I le 13 o oʻu tausaga, na amata vaivai ai le ma faiā ma Ieova. E foliga mai na maua e aʻu uō i le aʻoga le tele o le saʻolotoga, ma na ou manatu ai e iai se mea ua misi i loʻu olaga. Na avea ma avega mamafa tulafono a mātua, tapulaa faa-Kerisiano ma gaoioiga faaleagaga. E ui ou te leʻi fesiligia le moni o Ieova, ae na amata ona ou lagonaina le lē toe māfana o le ma faiā.

Na ou faia se sao itiiti i le galuega talaʻi, ina ia ʻalofia ai le avea o aʻu ma se tagata ua lē toe talaʻi i le faapotopotoga. Pe a ou auai i le talaʻiga, ou te lē sauniuni lelei ma na faigatā ai ona ou amataina pe faaauau foʻi se talanoaga. O le iʻuga, ou te leʻi olioli i laʻu faiva ma e leʻi fua mai, ma atili ai ona sesē laʻu vaai. Na ou fesili ifo, ʻE mafai faapefea e se tasi ona talaʻi pea i vaiaso uma, ma masina uma?’

Ina ua 17 oʻu tausaga, sa iā te aʻu ni faalogona malolosi o le fia tū toʻatasi. O lea, na ou tuua ai loʻu aiga ma siitia atu i Ausetalia. E leʻi faigofie i oʻu mātua loʻu alu ese ma le aiga. Na la popole, ae na la manatu o le a faaauau pea aʻu masaniga faaleagaga.

 Na atili ona faavaivaia loʻu itu faaleagaga i Ausetalia. Na amata ona misi aʻu sauniga. Na amata foʻi ona ou faauō i talavou e pei o aʻu, e sauniga i le isi pō ae tafafao i le isi pō i le fale kalapu. Pe a toe tepa i tua, na ou iloa ai sa tū le isi oʻu vae i le upu moni, ae o le isi i le lalolagi, ma ou te leʻi lagonaina le fiafia moni i se tasi o na mea.

Pe ā o le lua tausaga mulimuli ane, na ou feiloaʻi ai i se tuafafine na aunoa ma lona iloaina, o le a ia fesoasoani iā te aʻu ou te toe mafaufau i le olaga sa ou ola ai. Na matou nonofo faatasi ma ni tuafāfine nofofua se toʻalima, ma na matou valaaulia le ovasia asiasi ma lana avā o Tamara e matou te nonofo i se vaiaso. Pe a auai lana tane i mataupu a le faapotopotoga, e faaalu e Tamara lona taimi e matou te toē ma fiafia faatasi ai. Na ou fiafia i lenā mea. O ia o se tagata lotomaulalo ma na faigofie ona talanoa i ai. Na faateʻia aʻu ona o Tamara o se tagata faaleagaga, ae e fai mea mālie.

O Tamara o se tagata maelega ma maumauaʻi. Na iai ni aafiaga lelei o lona fiafia ma le naunau mo le faiva ma le upu moni. Sa matuā fiafia o ia e fai le mea sili mo Ieova, ae na ou faanoanoa ona e leʻi i ai loʻu loto i laʻu auaunaga. O le saʻo o le vaai a Tamara ma lona fiafia moni, na telē se aafiaga lelei i loʻu olaga. Na fesoasoani lana faaaʻoaʻoga ou te mafaufau ai i se upu moni tāua o le Tusi Paia: E finagalo Ieova ia tatou auauna uma iā te ia “ma le fiafia . . . ma le alaga fiafia.”—Sala. 100:2.

Na ou fia maua le ituaiga olioli lea na iā Tamara, ae sa tatau ona ou faia ni suiga tāua ina ia maua ai lenā olioli. E ui na umi se taimi, ae na faasolosolo lava ona ou faia ni suiga lāiti. Na amata ona ou sauniuni mo le talaʻiga, ma na ou paeonia lagolago mai i lea taimi i lea taimi. Na fesoasoani lenā e tuuitiitia ai loʻu popole ma faateleina ai loʻu mautinoa. O  le tele na ou faaaogāina ai le Tusi Paia i le faiva, o le faateleina foʻi lenā o le olioli na ou tofo i ai. E leʻi umi ae ou paeonia lagolago loa i masina uma.

Na amata ona ou faauō i so o se tasi na faamaoni ma olioli i le auaunaga iā Ieova. O a latou faaaʻoaʻoga na fesoasoani iā te aʻu e toe iloilo mea e ave i ai laʻu faamuamua, ma toe amata ni masaniga lelei faaleagaga. Na toe faateleina loʻu olioli i le faiva, ma mulimuli ane ou auauna loa o se paeonia sauatoa. O le taimi muamua lea i le tele o tausaga, ua ou lagona ai le mautinoa, fiafia ma māfana i le faapotopotoga.

I le tausaga na sosoo ai, na ou feiloaʻi ai iā Alex, o se tagata agalelei ma faamaoni, ma e alofa iā Ieova ma fiafia i le auaunaga. I lenā taimi, na avea o ia o se auauna o le faiva ma ua ono tausaga talu ona paeonia. Na galue foʻi Alex i Malawi mo sina taimi i le mea na tele ai le manaʻoga. Na latou galulue faatasi i inā ma nisi o misionare na avea ma faaaʻoaʻoga lelei iā te ia. Na latou faalaeiauina foʻi o ia e faamuamua pea manaʻoga o le Malo.

Na ma faaipoipo ma Alex i le 2003, ma faaauau ona ma galulue mai ai i le auaunaga faataimi atoa. E tele lesona mataʻina na ma aʻoaʻoina, ma e tele foʻi auala na faamanuiaina ai i maʻua e Ieova.

I le 2009, na valaaulia ai i maʻua e auauna o ni misionare i Timor-Leste o se tamaʻi motu i Indonesia. Na ma fiafia, ae na lagona foʻi le faateʻia ma le popole i le taimi e tasi. I le lima masina mulimuli ane, na ma taunuu ai i Dili le laumua o Timor-Leste.

O lenei faaeaga, na manaʻomia ai ona ma faia ni suiga i le auala e ma te ola ai. Sa tatau ona ma faamasani i le aganuu, gagana,  o meaʻai ma le olaga i inā. I le talaʻiga, e masani ona matou vaaia tagata matitiva, lē lelei tulaga tauaʻoaʻoga ma mafatia ona o sauāga. Na matou vāai foʻi i le toʻatele o tagata o loo iai aafiaga i le tino ma faalogona, ona o taua ma faiga sauā. *

Maʻeu le fiafia na maua mai i le talaʻiga! O se faataʻitaʻiga, na ou feiloaʻi i se teineitiiti foliga faanoanoa e 13 tausaga e igoa iā Maria. * Na maliu lona tinā i ni nai tausaga muamua atu, ma e seāseā vaai i lona tamā. E leʻi iloa e Maria pe faapefea ona faaaogā lona olaga e pei o le tele o tamaiti o lana tupulaga. Ou te manatua se tasi o taimi, na tagi ai o ia ma sasaa mai ona faalogona. Peitaʻi, ou te leʻi iloa le mea na fai mai ai ona ou te leʻi malamalama lelei i lana gagana. Na ou tatalo iā Ieova e fesoasoani mai ina ia ou faalaeiau iā Maria, ma ou faitauina loa i ai ni mau faamāfanafana. I ni nai tausaga na sosoo ai, na ou vaaia ai suiga i ona uiga, foliga vaaia ma lona olaga ona o le upu moni. Ua papatiso Maria, ma o loo ia faia nei suʻesuʻega faale-Tusi Paia a isi. I le taimi nei, ua maua e Maria se aiga faaleagaga toʻatele e alolofa iā te ia.

O loo faamanuia e Ieova le galuega talaʻi i Timor-Leste. E ui o le toʻatele o tagata talaʻi na faatoʻā papatiso i le 10 tausaga talu ai, ae o le toʻatele o loo auauna o ni paeonia, auauna o le faiva ma toeaina. O loo galulue isi i le ofisa faaliliu, ma o loo fesoasoani i le saunia o meaʻai faaleagaga i a latou lava gagana. E ese loʻu fiafia i le faalogo atu i a latou pese i le sauniga, vaaia o latou foliga fiafia ma mātauina lo latou tuputupu aʻe faaleagaga.

E matuā ese a le ma olaga na iai i Ausetalia ma le ma tofiga ua iai i Timor-Leste. Ae maʻeu le olioli na ma maua mai ai. O nisi taimi e ma te ō i ni pasi e tumu i tagata, o iʻa ma paelo fualaau ʻaina mai le maketi. O isi aso e ma te faia se suʻesuʻega i se tamaʻi fale vevela ma palapalā le fola, ma moa e feoaʻi solo ai. E ui i na luʻi, ae e masani ona ou faapea ifo, ʻOka se manaia!’

Pe a toe tepa i tua, ou te matuā faafetaia oʻu mātua ona o le la lagolagosua iā te aʻu ma le faia o le mea sili e aʻoaʻo ai aʻu i ala o Ieova, e oo lava i taimi faigatā o loʻu talavou. Ua moni ai le Faataoto 22:6 i loʻu olaga. O se mitamitaga i oʻu mātua le ma auaunaga ma Alex, ma e fiafia ona o loo faaaogā i maʻua e Ieova. O loo ma galulue nei i le galuega femalagaaʻi i atunuu o loo vaavaaia e le Lālā i Ausetalia talu mai le 2016.

E faigatā ona ou talitonu na iai le taimi na ou vaai ai i le galuega talaʻi o se mea sa tau ina fai. Maʻeu loʻu fiafia i le auaunaga i le taimi lenei! Ua ou iloa nei po o ā lava faigatā o le olaga, o le olioli moni e maua mai i le auauna iā Ieova ma le lotoatoa. Ua 18 nei tausaga o ma auauna ma Alex iā Ieova, ma o tausaga sili ia ona fiafia o loʻu olaga. Ua ou iloa nei le moni o upu a le faisalamo o Tavita iā Ieova: “E olioli i latou uma o ē e sulufaʻi atu iā te oe; Latou te alalaga foʻi ma le fiafia i aso uma lava. . . . E olioli foʻi iā te oe o ē e alolofa i lou suafa.”—Sala. 5:11.