1. I tausaga talu ai nei, o ā ni suiga ua iai i nisi vaipanoa?

I LE faitau afe o tausaga ua mavae, o le toʻatele o tagata i le lalolagi e foliga mai na iai ni o latou talitonuga faalotu. Ae ua telē le suiga i tausaga talu ai nei. Ua lē o toe auai le toʻatele i ni lotu. O le mea moni, o nisi atunuu e faapea mai le toʻatele e lē o i latou o ni tagata lolotu. *​—Mata. 24:12.

2. O ā māfuaaga atonu ua lē lolotu ai le toʻatele?

² Aiseā ua faatupulaʻia ai le aofaʻi o tagata e lē auai i lotu? * O nisi ua tosina i faafiafiaga ae o isi ua uaʻi atu i o latou popolega. (Luka 8:14) O nisi ua lē toe talitonu i se Atua. Ae o isi e talitonu i le Atua ae e manatu ua lē o toe aogā lotu, ua lē toe tāua, e feteenaʻi ma le faasaienisi ma manatu ua fuafua lelei. Atonu e latou te faalogo i a latou uō, faiaʻoga po o tagata faasalalau o faapea mai na teʻi lava ua iai le ola, ae e seāseā o latou faalogo i ni māfuaaga talafeagai e talitonu ai i le Atua. O isi ua lē fiafia i taʻitaʻi lotu o ē e mananaʻo tele i tupe ma le pule. I nisi atunuu ua faasāsā faaletulafono mea e fai e lotu.

3. O le ā le fuafuaga o lenei mataupu?

³ E faatalitalia i tatou e Iesu “e fai tagata o nuu uma lava ma soo.” (Mata. 28:19) E faapefea ona tatou fesoasoani iā i latou e lē auai i lotu, ina ia alolofa i le Atua ma avea ma soo o Keriso? E tatau ona tatou iloa e ono faalagolago le tali mai o le  tagata i la tatou feʻau i le vaipanoa na ola aʻe ai. O se faaaʻoaʻoga, o tagata e ola aʻe i Europa e lē tutusa la latou tali mai ma tagata na ola aʻe i Asia. Aiseā? I Europa, o le toʻatele e iai so latou iloa i le Tusi Paia ma e masani i le manatu na foafoaina e le Atua mea uma. Ae i Asia, o le toʻatele o tagata e itiiti pe e leai foʻi so latou iloa e faatatau i le Tusi Paia, ma atonu e lē talitonu e iai Sē na foafoaina mea. O le fuafuaga o lenei mataupu, o le fesoasoani ia pāʻia loto o i latou e tatou te feiloaʻi ai i le talaʻiga, e tusa lava po o le ā lona talitonuga.

4. Aiseā e tatau ai pea ona iā i tatou se vaaiga saʻo?

⁴ Ia Iai se Vaaiga Saʻo. I tausaga taʻitasi, e iai tagata na lē auai i lotu ua avea nei ma Molimau a Ieova. O le toʻatele na ola i tapulaa maualuluga tauamio ma na inoino i faiga piʻopiʻo a taʻitaʻi lotu. Ae o isi e leʻi lelei a latou tapulaa tauamio, ma na iai masaniga leaga na manaʻomia ona lafoaʻia. O le fesoasoani a Ieova, e tatou te mautinoa ai o le a tatou maua i latou “ua saunia o latou loto mo le ola e faavavau.”​—Galu. 13:48; 1 Timo. 2:3, 4.

5. Aiseā e masani ai ona talileleia e tagata la tatou feʻau?

⁵ Ia Agalelei ma Faautauta. E masani ona talilelei mai tagata i la tatou feʻau, e lē ona o mea o loo tatou taʻu atu, ae ona o le auala o loo tatou taʻu atu ai. E latou te talisapaia pe a tatou agalelei, faautauta ma faaalia le naunau moni iā i latou. E tatou te lē faamalosia i latou e faalogo mai i mea o loo tatou fai atu ai. Nai lo o lea, e tatou te taumafai e malamalama i māfuaaga o o latou manatu e faatatau i lotu. O se faaaʻoaʻoga, ua tatou iloa o nisi e lē fiafia e talanoa e faatatau i lotu ma se tagata e lē masani ai. O isi e manatu o se lē faaaloalo le fesiligia o sona manatu e faatatau i le Atua. Ae o isi, e māsiasi e vaai atu tagata o loo latou faitauina le Tusi Paia, aemaise lava ma se tasi o Molimau a Ieova. Po o le ā lava le tulaga, e tatou te taumafai e amanaʻia o latou faalogona.​—2 Timo. 2:24.

6. Na faapefea ona faaalia e le aposetolo o Paulo le fetuutuunaʻi, ma e faapefea ona tatou faaaʻoaʻo iā te ia?

⁶ O le ā e tatou te faia pe a ono lē fiafia mai se tasi pe a o tatou faaaogā upu e pei o le “Tusi Paia,” “foafoaga,” “Atua,” po o “tapuaʻiga”? E mafai ona tatou faaaʻoaʻo i le aposetolo o Paulo, ma fetuutuunaʻi le auala e tatou te talanoa atu ai iā i latou. Ina ua talanoa atu Paulo i tagata Iutaia, na ia fetufaaʻi ma i latou i Tusitusiga Paia. Peitaʻi, ina ua ia talanoa atu i tagata faifilosofia Eleni i Areopako, e na te leʻi taʻua le Tusi Paia. (Galu. 17:2, 3, 22-31) E faapefea ona tatou mulimuli i le faaaʻoaʻoga a Paulo? Pe a e feiloaʻi ma se tasi e lē talia le Tusi Paia, atonu e lelei ona ʻalofia le taʻua o le Tusi Paia a o talanoa atu i ai. Afai e te lagona e ono lē lelei faalogona o le tagata i le vaai mai o isi o loo lua faitauina le Tusi Paia, ia faautauta ma taumafai e faaaogā se masini faaonapōnei e faaali atu ai mau.

7. Ina ia pei o Paulo, o le ā e tatou te ono faia e tusa ai ma le 1 Korinito 9:20-23?

⁷ Ia Malamalama ma Faalogo. E tatau ona tatou taumafai e malamalama i auala, ua taaʻina ai olaga o tagata e tatou te feiloaʻi i ai. (Faata. 20:5) Seʻi toe mafaufau i le faaaʻoaʻoga a Paulo. Na ola aʻe o ia ma tagata Iutaia. E mautinoa na fetuutuunaʻi lana talaʻiga i tagata o Nuu Ese, o ē na itiiti pe leai foʻi so latou iloa e faatatau iā Ieova ma Tusitusiga Paia. Atonu e tatou te faia ni saʻiliʻiliga pe talanoa atu foʻi iā i latou e iai le poto masani i le faapotopotoga, ina ia tatou iloa lelei ma malamalama i tulaga o tagata i la tatou oganuu.​—Faitau le 1 Korinito 9:20-23.

8. O le ā se tasi o auala e amata ai se talanoaga e faatatau i le Tusi Paia?

⁸ O lo tatou sini o le saʻilia lea o i latou  “ua tatau i ai le feʻau.” (Mata. 10:11) Ina ia maua aogā, e tatau ona tatou valaaulia tagata e faaali mai o latou manatu ma ia faalogologo lelei i ai. Na fesili atu se uso mai i Egelani i tagata, i so latou manatu i se auala e maua ai se faaipoipoga fiafia, le auala e tausia aʻe ai fanau, po o le auala e fesagaʻia ai faiga lē tonu. Ina ua ia faalogologo lelei i o latou manatu, na ia fesili atu, “O le ā sou manatu i le fautuaga lenei na tusia pe ā ma le 2,000 tausaga ua mavae?” Nai lo o le taʻua o le “Tusi Paia,” na ia faaali atu iā i latou mai i lana telefoni feaveaʻi mau ua filifili lelei.

9. E faapefea ona tatou fesoasoani iā i latou e masani ona lē fia talanoa e faatatau i le Atua?

⁹ E mafai ona pāʻia loto o tagata o ē e masani ona lē fia talanoa e faatatau i le Atua, e ala i le talanoa i se mea e fiafia i ai. O se faaaʻoaʻoga, e maofa le toʻatele i mea o le natura. O lea, e tatou te ono faapea atu: “Atonu e te iloa o le tele o masini ua iai, na mafai ona maua ona ua kopi mai e saienitisi i mea o le natura. O se faaaʻoaʻoga, o tagata e faia maikorofoni ua latou suʻesuʻeina taliga, ma o tagata e faia mea puʻeata ua latou suʻesuʻeina mata. O le ā sou manatu, o le ā e uiga atu i ai le natura? Pe e te manatu i ai o se malosiaga uiga ese, o se tagata po o se isi mea?” Pe a uma ona e faalogologo lelei, e mafai ona e faaopoopo atu: “Na aʻoaʻo mai e inisinia mea mai le auala na fai ai taliga ma mata, atonu tatou te taumānatu po o ai lea latou te aʻoaʻoina mai ai nei mea. Na ou maofa i se tusitusiga a se fatusolo anamua: ʻO Lē na faia le taliga, pe e lē o faafofoga mai ea o ia? O Lē na faia le mata, pe e lē o silasila mai ea o ia? O Lē e . . . aʻoaʻo tagata i le poto?’ Ua ioe nisi saienitisi i nei faaupuga.” (Sala. 94:9, 10) Ona tatou faaali atu lea o se mataupu mai i le faasologa o mataupu, “Manatu e Faatatau i le Amataga o le Ola” i le jw.org. (Tagaʻi i le vaega AʻOAʻOGA A LE TUSI PAIA > FAASAIENISI MA LE TUSI PAIA.) Pe e avatu foʻi le polosiua Was Life Created? po o le polosiua The Origin of Life—Five Questions Worth Asking.

10. E faapefea ona tatou amata se talanoaga ma se tasi e lē fia talanoa e faatatau i le Atua?

¹⁰ Ua momoo le toʻatele i se lumanaʻi matagofie. Peitaʻi, o le toʻatele ua fefefe i le faaumatiaina o le lalolagi ma lē toe aināina. Na faamatala e se ovasia femalagaaʻi mai i Nouē, o tagata e lē fia talanoa e faatatau i le Atua, e masani lava e fiafia e talanoa e faatatau i le tulaga o le lalolagi. Pe a uma ona ia faafeiloaʻi tagata, e faapea atu: “O le ā sou manatu, pe e  mafai ona tatou maua se lumanaʻi matagofie? Pe e tatou te faamoemoe e mafai e tagata faipolotiki, saienitisi po o se isi ona aumaia se lumanaʻi matagofie?” Ina ua uma ona ia faalogologo lelei, ona ia faitau lea pe sii atu se mau e faatatau i le lumanaʻi matagofie. O nisi e maofa i le folafolaga a le Tusi Paia e tumau e faavavau le lalolagi, ma o le a nonofo ai e faavavau tagata lelei.​—Sala. 37:29; Fai. 1:4.

11. Aiseā e tatau ai ona tatou taumafai e faaaogā taulimaga eseese, ma e faapefea ona tatou faaaʻoaʻo i le faaaʻoaʻoga a Paulo e pei ona faamatalaina i le Roma 1:14-16?

¹¹ E tatau ona faaaogā taulimaga eseese iā i latou e tatou te feiloaʻi i ai. Aiseā? Ona e eseese uma tagata. O mea e tosina ai le isi atonu e lē fiafia i ai le isi. O nisi atonu e lē afāina le talanoa e faatatau i le Atua po o le Tusi Paia, ae o isi e fiafia pe a talanoa muamua i isi mea. Po o le ā lava le tulaga, e tatau ona faaaogā pea le avanoa e talanoa ai i ituaiga uma o tagata. (Faitau le Roma 1:14-16.) O le mea moni, e tatou te manatua e faatupu e Ieova le upu moni i loto o i latou e naunau i le amiotonu.​—1 Kori. 3:6, 7.

12. O le ā e tatou te faia e fesoasoani ai i tagata Asia, e leʻi iai se taimi na faaalu e mafaufau ai pe e iai Sē na foafoaina mea?

¹² I le lalolagi aoao, e toʻatele le ʻautalaʻi e feiloaʻi ma tagata mai i atunuu Asia, e aofia ai nisi mai i vaipanoa e faasāsā e faigāmalo mea e fai e lotu. O nisi o atunuu Asia, e toʻatele e leʻi iai lava se taimi na faaalu e mafaufau ai pe e iai Sē na foafoaina mea. O nisi e fia iloa ma talia se ofo tuusaʻo mo se suʻesuʻega faale-Tusi Paia, ae o isi e faatalatū i le taimi muamua e faalautele lo latou aʻoaʻoina o ni mea fou. E faapefea ona tatou fesoasoani iā i latou? Ua taulau nisi tagata talaʻi ua iai le poto masani, e ala i le amata o se talanoaga faasamasamanoa ma faaalia le naunau moni. Pe a talafeagai, e faamatala atu e tagata talaʻi auala na faaleleia ai o latou olaga, ina ua amata ona faatatau se mataupu silisili patino mai i le Tusi Paia.

13. O le ā e tosina mai ai tagata i le Tusi Paia? (Tagaʻi i le ata i le faavaa.)

¹³ O le toʻatele e muaʻi tosina i le atamai e maua i mataupu silisili o le Tusi Paia. (Fai. 7:12) I Niu Ioka, na faapea mai se tuafafine e talaʻi atu i tagata e tautatala i le gagana Mandarin: “Ou te taumafai e faaalia le naunau i tagata ma faalogologo atu iā i latou. Pe a ou iloa ni tagata na faatoʻā siitia mai i se isi atunuu, ou te fesili i ai: ʻO sologa lelei mea uma i le tou nonofo ai i inei? Ua maua sau galuega? E lelei tagata i inei?’” I nisi taimi o lenei auala e mafai ona amata ai se talanoaga faale-Tusi Paia. Pe a talafeagai, e faapea atu le tuafafine: “O le ā sou manatu, o le ā le ki i le mauaina o se faiā lelei ma se tasi? E mafai ona ou faaali atu se faataoto mai i le Tusi Paia? O loo faapea mai: ʻO le amataga o finauga e pei o le tatalaina o le vai e se tasi; o lea ia e tuua lea mea a o leʻi tetele le misa.’ Pe e te manatu e fesoasoani lenei fautuaga iā i tatou ina ia atiaʻe ai faiā lelei ma isi?” (Faata. 17:14) O nei talanoaga e fesoasoani iā i tatou e iloa ai tagata, e fiafia e toe asia i latou.

14. E faapefea ona fesoasoani se uso mai i le Atu Asia i tagata e faapea mai e lē talitonu i le Atua?

¹⁴ Ae e faapefea i latou e faapea mai e lē talitonu i le Atua? Ua faamatala mai e se uso ua leva ona talaʻi i tagata e lē talitonu i le Atua i le Atu Asia, e faapea: “E masani lava pe a faapea mai se tasi i inei, ʻOu te lē talitonu i le Atua,’ o loo uiga atu o ia i le lē talitonu i atua e tapuaʻi i ai tagata i lenā vaipanoa. O lea, e masani ona ou ioe i le manatu o le tele o atua e faia e tagata, e lē moni. Ou te faitauina le  Ieremia 16:20: “Pe e mafai ea e se tagata ona ia faia mo ia lava ni atua, ae e lē o ni atua i latou?” Ona ou fesili lea i ai: ʻE faapefea ona tatou iloa le Atua moni mai i atua e faia e tagata?’ Ou te faalogologo lelei atu, ona ou faitau lea o le Isaia 41:23: ʻIa taʻu mai mea o le a mulimuli mai, ina ia matou iloa ai o atua outou.’ Ona ou faaali lea i ai o se faaaʻoaʻoga o le auala na valoia ai e Ieova le lumanaʻi.”

15. O le ā e tatou te aʻoaʻoina mai i le faaaʻoaʻoga a se uso mai i Asia i Sasaʻe?

¹⁵ Na faaaogā e se uso mai i Asia i Sasaʻe le taulimaga o loo sosoo mai, ina ua ia faia ni toe asiga. Na ia faapea mai: “Na ou faaali iā i latou faaaʻoaʻoga o le atamai mai i le Tusi Paia, o valoaga ua faataunuuina, ma tulafono ua faatonutonuina ai le vateatea. Ona ou faamatala atu lea i ai, o nei mea uma ua faailoa mai ai o loo soifua ma e atamai Sē na foafoaina mea. Pe a talia e le tagata le manatu e iai le Atua, ona amata lea ona ou faaali i ai mea o loo taʻua i le Tusi Paia e faatatau iā Ieova.”

16. E tusa ai ma le Eperu 11:6, aiseā e manaʻomia ona iai i tagata suʻesuʻe le faatuatua i le Atua ma i le Tusi Paia, ma e faapefea ona tatou fesoasoani iā i latou ia atiaʻe?

¹⁶ Afai o loo tatou faia ni suʻesuʻega a tagata e lē auai i lotu, e tatau ona aʻoaʻoina pea i latou ia talitonu e iai le Atua. (Faitau le Eperu 11:6.) E ao foʻi ona fesoasoani iā i latou e atiaʻe lo latou faatuatua i le Tusi Paia. E ono manaʻomia ai la ona toe talanoaina ni aʻoaʻoga i le Tusi Paia. I taimi o le suʻesuʻega, e ono manaʻomia ona talanoa i faamaoniga, o le Tusi Paia o le Afioga a le Atua. Atonu e aofia ai se iloiloga puupuu o valoaga o le Tusi Paia ua faataunuuina, o le saʻo aʻiaʻi o le faasaienisi ma le talafaasolopito, po o le aogā o le atamai o loo i ai.

17. O le ā se aafiaga o lo tatou faaalia atu o le alofa i tagata?

¹⁷ E tatou te fesoasoani i tagata ina ia avea ma soo o Keriso, e ala i le faaalia o le alofa iā i latou e tusa pe lolotu pe leai. (1 Kori. 13:1) A o aʻoaʻoina i latou, o lo tatou sini ia faailoa atu e alofa le Atua iā i latou, ma e finagalo foʻi ia tatou alolofa atu iā te ia. I tausaga taʻitasi, o le faitau afe o ē na itiiti pe e leai foʻi se naunau i lotu, ua papatiso ona ua tuputupu aʻe lo latou alofa i le Atua. O lea, ia iai se vaaiga saʻo, ma faaalia le alofa ma le naunau i ituaiga uma o tagata. Ia faalogologo atu ma taumafai e malamalama iā i latou. E ala i lau faaaʻoaʻoga, ia aʻoaʻo i latou e avea ma soo o Keriso.