NA OU fanau i le 1926 i le aai o Crooksville i Ohio i le Iunaite Setete. E lē lolotu oʻu mātua, ae sa la faalaeiauina i matou le fanau e toʻavalu ina ia faia faapea. Na ou alu i le lotu Metotisi. I le 14 o oʻu tausaga, na aumai ai e le faifeʻau se faailoga iā te aʻu ona e leʻi misi saʻu lotu i Aso Sa uma mo le tausaga atoa.

I lenā vaitaimi na asiasi mai ai lo matou tuaoi o Margaret Walker o se tasi o Molimau a Ieova, i loʻu tinā ma amata sa laʻua talanoaga faale-Tusi Paia. I se isi aso, na ou filifili ai ou te auai i la laʻua talanoaga. Na tuli i fafo aʻu e loʻu tinā, ona sa ia manatu o le a ou faalavelave i le talanoaga. Peitaʻi, sa ou taumafai pea e faalogologo i ai. I le māeʻa ai o se tasi o ana asiasiga, na fesili mai ai Margaret iā te aʻu: “Pe e te iloa le igoa o le Atua?” Na ou tali i ai: “E iloa e tagata uma o le igoa o le Atua, o le Atua.” Na ia faapea mai: “Tago i lau Tusi Paia e suʻe le Salamo 83:18.” Na ou faia faapea, ma ou iloa ai o le suafa o le Atua, o Ieova. Sa ou faanatinati atu i aʻu uō ma faapea atu: “Pe a oo nanei fetagofi i le Tusi Paia e suʻe le Salamo 83:18 ma iloa ai le igoa o le Atua.”  E aunoa ma loʻu iloaina, o lea ua amata ona ou talaʻi.

Na ou suʻesuʻeina le Tusi Paia ma papatiso ai i le 1941. E leʻi umi lava ae tofia aʻu ou te taʻimua i se suʻesuʻega tautusi a le faapotopotoga. Na ou faalaeiauina loʻu tinā ma nai oʻu tei e auai, ma na amata loa ona latou auai uma i le suʻesuʻega sa ou faia. Peitaʻi, e leʻi fiafia loʻu tamā.

Na faateleina oʻu tiute tauave i le faapotopotoga ma na ou faaputuina foʻi le tele o tusi na lomia e Molimau a Ieova. I se tasi aso, na tusi le lima o loʻu tamā i aʻu tusi ma faapea mai: “Ua e vaai atu i mea lae? Ia ave nei loa i fafo ma e alu atu ai ma oe.” Na ou alu ese ma nofo i Zanesville i Ohio, e lē mamao ese ma loʻu aiga ma sa ou asiasi pea e faalaeiau iā i latou.

Na taumafai loʻu tamā e taofia loʻu tinā mai i le auai i sauniga. O nisi aso pe a alu loʻu tinā i sauniga e tuliloa o ia e loʻu tamā ma toe toso mai i le fale. Peitaʻi e na ona oso lava o ia i le isi faitotoʻa ma alu i le sauniga. Na ou fai i loʻu tinā: “Aua e te popole. E faifai a fiu.” Aʻo faagasolo taimi na iʻu lava ina fiu o ia, ma na amata loa ona saʻoloto loʻu tinā e auai i sauniga.

Na amata ona faia aʻu lauga i la matou faapotopotoga, ina ua amata le Aʻoga Faatiokarate i le 1943. O fautuaga na ou maua pea māeʻa aʻu lauga, na fesoasoani lea e faaleleia ai aʻu lauga.

A o faagasolo le Taua Lona Lua a le Lalolagi i le 1944, na faatonuina aʻu ou te alu i le vaegaʻau. Na ou alu i Fort Hayes i Columbus i Ohio, ina ia faia aʻu siaki ma faatumu ni pepa. Na ou faailoa foʻi iā i latou e lē mafai ona avea aʻu ma fitafita. Sa latou tuua aʻu ou te alu i le fale. Ae i nai aso mulimuli ane, sa sau ai se tasi o leoleo ma faapea mai: “Corwin Robison, na ou sau ma lau tusi saisai lea.”

I le faamasinoga i le lua vaiaso mulimuli ane ai, na faapea mai le faamasino iā te aʻu: “Pe ana ou faia le faaiʻuga ua e solo atoa i le falepuipui. E iai sau tala e fia fai?” Na ou tali atu: “Lau afioga le Faamasino, e tatau ona faavasega aʻu o se faifeʻau. O faitotoʻa uma o aiga, o laʻu pulelaa lenā, ma ou te talaʻia le tala lelei o le Malo i le toʻatele o tagata.” Na faapea atu le faamasino i le ʻaufaatonu o le faamasinoga: “E tou te leʻi ō mai e filifili po o se faifeʻau lenei tagata. Peitaʻi, ia iloilo pe na alu o ia i le vaegaʻau ina ua faatonuina o ia.” Pe ā ma le afa itula mulimuli ane, ae aumai le faaiʻuga a le ʻaufaatonu, e faasala aʻu i le falepuipui mo le lima tausaga i Ashland i Kentucky.

E lua vaiaso na ou nofo ai i se falepuipui i Columbus i Ohio, ma sa loka aʻu i le sela i le aso muamua. Na ou tatalo iā Ieova: “E lē mafai ona ou nofo i lenei sela mo le lima tausaga. Ua ou lē iloa le mea o le a fai.”

I le aso na sosoo ai, na faataga aʻu e leoleo ou te alu i fafo mai le sela. Na ou savali agaʻi i se pagota e maualuga ma lautetele ona tauʻau, na ma tutū i inā ma matamata i fafo i le faamalama. Na ia fesili mai: “Sole saa, o le ā lau mea lea e fai i inei?” Na ou faapea atu: “O aʻu o se Molimau a  Ieova.” Na ia faapea mai: “E moʻi? Aiseā la ua loka ai oe?” Na ou tali atu: “E lē auai Molimau a Ieova i le taua ma latou te lē fasioti tagata.” Na ia faapea mai: “Ua latou faafalepuipuiina oe ona e te lē fasioti tagata. Ae latou te faafalepuipuiina foʻi isi tagata ona o le fasioti tagata. Pe e talafeagai lenā mea?” Na ou tali atu: “E leai.”

Na ia faapea mai lea: “E 15 tausaga na loka ai aʻu i se tasi o falepuipui, ma na ou faitau ai i a outou lomiga.” I le taimi na ou faalogo ai i lenā tala, na ou tatalo: “Ieova e, ia e fesoasoani mai ina ia ʻau lenei tamāloa iā te aʻu.” Na faapea mai loa le tamāloa lea o Paul: “Pe a paʻi atu se tasi o le ʻau alii la iā te oe, valaau mai ona tuu mai lea iā te aʻu.” O lea, e leʻi iai se faafitauli i lo matou nonofo ai ma isi pagota e toʻa 50.

Na ou feiloaʻi i nisi o uso taʻumatuaina i le falepuipui i Ashland ina ua sifi atu aʻu i inā. Na latou fesoasoani mai iā te aʻu ma isi, ina ia mafuta vavalalata atu iā Ieova. Na latou tofia mai se faitauga Tusi Paia i vaiaso taʻitasi, ona matou saunia lea o fesili ma tali e talanoaina i a matou sauniga e taʻua o Talanoaga Faale-Tusi Paia (Bible Bees). Sa matou nonofo i se sela telē lava e iai le tele o moega. Sa iai se uso e na te faatulagaina a matou oganuu. E faapea mai: “Robison, o oe e gafa ma moega nei. O i latou uma e momoe i na moega, o lau oganuu lenā. Faamautinoa e te talaʻi i lenā tagata a o leʻi alu ese.” O le auala lenā sa matou talaʻi ai i se auala maopoopo.

Na māeʻa le Taua Lona Lua a le lalolagi i le 1945, ae na ou falepuipui pea mo sina taimi. Na ou popole i loʻu aiga, auā na faapea mai loʻu tamā: “Pe a mafai ona ou aveesea oe, ona faigofie foʻi lea o le isi vaega.” Ae e iai se mea manaia na faateʻia ai aʻu ina ua ou magalo mai le falepuipui. E toʻafitu sui o loʻu aiga ua auai i sauniga, ae e toʻatasi loʻu tuafafine ua papatiso e ui i teteega mai i loʻu tamā.

Na toe faatonuina foʻi aʻu ou te alu i Fort Hayes ina ua amata le taua i Korea i le 1950. Na māeʻa loa le tofotofoina o oʻu tomai, ona faapea mai lea o se tasi o fitafita: “O oe le isi tagata e maualuga ou togi.” Na ou fai atu iā te ia: “Faafetai lava, ae lē mafai ona ou alu i le vaegaʻau.” Na ou sii atu i ai le 2 Timoteo 2:3 ma faapea atu: “Ua māeʻa ona avea aʻu ma fitafita a Keriso.” Na  tū o ia mo se taimi umi ona ia faapea mai lea: “Alu ese loa.”

E leʻi umi lava ae ou auai loa i se fono mo Peteli sa faia i se tauaofiaga i Cincinnati i Ohio. Na faailoa mai e le uso o Milton Henschel o loo iai se manaʻoga i le Peteli mo uso e fia galulue mamafa mo le Malo. Na taliaina laʻu talosaga mo Peteli. Na amata laʻu auaunaga i Brooklyn iā Aokuso i le 1954, ma faaauau mai ai lava laʻu auaunaga i le Peteli.

Sa tele aʻu galuega sa faia i le Peteli. Sa ou galue mo le tele o tausaga i le vaaia o masini vai vevela i le fale lomitusi ma ofisa, vaaia isi masini ma faaleleia loka. Sa ou galue foʻi i Maota Fono i le aai o Niu Ioka.

Ou te fiafia tele i polokalame i le Peteli, e pei o tapuaʻiga i le taeao ma suʻesuʻega a le aiga o Le Olomatamata, faapea le talaʻi faatasi ma le faapotopotoga. Pe a mafaufau i ai o mea nei e tatau ona faia e lē aunoa e aiga uma o Molimau a Ieova. Pe a iloilo faatasi e lē aunoa e le aiga le mau o le aso, faia e lē aunoa Tapuaʻiga a le aiga, auai i sauniga a le faapotopotoga, ma maelega i le galuega talaʻi, o le a mafai e sui uma o le aiga ona mafuta vavalalata pea iā Ieova.

E tele aʻu uō i le Peteli ma le faapotopotoga. O nisi o le ʻaufaauuina ma ua ō i le lagi. Ae o nisi e lē faauuina. Peitaʻi, e lē lelei atoatoa auauna uma a Ieova, e oo lava foʻi i tagata Peteli. E masani ona ou taumafai e tausia le filemu, pe a tulaʻi mai se feeseeseaʻiga ma se isi uso. Ou te mafaufau i le Mataio 5:23, 24 e faatatau i le auala e tatau ona taulima ai feeseeseaʻiga. E lē faigofie ona faatoese atu, peitaʻi, o le auala lenā e foʻia ai le tele o feeseeseaʻiga.

Ua faigatā nei ona ou auai i le galuega talaʻi mai i lea fale i lea fale ona o loʻu tulaga matua, peitaʻi ou te lē o faavaivai ai. Sa ou aʻoaʻoina le gagana faa-Saina o le Mandarin ma ou te fiafia e talanoa i tagata Saina ou te feiloaʻi i ai i luga o auala. O nisi taeao ou te ofoina ai i tagata fiafia le 30 i le 40 mekasini.

 Sa oo lava ina ou faia se toe asiga i Saina. I se tasi aso na ataata mai ai se tamaʻitaʻi Saina talavou a o ia tufa i tagata pepa e faalauiloa ai nofoaga e faatau ai fualaau ʻaina. Sa ou ata atu iā te ia ma ofo i ai Le Olomatamata ma le Ala Mai! faa-Saina. Na ia taliaina mekasini ma faapea mai o lona igoa o Katie. O taimi uma lava e vaai ai Katie iā te aʻu e sau ma talanoa mai. Sa ou aʻoaʻoina iā te ia igoa faa-Peretania o fualaau ʻaina ma fualaau faisua, ma sa ia faataʻitaʻi mai iā te aʻu. Na ou faamatalaina iā te ia mau o le Tusi Paia ma sa ia taliaina le tusi o le Aʻoaʻoga Moni. Ae i nai vaiaso mulimuli ane, na lē toe vaaia ai o ia.

I nai masina mulimuli ane, na ou ofoina ai foʻi mekasini i se isi tamaʻitaʻi o loo ia tufaina pepa faalauiloa, ma na ia taliaina. O le vaiaso na sosoo ai, na ia tuuina mai iā te aʻu lana telefoni ma fai mai: “Talanoa i Saina.” Na ou tali atu: “Ou te lē masani i se isi i Saina.” Ae na ia tuuina mai pea le telefoni ma ou talanoa ai loa. Na ou faapea atu: “Talofa, o Robison lea.” Ae na ou faalogo atu i le leo o faapea mai: “Robby o Katie lea. O lea ua ou toe foʻi mai i Saina.” Na ou faapea atu: “Saina?” Na tali mai Katie: “Ioe. Robby o loʻu uso lenā na avatua iā te oe le telefoni. E tele mea lelei na e aʻoaʻoina ai aʻu. Faamolemole ia e aʻoaʻoina o ia e pei ona sa e faia iā te aʻu.” Na ou faapea atu: “Katie, o le a ou faia le mea ou te mafaia. Faafetai mo le faailoaina mai o le mea o lenā ua e iai.” Mulimuli ane ae ou talanoa loa i le uso o Katie mo le taimi mulimuli. Po o fea lava o iai nei teine, ou te faamoemoe o loo la aʻoaʻoina pea e faatatau iā Ieova.

Ua 73 nei tausaga talu ona ou auauna iā Ieova. Ou te fiafia ona sa ia fesoasoani mai ina ia ou solitū ma faamaoni i le falepuipui. Na faapea mai foʻi nai oʻu tei sa faalaeiauina i latou ona o loʻu lē faavaivai i teteega mai i loʻu tamā. Mulimuli ane, na papatisoina loʻu tinā ma oʻu uso ma tuafāfine e toʻa ono. E oo lava foʻi i loʻu tamā na iai se suiga laʻitiiti i ona uiga, ma na ia auai i nisi o sauniga a o leʻi maliu.

Pe a finagalo i ai Ieova o le a toetutū mai i le lalolagi fou aʻu uō ma sui o loʻu aiga ua maliliu. Mafaufau i le fiafia e maua i le auauna iā Ieova faatasi ma ē e tatou te alolofa i ai. *