IĀ MATI 26, 1937, e toʻalua ni tamāloloa ua matuā vaivai lava na alu atu lemū le la taavale agaʻi i nuu maotua o Sini i Ausetalia. Talu ona la tuua le taulaga i le pe ā ma le tausaga, e silia i le 12,000 maila (19,300 km) na la malaga ai e ui atu i nisi o vaipanoa e sili ona maotua ma gaoā o Ausetalia. O nei tamāloloa e lē o ni tagata e suʻesuʻeina mea po o ni tagata tafafao. O Arthur Willis ma Bill Newlands, o nisi o paeonia maelega e toʻalua na naunau e faaoo atu le tala lelei o le Malo o le Atua, i oganuu maotua e sili ona tetelē o Ausetalia.

A o leʻi oo i le 1930, na tele lava ina talaʻi se vaega toʻaitiiti o Tagata Aʻoga o le Tusi Paia * i aai ma taulaga i le talafatai o Ausetalia. Ae o vaipanoa maotua ia e tau leai ni tagata e nonofo ai ma e mātūtū e leai ni vai, o lona telē e sili atu i le ʻafa o le Iunaite Setete. E ui i lea, na iloa lelei e uso e tatau i soo o Iesu ona molimau atu e faatatau iā te ia i “tuluʻiga uma o le lalolagi,” lea e aofia ai ma nuu maotua o Ausetalia. (Galu. 1:8) O le a faapefea la ona latou faataunuuina lenei galuega telē? O lo latou faatuatua atoatoa o le a faamanuia e Ieova a latou taumafaiga, na latou maumauaʻi ai e faia le mea sili e latou te mafai.

I le 1929, na fau ai e faapotopotoga i Kuiniselani ma le itu i sisifo o Ausetalia, ni taavale ua iai mea uma e manaʻomia, ina ia mafai ai ona latou oo atu i vaipanoa i uta. O nei taavale na faaaogā e paeonia malolosi, o ē na mafai ona faafoeina i auala lauleaga ma toe faaleleia ni vaega pe a faalētonu. Na asiasi atu nei paeonia i nofoaga e leʻi oo muamua lava i ai le talaʻiga.

O paeonia na lē gafatia se taavale, na malaga atu i nuu maotua e faaaogā ai uila vilivae. Mo se faataʻitaʻiga, i le 1932, na agaʻi atu ai Bennett Brickell e 23 ona tausaga mai Rockhampton i Kuiniselani, mo se malaga i nuu maotua i le itu i mātū o le setete, e talaʻi ai mo le lima masina. Na ave i lana uila vilivae se uta mamafa o palanikeke, ofu, meaʻai, ma le tele o tusi. Ina ua manifinifi paʻu o lana uila, na faaauau pea o ia ma maufaatuatuaina o le a taʻitaʻia o ia e Ieova. Na alu ma tulei lana uila vilivae i le 200 maila (320 km) faaiʻu o lana malaga, lea e ui atu i nofoaga na maliliu ai tagata i le  matelāina. E silia i le 30 tausaga na malaga ai le uso o Brickell mo le faitau selau afe maila e faaaogā ai uila vilivae, pasika, ma taavale. Na ia amataina foʻi le galuega talaʻi i tagata Apoliki ma fesoasoani i le amataina o faapotopotoga fou, ma na lauiloa ma faaaloalogia o ia e tagata i nuu maotua.

I se fua faatatau, o Ausetalia o se tasi o atunuu i le lalolagi e aupito i toʻaitiiti ona tagata pe a fua i le telē o le laueleele, aemaise lava i nuu maotua. O lea na maelega ai tagata o Ieova ia saʻilia tagata i nei vaega maotua o le atunuu.

Na faaalia e paeonia o Stuart Keltie ma William Torrington lenā maelega. I le 1933, na la uia ai le toafa telē o Simpson ina ia talaʻi i le aai o Alice Springs i le ogatotonu o Ausetalia. Ina ua leaga le la taavale ma ua lē mafai ona toe faaaogā, na faaauau pea le malaga a le uso o Stuart lea e fai lona vae laau ina ia talaʻi, e faaaogā ai se kamela. Na taulau taumafaiga a paeonia ina ua feiloaʻi ma Charles Bernhardt, o le pule o se fale talimālō i William Creek, o se nuu maotua e tutū ai nofoaafi. Na talia e Charles le upu moni, faatau ese lona fale talimālō, ma paeonia na o ia mo le 15 tausaga i nisi o vaega pito i sili ona mātūtū ma mamao ese o Ausetalia.

Na matuā manaʻomia e nei paeonia le lototele ma le onosaʻi e fesagaʻia ai le tele o luʻi. A o talaʻi atu Arthur Willis ma Bill Newlands i oganuu maotua o Ausetalia e pei ona taʻua i le amataga, na la tauivi malosi mo le lua vaiaso e malaga ai mo na o le 20 maila (32 km), ona o le matuā mafiafia o le palapala i le toafa i le tetele o timuga. E iai taimi na la taumafai ai i le aasa o le lā e tulei le la taavale i luga o mauga oneone, uia vanu gaoā, ma sopoʻia alitivai o vaitafe. Ina ua leaga le la taavale, o se mea na masani ona tupu, na la savavali pe ō atu i uila vilivae mo ni aso i aai e lata ane, ma faatalitali ai mo ni vaiaso seʻi taunuu atu mea e faaleleia ai le la taavale. E ui lava i na tulaga faigatā, ae na tumau pea lo la fiafia. Na toe taʻua e Arthur Willis se manatu na tusia i le mekasini The Golden Age e faapea: “E leai se auala e lauleaga pe mamao tele mo Ana molimau.”

Na faamatala e Charles Harris o sē na paeonia mo le tele o tausaga, o le mamao o oganuu ma mea na latou nonofo ai, ma tulaga faigatā i nuu maotua, na atili ai ona māfana le la faiā ma Ieova. Na ia taʻua atili: “E sili atu ona lelei le ola i se olaga faigofie e lē tele ni meafaitino. Pe afai na lotomalie Iesu e tofā i fafo i le pō pe a manaʻomia, e tatau foʻi la ona tatou fiafia e faia faapea pe a manaʻomia a o faia la tatou auaunaga.” O le mea lenā na faia e le toʻatele o paeonia. O a latou taumafaiga fitā ua oo atu ai le tala lelei i itu uma o Ausetalia, ma ua fesoasoani ai i le toʻatele ina ia lagolagoina le Malo o le Atua.