1. O le ā ua faia e Ieova mo oe?

NA FAAPEFEA ona avea oe ma Molimau a Ieova? Muamua, na e faalogo i “le tala lelei” atonu mai i ou mātua, o se tasi e te lua faigaluega pe aʻoʻoga faatasi, pe na maua foʻi oe i le talaʻiga i lou fale. (Mare. 13:10) Ona faaalu lea e se tasi o le tele o le taimi ma taumafaiga, e faia ai lau suʻesuʻega faale-Tusi Paia. I lenā suʻesuʻega, na e atiaʻe ai le alofa mo Ieova ma na e aʻoaʻoina mai ai e alofa Ieova iā te oe. Na tosina mai oe e Ieova i le upu moni ma ona ua avea nei oe ma soo o Iesu Keriso, ua e maua la le faamoemoe e ola ai e faavavau. (Ioa. 6:44) E te matuā lotofaafetai iā Ieova, ona na ia uunaʻia se tasi e aʻoaʻo oe i le upu moni, ma ua ia talia oe e avea ma Ana auauna.

2. O le ā o le a tatou talanoaina i lenei suʻesuʻega?

² Ona ua tatou iloa le upu moni, ua iā i tatou la le faaeaga o le fesoasoani i isi ia tatou savavali faatasi i le ala i le ola. Atonu e faigofie iā i tatou le talaʻi mai i lea fale i lea fale, ae e ono faigatā ona tatou ofo atu ma fai ni suʻesuʻega faale-Tusi Paia. Po o ou faalogona na? Pe afai o lea, atonu e aogā iā te oe nisi o fautuaga mai i lenei suʻesuʻega. O le a talanoaina i lenei suʻesuʻega auala e uunaʻia ai i tatou e fai isi ma soo. O le a talanoaina ai foʻi auala e foʻia ai luʻi ia e ono faafaigatā ai iā i tatou ona faia se suʻesuʻega faale-Tusi Paia. Muamua, seʻi o tatou talanoaina māfuaaga e tatau ai ona tatou talaʻi ma avea ma faiaʻoga o le tala lelei.

3. Aiseā e tatou te talaʻi ai?

³ A o i ai Iesu i le lalolagi, na ia poloaʻia ona soo e fai se galuega e lua ona vala. Muamua, na ia faatonuina i latou ina ia talaʻi le tala lelei o le Malo ma na ia faasino atu foʻi iā i latou le auala e faia ai. (Mata. 10:7; Luka 8:1) O se faaaʻoaʻoga, na sauniunia e Iesu ona soo i le auala e tali atu ai pe a tali lelei pe lē tali lelei mai foʻi tagata i le feʻau o le Malo. (Luka 9:2-5) Na ia valoia foʻi le mamao o le a oo i ai la latou talaʻiga, ina ua ia fetalai atu o le a latou “molimau i atunuu uma.” (Mata. 24:14; Galu. 1:8) Po o le ā lava le auala e tali mai ai tagata i le galuega talaʻi, ae e tatau i soo o Iesu ona talaʻi atu i tagata le Malo o le Atua, ma mea o le a faataunuuina e lenā Malo.

4. I le Mataio 28:18-20, o le ā le isi vala o le galuega e tatau ona tatou faia?

⁴ O le ā le vala lona lua o le galuega na poloaʻia e Iesu ona soo e fai? Na ia fetalai i ona soo e aʻoaʻo ē e mafai ona avea ma ona soo ina ia latou tausia mea uma na ia poloaʻi mai ai. Ae pe na gata i le uluaʻi senituri lenei galuega talaʻi ma le aʻoaʻo atu e pei ona fai mai ai nisi? E leai. Na taʻua e Iesu o lenei galuega tāua o le a faaauau mai lava i o tatou aso “seʻia oo i le taufaaiʻuiʻuga o le faiga o mea a le lalolagi.” (Faitau le Mataio 28:18-20.) E foliga mai na avatu e Iesu lenā poloaʻiga ina ua ia faaali atu i le silia ma le 500 o ona soo. (1 Kori. 15:6) I le faaaliga a Iesu iā Ioane, na taʻua manino ai e Iesu, o lona finagalo ia fesoasoani ona soo uma e aʻoaʻo tagata e uiga iā Ieova.​—Faaa. 22:17.

5. I le 1 Korinito 3:6-9, na faapefea ona faataʻitaʻi e Paulo le fesootaʻiga o le talaʻi ma le aʻoaʻo atu?

⁵ Na faatusa e le aposetolo o Paulo le faia o isi ma soo i le galueaʻiina o se faatoʻaga, lea e faaalia ai e tele mea e tatau ona tatou faia nai lo o le tau ina totō o fatu. Na ia faamanatu atu i le faapotopotoga i Korinito: “O aʻu na totō, o Apolo na faasūsū . . . O outou o le faatoʻaga a le Atua o loo galueaʻiina.” (Faitau le 1 Korinito 3:6-9.) Ona o i tatou o le ʻaufaigaluega i le “faatoʻaga a le Atua,” e lē gata e tatou te totō fatu, ae e tatou te faasūsū foʻi ma siaki le tuputupu aʻe o le faatoʻaga. (Ioa. 4:35) Ae i le taimi e tasi, e tatou te iloa o le Atua e na te faatupuina fatu.

6. O le ā e aofia ai i la tatou galuega o ni faiaʻoga?

⁶ O loo tatou saʻilia i latou “ua saunia o latou loto mo le ola e faavavau.” (Galu. 13:48) Ina ia avea i latou ma soo, e tatau ona tatou fesoasoani iā i latou (1) ia malamalama, (2) talia, ma (3) faatatau mea ua latou aʻoaʻoina mai i le Tusi Paia. (Ioa. 17:3; Kolo. 2:6, 7; 1 Tesa. 2:13) E mafai ona fesoasoani faaaʻoaʻoga lelei a tagata uma o le faapotopotoga i tagata aʻoga. E latou te faaalia le alofa i tagata aʻoga fou, ma faafeiloaʻi ma le māfana i latou pe a auai i sauniga. (Ioa. 13:35) E ono faaalu foʻi e le faiaʻoga le tele o le taimi ma le malosi e fesoasoani ai i se tagata aʻoga e suia talitonuga ma masaniga ua “matuā mautū” iā te ia. (2 Kori. 10:4, 5) Atonu e tele ni masina e fesoasoani ai i le tagata aʻoga, ina ia faia na suiga ma agavaa ai mo le papatisoga. E matuā aogā na taumafaiga.

7. O le ā e uunaʻia ai i tatou e faia se sao i le galuega talaʻi ma le faia o isi ma soo?

⁷ Aiseā e tatou te talaʻi ai i tagata ma aʻoaʻo i latou ia avea ma soo? Muamua, ona e tatou te alolofa iā Ieova. Pe a e faia le mea sili e usitaʻi ai i le poloaʻiga ia talaʻi ma faia isi ma soo, ua e faaalia ai lou alofa mo le Atua. (1 Ioa. 5:3) Seʻi manatu i le mea lenei. O lou alofa mo Ieova na uunaʻia ai oe e talaʻi mai i lea fale i  lea fale. Pe na faigofie ona e usitaʻi i lenā poloaʻiga? Atonu e leai. Pe na e popole ina ua e sauni e fai lau fale muamua i le taimi na faatoʻā e talaʻi ai? E mautinoa na e popole. Peitaʻi, na e iloa o le galuega lenā e finagalo Iesu e te faia ma na e usitaʻi ai i lenā poloaʻiga. A o faagasolo taimi, atonu na faigofie iā te oe ona e auai i le galuega talaʻi. Ae ā le taimi lenei, o le ā sou manatu i le faia o se suʻesuʻega faale-Tusi Paia? Pe e te popole pe a taʻu le faia o se suʻesuʻega faale-Tusi Paia? Atonu. Peitaʻi, pe a e tatalo mo le fesoasoani a Ieova e foʻia ai lou fefe, ma ia lototele e ofo atu se suʻesuʻega faale-Tusi Paia, o le a fesoasoani Ieova e faamalosia lou faanaunauga e fai isi ma soo.

8. I le Mareko 6:34, o le ā le isi mea e uunaʻia ai i tatou e aʻoaʻo isi?

⁸ Lona lua, o le alofa mo tatou tuaoi e uunaʻia ai i tatou e aʻoaʻo i latou i le upu moni. I se tasi aso, na matuā lē lavavā Iesu ma ona soo ona ua alu le aso o talaʻi. Na latou manaʻomia se nofoaga e mālōlō ai, ae na maua i latou e le motu o tagata e toʻatele. Ona o le alofa mutimutivale o Iesu, na amata ai ona ia aʻoaʻo atu le “tele o mea” i tagata. (Faitau le Mareko 6:34.) E ui lava i le lēlavā o Iesu, ae na faamalosi pea e aʻoaʻo tagata. Aiseā? Na tuu e Iesu o ia i le tulaga o tagata. Na ia silafia lelei le matuā mafatia o tagata, ma na latou matuā manaʻomia se fesoasoani. O lea, na finagalo ai Iesu e fesoasoani iā i latou. E faapena foʻi tulaga o tagata i aso nei. Aua neʻi faasesēina i tatou i foliga vaaia o tagata. Ua pei i latou o mamoe ua sē, ua leai se fesoasoani, ona ua leai se leoleo mamoe e taʻitaʻia i latou. Na faamatalaina e le aposetolo o Paulo tagata faapena, o ni tagata e lē iloa le Atua ma e leai ni faamoemoe. (Efe. 2:12) O loo ui atu i latou i “le auala e tau atu i le faaumatiaga.” (Mata. 7:13) Pe a tatou mafaufau i le leaga o le tulaga faaleagaga o tagata i la tatou oganuu, o le a uunaʻia ai i tatou e le alofa ma le alofa mutimutivale e fesoasoani iā i latou. O lea, o le auala sili e tatou te fesoasoani ai iā i latou na, o le ofo atu i ai o se suʻesuʻega faale-Tusi Paia.

9. I le Filipi 2:13, e faapefea ona fesoasoani Ieova iā te oe?

⁹ Atonu e te faatalatū e ofo atu se suʻesuʻega faale-Tusi Paia, ona e te iloa e tele le taimi e faaaluina i le faia o le suʻesuʻega. Pe afai o ou popolega na, ia faailoa atu iā Ieova ou faalogona. Ia tatalo mo lana fesoasoani ina ia atiaʻe lou faanaunauga ia maua sau suʻesuʻega faale-Tusi Paia. (Faitau le Filipi 2:13.) Na faamautinoa mai e le aposetolo o Ioane, e taliina e le Atua a tatou tatalo pe a ōgatusa ma Lona finagalo. (1 Ioa. 5:14, 15) E mafai la ona e mautinoa, o le a fesoasoani Ieova iā te oe, e atiaʻe lou faanaunauga ina ia fai sou sao i le faia o isi ma soo.

10-11. O le ā e ono faafaigatā ai iā i tatou ona faia se suʻesuʻega faale-Tusi Paia?

¹⁰ E matuā tāua iā i tatou le galuega o le aʻoaʻo atu, e ui ina tatou fesagaʻia luʻi e ono faafaigatā ai ona fai so tatou sao i le faia o isi ma soo. Seʻi o tatou talanoaina nisi o nei luʻi ma auala e foʻia ai.

¹¹ Atonu e tatou te manatu e itiiti mea e mafai ona tatou faia ona o tatou tulaga. O se faaaʻoaʻoga, o nisi tagata talaʻi ua loa le soifua po ua aafia i maʻi o le tino. Po o tupu lenā mea iā te oe? Pe afai o lou tulaga lea, seʻi o tatou iloiloina se tasi o lesona na matou aʻoaʻoina mai i le faamaʻi o le KOVITI-19. Na matou aʻoaʻoina, e mafai ona faia suʻesuʻega faale-Tusi Paia e faaaogā ai auala faatekinolosi. O lea la, e mafai ona e amataina se suʻesuʻega faale-Tusi Paia mai i lou lava fale. E iai foʻi se isi aogā o le faaaogāina o auala faatekinolosi. E  iai nisi e fiafia e suʻesuʻe le Tusi Paia, ae e lē avanoa i taimi e masani ona asiasi atu ai o tatou uso. Ae e ono avanoa i le taeao pō, po o le leva foʻi o le pō. Pe e mafai ona e avanoa e suʻesuʻe ma se tasi i lenā taimi? Na aʻoaʻo e Iesu Nikotemo i le pō, o le taimi na manaʻo ai Nikotemo.​—Ioa. 3:1, 2.

12. O ā auala e faateleina ai lo tatou mautinoa e mafai ona avea i tatou ma faiaʻoga agavaa?

¹² Atonu e tatou te manatu e tatou te lē agavaa e fai se suʻesuʻega faale-Tusi Paia. Atonu e tatou te faapea ifo e tatau ona tele ni o tatou tomai po o le poto o ni faiaʻoga, faatoʻā tatou agavaa lea e fai se suʻesuʻega faale-Tusi Paia. Pe afai o ou faalogona na, seʻi o tatou iloiloina ni auala se tolu e faateleina ai lou mautinoa. Muamua, e silafia e Ieova e te agavaa e aʻoaʻoina isi. (2 Kori. 3:5) Lona lua, ua tuuina atu e Iesu iā te oe le pule e aʻoaʻo ai, ona ua iā te ia “le pule uma i le lagi ma le lalolagi.” (Mata. 28:18) Lona tolu, e mafai ona fesoasoani Ieova ma isi iā te oe. Na faalagolago Iesu i mea na aʻoaʻoina ai o ia e lona Tamā e taʻu atu ma tautala ai. E mafai foʻi ona e faia faapea. (Ioa. 8:28; 12:49) E mafai ona e talosagaina le fesoasoani a le ovasia o lau vaega i le talaʻiga, se paeonia agavaa po o se tagata talaʻi e iai le poto masani, e fesoasoani iā te oe ina ia amata ma faia se suʻesuʻega faale-Tusi Paia. O se tasi o auala e faateleina ai lou mautinoa, o lou auai lea i se suʻesuʻega faale-Tusi Paia e faia e se tasi o i latou na.

13. Aiseā e manaʻomia ai ona tatou faamasani i auala fou ma meafaigaluega fou e aʻoaʻo atu ai?

¹³ Atonu o se luʻi le faamasani i auala fou ma meafaigaluega fou. Ua suia nei le auala e tatou te faia ai suʻesuʻega faale-Tusi Paia. O la tatou lomiga autū ua faaaogā, o le tusi Se Olaga Fiafia e Faavavau! E manaʻomia ona tatou sauniuni lelei mo le suʻesuʻega ma ia faia i le auala fou ua aʻoaʻoina ai i tatou, nai lo o le auala ua tatou masani ai. Ua lē tele ni palakalafa e faitau, ae ua tele lava ina tatou talanoa ma le tagata aʻoga. Ua tatou faaaogāina le tele o vitiō ma meafaigaluega faaonapōnei e pei o le JW Library^® e aʻoaʻo atu ai. Pe afai e te lē masani i le faaaogāina o nei meafaigaluega, ia talosaga i se tasi e faasino atu le auala e faaaogā ai. O le natura o le tagata, e fiafia e fai mea ua masani ai. O lea la, e lē faigofie iā i tatou le faamasani i auala fou e faia ai mea. Ae o le fesoasoani a Ieova ma isi, o le a faigofie ai ona e faamasani i na suiga. Na taʻua e se paeonia, o lenei auala fou “e faaosofia ai le naunau o le tagata aʻoga ma le faiaʻoga e suʻesuʻe.”

14. O le ā e tatau ona tatou manatua pe a tatou galulue i oganuu e faigatā ona maua ai ni suʻesuʻega faale-Tusi Paia, ma e faapefea ona faalaeiauina i tatou e le 1 Korinito 3:6, 7?

¹⁴ Atonu o loo tatou talaʻi i se oganuu e faigatā ona amata ai ni suʻesuʻega faale-Tusi Paia. Atonu e lē fiafia tagata ma e tetee mai i la tatou feʻau. O le ā e fesoasoani iā i tatou e faatumau ai se vaaiga saʻo i na oganuu? Ia manatua, e vave lava ona suia tulaga o tagata i lenei lalolagi fevaevaeaʻi. O tagata e leʻi fiafia i le feʻau o le Tusi Paia, atonu ua naunau i meaʻai faaleagaga. (Mata. 5:3) O i latou sa masani ona teena lomiga i le taimi ua teʻa, ua latou talia nei ni suʻesuʻega faale-Tusi Paia. E tatou te iloa foʻi, o Ieova o le Alii o le seleselega. (Mata. 9:38) O lona finagalo ia faaauau pea ona tatou totō ma faasūsū, ae o Ia e faatupuina. (1 Kori. 3:6, 7) Maʻeu le faalaeiauina o i tatou i le iloa, e tusa lava pe e tatou te lē o faia se suʻesuʻega faale-Tusi Paia i le taimi lenei, ae e tauia e Ieova i tatou ona o a tatou taumafaiga ae e lē o iʻuga o a tatou galuega! *

15. O ā faalogona o Ieova pe a talia e se tasi se suʻesuʻega faale-Tusi Paia, ma faatatau i lona olaga mea ua ia aʻoaʻoina?

¹⁵ E faafiafiaina Ieova pe a talia e se tasi upu moni o le Tusi Paia, ma faasoa atu i isi. (Faata. 23:15, 16) Maʻeu le olioli o Ieova i lona silasila mai o loo maelega pea ona tagata e talaʻi ma aʻoaʻo atu! O se faaaʻoaʻoga, e ui i le pepesi o le faamaʻi i le lalolagi atoa a o faagasolo le tausaga faaleauaunaga 2020, ae e 7,705,765 suʻesuʻega faale-Tusi Paia na faia ai, ma e 241,994 tagata mai i na suʻesuʻega na tuuina atu o latou ola mo Ieova ma papatisoina. E mafai foʻi e nei soo fou ona faia ni suʻesuʻega faale-Tusi Paia ma maua ai isi soo. (Luka 6:40) E mautinoa e tatou te faafiafiaina Ieova, pe a faia so tatou sao i le faia o isi ma soo.

16. O le ā se sini lelei e tatou te faatūina?

¹⁶ E lē faigofie la tatou galuega o le faia o isi ma soo. Ae o le fesoasoani a Ieova, e mafai ai ona fai so tatou sao i le aʻoaʻoina o tagata fou e alolofa i lo tatou Tamā i le lagi. Pe e mafai ona tatou faatū se sini, e amata ma faia se suʻesuʻega faale-Tusi Paia? Atonu o le a faateʻia i tatou i iʻuga, pe a faaaogā avanoa talafeagai uma e ofo atu ai se suʻesuʻega faale-Tusi Paia i tagata e tatou te feiloaʻi ai. E mautinoa o le a faamanuia e Ieova a tatou taumafaiga.

17. O le ā o le a tatou tofo i ai pe a mafai ona tatou faia se suʻesuʻega faale-Tusi Paia?

¹⁷ Maʻeu se faaeaga ua tatou maua, o le talaʻi ma aʻoaʻo atu o le upu moni i isi! Ua tatou maua ai le fiafia moni i lenei galuega. Na fesoasoani le aposetolo o Paulo i le toʻatele o tagata i Tesalonia ia avea ma soo. Na ia faamatala mai ona faalogona i upu nei: “O le ā lo matou faamoemoe, ma le olioli, ma le pale e mitamita ai i luma o lo tatou Alii o Iesu i lona faatasi mai? Pe e lē o outou ea? E moni lava, o outou o lo matou mamalu ma lo matou olioli.” (1 Tesa. 2:19, 20; Galu. 17:1-4) E faapena foʻi faalogona o le toʻatele i aso nei. O se faaaʻoaʻoga, na faapea mai Stéphanie, o se tuafafine na fesoasoani ma lana tane i le toʻatele o tagata ina ia agavaa mo le papatisoga: “E leai se isi mea e sili atu ou te maua ai le olioli, nai lo o le fesoasoani i tagata e tuuina atu o latou ola mo Ieova.”