1. I le uluaʻi senituri, o le ā na faatonuina se aofia e toʻatele e fai?

I SE tasi aso a o faapotopoto faatasi ni tagata e toʻatele e aofia ai fafine ma tane mai i atunuu ma gagana eseese, na iai se mea mataʻina na tupu ai. Na faafuaseʻi ona tautatala se vaega o tagata Iutaia i gagana a i latou na asiasi atu. Na faateʻia le aofia i lenā mea, ma na faateʻia foʻi i latou i mea na tautatala atu ai tagata Iutaia, ae na sili atu ona faateʻia i latou i le lauga mataʻina a le aposetolo o Peteru. Na aofia i lenā lauga le feʻau, e mafai ona faasaoina i latou pe a faaalia le faatuatua iā Iesu Keriso. Na matuā pāʻia loto o le aofia i lenā feʻau. O lea, na latou fesili ai: “O le ā se mea e ao ona matou faia?” Ona tali atu lea o Peteru: “Ia taʻitasi ma papatisoina outou.”​—Galu. 2:37, 38.

2. O le ā o le a tatou iloiloina i lenei suʻesuʻega? (Tagaʻi i le ata i le faavaa.)

² E mataʻina le mea na sosoo ai. I lenā lava aso, e pe ā ma le 3,000 i latou na papatisoina e avea ma soo o Keriso. O le amataga lenā o le galuega tele o le faia o isi ma soo lea na faatonuina e Iesu ona soo e fai. O loo faaauau pea lenā galuega e oo mai i o tatou aso. I aso nei, e lē mafai ona tatou fesoasoani i se tasi e avea ma soo papatiso i ni nai itula. Atonu e alu ai ni masina, se tausaga pe sili atu foʻi mo se tagata aʻoga ina ia agavaa e papatiso. O lea, o le faia o isi ma soo e manaʻomia ai ni taumafaiga. E te iloa le saʻo o lenā manatu pe afai o loo e suʻesuʻeina le Tusi Paia ma se tasi. O le a iloiloina i lenei suʻesuʻega mea e mafai ona e faia e fesoasoani ai i lau tagata aʻoga, ina ia agavaa mo le papatisoga.

3. I le Mataio 28:19, 20, o le ā e ao ona fai e se tagata aʻoga ina ia agavaa ai mo le papatisoga?

³ A o leʻi papatiso se tagata aʻoga, e tatau ona ia faatatauina mea ua ia aʻoaʻoina mai i le Tusi Paia. (Faitau le Mataio 28:19, 20.) Pe a faatatau e lau tagata aʻoga mea ua ia aʻoaʻoina, ua pei la o ia o le “tagata faautauta” i le talafaatusa a Iesu, na ia ʻeli maulalo le faavae o lona fale na fausia i luga o le papa. (Mata. 7:24, 25; Luka 6:47, 48) E faapefea ona tatou fesoasoani i se tagata aʻoga, ina ia faatatau mea ua ia aʻoaʻoina? Seʻi o tatou iloiloina ni fautuaga se tolu.

4. E faapefea ona tatou fesoasoani i se tagata aʻoga, e agaʻigaʻi pea i luma ina ia agavaa mo le papatisoga? (Tagaʻi i le pusa “ Ia Fesoasoani i Lau Tagata Aʻoga e Faatutū ni Sini ma Ausia.”)

⁴ Fesoasoani i lau tagata aʻoga e faatutū ni sini. Aiseā e tatau ai ona e faia lenā mea? Ia mātau le faataʻitaʻiga lenei: Pe a e alu i se malaga umi, atonu e fai ma e mālōlō ma matamata i ni nofoaga matagofie a o alu le malaga. O le faia faapea, o le a e lē mafaufau ai i le mamao tele o le malaga. E faapena foʻi se tagata aʻoga e faatutū ni sini e faigofie ona ausia. O le a ia iloa ai, e lē faigatā ona ausia le sini o le papatisoga. Ia faaaogā le vaega “Sini,” i le tusi Se Olaga Fiafia e Faavavau!, e fesoasoani ai i lau tagata aʻoga ia agaʻigaʻi i luma. I faaiʻuga o lesona taʻitasi, ia iloilo ma lau tagata aʻoga po o le ā le fesootaʻiga o sini o loo i le lesona ma mea faatoʻā uma ona ia aʻoaʻoina. Afai e iai se isi sini o e mafaufau i ai mo lau tagata aʻoga, ia tusi i le vaega ua taʻua o “Isi Sini.” Ia faaaogā e lē aunoa lenei vaega o le suʻesuʻega, e iloilo ai ma lau tagata aʻoga sini e faigofie ona ia ausia faapea sini e umi se taimi e alu ai faatoʻā ausia.

5. I le Mareko 10:17-22, o le ā na fetalai Iesu i se tamāloa mauʻoa e fai, ma aiseā?

⁵ Fesoasoani i lau tagata aʻoga, ina ia faia suiga i lona olaga. (Faitau le Mareko 10: 17-22.) Na silafia e Iesu, e lē faigofie i le tamāloa mauʻoa ona faatau ese uma atu ana ʻoa. (Mare. 10:23) Peitaʻi, na faailoa atu e Iesu i le tamāloa e tatau ona ia faia na suiga tetele i lona olaga. Aiseā? Ona na alofa Iesu iā te ia. E iai taimi e tatou te faatalatū ai e faalaeiau a tatou tagata aʻoga ina ia faatatau mea ua latou aʻoaʻoina, ona e tatou te manatu e leʻi nofosauni e faia ni suiga. Atonu e umi se taimi e faaalu e se tagata e liaʻieseina ai ona uiga tuai ae ofu i le tagata fou. (Kolo. 3:9, 10) Peitaʻi, o le vave lava e te talanoa ai i lau tagata aʻoga i suiga e manaʻomia ona ia faia, o le vave foʻi lenā ona ia faia. O lou talanoa i ai, e faailoa atu ai e te manatu mamafa iā te ia.​—Sala. 141:5; Faata. 27:17.

6. Aiseā e tatau ai ona tatou faaaogāina fesili faatupu manatu?

⁶ O le faia o se fesili faatupu manatu, e fesoasoani i se tagata aʻoga e faailoa mai ai sona manatu i se mataupu. Ia faaaogā fesili faatupu manatu e iloa ai po o le ā le malamalamaga ma le talitonuga o lau tagata aʻoga. O le faaaogā e lē aunoa o fesili faatupu manatu, o le a faigofie ai ona oulua talanoa i mataupu e faigatā ona talia e lau tagata aʻoga. E tele fesili faatupu manatu o loo i ai i le tusi Se Olaga Fiafia e Faavavau! O se faataʻitaʻiga, i le lesona 04 o loo faapea mai: “O le ā sou manatu, o ā faalogona o Ieova pe a e faaaogāina lona suafa?” O loo i le lesona 09 le fesili: “O ā nisi o mea e te manaʻo e tatalo atu ai?” I le uluaʻi taimi, atonu e manaʻomia e lau tagata aʻoga se taimi e mafaufau muamua ai i tali o na fesili. E mafai ona e fesoasoani e toleni lau tagata aʻoga, ina ia iloilo ma mafaufau i mau ma ata o le suʻesuʻega.

7. E faapefea ona tatou faaaogā lelei tala o mea moni na tutupu e aʻoaʻo ai le tagata aʻoga?

⁷ Pe a malamalama lau tagata aʻoga i mea e tatau ona ia faia, ona faaaogā lea o tala o mea moni na tutupu e faalaeiau ai o ia e faatatau mea ua ia aʻoaʻoina. O se faataʻitaʻiga, afai o se luʻi i lau tagata aʻoga le auai i sauniga, e mafai ona e faaali i ai le vitiō E Tausia e Ieova Aʻu, o loo i le vaega “Manatu Faaopoopo” i le lesona 14. I le tele o lesona o le tusi Se Olaga Fiafia e Faavavau!, e maua ai tala o mea na tutupu i le vaega “Saʻiliʻili Atili” po o le “Manatu Faaopoopo.” * Ia faaeteete, aua le faatusatusaina lau tagata aʻoga i se isi e ala i le fai i ai, “Afai e mafai ona ia faia, e mafai foʻi la ona e faia.” Ia tuu i le tagata aʻoga e faia e ia le filifiliga saʻo. Ia talatalanoa ma lau tagata aʻoga i manatu aogā na fesoasoani i le tagata i le vitiō, e faatatau ai aʻoaʻoga a le Tusi Paia. Atonu e mafai foʻi ona e faailoa atu se mau autū po o se gaoioiga aogā na faia e le tagata i le vitiō. Ia faamatilatila e lē aunoa i lau tagata aʻoga le auala na fesoasoani ai Ieova i lenā tagata.

8. E faapefea ona tatou fesoasoani i a tatou tagata aʻoga e alolofa iā Ieova?

⁸ Fesoasoani i lau tagata aʻoga e alofa iā Ieova. E faapefea? Ia mātau avanoa e faauaʻi atu ai lau tagata aʻoga i uiga o Ieova. Ia fesoasoani i lau tagata aʻoga ia iloa o Ieova o le Atua fiafia, ma e fesoasoani iā i latou e alolofa iā te ia. (1 Timo. 1:11; Epe. 11:6) Ia faailoa i le tagata aʻoga aogā e na te maua pe a faatatau mea ua ia aʻoaʻoina, ma faamatala i ai o na aogā o le faailoaga lea o le alofa o Ieova iā te ia. (Isa. 48:17, 18) O lea la, e mafai ona uunaʻia lau tagata aʻoga e fai suiga, pe a loloto lona alofa mo Ieova.​—1 Ioa. 5:3.

9. I le Mareko 10:29, 30, o le ā e mafai ona fesoasoani i se tagata aʻoga e faia ai faataulaga ina ia avea ma soo papatiso o Iesu?

⁹ E tatau i le tagata aʻoga ona ia faia faataulaga,  ina ia agaʻigaʻi ai i luma mo le papatisoga. E pei nisi tagata aʻoga o le tamāloa mauʻoa na taʻua muamua, e ono manaʻomia ona faataulaga a latou meafaitino. Atonu e manaʻomia ona sui a latou galuega totogi, pe a fai e lē o ōgatusa galuega o loo latou faia ma mataupu silisili o le Tusi Paia. O nisi atonu e manaʻomia ona tuua uō e lē alolofa iā Ieova. O nisi atonu ua tuua e o latou tauaiga e lē fiafia i Molimau a Ieova. Na taʻua e Iesu e ono lē faigofie i nisi ona faia na faataulaga. Ae na ia folafola mai, o le a tauia i latou e usiusitaʻi iā te ia i se aiga faaleagaga e alolofa ona tagata. (Faitau le Mareko 10:29, 30.) E faapefea ona e fesoasoani i lau tagata aʻoga ina ia aogā iā te ia lenā meaalofa matagofie?

10. O le ā e tatou te aʻoaʻoina mai i le mea na tupu iā Manuel?

¹⁰ Atiaʻe se faauōga ma lau tagata aʻoga. E tāua le faailoa i lau tagata aʻoga, e te manatu mamafa iā te ia. Aiseā? Ia mātau le faamatalaga a Manuel e nofo i Mekisikō. E na te manatua le taimi a o fai lana suʻesuʻega, na ia faapea mai: “O taimi uma a o leʻi faia laʻu suʻesuʻega, e fesili mai loʻu faiaʻoga pe na ā mai loʻu aso. Na ia fesoasoani mai ina ia ou toʻa, ma na faigofie ai ona sasaa atu oʻu faalogona iā te ia i isi mea. Na ou lagonaina e matuā manatu mamafa lava iā te aʻu.”

11. E faapefea ona maua e tagata aʻoga aogā pe a faaalu se taimi e faatasitasi ai ma i latou?

¹¹ Ia faaalu le taimi ma lau tagata aʻoga e pei foʻi ona faaalu e Iesu lona taimi ma ona soo. (Ioa. 3:22) Pe a talafeagai, ia valaaulia i lou fale lau tagata aʻoga o loo agaʻigaʻi i luma mo se iputī, pe matamata se polokalame o le TV i le Initaneti. Atonu e talisapaia e lau tagata aʻoga lenā valaaulia i aso mālōlō, ona atonu e na te lagona le tuua toʻatasi i na taimi. Ua faapea mai Kazibwe e nofo i Uganda: “E tele mea ua ou aʻoaʻoina e faatatau iā Ieova mai i taimi e ma te faatasitasi ai ma laʻu faiaʻoga, e pei foʻi o taimi o ma suʻesuʻega. Na ou aʻoaʻoina mai ai i na taimi le tausia lelei e Ieova o ona tagata ma le  fiafia o loo latou maua. O le mea tonu lava lenā ou te manaʻo ai i loʻu olaga.”

12. Aiseā e tāua ai le eseese o tagata talaʻi e tatou te ō ma ave i a tatou suʻesuʻega faale-Tusi Paia?

¹² Valaaulia tagata talaʻi eseese i lau suʻesuʻega. Atonu e iai taimi e tatou te manatu ai e faigofie ona ō na o i tatou e fai se suʻesuʻega, pe ave na o se tagata talaʻi e masani ona tatou ō. E ui e ono faigofie mo i tatou lenā auala, ae e mautinoa e maua e la tatou tagata aʻoga aogā pe a tatou ō ma ave tagata talaʻi eseese mai i lea taimi i lea taimi. Ua faapea mai Dmitrii e nofo i Moldova: “E tofu lava le tagata talaʻi e auai i laʻu suʻesuʻega ma le auala e faamatala ai se mataupu. Na fesoasoani lenā e faaitiitia ai loʻu matamuli ina ua ou auai i laʻu sauniga muamua, talu ai o le toʻatele o uso ma tuafāfine na matou feiloaʻi muamua.”

13. Aiseā e ao ai ona tatou fesoasoani i a tatou tagata aʻoga e auai i sauniga?

¹³ Fesoasoani i lau tagata aʻoga ia auai i sauniga a le faapotopotoga. Aiseā? Ona o se vaega lenā o la tatou tapuaʻiga, ma na faatonuina e Ieova ona tagata tapuaʻi ina ia faapotopoto faatasi. (Epe. 10:24, 25) E lē gata i lea, o uso ma tuafāfine o se vaega o lo tatou aiga faaleagaga. Pe a auai faatasi ma i latou i le sauniga, e pei ua tatou faapotopoto faatasi i se fale e ʻaai i se taumafataga manaia. Pe a e fesoasoani i lau tagata aʻoga e auai i sauniga, ua e fesoasoani foʻi iā te ia e uia se tasi o laasaga e sili ona tāua mo le papatisoga. Ae e ono faigatā iā te ia le faia o lenā mea. E faapefea ona fesoasoani le tusi Se Olaga Fiafia e Faavavau! i lau tagata aʻoga, e manumalo mai ai i so o se luʻi e na te fesagaʻia?

14. E faapefea ona tatou uunaʻia a tatou tagata aʻoga ina ia auai i sauniga?

¹⁴ Ia faaaogā le lesona 10 o le tusi Se Olaga Fiafia e Faavavau!, e uunaʻia ai lau tagata aʻoga. Na talosagaina ni tagata talaʻi e iai le poto masani e faataʻitaʻia lenei lesona a o leʻi tatalaina le tusi. O le iʻuga, na mafai ona latou fesoasoani i a latou tagata aʻoga e auai i sauniga. E lē manaʻomia ona tatou faatali seʻia oo i le lesona 10 ona faatoʻā valaaulia lea o a tatou tagata suʻesuʻe e auai i sauniga. Ia valaaulia o ia i le vave e mafai ai, ma ia faaauau ona faia faapea. E eseese luʻi e feagai ma tagata aʻoga. O lea, ia uaʻi i manaʻoga o lau tagata aʻoga, ma mātau mea e mafai ona e fesoasoani i ai. Aua le lotovaivai pe afai e umi se taimi e leʻi auai mai, ae ia onosaʻi ma valaaulia pea o ia.

15. O ā māfuaaga atonu e lagona ai e lau tagata aʻoga le fefe?

¹⁵ Pe e te manatua ou lagona fefe i le taimi o le a avea ai oe ma Molimau a Ieova? Atonu na e manatu e lē mafai ona e talaʻi atu i le lautele. Pe atonu foʻi na e lagona le fefe ina neʻi tetee atu ou aiga ma uō. Pe afai o lea, e te malamalama la i faalogona o lau tagata aʻoga. Na taʻua e Iesu o le a oo i nisi na lagona fefe. Peitaʻi, na ia poloaʻia ona soo e aua le faatagaina le fefe e taofia ai i latou mai i le auauna iā Ieova. (Mata. 10:16, 17, 27, 28) Na faapefea ona fesoasoani Iesu i ona soo ina ia manumalo mai i le fefe? E faapefea ona e mulimuli i lana faaaʻoaʻoga?

16. E faapefea ona e toleniina lau tagata aʻoga e faailoa atu lona faatuatua?

¹⁶ Faasolosolo ona toleni lau tagata aʻoga e faailoa atu lona faatuatua. Na ono lagona e soo o Iesu le popole ina ua ia auina atu i latou e talaʻi. Peitaʻi, na fesoasoani Iesu iā i latou e ala i le faailoa atu o le nofoaga e talaʻi ai ma le feʻau o le a latou talaʻia. (Mata. 10:5-7) E faapefea ona e faaaʻoaʻo iā Iesu? Ia fesoasoani i lau tagata aʻoga ina ia iloa le nofoaga e mafai ona talaʻi ai. O se faataʻitaʻiga, fesili i ai pe e na te iloa se tasi e mafai ona aogā i ai se upu moni tāua o le Tusi Paia. Ona fesoasoani lea iā te ia,  e ala i le faataʻitaʻi i ai o se auala faigofie e faasoa atu ai le upu moni. Pe a talafeagai, e mafai ona oulua faataʻitaʻia le vaega “Ua Faapea Mai Nisi” ma le “E Ono Fesili Mai se Tasi,” i le tusi Se Olaga Fiafia e Faavavau! Pe a e faia lenā mea, ia uaʻi atu i le toleniina o lau tagata aʻoga e faaaogā le Tusi Paia e avatu ai tali faigofie ma faautauta.

17. E faapefea ona tatou faaaogāina le Mataio 10:19, 20, 29-31, a o fesoasoani i a tatou tagata aʻoga e maufaatuatuaina Ieova?

¹⁷ Fesoasoani i lau tagata aʻoga e maufaatuatuaina Ieova. Na faamautinoa atu e Iesu i ona soo o le a fesoasoani Ieova iā i latou ona o lona alofa mo i latou. (Faitau le Mataio 10:19, 20, 29-31.) Ia faamanatu i lau tagata aʻoga o le a fesoasoani foʻi Ieova iā te ia. E mafai ona e fesoasoani iā te ia e faalagolago iā Ieova, e ala i le tatalo faatasi ma ia e faatatau i ona sini. Ua faapea mai Franciszek e nofo i Polani: “E masani ona taʻua e loʻu faiaʻoga oʻu sini i ana tatalo. Ina ua ou mātauina le auala na tali ai e Ieova tatalo a laʻu faiaʻoga, na vave lava foʻi ona ou tatalo. Na ou lagona le fesoasoani a Ieova ina ua ou talosaga i laʻu galuega fou, e ave ni oʻu aso mālōlō ina ia ou auai i sauniga ma tauaofiaga.”

18. O ā faalogona o Ieova i le galuega o loo faia e faiaʻoga Kerisiano?

¹⁸ E matuā manatu mamafa Ieova i a tatou tagata aʻoga. E na te talisapaia le galulue mamafa o faiaʻoga Kerisiano e fesoasoani i tagata ina ia tosina atu iā te ia, ma e alofa o ia iā i latou ona o lenā mea. (Isa. 52:7) Pe afai e lē o iai sau suʻesuʻega faale-Tusi Paia, e mafai lava ona e fesoasoani i se tagata aʻoga ina ia agavaa mo le papatisoga, e ala i le ō faatasi ma isi tagata talaʻi i a latou suʻesuʻega.