1, 2. (a) O le ā le sootaga o le alofa ma le faatuatua? (e) O ā fesili o le tatou iloiloina?

E TATOU te alolofa iā Ieova ʻauā na muaʻi alofa mai o ia iā i tatou.’ (1 Ioa. 4:19) O se tasi o auala e faaalia ai le alofa faapelepele o Ieova, o le faamanuia lea i ana auauna faamaoni. O le tele e tatou te alolofa ai i le Atua, o le malosi foʻi lenā o lo tatou faatuatua o loo soifua o ia, ma lo tatou mautinoa e na te tauia i latou e alofa i ai.​—Faitau le Eperu 11:6.

² O le tauia o ana auauna, o se mea e matuā tāua tele iā Ieova ma mea e na te faia. E faatoʻā atoa lo tatou faatuatua, pe a tatou talitonu maumauaʻi o le a tauia e le Atua ē e matuā saʻili iā te ia, auā “o le faatuatua, o le faatalitali lea ma le mautinoa i mea ua faamoemoe i ai.” (Epe. 11:1) O le faatuatua e aofia ai le faatalitali ma le mautinoa i faamanuiaga ua folafola mai e le Atua. Ae e faapefea ona aogā iā i tatou le faamoemoe i se taui? Ua faapefea ona tauia e Ieova ana auauna i le taimi ua mavae ma aso nei? Seʻi o tatou iloiloina.

3. O le ā le folafolaga o loo taʻu mai i le Malaki 3:10?

³ E faamautinoa e Ieova le Atua ua ia tauia ana auauna faamaoni.  O lea, ua ia valaaulia ai i tatou ia saʻili mo lana faamanuiaga. Ua taʻua i le Malaki 3:10: “ʻFaamolemole, ia outou tofotofo mai iā te aʻu . . . ’ ua fetalai mai ai Ieova o ʻau, ʻpo ou te lē tatalaina ea faitotoʻa o le lagi ma liligi ifo i o outou luga faamanuiaga seʻia oo ina matuā tele lava.’” E faaalia le tele o lo tatou talisapaia ma le lotofaafetai, pe a tatou talia le valaaulia agalelei a Ieova.

4. Aiseā e tatou te mautinoa ai i le folafolaga a Iesu o loo i le Mataio 6:33?

⁴ Na faamautinoa atu e Iesu i ona soo o le a tausia i latou e le Atua, pe afai e latou te faamuamua le Malo. (Faitau le Mataio 6:33.) E mautinoa le folafolaga a Iesu ona sa faavae i faamaoniga maumaututū o le maufaatuatuaina o Ieova. Sa iloa e Iesu e taunuu folafolaga uma a Ieova. (Isa. 55:11) E tatou te mautinoa foʻi pe afai e tatou te faatuatua atoatoa iā Ieova, o le a ia faataunuu lana folafolaga: “Ou te lē tuua lava oe, ma ou te lē tuulafoaʻia lava oe.” (Epe. 13:5) E mafai ona tatou faafesootaʻi atu lenei folafolaga i le fetalaiga a Iesu e faatatau i le saʻili muamua o le Malo ma le amiotonu a le Atua.

5. Aiseā e faamalosia ai le faatuatua i le tali a Iesu iā Peteru?

⁵ Na fesili le aposetolo o Peteru iā Iesu: “Ua matou tuua mea uma ae mulimuli atu iā te oe; o le ā la se mea e matou te maua?” (Mata. 19:27) E leʻi aʻoaʻia e Iesu Peteru ona o le faia o lenei fesili, ae na ia fetalai atu i ona soo o le a tauia i latou mo faataulaga ua latou faia. O le a pule faatasi i le lagi Iesu ma ona aposetolo ma isi auauna faamaoni. Ae e iai foʻi taui i aso nei auā na fetalai Iesu: “O ē uma e tuua fale po o uso, tuafāfine, tamā, tinā, fanau, po o fanua ona o loʻu igoa, e sili  atu mea latou te maua, ma e maua foʻi le ola e faavavau.” (Mata. 19:29) E sili atu ona tele faamanuiaga e maua e ona soo nai lo o so o se mea na latou faataulagaina. Pe e lē sili atu ona tāua tamā, tinā, uso, tuafāfine, ma fanau faaleagaga, nai i lo o so o se mea ua tatou tuua pe faataulaga ona o le Malo?

6. Aiseā ua folafola mai ai e Ieova i ona tagata tapuaʻi se taui?

⁶ E faamalosia e Ieova ona tagata tapuaʻi i taimi e feagai ai ma tofotofoga o le faamaoni, e ala i le folafola atu iā i latou o se taui. E lē gata o loo olioli auauna faamaoni a Ieova le Atua i le anoanoaʻi o faamanuiaga faaleagaga i le taimi nei, ae o loo latou matuā tulimataʻia foʻi faamanuiaga e sili atu i le lumanaʻi. (1 Timo. 4:8) O lea, o le talitonu ma le maumauaʻi o Ieova “e na te tauia ē e matuā saʻili iā te ia,” o le a fesoasoani iā i tatou e tutūmausalī ai i le faatuatua.—Epe. 11:6.

7. E faapefea ona avea le faamoemoe e pei o se taula?

⁷ Na fetalai Iesu i lana Lauga i le Mauga: “Ia outou olioli ma fiafia, auā o loo i le lagi lo outou taui e tele; auā na faapena foʻi ona latou faasauā i perofeta o ē na muamua atu iā te outou.” (Mata. 5:12) E lē gata iā i latou o le a maua se taui i le lagi, ae e “olioli ma fiafia” foʻi i latou e faamoemoe e ola e faavavau i le lalolagi parataiso. (Sala. 37:11; Luka 18:30) E tusa po o lo tatou faamoemoe o le lagi po o le lalolagi, ae e mafai ona avea lo tatou faamoemoe “o se taula i o tatou ola, e mautinoa ma mausalī.” (Epe. 6:17-20) E pei lava ona taofia e se taula se vaa i taimi o matagi malolosi, e faapena foʻi ona fesoasoani le faamoemoe mautinoa i se taui, e tumau ai ona tatou malolosi i le itu tau faalogona, mafaufau, ma le itu faaleagaga. E mafai foʻi ona fesoasoani iā i tatou ina ia maua le malosi e tumau ai i faigatā.

8. E faapefea i le faamoemoe ona faaitiitia ai popolega?

⁸ E mafai e lo tatou faamoemoe e faavae mai i le Tusi Paia ona faaitiitia ai o tatou popolega i aso nei. Ua pei folafolaga a le Atua o se suāuu faaleagaga e faatoʻafilemu ai o tatou loto popole. O se faamāfanafanaga le ʻtuuina atu iā Ieova o o tatou popolega,’ ma le iloaina ʻo ia lava e na te tausia i tatou.’ (Sala. 55:22) Ia tatou talitonu atoatoa e mafai e le Atua ona faia “mea e matuā sili atu i lo o mea tatou te talosaga atu ai pe e mafaufau i ai.” (Efe. 3:20) Seʻi manatu foʻi, e lē o tau ina faapea mai e mafai e le Atua ona faia le mea sili po o le mea e sili atu, ae o le “mea e matuā sili atu” i mea e tatou te talosaga atu ai!

9. O le ā e tatou te faia ina ia mautinoa ai e tatou te maua le faamanuia a Ieova?

⁹ Ina ia maua le taui, e ao ona tatou faatuatua atoatoa iā Ieova ma usiusitaʻi i ana taʻiala. Na faapea atu Mose i le nuu o Isaraelu: “E faamanuia lava e Ieova oe i le laueleele ua tuuina mai e Ieova iā te oe e avea ma ou tofi ma fai mo oe, pe afai e te matuā faalogo i le siʻufofoga o Ieova lou Atua, ma e toʻaga e tausia nei poloaʻiga uma ua ou poloaʻi atu ai iā te oe i le asō. Auā e faamanuia Ieova lou Atua iā te oe e pei ona ia folafola mai iā te oe.” (Teu. 15:4-6) Pe e te talitonu atoatoa o le a faamanuia oe e Ieova pe a faaauau ona e auauna ma le faamaoni iā te ia? E mautinoa e iai māfuaaga lelei e te talitonu ai faapea.

10, 11. Na faapefea ona tauia e Ieova Iosefa?

¹⁰ Na tusia manatu o loo i le Tusi Paia ina ia aogā iā i tatou. O loo iai le tele o tala e faatatau i auala na tauia ai e le Atua ana auauna faamaoni. (Roma 15:4) O Iosefa o se tasi lea o faaaʻoaʻoga mataʻina. Muamua, na faatau ese atu o ia e ona uso e fai ma pologa. Mulimuli ane na tuuaʻia sesē e le avā a lona  matai, ma iʻu ai ina faafalepuipui o ia i Aikupito. Ae pe na tuulafoaʻia ai Iosefa e lona Atua? E leai. Na “faatasi pea Ieova iā Iosefa ma faaalia pea le alofa faamaoni iā te ia.” Na ʻfaatasi Ieova ma Iosefa ma na taulau manuia mea uma na ia faia ona o Ieova.’ (Kene. 39:21-23) Sa faatalitali atu ma le onosaʻi Iosefa i le Atua i na taimi faigatā.

¹¹ I tausaga mulimuli ane, na faasaʻoloto ai e Farao Iosefa mai i le falepuipui, ma tofia ai lenei pologa lotomaulalo e pule i Aikupito e lona lua atu iā Farao. (Kene. 41:1, 37-43) Ina ua fananau atalii e toʻalua o Iosefa, “ua faaigoa e Iosefa le ulumatua o Manase, auā na ia faapea ane, ʻO le Atua ua māfua ai ona galo iā te aʻu oʻu mafatiaga, ma le aiga atoa o loʻu tamā.’ Ua ia faaigoa le lona lua o Efaraima auā na ia faapea ane, ʻUa faauluolaina aʻu e le Atua i le atunuu na ou puapuagatia ai.’” (Kene. 41:51, 52) O le tumau faamaoni o Iosefa i le Atua, na tauia ai o ia i faamanuiaga na iʻu ai i le faasaoina o ola o tagata Isaraelu ma tagata Aikupito. O le manatu tāua, sa iloa e Iosefa o Ieova na tauia ma faamanuiaina o ia.​—Kene. 45:5-9.

12. Na faapefea ona tumau faamaoni Iesu i taimi o tofotofoga?

¹² Sa tumau foʻi ona usiusitaʻi Iesu Keriso i le Atua i taimi eseese na tofotofoina ai lona faatuatua, ma na tauia o ia. O le ā na fesoasoani iā Iesu e onosaia ai na tofotofoga? Ua faapea mai le Eperu 12:2: “Ona o le olioli sa i ona luma, na tumau ai o ia e ui ina faapuapuagatia i le laau, na lē amanaʻia e ia le mā.” E mautinoa sa olioli Iesu ona sa ia faapaiaina le suafa o le Atua. Sa tauia foʻi o ia i le mauaina o le finagalo malie o lona Tamā ma le tele o faaeaga matagofie. Ua taʻua i le Tusi Paia na “nofo o ia i le itu taumatau o le nofoālii o le Atua.” Ua taʻua foʻi i le Filipi 2:9: ʻUa faaeaina foʻi o ia e le Atua i se tulaga e sili ona maualuga, ma avatu ma le agalelei iā te ia le suafa e sili i isi igoa uma.’

13, 14. O ā faalogona o Ieova e faatatau i mea e tatou te faia mo ia?

¹³ E tatou te mautinoa e talisapaia e Ieova taumafaiga uma e tatou te faia ina ia auauna atu ai iā te ia. E malamalama o ia i so o se faalogona lē mautonu atonu o loo iā i tatou. E alofa mutimutivale mai pe afai e faapopoleina i tatou i tulaga faigatā tau tupe, po ua tapulaa foʻi la tatou auaunaga paia ona o lo tatou soifua mālōlōina po o faalogona. E tatou te mautinoa atoatoa i le alofa faapelepele o Ieova, e tusa po o ā mea e faia e ana auauna ina ia tumau faamaoni ai iā te ia.​—Faitau le Eperu 6:10, 11.

¹⁴ Aua foʻi neʻi galo, e mafai ona tatou faalatalata atu i le “Faafofoga tatalo” ma le mautinoa e manatu mai o ia i o tatou popolega. (Sala. 65:2) O le a matuā saunia mai e “le Tamā o le alofa mutimutivale, ma le Atua o faamāfanafanaga uma,” le fesoasoani tau faalogona ma le faaleagaga lea e tatou te manaʻomia, atonu e ala mai i o tatou uso ma tuafāfine. (2 Kori. 1:3) E faafiafiaina le finagalo o Ieova pe a tatou faaalia le alofa mutimutivale i isi. “O lē e faaalia le agalelei i lē e lē taualoa, ua nonō atu iā Ieova, ma o le a toe tauia o ia e Ia e tusa ma ana gaoioiga.” (Faata. 19:17; Mata. 6:3, 4) O lea, pe a tatou fesoasoani atu ma le lē manatu faapito i ē o loo feagai ma tulaga faigatā, e silasila Ieova i na gaoioiga lelei e pei o se aitalafu iā te Ia. Ua ia folafola mai e na te tauia lenā gaoioiga agalelei.

15. O ā taui o loo e tulimataʻia i le lumanaʻi? (Tagaʻi i le ata i luga aʻe o le matua.)

¹⁵ Ua faamalosia Kerisiano faauuina i le faamoemoe o le mauaina o le “pale o le amiotonu, lea e tuuina mai . . . o se taui i  lenā aso e le Alii o le faamasinotonu.” (2 Timo. 4:7, 8) Peitaʻi, e lē faapea ua lē tāua oe i le silasila a le Atua pe afai e ese le faamoemoe ua ia tuuina mai iā te oe. E faitau miliona “isi mamoe” a Iesu o loo tulimataʻia ma le naunautaʻi le taui i le lumanaʻi, o le ola e faavavau i le lalolagi parataiso. O le a “matuā faafiafiaina foʻi i latou ona o le tele o le filemu.”​—Ioa. 10:16; Sala. 37:11.

16. O le ā le faamāfanafanaga e tatou te maua i le 1 Ioane 3:19, 20?

¹⁶ O nisi taimi atonu e tatou te manatu e itiiti mea ua tatou faia, pe taumānatu foʻi po o fiafia Ieova i a tatou taumafaiga. E tatou te ono lē mautonu foʻi pe e tatou te agavaa mo le mauaina o se taui. Peitaʻi, ia manatua, “e sili atu le Atua i o tatou loto, e na te silafia foʻi mea uma lava.” (Faitau le 1 Ioane 3:19, 20.) Pe a tatou auauna iā Ieova ona o le faatuatua ma le alolofa iā te ia, e mautinoa o le a ia tauia i tatou, e tusa pe tatou te manatu e lē tāua mea o loo tatou faia.​—Mare. 12:41-44.

17. O ā nisi o taui ua tatou olioli ai i le taimi nei?

¹⁷ E oo lava i nei aso e gata ai o le faiga amioleaga o mea a Satani, o loo faamanuiaina ai e Ieova ona tagata. E na te faamautinoa e taulau manuia ona tagata tapuaʻi moni i lo latou parataiso faaleagaga, lea e fau ma soloi ai taumafa faaleagaga. (Isa. 54:13) E pei ona folafola mai e Iesu, ua tauia e Ieova i tatou i le taimi nei e ala i le avea ma vaega o se aiga alolofa o uso ma tuafāfine faaleagaga i le lalolagi aoao. (Mare. 10:29, 30) Ua tauia foʻi i latou o loo matuā saʻili i le Atua i faamanuiaga e lē mafaatusalia o le filemu o le mafaufau, faamalieina, ma le fiafia.​—Fili. 4:4-7.

18, 19. O ā faalogona o auauna a Ieova e faatatau i taui ua latou mauaina?

¹⁸ Ua tofo auauna a Ieova i le lalolagi aoao i taui matagofie ua latou maua mai iā te ia. O se faaaʻoaʻoga, ua faapea mai Bianca mai i Siamani: “E lē lava aʻu upu e faafetaia ai Ieova ona o le fesoasoani mai i taimi o oʻu popolega, ma le faatasi mai pea iā te aʻu i aso taʻitasi. O loo vevesi ma lē mautonu lenei lalolagi. Ae a o ma galulue vavalalata ma Ieova, ou te lagona le malupuipuia i ona aao. O so o se taimi ou te faia ai ni faataulaga mo ia, e na te tauia aʻu i le faitau selau o faamanuiaga.”

¹⁹ Seʻi manatu iā Paula mai i Kanata, e 70 ona tausaga ma e matuā faigatā ona gaoioi ona e faalētonu lona tuasivi. Ua ia faapea mai: “O le faigatā ona gaoioi e lē faapea ai ua faaitiitia laʻu faiva. Ou te faaaogā auala eseese e molimau atu ai, e pei o le telefoni ma le molimau lē fuafuaina. Ina ia faalaeiauina aʻu lava, e iai saʻu api e tusi ai mau ma manatu mai i a tatou lomiga, e mafai ona ou toe faitau i ai mai i lea taimi i lea taimi. Ou te taʻua lenā api o ʻLaʻu Api o Faalaeiauga.’ E lē tumau ona tatou lotovaivai pe afai e taulaʻi atu i folafolaga a Ieova. Po o ā lava o tatou tulaga, e fesoasoani mai Ieova iā i tatou i taimi uma.” Atonu e ese lou tulaga mai iā Bianca po o Paula. Peitaʻi, ia mafaufau i auala ua tauia ai e Ieova oe ma ē o loo tou aufaatasi. O se mea lelei le manatunatu i auala ua tauia ai e Ieova oe i le taimi nei, ma auala o le a ia tauia ai oe i le lumanaʻi!

20. O le ā e mafai ona tatou taulaʻi i ai pe a faaauau ona tatou auauna ma le lotoatoa iā Ieova?

²⁰ Ia manatua, o le saʻoloto e tatalo atu i le Atua mai i o tatou loto, “e maua mai ai le taui tele.” E mautinoa o le a tatou ʻmaua le faataunuuga o le folafolaga, pe a uma ona tatou faia le finagalo o le Atua.’ (Epe. 10:35, 36) O lea, seʻi faaauau ona faamalosia lo tatou faatuatua ma auauna ma le lotoatoa iā Ieova. E mafai ona tatou faia faapea ma le iloaina, o le a tatou maua mai iā Ieova le taui talafeagai.​—Faitau le Kolose 3:23, 24.