1. O ā nisi o mea e ono taaʻina ai manatu o se tane i lona tulaga ulu?

O LE ā le uiga o le upu ulu iā te oe? O nisi tane ua manatu o a latou tū ma aganuu po o le auala na tausia aʻe ai i latou, o le auala lenā e feutagaʻi ai ma a latou avā ma fanau. Seʻi mātau le faamatalaga a Yanita o se tuafafine mai i Europa: “I le vaipanoa o loo oʻu nofo ai, ua matuā mauaa i tagata le manatu e tāua atu tamāloloa nai lo o fafine ma e tatau ona vaai iā i latou o ni pologa.” Ua faapea mai se uso e igoa iā Luka e nofo i le Iunaite Setete: “E aʻoaʻo e nisi tamā a latou fanau tama e lē tāua manatu o fafine ma e lē tatau ona uaʻi i ai.” Peitaʻi, e lē o le auala lenā e finagalo Ieova e faatino ai e tane o latou tulaga ulu. (Faatusatusa i le Mareko 7:13.) O lea la, e faapefea ona avea se tane ma ulu lelei o se aiga?

2. O le ā e tatau ona iloa e le ulu o se aiga ma aiseā?

² Muamua, e tatau ona malamalama se tane i mea e finagalo Ieova e na te faia ina ia avea ai o ia ma ulu lelei o se aiga. E tatau foʻi ona malamalama le tane i le māfuaaga na faavae ai e Ieova le tulaga ulu, ma le auala e faaaʻoaʻo ai iā Ieova ma Iesu. Aiseā e tāua ai i se tane ona iloa na mea? Talu ai ua tuu e Ieova i ulu o aiga se pule, ma e na te faatalitalia i latou e faaaogā tatau lenā pule.—Luka 12:48e.

3. O le ā e tatou te aʻoaʻoina mai i le 1 Korinito 11:3 e faatatau i le tulaga ulu?

³ Faitau le 1 Korinito 11:3. Ua faamatala mai i lenei mau le auala ua faatulaga ai e Ieova lona aiga i le lagi ma le lalolagi.  O le tulaga ulu e aofia ai mea tāua e lua, o le pule ma le auala e tali atu ai iā Ieova. O Ieova o “le ulu” po o le pule aoao ma e tali atu iā te ia lana fanau uma, o agelu ma tagata. (Roma 14:10; Efe. 3:14, 15) Ua tuu atu e Ieova iā Iesu le pule i le faapotopotoga ma e tali atu Iesu iā Ieova i le auala e feutagaʻi ai ma i latou. (1 Kori. 15:27) Ua tuu atu foʻi e Ieova i tane le pule i lana avā ma lana fanau, o lea, e tali atu le tane iā Ieova ma Iesu i le auala e feutagaʻi ai ma lona aiga.—1 Pete. 3:7.

4. O le ā le pule o loo iā Ieova ma Iesu?

⁴ Ona o Ieova o le Ulu o lona ʻauaiga i le lagi ma le lalolagi, ua iā te ia la le pule e fai ai tulafono i le auala e amioaʻi ai lana fanau, ma e na te faamautinoa e latou te usitaʻia na tulafono. (Isa. 33:22) Ona o Iesu o le ulu i le faapotopotoga Kerisiano, e iā te ia foʻi la le aiā e fai ai tulafono ma faamautinoa e usitaʻia e le faapotopotoga na tulafono.—Kala. 6:2; Kolo. 1:18-20.

5. O le ā le pule ua tuuina atu i se ulu o se aiga Kerisiano, ma o fea e gata ai lana pule?

⁵ Ina ia mulimuli i le faaaʻoaʻoga a Ieova ma Iesu, ua tuuina atu i se ulu o se aiga Kerisiano le pule e faia ai filifiliga mo lona aiga. (Roma 7:2; Efe. 6:4) Ae e iai le mea e gata ai lana pule. O se faaaʻoaʻoga, e tatau ona faavae ana tulafono i mataupu silisili o le Afioga a le Atua. (Faata. 3:5, 6) E leai se pule i le ulu o le aiga e fai ai tulafono mo i latou e lē o se vaega o lona aiga. (Roma 14:4) Pe a matutua le fanau ma tuua le aiga, e faaauau pea ona latou faaaloalo iā te ia, ae e latou te lē toe ola i lalo o lana pule o le ulu o le aiga.—Mata. 19:5.

6. Aiseā na faavae ai e Ieova le tulaga ulu?

⁶ Na faavae e Ieova le tulaga ulu, ona o lona alofa i lona ʻauaiga. O le aiga o se meaalofa mai iā Ieova. O le faatulagaga ulu ua faigofie ai ona faagaoioi le ʻauaiga o Ieova i se auala filemu ma maopoopo. (1 Kori. 14:33, 40) E lē maopoopo ma lē fiafia le ʻauaiga o Ieova, pe ana lē manino lelei le faatulagaga ulu. O se faataʻitaʻiga, e lē iloa po o ai e tatau ona faia faaiʻuga ma po o ai e tatau ona taulamua i le faatinoina o na faaiʻuga.

7. E tusa ai o le Efeso 5:25, 28, o le ā le auala e finagalo Ieova e feutagaʻi ai tane ma a latou avā?

⁷ Pe afai o se māfuaaga lelei na faatulaga ai e le Atua le tulaga ulu, aiseā la ua tele ai fafine i aso nei ua faileagaina ma pule malosi ai a latou tane? Talu ai o le toʻatele o tane ua latou teena tapulaa a Ieova mo aiga, ae mulimuli i tū ma aganuu a latou atunuu. E latou te ono faileagaina foʻi a latou avā ina ia faamalie ai ni o latou faalogona manatu faapito. O se faaaʻoaʻoga, e ono pule malosi se tane i lana avā ona o lona faaalialia vale pe faaali atu foʻi i isi “o ia e pule.” E ono manatu e lē mafai ona ia faamalosia lana avā e alofa iā te ia, ae e mafai ona ia faamataʻuina o ia. O le a fefe le avā ma faigofie ai ona pulea o ia e le tane. * E manino mai o na ituaiga mafaufauga ma amioga, ua aveesea ai le mamalu ma le faaaloalo na tatau ona maua e fafine, ma e matuā tuufaafeagai lava ma le finagalo o Ieova.—Faitau le Efeso 5:25, 28.

8. E faapefea i se tane ona avea ma ulu lelei?

⁸ E mafai e se tane ona avea ma ulu lelei o se aiga, e ala i le faaaʻoaʻo i le auala e faatino ai e Ieova ma Iesu o la tulaga ulu. Seʻi o tatou iloiloina ni uiga se lua na faaalia e Ieova ma Iesu,  ma mātau le auala e mafai ai e se ulu o se aiga ona faaalia na uiga, pe a feutagaʻi ma a latou avā ma fanau.

9. E faapefea ona faaalia e Ieova le lotomaulalo?

⁹ Lotomaulalo. E ui e sili le atamai o Ieova i le aoao o mea, ae e uaʻi mai o ia i manatu o ana auauna. (Kene. 18:23, 24, 32) Na ia faataga i latou i lalo o lana pule e faaali atu o latou manatu. (1 Tu. 22:19-22) E lelei atoatoa Ieova, peitaʻi e na te lē faatalitalia i tatou i le taimi nei ia lelei atoatoa. Ae e fesoasoani i tagata lē lelei atoatoa ina ia taulau i le auaunaga iā te ia. (Sala. 113:6, 7) O le mea moni, o loo faamatalaina i le Tusi Paia Ieova o “le fesoasoani.” (Sala. 27:9; Epe. 13:6) Na taʻutino mai le tupu o Tavita na pau le māfuaaga na mafai ai ona ia faataunuuina le galuega tele na tuuina atu iā te ia, ona o le lotomaulalo o Ieova.—2 Samu. 22:36.

10. Na faapefea ona faaalia e Iesu le lotomaulalo?

¹⁰ Seʻi o tatou iloiloina le faaaʻoaʻoga a Iesu. E ui o ia o le Alii ma le Matai o ona soo, ae na ia mulumuluina o latou vae. O le ā se tasi o māfuaaga na faamauina ai e Ieova lenei tala i le Tusi Paia? Ina ia maua ai e tagata uma e aofia ai ma ulu o aiga se faaaʻoaʻoga lelei e mulimuli i ai. Na fetalai Iesu: “Ua ou faia le faaaʻoaʻoga mo outou, o lea, e pei ona ou faia iā te outou, e tatau foʻi ona outou faia faapea.” (Ioa. 13:12-17) E ui e tele le pule na iā Iesu ae e na te leʻi faatalitalia isi e auauna iā te ia. Peitaʻi, na ia auauna atu i isi.—Mata. 20:28.

11. O le ā e aʻoaʻoina e ulu o aiga e faatatau i le lotomaulalo mai i faaaʻoaʻoga a Ieova ma Iesu?

¹¹ Lesona mo tatou. E tele auala e faaalia ai e ulu o aiga le lotomaulalo. O se faaaʻoaʻoga, e na te lē faatalitalia lana avā ma lana fanau ia lelei atoatoa. E uaʻi i manatu o lona aiga e tusa lava pe latou te lē ioe i ona manatu. Ua faapea mai Marley e nofo i Amerika: “E iai taimi e eseese ai o ma manatu ma laʻu tane. Ae ou te lagona le talisapaia ma le faaaloalo o laʻu tane iā te aʻu, ona e fesili mai i soʻu manatu ma iloilo lelei a o leʻi faia lana faaiʻuga.” O se tane lotomaulalo, e lotomalie e fai feʻau i le fale e ui e manatu i ai tagata o lenā vaipanoa o feʻau na a fafine. O se luʻi lenā mea. Aiseā? Ua faapea mai se tuafafine e igoa iā Rachel: “O le vaipanoa ou te sau ai, pe a fesoasoani le  tane i lana avā i le fufuluina o ipu po o le faamamāina o le fale, e manatu tuaoi ma ona tauaiga ua pule ai le avā.” Pe afai e taatele lenā uiga i lou vaipanoa, ia manatua na mulumulu e Iesu vae o ona soo, e ui na manatu i ai o se galuega a se pologa. O se ulu lelei e manatu mamafa mo le lelei o lana avā ma lana fanau, ae lē o le vaaiga a isi iā te ia. E ese mai i le lotomaulalo, o ā isi uiga e manaʻomia e se ulu lelei o se aiga?

12. O le ā ua uunaʻia e le alofa Ieova ma Iesu e fai?

¹² Alofa. E uunaʻia e le alofa mea uma e faia e Ieova. (1 Ioa. 4:7, 8) E tausia ma le alofa e Ieova o tatou manaʻoga faaleagaga, e ala mai i lana Afioga tusia le Tusi Paia ma lana faalapotopotoga. E na te tausia foʻi o tatou itu tau faalogona, e ala i le faamautinoa mai e alofa iā i tatou. Ae e faapefea o tatou manaʻoga faaletino? E ʻfoaʻi mai e Ieova le tele o mea iā i tatou ina ia tatou fiafia ai.’ (1 Timo. 6:17) E na te faasaʻoina foʻi i tatou pe a faia ni mea sesē, ae e lē taofia ai lona alofa. Na saunia e Ieova le togiola ona o lona alofa iā i tatou. (Ioa. 3:16; 15:13) E leai se mea e mafai ona taofia le alofa māfana o Ieova ma Iesu mo i latou e faamaoni iā i laʻua.—Ioa. 13:1; Roma 8:35, 38, 39.

13. Aiseā e tāua ai mo ulu o aiga ona faaalia le alofa mo lona aiga? (Tagaʻi i le pusa “ E faapefea Ona Maua e se Tane Faatoʻā Faaipoipo le Faaaloalo o Lana Avā?”)

¹³ Lesona mo tatou. E tatau ona uunaʻia e le alofa mea uma e faia e se ulu o se aiga. Aiseā e matuā tāua ai? Na tali le aposetolo o Ioane: “O lē e lē alofa i lona uso, (po o lona aiga) o lē ua ia vaai atu i ai, e lē mafai ona ia alofa i le Atua, o lē ua ia lē vaai atu i ai.” (1 Ioa. 4:11, 20) O lea la, o se tane e alofa i lona aiga ma manaʻo e faaaʻoaʻo iā Ieova ma Iesu, e na te tausia manaʻoga faaleagaga, itu tau faalogona ma manaʻoga faaletino o lona aiga. (1 Timo. 5:8) E na te aʻoaʻo foʻi ma faatonu lana fanau. E faaauau pea ona ia faia filifiliga e faamamaluina ai Ieova ma aogā i lona aiga. Seʻi o tatou iloiloina na vala ma pe faapefea i ulu o aiga ona faaaʻoaʻo iā Ieova ma Iesu.

14. E faapefea ona tausia e se ulu o se aiga manaʻoga faaleagaga o lona aiga?

¹⁴ Tausia manaʻoga faaleagaga o lona aiga. Na faaaʻoaʻo Iesu i lona Tamā e ala i le tausia lelei o manaʻoga faaleagaga o ona soo. (Mata. 5:3, 6; Mare. 6:34) E faaaʻoaʻo foʻi ulu o aiga iā Iesu, e ala i le faamuamua ona tausia o manaʻoga faaleagaga o lona aiga. (Teu. 6:6-9) E faamautinoa e se ulu o se aiga e latou te faitau ma suʻesuʻe faatasi ma lona aiga le Afioga a le Atua, auai i sauniga, talaʻi le tala lelei, atiaʻe ma faatumauina la latou faiā ma Ieova.

15. O le ā se tasi o auala e tausia ai e se ulu o se aiga manaʻoga tau faalogona o lona aiga?

¹⁵ Tausia manaʻoga tau faalogona o lona aiga. Na faailoa e Ieova i le lautele lona alofa mo Iesu. (Mata. 3:17) Na saʻoloto Iesu e faailoa atu lona alofa i ona soo, e ala i ana gaoioiga ma ana fetalaiga. Na latou faaalia foʻi lo latou alolofa mo Iesu. (Ioa. 15:9, 12, 13; 21:16) E mafai e se ulu o se aiga ona faaalia le alofa i lana avā ma lana fanau, e ala i ana gaoioiga e pei o le suʻesuʻe o le Tusi Paia faatasi ma i latou. E tatau ona ia faailoa atu lona alofa ma lona talisapaia o i latou, ma pe a talafeagai, faamālō i ai i luma o isi.—Faata. 31:28, 29.

16. O le ā se isi mea e tatau ona faia e se ulu o se aiga, ma e faapefea ona ia faatumauina se vaaiga paleni?

¹⁶ Tausia manaʻoga faaletino o lona aiga. E ui ina faasala e Ieova tagata Isaraelu ona o lo latou lē usiusitaʻi, ae na ia tausia pea o latou manaʻoga faaletino. (Teu. 2:7; 29:5) O loo ia tausia foʻi o tatou manaʻoga faaletino i aso nei. (Mata. 6:31-33; 7:11) Na fafaga e Iesu ē na mulimuli iā te ia ma faamālōlō o latou maʻi. (Mata. 14:17-20; Mata. 4:24) E tatau foʻi i se ulu o se aiga ona tausia manaʻoga faaletino o lona aiga ina ia maua ai le finagalo malie o Ieova. Peitaʻi, e manaʻomia ona iā te ia se vaaiga paleni. E lē tatau ona alu uma lona taimi i lana galuega totogi e tausia ai manaʻoga faaletino o lona aiga, ma lē taulau ai i le tausia o latou manaʻoga faaleagaga ma tau faalogona.

17. E faapefea ona toleni ma faatonu i tatou e Ieova ma Iesu?

¹⁷ Saunia toleniga. E toleni ma faatonu i tatou e Ieova ona e finagalo ia tatou maua se olaga e sili ona lelei. (Epe. 12:7-9) E faaaʻoaʻo Iesu i lona Tamā e ala i le toleni o i latou i lalo o lana pule i se auala alofa. (Ioa. 15:14, 15) E maumauaʻi ae e agalelei Iesu. (Mata. 20:24-28) E malamalama o ia e tatou te lē lelei atoatoa, ma e iai taimi e tatou te sesē ai.—Mata. 26:41.

18. O le ā e tatau ona manatua e se ulu lelei o se aiga?

¹⁸ O se ulu o se aiga e faaaʻoaʻo iā Ieova ma Iesu, e tatau ona ia manatua e lē lelei atoatoa sui taʻitasi o le aiga. E lē tatau ona “soona ita” i lana avā po o lana fanau. (Kolo. 3:19) Ae e na te faatatauina le mataupu silisili i le Kalatia 6:1 ma taumafai e faasagatonu i latou i le  “agaga o le agamalu,” ma manatua e lē lelei atoatoa foʻi o ia. O le faaaʻoaʻo iā Iesu, e na te iloa ai o le auala sili e aʻoaʻo ai o lana faaaʻoaʻoga.—1 Pete. 2:21.

19-20. E faapefea ona faaaʻoaʻo se ulu o se aiga iā Ieova ma Iesu pe a faia ana faaiʻuga?

¹⁹ Ia faia faaiʻuga lē manatu faapito. E faia e Ieova faaiʻuga e sili ona lelei mo isi. O se faaaʻoaʻoga, na ia foafoaina le ola e lē mo lona lava lelei, ae ina ia tatou tofo ai i le olioli o le mauaina o le ola. E leʻi faamalosia o ia e foaʻi mai lona Alo mo a tatou agasala. Na finagalo malie o ia e fai lenā faataulaga mo i tatou. Na faia foʻi e Iesu faaiʻuga mo le lelei o isi. (Roma 15:3) O se faaaʻoaʻoga, na faataulaga lona fia mālōlō ae aʻoaʻo le motu o tagata.—Mare. 6:31-34.

²⁰ E iloa e se ulu lelei o se aiga, o se tasi o mea e sili ona faigatā e na te faia, o le faia o faaiʻuga atamai mo lona aiga, ma e na te matuā faatāuaina lenā matafaioi. E taumafai o ia e ʻalofia le faia o faaiʻuga faatatope po o faaiʻuga e fua i ona faalogona i lenā taimi. Ae e na te faataga Ieova e toleni o ia. * (Faata. 2:6, 7) O le faia faapea, e mafaufau ai o ia i le lelei o isi ae lē o lona lava lelei.—Fili. 2:4.

21. O le ā o le a talanoaina i le mataupu o loo sosoo mai?

²¹ Ua tuuina mai e Ieova i ulu o aiga se tofiga faigatā, ma e latou te tali atu iā Ieova i le auala e latou te faataunuuina ai. Pe a maumauaʻi se tane e faaaʻoaʻo i le faaaʻoaʻoga a Ieova ma Iesu, o le a avea la o ia ma ulu lelei o lona aiga. Pe a faataunuu e le avā lana matafaioi, o le a fiafia foʻi le faaipoipoga. O le ā le vaaiga e tatau ona iai i avā i le tulaga ulu, ma o ā luʻi e na te fesagaʻia? O le a tali i le mataupu o loo sosoo mai na fesili.