UA TAʻUA i le Evagelia a Mataio e faapea: “Ua ulufale atu Iesu i le malumalu ma tutuli i fafo ē uma ua fai fefaatauaʻiga i le malumalu, ma fuli laulau a tagata suitupe ma nofoa o le ʻaufaatau lupe. Ua ia faapea atu iā i latou: ʻUa tusia, “E taʻua loʻu fale o le fale tatalo,” a o lenei ua outou faia ma ana o ē e faomea.’”​—Mata. 21:12, 13.

Ua faaalia mai i faamaumauga o le talafaasolopito a Iutaia, sa faaaogā sesē e tagata faatauʻoa i le malumalu a latou tagata faatau, e ala i le faatau o a latou oloa i ni tau e matuā taugatā. O se faaaʻoaʻoga, o loo taʻua i tusitusiga anamua a tagata Iutaia se mea na tupu i le uluaʻi senituri T.A., ina ua siitia i le tenari auro le tau o tamaʻi lupe e lua na faaaogā e ofo ai taulaga. Na tutusa lenā ma le totogi o se tagata faigaluega faatauvaa mo aso faigaluega e 25. Sa faataga ona faaaogā e tagata matitiva lupe e fai ai a latou taulaga. Peitaʻi, sa oo lava i na manulele faatauvaa na matuā taugatā ma lē gafatia e tagata. (Levi. 1:14; 5:7; 12:6-8) Na matuā lē fiafia le Rapi o Simeon ben Gamaliel i lenei faiga, ma ia faaitiitia ai taulaga e tatau ona ofo atu e tagata. O lea, na matuā paʻū ai le tau o tamaʻi lupe e lua mai i le tau sa iai muamua.

Pe a fua i lenei tulaga, na matuā talafeagai la ona taʻua e Iesu le ʻaufaatauʻoa i le malumalu, o “ē e faomea” ona o a latou faiga faapiʻopiʻo ma le matapeʻapeʻa.