UA FAAPEA mai Lisa *: “Na sili atu ona ou tosina i le agalelei o uso ma tuafāfine Kerisiano nai lo se isi lava mea.” Na uiga atu lana faamatalaga i le vala muamua na tosina ai o ia i le upu moni. Na taʻutino mai foʻi Anne: “O le agalelei o Molimau na ou tosina ai i le upu moni, nai lo o a latou aʻoaʻoga.” Na iai se aafiaga tele o le agalelei i na tuafāfine, ma ua la olioli nei i le faitauina o le Tusi Paia ma manatunatu loloto i ai.

E faapefea ona tatou faaalia le agalelei i se auala e pāʻia ai loto o tatou tuaoi? Seʻi o tatou talanoaina ni auala se lua: o la tatou tautala ma a tatou gaoioiga. O le a talanoaina foʻi, po o ai i latou e tatau ona faaalia i ai le agalelei.

O loo faamatalaina i le Faataoto mataupu 31 se avā lelei, e i lona laulaufaiva “le tulafono o le agalelei.” (Faata. 31:26. NWT.) E na te faatagaina lenā “tulafono” e iloilo ai lona leo ma mea e tautala atu ai. E tatau foʻi i tamā ona i o latou laulaufaiva lenā “tulafono.” E iloa lelei e le toʻatele o mātua, e iai se aafiaga lē lelei o a latou faamatalaga inainā i a latou fanau. Pe a malolosi tala a mātua ma paū o latou leo, e ono lē fia faalogo mai le fanau. Ae pe a tautatala mātua i se auala agalelei, o le a faigofie ona faalogo ma usiusitaʻi fanau iā i latou.

E tusa po o oe o se matua pe leai, e faapefea ona e faaalia le agalelei i le auala e te tautala ai? E maua le tali i le vaega muamua o le Faataoto 31:26: “Ua tautala o ia ma le atamai.” E aofia i lenā mea le filifili ma le atamai o a tatou upu ma o tatou leo. E aogā le fesili ifo, ʻPo o le a faatupu le ita po o le filemu i se tala ou te fai atu ai?’ (Faata. 15:1) Ioe, e atamai le mafaufau muamua a o leʻi tautala.

Ua faapea mai foʻi se isi faataoto: “O le tagata e tautala lē mafaufau, ua pei o le tutuʻi o le pelu.” (Faata. 12:18) E ono uunaʻia i tatou e pulea le tautala, pe a mafaufau muamua i le auala e aafia ai isi i a tatou upu ma o tatou leo. E fesoasoani lo tatou faatatauina o le “tulafono o le agalelei,” e taofia ai i tatou mai i le faaaogāina o upu malolosi ma se leo inainā. (Efe. 4:31, 32) O le a suia ai o tatou mafaufauga ma upu lē saʻo, i upu agalelei ma se leo mālū. Na faataatia e Ieova se faaaʻoaʻoga mataʻina o lenā vala, ina ua ia faamāfanafana atu iā Elia lana auauna na lagona le fefe. Na talanoa atu iā Elia le agelu na fai ma sui o Ieova i “se leo itiiti e toʻafilemu.” (1 Tu. 19:12) O le mea moni, e iai isi mea e aofia ai i le faaalia o le agalelei nai lo le tautala i se auala agalelei. E tatau foʻi ona tatou faia gaoioiga agalelei. E faapefea?

E tatou te tautatala i upu ma faia gaoioiga agalelei pe a faaaʻoaʻo iā Ieova. (Efe. 4:32; 5:1, 2) Na faamatala e Lisa lea na taʻua muamua le faia e Molimau o gaoioiga agalelei mo ia. “Ina ua faafuaseʻi ona siitia lo matou aiga, na ave ai ni aso mālōlō o ni ulugalii se toʻalua o la matou faapotopotoga ina ia fesoasoani ai i le teuina o a matou mea. Ae ou te leʻi suʻesuʻeina le Tusi Paia i lenā taimi!” O na gaoioiga agalelei na uunaʻia ai Lisa e fia iloa atili le upu moni.

Na talisapaia foʻi e Anne lea na taʻua muamua, le agalelei o Molimau a Ieova iā te ia. Na  ia faapea mai: “Talu ai ona o le tulaga o mea i le lalolagi, na oo ai iā te aʻu le uiga masalosalo. Na faigatā ai iā te aʻu ona talitonuina tagata. Ou te leʻi talitonu i Molimau a Ieova ina ua ou feiloaʻi i ai. Na ou faapea ane, ʻAiseā e latou te fiafia ai iā te aʻu?’ O le agalelei o laʻu faiaʻoga, na uunaʻia ai aʻu e talitonuina o ia.” O ā iʻuga lelei na maua e Anne? Na toe faapea mai o ia: “Mulimuli ane, na amata ai ona ou mafaufau loloto i mea na ou aʻoaʻoina.”

Na matuā pāʻia loto o Lisa ma Anne i gaoioiga agalelei a uso ma tuafāfine i le faapotopotoga, ma na fesoasoani lenā e la te fia iloa atili ai le upu moni. Na fesoasoani foʻi e la te maufaatuatuaina ai Ieova ma ona tagata.

E masani ona tautatala nisi tagata i upu agalelei ma mata ʻataʻata, ona o a latou aganuu ma le auala na ola aʻe ai. E lelei na uiga faaaloalo e māfua mai i aganuu po o uiga masani. Ae pe afai e na o le pau lenā o le uunaʻiga e tatou te faaalia ai le agalelei, atonu la e tatou te lē o faaalia le agalelei mai le Atua.​—Faatusatusa i le Galuega 28:2.

 O le agalelei mai le Atua o se vala o le fua o le agaga paia o le Atua. (Kala. 5:22, 23) O lona uiga la, o le atiaʻeina o le agalelei e tatou te manaʻomia ai le fesoasoani a le agaga paia. E ōgatusa lenā ma lo tatou faanaunauga e faaaʻoaʻo iā Ieova ma Iesu. E tatou te faaalia foʻi le naunau moni i isi ona o i tatou o Kerisiano. O lea, e uunaʻia i tatou e lo tatou alofa mo Ieova le Atua ma tagata e faia ai faapea. O lo tatou agalelei la, o se uiga e matuā aogā, e sau mai i le loto ma e finagalo malie i ai le Atua.

O se mea masani le faaalia o le agalelei i ē e tatou te masani ai po o i latou e faaalia mai lenā uiga. (2 Samu. 2:6) O se tasi o auala e faaalia ai, o le faafetai atu iā i latou. (Kolo. 3:15) Ae ā pe a tatou manatu e lē tatau ona tatou faaalia le agalelei i se tasi?

Seʻi manatu i le mea lenei: Ua faataatia e Ieova se faaaʻoaʻoga sili o le faaalia o le agalelei faifua. Ua aʻoaʻoina foʻi i tatou e lana Afioga i le auala e faaalia ai lenā uiga. E tele taimi o loo faaaogā ai i Tusitusiga Paia Eleni le faaupuga “agalelei faifua.” E faapefea ona faaalia e le Atua le agalelei iā i tatou?

Seʻi mafaufau i le faitau miliona o tagata ua faaalia i ai e Ieova le agalelei, e ala i le saunia o mea e latou te manaʻomia ina ia ola ai. (Mata. 5:45) O le mea moni, e oo lava i tagata e leʻi iloa muamua Ieova na ia faaalia i ai le agalelei. (Efe. 2:4, 5, 8) O se faataʻitaʻiga, na faia e Ieova le mea sili e ala i le foaʻi mai o lona Alo pele e toʻatasi e maliu mo tagata uma. Na tusi le aposetolo o Paulo na saunia e Ieova le togiola, “e tusa ma le matuā tele o lona agalelei faifua.” (Efe. 1:7) E lē gata i lea, e ui ina tatou agasala ma faia mea e lē fiafia ai Ieova, ae e na te faatonutonuina ma aʻoaʻoina pea i tatou. E tai pei ana faatonuga ma ana fetalaiga o se “timu maamaa.” (Teu. 32:2) E lē mafai ona tatou tauia atoatoa le agalelei uma o Ieova iā i tatou. O le mea moni, e tatou te faalagolago i le agalelei o Ieova e maua ai le faamoemoe mo le lumanaʻi.​—Faatusatusa i le 1 Peteru 1:13.

E mautinoa o le agalelei o Ieova, e tatou te lagona ai le alofa ma faamalosia ai i tatou. O le iʻuga e tatou te faaalia ai le agalelei i tagata uma, ma e tatou te taumafai malosi e faaaʻoaʻo iā Ieova e ala i le faaalia o le agalelei i aso uma o le olaga. (1 Tesa. 5:15) Pe a faaauau pea ona tatou faaalia le agalelei, o le a pei ai i tatou o se afi e faamāfanafana ai i se aso mālūlū. O le a avea ai i tatou ma ni ē e faamāfanafana i o tatou aiga, uso ma tuafāfine, ē faigaluega ma aʻoaʻoga faatasi ma tuaoi.

Ia mafaufau i aogā o au upu ma gaoioiga agalelei i lou aiga po o nisi o le faapotopotoga. Atonu e iai se tasi i lau faapotopotoga e manaʻomia le fesoasoani i le faamamāina o le fale ma le togālaau, pe faia foʻi galuega masani e pei o le faia o se faatau. Pe mafai ona e ofo atu se fesoasoani aogā, i sē e te feiloaʻi i ai i le talaʻiga o loo manaʻomia se fesoasoani?

Seʻi o tatou faaaʻoaʻo iā Ieova e ala i le pulea i taimi uma o a tatou upu ma gaoioiga, e le “tulafono o le agalelei.”