1-2. O le ā se mea e matuā tāua iā Ieova, ma o le ā e finagalo o ia ina ia tatou faia?

 E MATUĀ tāua iā Ieova o tatou uiga e faaalia i isi tagata. Na aʻoaʻo i tatou e Iesu ina ia alolofa i o tatou tuaoi, e pei ona tatou alolofa iā i tatou lava. (Mata. 22:​37-39) E aofia ai le faaalia o le agalelei e oo lava i ē e lē tutusa o tatou talitonuga. O le faia faapea, ua tatou faaaʻoaʻo ai iā Ieova le Atua “o lē na te faaoso lona lā i ē e amioleaga ma ē e amiolelei, ma faatotō mai le timu i ē e amiotonu ma ē e amiolētonu.”—Mata. 5:45.

² E ui e alofa Ieova i tagata uma, ae e alofa faapelepele o ia i ē e faia le amiotonu. (Ioa. 14:21) E finagalo o ia ina ia tatou faaaʻoaʻo iā te ia. Ua timaʻi mai o ia ina ia ʻtele lo tatou alofa’ i o tatou uso ma tuafāfine, ma ia “matuā alofa faapelepele” iā i latou. (1 Pete. 4:8; Roma 12:10) Pe a talanoa i le faaalia o lenā alofa ma faalogona faapelepele i se tasi, atonu e tatou te mafaufau i o tatou faalogona māfana i so tatou tauaiga po o se uō pele.

3. O le ā e tatau ona tatou manatua e faatatau i le alofa?

³ Ina ia ola se laau, e manaʻomia ona faaauau ona tausi lelei. E faapena foʻi le alofa. Na fautua atu le aposetolo o Paulo i Kerisiano: “Ia faaauau ona faaalia lo outou alofa faaleuso.” (Epe. 13:1) E finagalo Ieova ia faaauau ona atiaʻe lo tatou alofa mo isi. O le a talanoaina i lenei suʻesuʻega māfuaaga e tatau ai ona tatou māfana i uso tapuaʻi, ma auala e faaauau ona tatou faia ai faapea.

 MĀFUAAGA E TATAU AI ONA MĀFANA A TATOU FAAUŌGA

4. E tusa ai ma le Salamo 133:​1, e faapefea ona tatou talisapaia lo tatou ʻauuso autasi? (Tagaʻi foʻi i ata.)

⁴ Faitau le Salamo 133:1. E tatou te ioe i upu a le faisalamo o lē na tusi e faapea, e “lelei” ma e “matagofie” faauōga moni ma i latou e alolofa iā Ieova. Peitaʻi, e mafai ona tatou manatu māmā i le matagofie o lo tatou autasi o ni Kerisiano, e pei ona manatu māmā se tasi i se laau matagofie e vaai i ai i aso faisoo. E tatou te vāai i o tatou uso ma tuafāfine i le tele o taimi o le vaiaso. E faapefea la ona faaauau ona tatou talisapaia i latou? O le a tuputupu aʻe lo tatou alofa i o tatou uso ma tuafāfine, pe a faaalu se taimi e mafaufau ai i le tāua o sui taʻitoʻatasi iā i tatou, faapea le faapotopotoga.

5. O le ā le aafiaga i isi pe a latou mātauina le alofa i lo tatou ʻauuso?

⁵ E maofa i latou ua faatoʻā auai i se sauniga ona o le alofa e tatou te faaalia i le tasi i le isi. O le vaaia o lenā alofa, ua latou manatu ai ua latou maua le upu moni. Na fetalai Iesu: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” (Ioa. 13:35) Seʻi manatu i le mea na tupu iā Chaithra, o se talavou e aʻoga i le iunivesite na suʻesuʻe ma Molimau a Ieova. Na ia talia se valaaulia e auai i se tauaofiaga itumalo. Ina ua uma le aso muamua o le tauaofiaga, na ia faapea atu i lona faiaʻoga o le Tusi Paia: “Ou te lē manatua se taimi na fusi ai aʻu e oʻu mātua. Ae i le tou tauaofiaga, e 52 taimi na fusi ai aʻu e tagata i le aso e tasi. Na ou lagona le alofa o Ieova e ala mai i lenei  aiga faaleagaga. Ua ou fia auai lava i lenei aiga.” Na faaauau ona agaʻigaʻi i luma Chaithra ma papatiso i le 2024. Ioe, e masani ona uunaʻia tagata fou e auauna iā Ieova, pe a latou mātauina a tatou galuega lelei lea e aofia ai le alofa o le tasi i le isi.—Mata. 5:16.

6. E faapefea ona puipuia i tatou pe a māfana a tatou faauōga ma o tatou uso ma tuafāfine?

⁶ E mafai ona puipuia i tatou pe a māfana a tatou faauōga ma o tatou uso ma tuafāfine. Na apoapoaʻi atu Paulo i ona uso Kerisiano: “Ia faalaeiau pea le tasi i le isi i aso taʻitasi . . . ina neʻi faamaaa se tasi o outou ona o le malosi taufaasesē o le agasala.” (Epe. 3:13) E ono uunaʻia e Ieova se uso mataala e na te saunia le fesoasoani e tatou te manaʻomia, pe afai ua lofitūina i tatou i le lotovaivai ma amata ai ona tatou liliuese mai le ala o le amiotonu. (Sala. 73:​2, 17, 23) O faalaeiauga faapena e matuā lelei mo i tatou.

7. O le ā le fesootaʻiga o le alofa ma le autasi? (Kolose 3:​13, 14)

⁷ E tele faamanuiaga o loo tatou olioli ai, ona o i tatou o se vaega o tagata o loo taumafai malosi e faaalia le alofa o le tasi i le isi. (1 Ioa. 4:11) O se faataʻitaʻiga, o le alofa e uunaʻia ai i tatou e “faaauau ona faapalepale le tasi i le isi,” lea e saosaolaumea i lo tatou autasi o ni Kerisiano. (Faitau le Kolose 3:​13, 14; Efe. 4:​2-6) O le mea lea e tatou te olioli ai i ni mafutaga māfana i a tatou sauniga, o se siʻomaga e lē maua i se isi lava mea.

IA FAAALOALO LE TASI I LE ISI

8. E faapefea ona fesoasoani Ieova iā i tatou ina ia tatou autasi?

⁸ O se vavega le autasi o lo tatou ʻauuso i le lalolagi aoao. O Ieova e māfua ai lenei autasi e ui i lo tatou tulaga lē lelei atoatoa. (1 Kori. 12:​24, 25) Ua faapea mai le Tusi Paia, ʻua aʻoaʻoina i tatou e le Atua ina ia alofa le tasi i le isi.’ (1 Tesa. 4:9) O lona uiga, ua faailoa manino mai e Ieova e ala i le Tusi Paia, mea e manaʻomia ona tatou faia ina ia māfana ai a tatou faauōga. E mafai ona ʻaʻoaʻoina i tatou e le Atua,’ e ala i lo tatou iloilo totoʻa o ana aʻoaʻoga ma faatatau i o tatou olaga. (Epe. 4:12; Iako. 1:25) O le mea tonu lenā o loo taumafai malosi Molimau a Ieova e fai.

9. O le ā e tatou te aʻoaʻoina mai i le Roma 12:​9-13 e faatatau i le faaaloalo o le tasi i le isi?

⁹ E faapefea ona aʻoaʻoina i tatou e le Afioga a le Atua ina ia māfana a tatou faauōga? Seʻi o tatou iloiloina upu a Paulo o loo i le Roma 12:​9-13. (Faitau.) Ia mātau le faaupuga, “ia tausolomua ona faaaloalo le tasi i le isi.” O lona uiga, e tatau ona tatou tausolomua e “matuā alofa faapelepele” i isi e ala i le faaalia o le lotofaamagalo, talimālō, limafoaʻi, ma isi uiga lelei faapena. (Efe. 4:32) Aua le faatalitali seʻia faaalia mai e uso ma tuafāfine uiga māfana iā te oe, ae ia e “tausolomua” e faia faapea, ma e tofo ai i le moni o le fetalaiga a Iesu: “E sili le fiafia e maua i le foaʻi atu i lo o le talia mai.”—Galu. 20:35.

10. O le ā le fesootaʻiga o le toʻaʻaga ma le faaalia o le ʻfaaaloalo o le tasi i le isi’? (Tagaʻi foʻi i le ata.)

¹⁰ O le mea e mataʻina ai, ina ua uma ona faapea mai Paulo ia tausolomua ona faaaloalo le tasi i le isi, ona ia apoapoaʻi mai lea “ia toʻaʻaga, ae aua le paiē.” O se tagata e toʻaga, e sogasogā ma e galue mamafa e faatino se galuega e tuuina atu iā te ia. Ua faalaeiauina i tatou i le Faataoto 3:​27, 28: “Aua e te taofia se mea lelei mai i ē ua tatau i ai pe  afai e mafai ona e fesoasoani i ai.” O lea, pe a tatou mātauina se tasi o loo manaʻomia se fesoasoani, e tatou te faia le mea sili e fesoasoani ai iā te ia. E tatou te lē faimeatuu pe mafaufau foʻi o loo iai se tasi e fesoasoani i ai.—1 Ioa. 3:​17, 18.

11. O le ā e fesoasoani iā i tatou ina ia māfana ai a tatou faauōga ma isi?

¹¹ O se isi auala e faaalia ai le faaaloalo i isi, o le vave lea ona faamagalo atu pe a faatigā mai se isi. Ua faapea mai le Efeso 4:26: “Aua neʻi goto le lā o tumau pea lo outou ita.” Aiseā? Ua taʻua i le fuaiupu 27, ona o le a tatou ʻtuua ai se avanoa i le Tiapolo.’ O loo fetalai mai pea lava pea Ieova i lana Afioga, ina ia tatou fefaamagaloaʻi. Ua faalaeiauina i tatou i le Kolose 3:​13, ina ia “faaauau ona . . . fefaamagaloaʻi ma le lotoatoa.” O se tasi o auala sili e māfana ai a tatou faauōga, o le lē amanaʻia lea o mea sesē ma mea e faatigā mai ai isi iā i tatou. E fesoasoani lea ʻe faatumau ai le autasi i le agaga i le fusi o le filemu.’ (Efe. 4:3) Ioe, o le fefaamagaloaʻi e saosaolaumea i lo tatou autasi ma le filemu.

12. E faapefea ona fesoasoani Ieova iā i tatou ina ia maua le lotofaamagalo?

¹² O le mea moni, e ono faigatā ona tatou faamagalo atu i ē na faatigā mai iā i tatou. Ae e mafai ona tatou faia faapea e ala i le fesoasoani a le agaga o le Atua. Ina ua uma ona taʻua i le Tusi Paia le faalaeiauga, ia “matuā alofa faapelepele le tasi i le isi” ma “ia toʻaʻaga,” ona faapea atili mai lea: “Ia maelega i la le agaga.” O lona uiga, e mafai e le agaga paia o le Atua ona uunaʻia i tatou ina ia matuā maelega ma filigā e faia mea uma e faafinagaloina e le Atua. (Roma 12:11) O lea, e fesoasoani le agaga o le Atua iā i tatou ina ia alolofa faapelepele i isi, ma fefaamagaloaʻi ma le lotoatoa. O le māfuaaga lea e tatou te matuā ʻaiʻoi atu ai iā Ieova mo lana fesoasoani.—Luka 11:13.

“IA LEAI NI FEVAEVAEAʻIGA IĀ TE OUTOU”

13. O le ā se mea e ono faatupu ai fevaevaeaʻiga?

¹³ O loo faia aʻe le faapotopotoga i “ituaiga  uma o tagata,” ma e eseese o latou talaaga. (1 Timo. 2:​3, 4) Pe a tatou lē faaeteete, o le a avea nei eseesega ma mea e faatupu ai fevaevaeaʻiga, e tusa ai o mataupu e patino i le tagata lava ia e pei o laʻei ma teuga, o le tausia o le soifua mālōlōina, ma faafiafiaga. (Roma 14:4; 1 Kori. 1:10) Talu ai ua aʻoaʻoina i tatou e le Atua ina ia alofa le tasi i le isi, e tatau la ona faaeteete i le soona faatāua o a tatou lava filifiliga, ma manatu ai e sili atu nai lo o filifiliga a isi.—Fili. 2:3.

14. O le ā e tatau ona tatou taumafai malosi e fai, ma aiseā?

¹⁴ E mafai foʻi ona taofia fevaevaeaʻiga i le faapotopotoga, e ala i le taumafai malosi e avea i tatou o ni ē e atiaʻe ma faafouina ai isi i taimi uma. (1 Tesa. 5:11) Talu ai nei, na toe foʻi mai ai le toʻatele o ē e leʻi toe talaʻi pe na aveesea mai i le faapotopotoga. E tatou te talia ma le alofa i latou. (2 Kori. 2:8) Ia mātau le mea na tupu i se tuafafine na toe foʻi mai i le Maota mo Sauniga, ae ua sefulu tausaga talu ona lē toe talaʻi. Na ia faapea mai: “Na sagisagi fiafia ma faatalofa mai isi iā te aʻu.” (Galu. 3:19) O ā ni ona faalogona ona o le talia lelei o ia? Na ia faapea mai: “Na ou lagona ai ua toe taʻitaʻia mai aʻu e le aao o Ieova i se olaga fiafia.” E mafai ona faaaogā i tatou e Keriso e faafouina i latou “ua tigāina ma mafatia i avega,” pe afai e avea i tatou o ni ē e atiaʻe pe faalaeiauina isi.—Mata. 11:​28, 29.

15. O le ā se isi auala e faamalosia ai lo tatou autasi? (Tagaʻi foʻi i le ata.)

 ¹⁵ O se isi auala e faamalosia ai lo tatou autasi, o a tatou faamatalaga. Ua taʻua i le Iopu 12:11: “Pe e lē tofotofo ea e le taliga upu e pei ona tofo e le laulaufaiva o meaʻai?” E pei lava ona masani ona tofo muamua e se kuka se meaʻai a o leʻi laulauina atu, e tatau foʻi la ona tatou mafaufau muamua i a tatou faamatalaga a o leʻi fai atu. (Sala. 141:3) O lo tatou sini o le faamautinoa lea e atiaʻe, faafouina, ma ʻaogā a tatou upu i ē o faalogologo i ai.’—Efe. 4:29.

16. O ai e ao ona mataalia i le faia o faamatalaga e faalaeiau ai?

¹⁶ E tāua tele i tane ma mātua ona atiaʻe isi e ala i a latou faamatalaga. (Kolo. 3:​19, 21; Tito 2:4) E ao foʻi i toeaina ona avea o ni puna o faalaeiauga ma faamāfanafanaga, a o latou leoleoina le lafu mamoe a Ieova. (Isa. 32:​1, 2; Kala. 6:1) Ua faapea mai le Faataoto 15:23: “Maʻeu le matagofie o le upu e fai i le taimi talafeagai!”

ALOFA ʻE ALA I GAOIOIGA MA LE FAAMAONI’

17. E faapefea ona tatou faamautinoa e moni lo tatou alofa i o tatou uso ma tuafāfine?

¹⁷ Na faalaeiauina i tatou e le aposetolo o Ioane: “Aua neʻi o tatou alolofa tau o le upu ma le gutu, ae e ala foʻi i gaoioiga ma le faamaoni.” (1 Ioa. 3:18) E tatou te mananaʻo ia moni lo tatou alofa i o tatou uso ma tuafāfine. E faapefea ona tatou atiaʻe lenā ituaiga o alofa? O le tele e tatou te faifaimea faatasi ai ma o tatou uso ma tuafāfine, o le tele foʻi lenā e māfana ai a tatou faauōga ma le alofa o le tasi i le isi. O lea, ia saʻili ni avanoa e faifaimea faatasi ai ma isi i sauniga ma talaʻiga. Ia asiasi atu foʻi i isi. O le faia faapea, ua faaalia ai ʻua aʻoaʻoina i tatou e le Atua ina ia alofa le tasi i le isi.’ (1 Tesa. 4:9) O le a faaauau ai foʻi ona tatou tofo i le moni o upu nei: “Maʻeu le lelei ma le matagofie o le nonofo faatasi o uso i le autasi!”—Sala. 133:1.