1, 2. O le ā ua uunaʻia i tatou e fai e tusa ai ma le Eperu 13:4?

E MAUTINOA e tatou te mananaʻo e faamamaluina Ieova. Ua alagatatau ona tatou faia faapea, ma ua ia folafola mai e na te faamamaluina foʻi i tatou. (1 Samu. 2:30; Faata. 3:9; Faaa. 4:11) E finagalo foʻi Ieova e tatou te faaaloalo i isi tagata e aofia ai ma tagata maualuluga o le malo. (Roma 12:10; 13:7) Peitaʻi, e iai se vala e sili ona tāua i o tatou olaga e manaʻomia ona faamamaluina, o le faatulagaga lea o le faaipoipoga.

² I le Eperu 13:4, na taʻua ai e le aposetolo o Paulo: “Ia faamamaluina e tagata uma le faaipoipoga, ma ia aua ne‘i faaleagaina le moega o le faaipoipoga.” E leʻi faapea na tau ina aumai e Paulo se manatu lelei. Peitaʻi, na ia aumaia se faatonuga. Na ia uunaʻia Kerisiano ina ia faatāua e tagata uma le faatulagaga o le faaipoipoga, pe ia faapelepele i ai. Po o lau vaaiga lenā i le faaipoipoga, aemaise pe afai ua e faaipoipo?

3. O le ā le fautuaga tāua na aumai e Iesu e faatatau i le faaipoipoga? (Tagaʻi i le ata i luga aʻe o le matua.)

³ Pe afai e te faamamaluina le faaipoipoga, o lona uiga ua e mulimuli i se faaaʻoaʻoga e sili ona lelei. Na faamamaluina e Iesu le faaipoipoga. Ina ua fesili atu le ʻau Faresaio iā te ia e faatatau i le faate‘a e se  tasi o lana avā, na ia taʻua le fetalaiga a le Atua e uiga i le uluaʻi faaipoipoga: “O le mea lea e tuua ai e le tane lona tamā ma lona tinā, ona avea ai lea o i la‘ua ma tino e tasi.” Na faapea atili atu o ia: “O ē ua faatasia e le Atua, aua ne‘i tuueseeseina e se tagata.”​—Faitau le Mareko 10:2-12; Kene. 2:24.

4. O le ā le faatulagaga na faataatia e Ieova mo faaipoipoga?

⁴ O lea, sa talitonu Iesu na faavae e le Atua le faaipoipoga ma o se mafutaga e tumau. E leʻi fetalai atu le Atua iā Atamu ma Eva e mafai ona tatalaina le faaipoipoga. O le faatulagaga sa iai mai lava i le amataga, o le tasi lea o le paaga faaipoipo, ma e tumau pea ‘ona avea i la‘ua ma tino e tasi.’

5. E faapefea ona aafia le faaipoipoga pe a maliu se tasi o le paaga?

⁵ Peita‘i, ina ua agasala Atamu, na tula‘i mai ai ni suiga. O se tasi o na suiga o le oti, ma e iai lona aafiaga i le faaipoipoga. E faamaonia lenā manatu ina ua taʻua e le aposetolo o Paulo, e lē o toe ola Kerisiano i le Tulafono a Mose. Na ia faapea atu, e muta le feagaiga o le faaipoipoga pe a maliu se tasi o le paaga, ma saʻoloto ai le isi paaga e toe faaipoipo.​—Roma 7:1-3.

6. Na faapefea ona atagia mai i le Tulafono a Mose le silafaga a le Atua i le faaipoipoga?

⁶ Na iai i le Tulafono na tuuina atu e le Atua i le nuu o Isaraelu tapulaa mo faaipoipoga. Na faatagaina ai le tele o avā a se tamāloa, o se faiga ua leva ona iai a o leʻi tuuina atu e le Atua lenā Tulafono. Peitaʻi, na iai aiāiga na faasā ai le faileagaina o fafine. O se faaaʻoaʻoga, pe a faaipoipo se tamāloa Isaraelu i se teine pologa ae mulimuli ane toe faaipoipo atu i se isi fafine, e lē tatau ona ia faaitiitia mea e avatu e tausia ai lana avā muamua. E aofia ai meaʻai, ofu, faapea foʻi le mea ua tatau ai i le faaipoipoga. Na finagalo le Atua ina ia puipuia ma tausia e lenei tamāloa lana avā muamua. (Eso. 21:9, 10) E ui e tatou te lē o toe ola i le Tulafono, ae e mafai ona tatou iloa mai ai le faatāua e Ieova o le faaipoipoga. Pe e lē uunaʻia ai foʻi oe ina ia faatāua le faaipoipoga?

7, 8. (a) E tusa ai ma le Teuteronome 24:1, o le ā se māfuaaga na faataga ai i le Tulafono le tatalaina o le faaipoipoga? (e) O le ā le silafaga a Ieova i le tatalaina o faaipoipoga?

⁷ Ae pe na faataga i le Tulafono le tatalaina o le faaipoipoga? E ui sa faatāua e le Atua le faaipoipoga, ae na ia faia foʻi se faatagaga e tatala ai e se tasi lana faaipoipoga. (Faitau le Teuteronome 24:1.) Sa mafai e se tamāloa Isaraelu ona faate‘a i lana avā, pe afai ‘ua ia iloa ua leaga se mea na faia e le avā.’ E leʻi faamatalaina i le Tulafono po o le ā na faasino atu i ai le upu “leaga.” Ae e lē taumatea o se mea e sili ona matagā pe tugā, ae e lē o ni masei lāiti. (Teu. 23:14) O le tulaga e faanoanoa ai, e oo ane i aso o Iesu ua faate‘a e le toʻatele o tagata Iutaia a latou avā “i so o se māfuaaga.” (Mata. 19:3) E mautinoa e tatou te lē fia faaaʻoaʻo iā i latou na.

⁸ Na faailoa mai e le perofeta o Malaki le silafaga a le Atua i le tatalaina o faaipoipoga. O le taimi lenā, sa avea o se mea masani le faate‘a e se tane e aunoa ma se māfuaaga tatau o lana ‘avā sa faia a o tauleʻaleʻa,’ atonu ina ia faaipoipo ai i se fafine e talavou ifo mai i atunuu faapaupau. Na taʻua e Malaki “e ʻinoʻino [le Atua] i le tete‘a,” po o le “tatalaina faaletulafono o le faaipoipoga.” (Mala. 2:14-16; fpl.) E talafeagai lelei lenā manatu ma le faamatalaga i le Kenese 2:24 e faatatau i le uluaʻi faaipoipoga: ‘E nonofo faatasi le tane ma lana avā, ona avea ai lea o i la‘ua ma tino e tasi.’ Na lagolagoina e Iesu le manatu o lona Tamā i faaipoipoga e ala i le faapea mai: “O ē ua faatasia e le Atua, aua ne‘i tuueseeseina e se tagata.”​—Mata. 19:6.

9. O le ā le uiga o upu a Iesu o loo i le Mareko 10:11, 12?

⁹ E ono fesili mai se tasi, ‘Pe e iai se faavae e mafai ai e se Kerisiano ona tatala lana faaipoipoga ma toe faaipoipo?’ O le silafaga lenei a Iesu i le tatalaina o faaipoipoga: “Ai se tasi e  faate‘a i lana avā ma toe faaipoipo atu i se isi, ua mulilua o ia, ma ua agasala ai i le fafine muamua, pe afai fo‘i e toe faaipoipo le fafine i se tasi ina ua uma ona faate‘a i lana tane, ua mulilua fo‘i lenā fafine.” (Mare. 10:11, 12; Luka 16:18) E manino mai, sa faamamaluina e Iesu faaipoipoga ma sa finagalo foʻi o ia ina ia faia faapea e isi. Pe a faate‘a e se tane lana avā faamaoni (po o se avā foʻi i lana tane faamaoni) ona o se māfuaaga faatauvaa ina ia mafai ai ona toe faaipoipo, o lenā ua ia faia le mulilua. E lē faapea a tatala e lenā tagata lana faaipoipoga, ona manatu ai lea ua muta le feagaiga o le faaipoipoga. I le silafaga a le Atua, o loo avea pea i laʻua ma “tino e tasi.” Na fetalai foʻi Iesu, pe a faate‘a e se tane lana avā faamaoni, o le a faaosoosoina ai le avā e faia le mulilua. E faapefea ona tupu lenā tulaga? I aso o Iesu, e ono uunaʻia se fafine ua faate‘a e lana tane ina ia toe faaipoipo, ona o le tausiga faaletino. O le iʻuga, o le a ia faia ai le mulilua.

10. O le ā le faavae e mafai ai e se Kerisiano ona tatala lana faaipoipoga ma saʻoloto e toe faaipoipo?

¹⁰ Na taʻua e Iesu le faavae e mafai ona tatala ai se faaipoipoga: “Ou te fai atu iā te outou, ai se tasi e faate‘a i lana avā ae e le‘i faitaaga [upu Eleni, por·neiʹa] lana avā, ma toe faaipoipo i se isi fafine, ua mulilua o ia.” (Mata. 19:9) O le manatu foʻi lenā na ia taʻua i lana Lauga i le mauga. (Mata. 5:31, 32) I na taimi uma e lua, na taʻua ai e Iesu le “faitaaga” po o feusuaʻiga lē mamā. E aofia ai agasala taufeusuaʻiga i fafo atu o le li‘o o le faaipoipoga e pei o le mulilua, faiga faatalitane, feusuaʻiga i le va o tagata e leʻi faaipoipo, tauatane, tauafafine, ma feusuaʻiga ma manu. Pe afai la e faitaaga le tane faaipoipo, e mafai e le avā ona filifili pe e tatala le la faaipoipoga pe e leai. Pe afai e tatala le la faaipoipoga, e tusa lenā ua muta le feagaiga o le faaipoipoga i le silafaga a le Atua.

11. Aiseā e ono filifili ai se Kerisiano e lē tatalaina lana faaipoipoga, e ui lava e iai le faavae faale-Tusi Paia e faia ai faapea?

¹¹ O le mea moni, e leʻi faapea mai Iesu e tatau lava ona tatala le faaipoipoga pe a faia e se tasi o le paaga le faitaaga (por·neiʹa). O se faaaʻoaʻoga, e ono filifili le avā e lē tatalaina le faaipoipoga, e ui lava sa faia e le tane le faitaaga. Atonu o loo alofa pea le avā i le tane, ma  lotomalie e faamagalo o ia ma galulue faatasi e toe faalelei la laʻua faaipoipoga. O le mea moni lava ia, pe a tatala e le avā le faaipoipoga ae e lē toe faaipoipo, o le a feagai o ia ma luʻi. O se faataʻitaʻiga: O le a faapefea ona tausia ona manaʻoga faaletino ma faamalieina ona manaʻoga taufeusuaʻiga? Ae e faapefea ona faalogona tuua toʻatasi? Pe afai e iai sa laʻua fanau, e faapefea ona aafia ai i latou? Po o le a faigofie ona tausia aʻe i latou i le upu moni? (1 Kori. 7:14) Ua manino mai, o le a feagai le paaga faamaoni ua filifili e tatala le faaipoipoga ma ni tulaga faigatā.

12, 13. (a) O le ā le tulaga sa iai le faaipoipoga a Hosea? (e) Aiseā na toe talia ai e Hosea Komeri, ma o le ā le tāua o lenā manatu mo faaipoipoga i aso nei?

¹² E mataʻina le faaaʻoaʻoga a le perofeta o Hosea. Na fetalai mai le Atua iā Hosea ina ia ave Komeri e fai ma ana avā. O le a avea o ia o se “fafine faitaaga ma o le a iai [sana] fanau ona o lana faitaaga.” Na ‘tō Komeri ma fanauina se atalii mo Hosea.’ (Ho. 1:2, 3) Na toe fanauina e Komeri ni fanau se toʻalua, lea atonu na maua mai i lona faia o le mulilua. E ui i lea, sa faamaoni pea Hosea iā te ia. Mulimuli ane, na tuua e Komeri Hosea ma avea o ia ma pologa. Peitaʻi, na toe faatauina mai o ia e Hosea. (Ho. 3:1, 2) Sa faaaogā e Ieova le faaaʻoaʻoga a Hosea, e faataʻitaʻi mai ai le tele o taimi na ia faamagaloina ai le nuu o Isaraelu, i lo latou lē faamaoni iā te Ia. O le ā e tatou te aʻoaʻoina mai i lenei faaaʻoaʻoga?

¹³ Pe a faitaaga se tasi o le paaga, e mafai e le paaga Kerisiano o loo faamaoni pea ona filifili pe e tatala le faaipoipoga pe e leai. Na fetalai Iesu, e iai i le paaga o loo faamaoni māfuaaga tatau e tatala ai le faaipoipoga, ma saʻoloto e toe faaipoipo. Ae i le isi itu, e mafai foʻi ona ia faamagaloina le paaga na faitaaga. E lē sesē le faia o lenā filifiliga. Na toe talia e Hosea lana avā o Komeri. Ina ua toe faatasi i laʻua, e leʻi tatau ona toe momoe Komeri ma se isi tamāloa. E leʻi “momoe” Hosea ma Komeri mo sina taimi. (Ho. 3:3) Ae i se taimi mulimuli ane, e lē taumatea na toe feusua‘i i la‘ua. O le faia faapea e Hosea, ua faaāta mai ai le finagalo malie o le Atua e toe talia ona tagata, ma toe faaauau ana feutagaʻiga ma i latou. (Ho. 1:11; 3:3-5) O le ā le tāua o lenā manatu mo faaipoipoga i aso nei? Pe a filifili le paaga faamaoni e lē tatalaina le faaipoipoga, o le toe faia la o feusuaʻiga ma lana paaga, ua faaalia ai ua ia faamagaloina o ia. (1 Kori. 7:3, 5) O lenā gaoioiga, ua faalēaogāina ai le faavae sa mafai ai ona tatala le faaipoipoga. O lea, o le a la faia ai taumafaiga ina ia faaleleia la laʻua faaipoipoga, ma faaatagia atu ai le silafaga a le Atua i le faaipoipoga.

14. E tusa ai ma le 1 Korinito 7:10, 11, o le ā e ono tupu i se faaipoipoga?

¹⁴ E tatau i Kerisiano uma ona taumafai ina ia faamamaluina le faaipoipoga, e pei o Ieova ma Iesu. Peitaʻi, e iai i latou e lē taulau i lea itu, ona o le tulaga lē lelei atoatoa. (Roma 7:18-23) O lea, e lē o se tulaga e faateʻia ai i tatou, auā sa iai faafitauli matuiā i faaipoipoga a nisi o Kerisiano i le uluaʻi senituri. Na tusi Paulo, “e lē tatau i se avā ona tuua lana tane.” Peitaʻi, e lē o le tulaga lenā sa iai nisi o faaipoipoga.​—Faitau le 1 Korinito 7:10, 11.

15, 16. (a) O le ā le sini o se ulugalii pe a iai ni faafitauli i la laʻua faaipoipoga, ma aiseā? (e) Ae e faapefea pe afai o le isi paaga e lē talitonu?

¹⁵ E leʻi faamatalaina e Paulo le māfuaaga na nonofo eseese ai paaga faaipoipo. E lē o le faafitauli ona e faapea sa faia e le tane le faitaaga, ma maua ai e le avā se māfuaaga e tete‘a ai ma lana tane ma toe faaipoipo atu i se isi. Nai lo o lea, na tusi Paulo pe a nonofo eseese le avā ma lana tane, e tatau ona “nofofua pea o ia pe toe faalelei ma lana tane.” O lea, o loo avea pea i laʻua ma tino e tasi i le silafaga a le Atua. Na fautua mai Paulo, po o ā lava faafitauli e tulaʻi mai i totonu o le faaipoipoga ae e lē o aofia ai le faitaaga, o le sini o se ulugalii o le toe faalelei o la  laʻua faaipoipoga. E mafai ona saʻili atu le tane ma le avā mo se fesoasoani faale-Tusi Paia mai i toeaina o le faapotopotoga. E avatu e toeaina fautuaga mai i le Tusi Paia, nai lo o le faaituʻau.

¹⁶ Atonu o le a tele atu tulaga faigatā pe afai e na o le toʻatasi le paaga e talitonu, ma ola i tapulaa a le Atua. Pe a tulaʻi mai ni faafitauli, po o le vaifofō le nonofo eseese? E pei ona faailoa mai i le Tusi Paia, e na o le pau le faavae e mafai ai ona tatala le faaipoipoga o le faitaaga, ae e lē o auʻiliʻili mai māfuaaga e mafai ai ona nonofo eseese se ulugalii. Na tusi Paulo: ‘Afai e iai se fafine e iai sana tane e lē talitonu, ma ua lotomalie lana tane e nonofo pea ma ia, aua ne‘i tuua e ia lana tane.’ (1 Kori. 7:12, 13) E faatatau foʻi lenā fautuaga i o tatou aso.

17, 18. Aiseā ua filifili ai nisi Kerisiano ina ia nonofo pea ma a latou paaga e ui i le tele o faafitauli?

¹⁷ E iai nisi tane lē talitonu e mananaʻo e nonofo pea ma a latou avā, ae e ese a latou gaoioiga o loo fai. Atonu e matuā sauā le tane, ma lagona ai e le avā ua lamatia lona ola po o lona soifua mālōlōina. Atonu e lē manaʻo fo‘i e tausia lana avā ma le aiga, ma matuā lamatia ai le tulaga faaleagaga o le avā. I na tulaga, ua filifili ai nisi avā Kerisiano e nonofo eseese ma a latou tane, e ui lava e faapea mai a latou tane e mananaʻo “e nonofo pea” ma i latou. Peitaʻi, ua filifili isi Kerisiano o loo iai i tulaga faigatā faapena, e nonofo pea ma a latou paaga ma taumafai e faaleleia a latou faaipoipoga. O le ā le māfuaaga?

¹⁸ E tusa pe e nonofo eseese le tane ma le avā, ae o loo avea pea i laʻua o se ulugalii faaipoipo. Pe a nonofo eseese, o le a laʻua feagai ma luʻi e pei ona taʻua i se tasi o palakalafa. Na taʻua foʻi e le aposetolo o Paulo se isi māfuaaga e nonofo faatasi ai pea le tane ma le avā: “Ua faapaiaina le tane lē talitonu ona o lana avā, ua faapaiaina fo‘i le avā lē talitonu ona o le uso; auā a leai, ua lē mamā a outou fanau, a o lenei ua paia i latou.” (1 Kori. 7:14) E toʻatele Kerisiano faamaoni sa nonofo pea ma a latou paaga lē talitonu, e ui lava i tulaga e sili ona faigatā. E latou te ta‘utino mai ua tauia a latou taumafaiga, aemaise ona ua avea a latou paaga ma tagata tapuaʻi moni o Ieova.​—Faitau le 1 Korinito 7:16; 1 Pete. 3:1, 2.

19. Aiseā ua taulau manuia ai le tele o faaipoipoga i faapotopotoga Kerisiano?

¹⁹ Na aumaia e Iesu faamatalaga e faatatau i le tatalaina o faaipoipoga, ae na faailoa mai e le aposetolo o Paulo fautuaga e faatatau i le nonofo eseese. E tutusa lo laʻua faanaunauga, ina ia faamamaluina e auauna a le Atua le faaipoipoga. E to‘atele ulugalii i faapotopotoga Kerisiano i le lalolagi aoao ua taulau manuia a latou faaipoipoga. E mautinoa e faapena foʻi la outou faapotopotoga, e to‘atele uso faamaoni e alolofa i a latou avā, ma avā faamaoni e alolofa i a latou tane. Ua faamaonia mai e i latou nei, e mafai ona faamamaluina le faaipoipoga. O le faitau miliona o faaipoipoga ua taulau manuia i aso nei, o se faamaoniga manino lea o le moni o fetalaiga a le Atua: “O le mea lea e tuua ai e le tane lona tamā ma lona tinā, ae nonofo faatasi ma lana avā, ona avea ai lea o i la‘ua ma tino e tasi.”​—Efe. 5:31, 33.