mai i tagata i lenā vaipanoa ma taaʻiga a le lotu Katoliko, na matuā lē fia faalogo ai lava tagata i le feʻau o le Malo. Na taʻua e Gladys: “Na ma talaʻi mai i le fale i le fale i le valu itula i le aso mo le lua tausaga, e aunoa ma le taliaina e se tasi o i maʻua i lona fale. Na o le ō mai lava o tagata i le faitotoʻa ma toso i lalo pupuni, ae ma te leʻi fiu ai.” A o faagasolo taimi, na suia uiga o tagata, ma na iai ni tagata na fia faalogo i le talaʻiga. I le taimi lenei, e tolu faapotopotoga ua iai i lenā taulaga.​—Isa. 60:22.

15. E tusa ai o le 1 Korinito 3:6, 7, o le ā e tatou te aʻoaʻoina mai ai e faatatau i le faia o isi ma soo?

¹⁵ O le faia o isi ma soo, e manaʻomia ai le fesoasoani a tagata e toʻatele. Ua masani ona tatou faapea atu e manaʻomia le fesoasoani a tagata uma i le faapotopotoga ina ia agavaa ai se tasi mo le papatisoga. (Faitau le 1 Korinito 3:6, 7.) O se faataʻitaʻiga, pe a tuu  e se tagata talaʻi se sāvali po o se mekasini i se tagata fiafia. Atonu e lē avanoa lenā tagata talaʻi e toe asi le tagata fiafia, o lea e talosaga atu ai i se isi tagata talaʻi e na te asia lenā tagata. Ua mafai e le tagata talaʻi ona amata se suʻesuʻega faale-Tusi Paia. E na te valaaulia isi uso ma tuafāfine e auai i le suʻesuʻega ma e eseese auala e faalaeiau ai e uso ma tuafāfine le tagata aʻoga. O uso uma ma tuafāfine e feiloaʻi i ai le tagata aʻoga, e latou te fesoasoani i le faasūsūina o le fatu o le upu moni. O lenā auala, e pei ona taʻua e Iesu, e olioli faatasi ai lē lūlū ma lē selesele i le seleselega faaleagaga.​—Ioa. 4:35-38.

16. Aiseā e mafai ai ona e maua le olioli i lau faiva, e tusa lava pe lē atoatoa lou soifua mālōlōina ma le malosi?

¹⁶ Ae faapefea pe afai ua faatapulaa mea e mafai ona e faia i le talaʻiga ma le aʻoaʻo atu, ona ua lē lelei le soifua mālōlōina po ua lē lava foʻi le malosi? E mafai lava ona e maua le olioli i le faia o sou sao i lenei galuega. Seʻi manatu i le mea na tupu i le tupu o Tavita, ina ua ia laveaʻiina ma lana ʻautau o latou aiga ma mea uma na fāoa e tagata Ameleka. E toʻalua selau tamāloloa o lana ʻautau na matuā vaivai ma lē mafai ona ō e tau, o lea na latou faamuli ai e leoleo a latou ato. Ina ua manumalo Tavita ma lana ʻautau i le taua, na faatonu ai e Tavita ia tutusa le faasoaina i tagata uma o ʻoa na maua mai le vete. (1 Samu. 30:21-25) E faapena foʻi la tatou galuega o le faia o isi ma soo i le lalolagi aoao. O i latou uma e faia le mea sili e mafai ona faia i lenā galuega, e tutusa le olioli e latou te maua pe a laveaʻiina se tasi ma fesoasoani iā te ia e amata ona savali i le ala o le ola.

17. Aiseā e tatou te faafetai atu ai iā Ieova?

¹⁷ E tatou te faafetaia Ieova i le auala alofa e silasila mai ai i la tatou auaunaga iā te ia. E na te silafia e lē mafai ona tatou pulea le iʻuga o a tatou lava taumafaiga. E ui i lea, e na te mātauina lo tatou galulue mamafa ma o tatou uiga lelei, ma e na te tauia i tatou. O loo ia aʻoaʻoina foʻi i tatou ina ia tatou maua le olioli i la tatou vaega o loo faia i le seleselega tele. (Ioa. 14:12) E mautinoa e fiafia le finagalo o le Atua iā i tatou, pe a tatou lē fiu i le faia o lona finagalo.