1, 2. Aiseā e ono popole ai nisi o mātua pe a mananaʻo a latou fanau e tuuina atu ma papatiso?

E FAITAU afe tagata aʻoga o le Tusi Paia ua tuuina atu i latou iā Ieova ma papatiso i tausaga taʻitasi. O le toʻatele o i latou o talavou na ola aʻe i le upu moni, ma ua latou filifilia le auala sili e ola ai. (Sala. 1:1-3) Pe afai o oe o se matua Kerisiano, e lē taumatea o loo e tulimataʻia le aso o le a papatiso ai sou alo.​—Faatusatusa i le 3 Ioane 4.

² Peitaʻi, e ono iai ni mea e faapopoleina ai oe. Atonu na e iloa nisi o talavou na papatiso ae mulimuli ane o latou fesiligia le atamai o le ola e tusa ai ma tapulaa a le Atua. O nisi ua iʻu lava ina latou tuua le upu moni. O lea, e te ono popole ina neʻi auauna lou alo iā Ieova ae mulimuli ane sui ma mou atu lona uluaʻi alofa mo Ieova. Atonu o le a pei o ia o i latou i le uluaʻi senituri i le faapotopotoga i Efeso, lea na faapea atu i ai Iesu: “Ua e tuua le uluaʻi alofa sa iā te oe.” (Faaa. 2:4) E faapefea ona e fesoasoani i lou alo ina ia ʻtuputupu aʻe ia maua le  faaolataga,’ ma ʻalofia ai le oo i se iʻuga faapena? (1 Pete. 2:2) Ina ia tali lenei fesili, seʻi o tatou tilofaʻia le faaaʻoaʻoga a Timoteo.

3. (a) Na faapefea ona avea Timoteo ma Kerisiano, ma o le ā lana tali atu i aʻoaʻoga faa-Kerisiano? (e) O ā vala e tolu e faatatau i le aʻoaʻoina o le upu moni na apoapoaʻi atu ai Paulo iā Timoteo?

³ E foliga mai o le 47 T.A. i le taimi o le uluaʻi asiasiga a le aposetolo o Paulo i Lusa, na aʻoaʻoina ai Timoteo i aʻoaʻoga faa-Kerisiano. E ui e foliga mai na talavou Timoteo i lenā taimi ae na ia matuā faatatauina mea na ia aʻoaʻoina. I le lua tausaga mulimuli ane ai, na avea loa o ia ma sē e malaga faatasi ma Paulo. Ina ua mavae le pe tusa o le 16 tausaga, na tusi atu Paulo iā Timoteo: “Ia e tausisi pea i mea ua e aʻoaʻoina ma na faatalitonu ai oe, auā ua e iloa tagata na aʻoaʻoina oe na e iloa foʻi tusitusiga paia [Tusitusiga Paia Eperu] talu ona e laʻitiiti, lea e mafai ona faapotoina ai oe mo le faaolataga e ala i le faatuatua e tusa ai ma Keriso Iesu.” (2 Timo. 3:14, 15) Mātau, o loo taʻua e Paulo le (1) iloa o tusitusiga paia, (2) faatalitonu i mea ua aʻoaʻoina, ma le (3) faapotoina mo le faaolataga e ala i le faatuatua iā Keriso Iesu.

4. O ā meafaigaluega o e iloa o loo aogā i le aʻoaʻoina o lau fanau lāiti? (Tagaʻi i le ata i luga aʻe o le matua.)

⁴ I le avea ai o se matua Kerisiano, e te manaʻo ia iloa e lou alo tusitusiga paia, lea e aofia ai Tusitusiga Paia Eperu ma Tusitusiga Paia Eleni. E fua lava i le tulaga o lau fanau, ae e oo lava i fanau lāiti e mafai ona aʻoaʻoina i latou i ni mea faigofie e faatatau i tagata ma tala o loo i le Tusi Paia. Ua saunia mai foʻi e le faalapotopotoga a Ieova le tele o meafaigaluega e mafai ona faaaogā e mātua e fesoasoani ai i fanau. Pe e mafai ona e mafaufau i nisi o na meafaigaluega o loo maua i la outou gagana? Ia manatua, o le iloaina o Tusitusiga Paia o le faavae lea mo le mauaina o se faiā lelei ma Ieova.

5. (a) O ā mea na faatalitonuina ai Timoteo? (e) E faapefea ona tatou iloa na faatalitonuina Timoteo i le tala lelei e faatatau iā Iesu?

⁵ E tāua le iloa e fanau o tusitusiga paia. Peitaʻi, e tele atu mea e aofia ai i le aʻoaʻoina faaleagaga o i latou nai lo o le tau ina aʻoaʻo e faatatau i tagata ma tala o loo i le Tusi Paia. ʻNa faatalitonuina’ foʻi Timoteo i mea na aʻoaʻoina ai o ia. O lona uiga, na matuā talitonu o ia e moni mea na ia aʻoaʻoina. Na iloa e Timoteo Tusitusiga Paia Eperu mai lava a o tamaitiiti. Ae mulimuli ane na matuā mautinoa Timoteo ona o faamaoniga iloga o Iesu o ia lea o le Mesia. I se isi faaupuga, na faamausalī lona iloa ina ua mautinoa i mea na ia aʻoaʻoina. O le mea moni, na matuā mautinoa Timoteo i le tala lelei ma iʻu ai ina papatisoina o ia e avea ma soo, ma faatasi atu loa iā Paulo i le galuega faamisionare.

6. E faapefea ona e fesoasoani e faatalitonu lau fanau i mea ua latou aʻoaʻoina mai i le Afioga a le Atua?

⁶ E faapefea ona e fesoasoani e atiaʻe le mautinoa i lau fanau ina ia faatalitonuina ai i latou e pei o Timoteo? Muamua, ia e onosaʻi. O le mautinoa e lē o se mea e tupu faafuaseʻi. E lē o se mea foʻi e te tuufaasolo atu i lau fanau ona e faapea ua faatalitonuina oe. E tatau i tamaiti taʻitoʻatasi ona faaaogā le “mafaufau lelei,” ina ia atiaʻe ai lo latou mautinoa e faatatau i upu moni o le Tusi Paia. (Faitau le Roma 12:1.) E tāua lau matafaioi o se matua i le faatalitonuina o fanau, aemaise lava pe a fai atu ni a latou fesili. Seʻi o tatou tilofaʻia se faataʻitaʻiga.

7, 8. (a) E faapefea ona faaalia e se uso Kerisiano le onosaʻi i le aʻoaʻoina o lona afafine? (e) Ae faapefea oe, o ā taimi na manaʻomia ai ona e onosaʻi i sou alo?

 ⁷ Ua faapea mai Thomas, o le tamā o se teineitiiti e 11 tausaga: “E ono fesili mai loʻu afafine, ʻPe na mafai ona faaaogā e Ieova le evolusione ina ia maua ai le ola i le lalolagi?’ pe ʻAiseā e tatou te lē auai ai i meafai a le atunuu, e pei o faigāpalota ina ia taumafai ai e faaleleia le tulaga o mea?’ O nisi taimi ou te taumafai e ʻalofia le taʻu atu iā te ia o le mea e tatau ona talitonu i ai. O le mea moni, e mafai ona atiaʻe le mautinoa o se tasi e ala i le tele o ni faamaoniga lāiti nai lo o se aʻoaʻoga telē se tasi.”

⁸ E pei ona mātaulia e Thomas, o le aʻoaʻoina o fanau e manaʻomia ai le onosaʻi. O le mea moni, e tāua le onosaʻi i Kerisiano uma. (Kolo. 3:12) Ua iloa foʻi e Thomas atonu e manaʻomia ai le tele o talanoaga a o faagasolo le taimi. E manaʻomia foʻi ona ia fefulifulisaʻi i le Tusi Paia ina ia atiaʻe ai le mautinoa o lona afafine i mea ua ia aʻoaʻoina. Ua faapea mai Thomas: “E ma te mananaʻo lava ma laʻu avā ia iloa po o talitonu moni le ma tama i mea o loo ia aʻoaʻoina aemaise lava i mataupu e sili ona tāua, ma po o malamalama i ai. Pe a iai ni ana fesili, o se mea lelei lenā auā ou te popole pe afai e na te talia se mea e aunoa ma le fesili.”

9. E faapefea ona e matuā aʻoaʻo lau fanau i le Afioga a le Atua?

⁹ O le aʻoaʻo atu o mātua ma le onosaʻi, o le a faasolosolo ai ina iloa e fanau “le lautele, ma le umi, ma le maualuga ma le loloto” o le upu moni. (Efe. 3:18) E mafai ona tatou aʻoaʻo i latou i mea e talafeagai ma o latou mafaufau ma le matutua. A o faasolo ina latou mautinoa i mea ua latou aʻoaʻoina, o le a atiaʻe ai lo latou tomai e puipuia o latou talitonuga i luma o isi, e aofia ai tamaiti i le aʻoga. (1 Pete. 3:15) O se faataʻitaʻiga, pe e mafai e lau fanau ona faamatala mai i le Tusi Paia le tulaga o le tagata pe a oti? Po o latou malamalama i le faamatalaga a le Tusi Paia? * Ioe, o le matuā aʻoaʻo soo o le Afioga a le Atua i lau fanau e manaʻomia ai le onosaʻi, ae o le a tauia au taumafaiga.​—Teu. 6:6, 7.

10. O le ā se isi vala tāua i le aʻoaʻoina o lau fanau?

¹⁰ E tāua foʻi lau faaaʻoaʻoga ina ia atiaʻe ai le mautinoa o lou alo. Ua faapea mai Stephanie, o se tinā e toʻatolu lana fanau: “Talu mai lava a o lāiti laʻu fanau, na ou fesili ifo, ʻPo o ou talanoa atu i laʻu fanau i māfuaaga ua ou mautinoa ai o loo soifua Ieova, e alofa, ma e tonu ona ala? Po o iloa lelei mai e laʻu fanau ou te matuā alofa iā Ieova?’ Ou te lē faatalitalia o le a faatalitonuina laʻu fanau i le upu moni, pe afai e leʻi faatalitonuina aʻu lava.”

11, 12. O le ā le atamai, ma e faapefea ona tatou iloa e lē fua i le matua o le tagata?

¹¹ O lea na tatou talanoaina, o Timoteo na ia (1) iloa Tusitusiga Paia ma (2) na mautinoa o ia i mea na ia aʻoaʻoina. Ae o le ā na uiga i ai Paulo ina ua ia faapea atu o tusitusiga paia e mafai ona “faapotoina ai,” pe ia atamai ai Timoteo “mo le faaolataga”?

¹² O loo taʻua i le tusi lona lua o le Insight on the Scriptures e faapea, i le Tusi Paia o le atamai e aofia ai “le tomai e faaaogā ai le poto ma le malamalama e foʻia ai ma le taulau manuia faafitauli, e ʻalofia pe faamamao ese mai i tulaga e lamatia ai, e ausia ai sini, pe saunia ai fautuaga mo isi  ina ia faia faapea. O le atamai e tuufaafeagai ma le valea.” Ua taʻua i le Tusi Paia “ua fusifusia le loto o le tama i le valea.” (Faata. 22:15) Talu ai o le atamai o le tuufaafeagai lea o le valea, o le atamai la o se faailoga o se tagata ua taʻumatuaina. E fua le taʻumatuaina faaleagaga o le tagata i lona mataʻu iā Ieova ma lona nofosauni e usiusitaʻi i ana poloaʻiga, ae e lē fua i le matua o le tagata.​—Faitau le Salamo 111:10.

13. E faapefea ona faaalia atu e se talavou ua faapotoina o ia mo le faaolataga?

¹³ O talavou ua matutua faaleagaga e lē “felafoaʻiina e pei o peau, ma fetosoaʻiina” solo e o latou tuʻinanauga po o omiga mai i aumea. (Efe. 4:14) Nai lo o lea, ua faasolo ina ʻfaaaogā o latou mafaufau e iloa ai le mea saʻo ma le mea sesē ina ua aʻoaʻoina.’ (Epe. 5:14) E atagia mai lo latou agaʻigaʻi i luma e avea ma tagata taʻumatuaina e ala i le faia o filifiliga atamai e tusa lava pe e lē o vaavaai atu o latou mātua po o nisi tagata matutua. (Fili. 2:12) O le ituaiga atamai lenā e manaʻomia mo le faaolataga. (Faitau le Faataoto 24:14.) E faapefea ona e fesoasoani i lau fanau ina ia atiaʻe lenā atamai? Muamua lava, ia faamautinoa ua e faailoa manino atu i lau fanau au tapulaa e faavae mai i le Tusi Paia. E ala i au upu ma faaaʻoaʻoga, ia iloa mai e lau fanau o loo e taumafai e ola e tusa ma tapulaa mai i le Tusi Paia.​—Roma 2:21-23.

14, 15. (a) O ā vala tāua e ao ona tilofaʻia e se talavou ua manaʻo e papatiso? (e) E faapefea ona e fesoasoani i lau fanau ia manatunatu loloto i faamanuiaga o le usiusitaʻi i tulafono a le Atua?

¹⁴ E lē lava le tau ina taʻu i lau fanau o le mea saʻo ma le mea sesē. E tatau foʻi ona e fesoasoani iā i latou ina ia manatunatu i fesili nei: ʻAiseā e faasā ai i le Tusi Paia nisi o mea e tuʻinanau i ai talavou? Aiseā ua ou mautinoa ai o tapulaa i le Tusi Paia e mo loʻu lava lelei i taimi uma?’​—Isa. 48:17, 18.

¹⁵ Pe a faailoa mai e lou alo ua fia papatiso, e tatau ona fesoasoani i ai ina ia mafaufau lelei i mea e aofia ai i le avea ma Kerisiano. O ā aogā e na te maua mai ai? O ā  mea e manaʻomia ona ia faataulaga? Aiseā o le a sili atu ai aogā e na te mauaina nai lo o ni faataulaga o le a ia faia? (Mare. 10:29, 30) O nisi na o luʻi e na te ono fesagaʻia pe a uma ona papatiso. O lea, e tāua tele ai ona mafaufau lelei i nei vala a o leʻi uia lenei laasaga tāua. Pe a e fesoasoani i lou alo e iloilo totoʻa faamanuiaga o le usitaʻi faapea āuga o le lē usitaʻi, e lē taumatea o le a atiaʻe ai lona mautinoa i le manatu e faapea, o tapulaa o le Tusi Paia e mo lona lelei i taimi uma.​—Teu. 30:19, 20.

16. O le ā e tatau ona faia e mātua pe a amata ona vaivai le faatuatua o se isi o le fanau ua papatiso?

¹⁶ Ae ā pe afai ua amata ona masalosalo i le upu moni lou alo lea ua uma ona papatiso? O se faataʻitaʻiga, atonu ua amata ona tosina atu se talavou ua papatiso i mea a le lalolagi, po ua amata foʻi ona ia fesiligia le atamai o le usitaʻi i mataupu silisili o le Tusi Paia. (Sala. 73:1-3, 12, 13) Mātua e, o le auala e tou te taulima ai lenei tulaga e ono aafia ai le filifiliga a le fanau po o le a faaauau ona auauna iā Ieova pe leai. Ia taumafai e ʻalofia le finau ma lou alo e faatatau i lenei mataupu e tusa lava po o laʻitiiti pea o ia po ua avea ma talavou. O lou sini o le lagolagosua ma le alofa i lou alo.

17, 18. E faapefea ona fesoasoani mātua i se talavou ua iai ni ona masalosaloga i le upu moni?

¹⁷ O le mea moni, o se talavou ua papatiso ua uma ona ia faia se tuuina atu iā Ieova. O lenā tuuina atu o se tautoga i le Atua o le a e alofa iā te ia ma faamuamua lona finagalo i lo o se isi lava mea. (Faitau le Mareko 12:30.) E lē manatu māmā Ieova i lenā tautoga ma e lē tatau foʻi ona manatu māmā i ai lē na faia. (Fai. 5:4, 5) I se taimi talafeagai, ia faamanatu atu i se auala alofa i lau fanau na mea moni. A o leʻi faia faapea, ia faaaogā lelei meafaigaluega ua saunia mai e le faalapotopotoga a Ieova mo mātua. O se faavae lelei lea e faamatilatila ai le tāua ma faamanuiaga o le tuuina atu iā Ieova o se Kerisiano papatiso.

¹⁸ O se faataʻitaʻiga, e maua fautuaga aogā i le faaopoopoga “Fesili a Mātua,” i le pito i tua o le tusi faa-Peretania Fesili ua Fesili Mai ai Talavou—Tali e Aogā, tusi muamua. O loo fautuaina ai mātua e faapea, e lē tatau ona latou vave manatu ua teena e a latou fanau le upu moni, ae ia saʻili po o le ā tonu le faafitauli. Atonu e māfua ona o omiga mai i aumea po o le leai o ni uō. E ono manatu foʻi lou alo e sili atu mea o loo faia e isi talavou i le auaunaga iā Ieova nai lo o ia. Ua faamatala atili i le faaopoopoga, o nei luʻi e lē faapea ai ua lē talitonu lou alo i ou talitonuga. E masani lava e māfua ona masalosalo talavou ona o faafitauli o loo latou fesagaʻia. O loo aumaia ai foʻi ma fautuaga i le auala e mafai ona fesoasoani ai se matua i sana tama ua tau masalosalo i le upu moni.

19. E faapefea ona fesoasoani mātua i fanau ina ia ʻfaapotoina mo le faaolataga’?

¹⁹ I le avea ai ma matua, ua iā te oe se tiute tauave tāua ma se faaeaga o le tausia aʻe o lau fanau i “aʻoaʻiga ma apoapoaʻiga a Ieova.” (Efe. 6:4) E pei ona tatou talanoaina, o le faia faapea e manaʻomia ai le aʻoaʻoina o i latou i le Tusi Paia ma fesoasoani e atiaʻe lo latou mautinoa i mea ua aʻoaʻoina. Ioe, e manaʻomia ona latou matuā mautinoa i o latou talitonuga ina ia uunaʻia ai i latou e tuuina atu iā Ieova ma auauna iā te ia ma le lotoatoa. Tau ina ia avea le Afioga a Ieova, o lona agaga, ma au taumafaiga o se matua e fesoasoani i lau fanau ia ʻfaapotoina mo le faaolataga.’