E TELE taimi o loo taʻua ai i le Tusi Paia, faamatalaga faamaoni a tagata “e pei o i tatou.” (Iako. 5:17) O se faaaʻoaʻoga, e faigofie ona tatou malamalama i le faamaoni o faaupuga a Paulo, o loo faamauina i le Roma 7:21-24: “Pe a ou loto atu e fai le mea lelei, ae ua iā te aʻu le leaga. . . . Auē o aʻu le tagata malaia!” O se faalaeiauga le faamaoni o nei faaupuga pe a tatou tauivi ma o tatou lava vaivaiga.

Na faailoa mai foʻi e Paulo isi ona faalogona moni. O loo taʻua i le Kalatia 2:20 lona mautinoa, o Iesu na “alofa mai [iā te ia] ma foaʻiina mai lona ola [iā te ia].” Po o ou faalogona na? Atonu e lē o taimi uma.

Afai o loo e feagai ma faalogona o le lē aogā ona o agasala na fai i le taimi ua teʻa, ma atonu i nisi taimi ua faigatā ai ona tatou talia le alofa ma le faamagaloga a Ieova, ua matuā faigatā ai foʻi ona tatou talia le taulaga togiola, o se meaalofa e patino mo i tatou. Ae po o le auala lea e finagalo Iesu e tatou te vaai ai i le togiola? Afai o lea, o le ā la e mafai ona fesoasoani iā i tatou? Seʻi o tatou iloiloina nei fesili e lua.

Ioe, e finagalo Iesu ia tatou vaai i lana taulaga o se meaalofa patino mo i tatou. E faapefea ona tatou mautinoa i lenā mea? Ia faaata i lou mafaufau le vaaiga lea o loo faamauina i le Luka 23:39-43. O loo faatautau i se laau e faapuapuagatia ai se tamāloa i autafa o Iesu. Sa tatau ona matuiā lana solitulafono, auā o lenei faasalaga oti e na o tagata e matuiā solitulafono e faasala ai. Ona o lona mafatia, na augani atu lenei tamāloa iā Iesu: “Ia e manatua mai aʻu pe a e oo i lou malo.”

O le ā le tali a Iesu? Seʻi faaata le tigā o Iesu a o liliu atu lona ulu e vaai i le tamāloa. E ui i tigā, ae na ia faamalosi e ʻataʻata ma faamautinoa i le tamāloa: “E moni ou te fai atu iā te oe i le asō, o le a ta faatasi ma oe i le Parataiso.” Sa mafai lava ona faapea atu Iesu i le tamāloa, na “sau le Atalii o le tagata ina ia . . . foaʻi atu lona ola e fai ma togiola e sui aʻi tagata e toʻatele.” (Mata. 20:28) Pe na e mātauina na faatatau patino atu ma le agalelei e Iesu, le aogā o lana taulaga i le tamāloa? Na faaleuō lana talanoa atu i le tamāloa, a o ia faaaogāina suinauna “oe” ma le “ta.” Ma na faatatau patino atu pea i le tamāloa lana faamatalaga, ina ua ia faasino atu i ai lona faamoemoe o le ola e faavavau i se lalolagi parataiso.

E mautinoa, na finagalo Iesu ia talia e le tamāloa lana taulaga, o se meaalofa e patino mo ia. Afai o faalogona ia o i le tamāloa solitulafono, o se tagata e leʻi i ai se avanoa e auauna ai i le Atua, e mautinoa o ona faalogona foʻi na i se Kerisiano papatiso o loo auauna i le Atua. O le ā la e fesoasoani e atiaʻe ai se faalogona lelei iā i tatou lava, e ui i agasala na tatou faia?

O le talaʻiga a Paulo na aafia ai le auala na ia vaai ai i le taulaga a Iesu. E faapefea? Na ia faapea mai: “Ou te faafetai iā Keriso Iesu lo tatou  Alii, o lē na tuuina mai iā te aʻu le mana, auā ua ia manatu ua ou faamaoni, e ala i lona tofiaina o aʻu i lenei faiva, e ui lava sa ou upuleaga muamua ma faasauā, ma o se tagata fiasili.” (1 Timo. 1:12-14) O le tofiga a Paulo, ua toe faamautinoa atu ai iā te ia le alofa mutimutivale o Iesu, le alofa ma lona maufaatuatuaina o ia. Ua tuuina mai foʻi e Iesu iā i tatou se tofiga patino o le talaʻia o le tala lelei. (Mata. 28:19, 20) Po o le a fesoasoani lo tatou tofiga e talaʻi ina ia malamalama ai, na maliu foʻi Iesu mo i tatou?

Na faapea mai Albert, o lē e leʻi leva ona toe foʻi iā Ieova ina ua toetoe 34 tausaga o faateʻaina: “Ou te manatua pea aʻu agasala na fai. Ae pe a ou talaʻi, e tai pei oʻu faalogona o le aposetolo o Paulo, ua tuuina saʻo mai e Iesu iā te aʻu le galuega talaʻi e fai. O le talaʻiga, e atiaʻe ai ma faatumauina ai se vaaiga saʻo iā te aʻu lava, loʻu olaga ma loʻu lumanaʻi.”​—Sala. 51:3.

Na ola Allan i se olaga solitulafono ma sauā a o leʻi mauaina le upu moni, na ia taʻutino mai: “Ou te manatua pea mea leaga na ou faia i tagata. Ou te lagona ai le lotovaivai i nisi taimi. Ae ou te faafetai iā Ieova ona o lona faatagaina o se tagata agasala e pei o aʻu, e taʻu atu le tala lelei i isi. Pe a ou vaai i le tali mai a tagata i le tala lelei, e faamanatu mai ai iā te aʻu le lelei ma le alofa o Ieova. Ou te manatu o loo ia faaaogāina aʻu e fesoasoani i isi, o loo latou tauivi foʻi ma faalogona ia na oo iā te aʻu.”

O le talaʻiga ua tuuina patino mai iā i tatou, ua mafai ai ona faaaogā lo tatou malosi i gaoioiga aogā, ma mafaufau ai i mea lelei. Ua toe faamautinoa mai ai iā i tatou le alofa mutimutivale o Iesu, lona alofa, ma lona maufaatuatuaina o i tatou.

E ono taʻusalaina pea i tatou e o tatou loto ona o agasala na tatou faia, seʻi vaganā ai ua tafiesea le lalolagi leaga a Satani. O le ā e fesoasoani iā i tatou e teena ai nei faalogona?

“Ou te fiafia i le manatu, ʻe sili atu le Atua i o tatou loto,’” o le faamatalaga lea a Jean, o lē na masani ona tauivi ma faalogona nofosala, ona o le olaga uigalua na ola ai a o talavou. (1 Ioa. 3:19, 20) E faamāfanafanaina foʻi tatou i le iloa, e sili atu ona silafia e Ieova ma Iesu o tatou tulaga agasala, nai lo o i tatou lava. Ia manatua, o lo la alofa na saunia ai le togiola, e lē mo tagata lelei atoatoa ae mo tagata agasala ua salamō.​—1 Timo. 1:15.

E faamautinoa i o tatou loto lenei upu moni tautele, pe a tatou manatunatu loloto i le auala na feutagaʻi ai Iesu ma tagata lē lelei atoatoa, ma le auala e tatou te faia ai le mea sili e faataunuu ai le faiva na tuuina mai iā i tatou. O le iʻuga, e te faapea atu ai e pei o Paulo: E “alofa mai [Iesu] iā te aʻu ma foaʻiina mai lona ola mo aʻu.”