1. Aiseā e faigatā ai iā i tatou ona usiusitaʻi?

 PE E faigatā ona e usiusitaʻi? Na faigatā ona usiusitaʻi le tupu o Tavita, o lea na ia tatalo ai i le Atua: “Ia e faagaee iā te aʻu le lotomalie e usitaʻi iā te oe.” (Sala. 51:12) Na alofa Tavita iā Ieova. E ui i lea, na iai taimi na faigatā ai iā te ia ona usiusitaʻi ma e faapena foʻi i tatou. Aiseā? Muamua, ona ua tatou aafia i le uiga lē usiusitaʻi. Lua, ona o loo taumafai pea Satani e faatupu iā i tatou le uiga fouvale e pei o ia. (2 Kori. 11:3) Tolu, ona o loo siʻomia i tatou i le uiga fouvale o le lalolagi, “o le agaga lea o loo galue i fanau e lē usiusitaʻi.” (Efe. 2:2) E tatau ona tatou taumafai malosi e tauivi ma o tatou faanaunauga agasala, ma teena faaosoosoga a le Tiapolo ma le lalolagi ina ia lē usiusitaʻi. E tatau ona tatou faia taumafaiga uma ina ia usiusitaʻi iā Ieova ma i latou ua ia tuuina atu i ai le pule.

2. O le ā le uiga o le faaupuga “e gauaʻigofie”? (Iakopo 3:17)

² Faitau le Iakopo 3:17. Ua faapea mai Iakopo, o tagata e atamamai “e gauaʻigofie.” Seʻi mafaufau po o le ā le uiga o lenā faaupuga. E tatau ona tatou naunau ma lotomalilie e usiusitaʻi iā i latou ua tuuina atu i ai e Ieova sina pule. Peitaʻi, e lē faatalitalia e Ieova i tatou e usiusitaʻi i se tasi e taumafai e taofia i tatou mai i le usiusitaʻi i Ana poloaʻiga.—Galu. 4:​18-20.

3. Aiseā e tāua ai iā Ieova lo tatou usiusitaʻi i ē ua ia tuuina i ai sina pule?

³ Atonu e faigofie ona tatou usiusitaʻi iā Ieova nai lo o se tagata. O le māfuaaga, ona e lelei atoatoa faatonuga e aumaia e Ieova i taimi uma. (Sala. 19:7) Peitaʻi, o tagata e iai le pule, e lē lelei atoatoa. E ui i lea, ua tuuina mai e lo tatou Tamā i le  lagi sina pule i mātua, malo, ma toeaina. (Faata. 6:20; 1 Tesa. 5:12; 1 Pete. 2:​13, 14) Pe a tatou usiusitaʻi iā i latou, ua tatou usiusitaʻi foʻi la iā Ieova. Seʻi o tatou iloiloina le auala e usiusitaʻi ai i ē ua tuuina i ai e Ieova le pule, e ui e iai taimi atonu e faigatā ai ona tatou talia ma mulimuli i a latou faatonuga.

4. Aiseā ua toʻatele ai fanau e lē usiusitaʻi i mātua?

⁴ O loo siʻomia talavou i a latou uō “e lē usiusitaʻi i mātua.” (2 Timo. 3:​1, 2) Aiseā ua toʻatele ai i latou e lē usiusitaʻi? E manatu nisi talavou e faagutugutulua o latou mātua. E masani lava, e mulimuli fanau i faaaʻoaʻoga leaga a mātua. Ae e manatu nisi talavou, ua faasāsā naʻuā mātua po ua lē toe aogā a latou fautuaga. Pe afai o oe o se talavou, po o ou lagona na? E faigatā i le toʻatele o talavou ona faatatau le poloaʻiga a Ieova: “Ia usiusitaʻi i o outou mātua e tusa ma le finagalo o le Alii, auā o le mea tonu lea e ao ona fai.” (Efe. 6:1) O le ā e fesoasoani iā te oe e faatatau ai lenā poloaʻiga?

5. I le Luka 2:​46-52, aiseā e mataʻina ai le usiusitaʻi pea o Iesu i ona mātua?

⁵ E mafai ona e aʻoaʻoina le usiusitaʻi mai i le faaaʻoaʻoga sili o Iesu. (1 Pete. 2:​21-24) O Iesu o se tagata e lelei atoatoa ae e lē lelei atoatoa ona mātua. Peitaʻi, na faaaloalo pea Iesu i ona mātua e ui na la faia ni mea sesē, ma e iai taimi na sesē ai o la manatu e faatatau iā Iesu. (Eso. 20:12) Seʻi manatu i le mea na tupu ina ua 12 tausaga o Iesu. (Faitau le Luka 2:​46-52.) Ina ua tuua e mātua o Iesu Ierusalema, na galo iā i laʻua Iesu. O le matafaioi a Iosefa ma Maria, o le faamautinoa o loo iai uma le la fanau i le taimi e toe foʻi ai i le fale. Ina ua la maua Iesu i le malumalu, na tuuaʻia ai e Maria Iesu ona na la fiu e suʻe o ia. Na ono faapea atu Iesu e lē tatau ona tuuaʻia o ia. Nai lo o lea, na puupuu ma faaaloalo le auala na ia tali atu ai i ona mātua. Peitaʻi, e “la te leʻi malamalama i mea ua ia fai atu ai iā i laʻua.” Ae na “gauaʻi pea o ia iā i laʻua.”

6-7. O le ā e fesoasoani i talavou ina ia usiusitaʻi ai i o latou mātua?

⁶ Talavou e, pe e faigatā ona outou usiusitaʻi i o outou mātua pe a latou faia ni mea sesē pe e sesē foʻi o latou manatu e faatatau iā te outou? O le ā e mafai ona fesoasoani iā te outou? Muamua, ia mafaufau i faalogona o Ieova. Ua faapea mai le Tusi Paia pe a outou usiusitaʻi i o outou mātua, “o le mea lea e finagalo malie i ai le Alii.” (Kolo. 3:20) E silafia e Ieova le taimi e lē malamalama atoatoa ai o outou mātua iā te outou, pe e latou te faia foʻi ni tulafono e faigatā ona outou usiusitaʻi i ai. Ae pe a outou usiusitaʻi pea iā i latou, o le a outou faafiafiaina Ieova.

⁷ Lua, ia mafaufau i faalogona o tou mātua. Pe a outou usiusitaʻi i tou mātua, o le a outou faafiafiaina i latou ma latou maufaatuatuaina outou. (Faata. 23:​22-25) O le a māfana ai foʻi la outou faiā. Ua faapea mai se uso e igoa iā Alexandre mai i Peleseuma, “Ina ua fai ma aʻu masaniga le usiusitaʻi i faatonuga a oʻu mātua, na matuā māfana ai la matou faiā ma maua ai le fiafia.” b Tolu, ia mafaufau i aogā e tou te maua i le lumanaʻi ona o lo outou usiusitaʻi i le taimi lenei. Ua faapea mai Paulo e nofo i Pasili, “O le usiusitaʻi i oʻu mātua ua fesoasoani iā te aʻu e usiusitaʻi ai iā Ieova ma i latou e iai le pule.” O loo aumaia i le Afioga a le Atua se māfuaaga tāua e tatou te usiusitaʻi  ai i mātua. Ua faapea mai: “Ina ia e manuia ai ma e ola umi ai i le lalolagi.”—Efe. 6:​2, 3.

8. Aiseā e usiusitaʻi ai le toʻatele o talavou i o latou mātua?

⁸ E toʻatele talavou ua iloa le aogā o le usiusitaʻi i mātua. Na faigatā iā Luiza mai i Pasili, ona malamalama i le māfuaaga na lē faatagaina ai o ia e ona mātua mo se taimi e fai sana telefoni feaveaʻi. Na ia manatu o le toʻatele o talavou e latou te tupulaga e iai a latou telefoni. Peitaʻi na ia iloa mulimuli ane, o loo puipuia o ia e ona mātua. Na ia faapea mai, “Ua ou malamalama nei o le usiusitaʻi i oʻu mātua e lē o se faasāsāaga ae o se puipuiga.” E iai taimi na faigatā ai iā Elizabeth o se tuafafine talavou mai i le Iunaite Setete ona usiusitaʻi i ona mātua. Na ia faapea mai, “Pe a ou lē malamalama atoatoa i le māfuaaga e faia ai e oʻu mātua se tulafono, ona ou toe mafaufau lea i taimi na puipuia ai aʻu i tulafono na la faia.” Na taʻua e Monica e nofo i Armenia, e sili atu le fiafia e na te maua i le usiusitaʻi i ona mātua nai lo o le lē usiusitaʻi.

9. O ā manatu o le toʻatele e faatatau i le usitaʻia o tulafono?

⁹ E toʻatele i latou e faapea mai e manaʻomia e tagata pulega a malo, ma e tatau ona usitaʻia nisi o tulafono e faia e nei “faipule silisili.” (Roma 13:1) Ae atonu e faatalatū na tagata e usitaʻia se tulafono e lē fiafia i ai pe e manatu e lē talafeagai. O se faataʻitaʻiga, o le totogiina o lafoga. I se tasi o atunuu i Europa, e toʻatele e manatu “e lē talafeagai le totogiina o lafoga, pe a faia e le malo ni faaiʻuga lē tonu e faatatau i le aoina o lafoga.” E lētioa la toʻatele tagata o lenā atunuu e lē totogiina uma lafoga e manaʻomia ona totogi i le malo.

10. Aiseā e tatou te usiusitaʻi ai i tulafono e tusa lava pe e tatou te lē fiafia i ai?

¹⁰ O loo taʻua i le Tusi Paia, o loo pulea e Satani faigāmalo a tagata lea e māfua ai mafatiaga, ma ua toeitiiti ona faaumatia lea. (Sala. 110:​5, 6; Fai. 8:9; Luka 4:​5, 6) O loo taʻua foʻi i le Tusi Paia “o so o se tasi e tetee i le pule, ua tetee o ia i le faatulagaga a le Atua.” O lo tatou usiusitaʻi i faipule silisili, o se vaega lea o le faatulagaga lē tumau a Ieova e puipuia ai i tatou. O lea la, e tatau ona tatou “avatu i [faipule silisili] uma mea e tatau iā i latou,” e aofia ai le totogiina o lafoga, faaalia o le faaaloalo, ma le usiusitaʻi. (Roma 13:​1-7) Atonu e faigatā ona tatou usiusitaʻi i se tulafono e tatou te manatu e lē talafeagai, e faasāsā naʻuā, ma e tele tupe e alu ai. Ae e tatou te usiusitaʻi iā Ieova, ma ua ia faatonuina i tatou e usiusitaʻi i na faipule silisili seʻi vaganā ua latou faatonuina i tatou e solia ana poloaʻiga.—Galu. 5:29.

11-12. E pei ona taʻua i le Luka 2:​1-6, o le ā na faia e Iosefa ma Maria e usiusitaʻi ai i le tulafono e ui ina faigatā, ma o le ā le iʻuga? (Tagaʻi foʻi i ata.)

 ¹¹ E mafai ona tatou aʻoaʻoina ni lesona tāua mai i le faaaʻoaʻoga a Iosefa ma Maria. Na la gauaʻi i faipule silisili e ui ina faigatā. (Faitau le Luka 2:​1-6.) I le pe ā ma le 9 masina o le maʻitaga o Maria, na tofotofoina ai lo la usiusitaʻi ina ua faatonuina e le Emeperoa o Roma o Aokuso le faia o se tusigāigoa. O lea, na faimalaga ai Iosefa ma Maria i Peteleema e pe ā ma le 150 kilomita (93 maila) le mamao ma na ui atu i nuu maugā. E leʻi faigofie lenā faigāmalaga aemaise lava iā Maria. Atonu na la popole mo lona saogalemu ma le la pepe e leʻi fanau mai. Ae e faapefea pe a tigā faafuaseʻi le manava o Maria a o alu le malaga? O loo ia tauaveina le Mesia. Pe na la faia lenā mea ma faamolemolega e lē usiusitaʻi ai i le malo?

¹² E leʻi faatagaina e Iosefa ma Maria na atugaluga ina ia lē usiusitaʻi ai i le tulafono. Na faamanuia Ieova i lo la usiusitaʻi. Na taunuu ma le manuia Maria i Peteleema ma fanauina ai se pepe soifua mālōlōina lelei, ma na faataunuuina ai foʻi se valoaga o le Tusi Paia.—Mika 5:2.

13. E faapefea i lo tatou usiusitaʻi ona puipuia ai o tatou uso ma tuafāfine?

¹³ Pe a tatou usiusitaʻi i faipule silisili, o le a aogā iā i tatou ma isi. E faapefea? O le a ʻalofia ai faasalaga o le lē usiusitaʻi i le tulafono. (Roma 13:4) O lo tatou usiusitaʻi foʻi, o le a iai se aafiaga lelei i le auala e vaai ai malo i Molimau a Ieova. O se faataʻitaʻiga, i le tele o tausaga ua teʻa i Nigeria a o faia se sauniga, na ō atu ai fitafita i le Maota mo Sauniga e suʻe i latou e tetee i le totogiina o lafoga i le malo. Peitaʻi na faatonuina fitafita e le taʻitaʻiʻau ina ia ō ese, ma na ia faapea atu: “O Molimau a Ieova e lē o ni tagata e tetee i le totogiina o lafoga.” O so o se taimi lava e te usiusitaʻi ai i le tulafono, ua e saosaolaumea i le talaaga lelei o tagata o Ieova, ma atonu e  iai se aso o le a fesoasoani ai lenā talaaga lelei e puipuia tagata tapuaʻi o Ieova.—Mata. 5:16.

14. O le ā na fesoasoani i se tuafafine “e gauaʻigofie” ai i faipule silisili?

¹⁴ Atonu e lē faigofie iā i tatou ona usiusitaʻi i faipule silisili. Na taʻutino mai se tuafafine e igoa iā Joanna mai i le Iunaite Setete, “Na matuā faigatā lava iā te aʻu ona usiusitaʻi i faipule silisili, ona na latou faileagaina nisi o loʻu aiga.” Peitaʻi, na faia e Joanna ni taumafaiga maumauaʻi e suia ona manatu. Muamua, e leʻi toe faitau i faamatalaga a tagata i luga o Upega tafaʻilagi lea e faatupu ai ona faalogona lē fiafia i faipule silisili. (Faata. 20:3) Lua, na ia tatalo iā Ieova e fesoasoani mai ina ia maufaatuatuaina o Ia nai lo o le suia o pulega a tagata. (Sala. 9:​9, 10) Tolu, na ia faitau i mataupu i a tatou lomiga e faatatau i le solitū. (Ioa. 17:16) Na faapea mai Joanna, o le faaaloalo ma le usiusitaʻi i faipule silisili ua ia maua ai “le filemu ma le faamalieina.”

15. Aiseā atonu e faigatā ai ona tatou usitaʻi i faatonuga mai i le faalapotopotoga a Ieova?

¹⁵ Ua faatonuina i tatou e Ieova ina “ia usiusitaʻi i ē o taʻimua” i le faapotopotoga. (Epe. 13:17) E lelei atoatoa lo tatou Taʻitaʻi o Iesu, ae e lē lelei atoatoa i latou ua ia faaaogāina e taʻimua i le faapotopotoga Kerisiano i le lalolagi. Atonu e faigatā ona tatou usiusitaʻi iā i latou, aemaise lava pe a latou faatonuina i tatou e faia se mea e tatou te lē mananaʻo ai. E iai le taimi na faatalatū ai le aposetolo o Peteru e usiusitaʻi. Ina ua faatonuina o ia e se agelu e ʻai aano o manu e lē mamā i le Tulafono a Mose, na faatolu ona musu Peteru e faia faapea. (Galu. 10:​9-16) Aiseā? E lē fetaui i lona manatu lenā faatonuga fou. E ese le auala na masani ona ia faia ai mea. Pe afai na faigatā ona usiusitaʻi Peteru i le faatonuga mai i se agelu lelei atoatoa, e sili atu la ona faigatā ona tatou usiusitaʻi i faatonuga mai i tane lē lelei atoatoa.

16. E ui na ono manatu Paulo e lē talafeagai le faatonuga na ia maua, ae o le ā na ia faia? (Galuega 21:​23, 24, 26)

¹⁶ Na “gauaʻigofie” le aposetolo o Paulo ina ua ia maua se faatonuga atonu na ia lagona e lē talafeagai. Na faalogo Kerisiano Iutaia i ni tala feaveaʻi lea na tuuaʻia ai Paulo ua ia aʻoaʻo tagata e “fulitua iā Mose,” ma na ia faaalia le lē faaaloalo i le Tulafono a Mose. (Galu. 21:21) Na faatonuina Paulo e toeaina Kerisiano i Ierusalema, e ō ma ni tamāloloa se toʻafā i le malumalu ma faamamāina faatasi ma i latou ina ia faailoa ai o loo ia tausia le Tulafono. Peitaʻi, na iloa e Paulo e lē o toe ola Kerisiano i lalo o le Tulafono a Mose ma e na te leʻi faia foʻi se mea sesē. Ae na usitaʻi pea Paulo. “I le aso [na] sosoo ai” na ia “ave . . . tamāloloa, [ma] faamamāina o ia lava faatasi ma i latou.” (Faitau le Galuega 21:​23, 24, 26.) O le usiusitaʻi o Paulo na fesoasoani i le tausia o le autasi o le ʻauuso.—Roma 14:​19, 21.

17. O le ā e te aʻoaʻoina mai i le mea na tupu iā Stephanie?

¹⁷ Na faigatā i se tuafafine e igoa iā Stephanie, ona talia se faaiʻuga na faia e le ofisa o le lālā i lona atunuu. Na auauna ma le fiafia ma lana tane i se vaega e tautatala i se isi gagana. Na faamuta e le ofisa o le lālā lenā vaega ma toe tofia i laʻua i se faapotopotoga e tautatala i le la gagana. Na taʻutino mai Stephanie, “Na ou matuā lē fiafia ai lava. Ou te leʻi talitonu e telē se manaʻoga i le gagana lea e ma te tautatala ai.” E ui i lea, na ia usitaʻia le taʻiala fou. Na ia toe faapea mai, “Mulimuli ane, na  ou malamalama ai i le atamai o lenā faaiʻuga. Ua avea nei i maʻua ma mātua faaleagaga i nisi o le faapotopotoga e leai ni aiga i le upu moni. O loo ma suʻesuʻe nei ma se tuafafine faatoʻā toe talaʻi, ma ua tele foʻi le taimi e faia ai aʻu lava suʻesuʻega.” Na ia faapea atili mai, “Ua ou maua nei se lotofuatiaifo mamā i le iloaina ua ou faia le mea sili e usiusitaʻi ai.”

18. E faapefea ona aogā iā i tatou le usiusitaʻi?

¹⁸ E mafai ona tatou aʻoaʻoina le usiusitaʻi. Na “aʻoaʻoina [e Iesu] le usiusitaʻi mai i mea na puapuaga ai o ia,” ae e lē mai i mea lelei na tutupu i lona olaga. (Epe. 5:8) E masani foʻi ona tatou aʻoaʻoina le usiusitaʻi mai i luʻi e tutupu i o tatou olaga. O se faataʻitaʻiga, i le taimi na amata ai le KOVITI-19, na faatonuina ai i tatou e taofia le faatasitasi i Maota mo Sauniga ma le talaʻi mai i lea fale i lea fale. Pe na faigatā iā te oe ona usiusitaʻi? Na puipuia oe ona o lou usiusitaʻi, faatumauina ai le autasi ma uso ma tuafāfine, ma faafiafiaina ai le finagalo o Ieova. O lea, ua lava saunia ai i tatou uma i le taimi lenei e usiusitaʻi i so o se faatonuga e maua i le taimi o le puapuaga tele. O lo tatou usitaʻia o na faatonuga, e faalagolago i ai le faasaoina o o tatou ola.—Iopu 36:11.

19. Aiseā e te manaʻo ai e usiusitaʻi?

¹⁹ Ua tatou aʻoaʻoina o le usiusitaʻi e tatou te maua ai le anoanoaʻi o faamanuiaga. Ae o le māfuaaga autū e tatou te usiusitaʻi ai iā Ieova, ona e tatou te alolofa iā te ia ma mananaʻo e faafiafia lona finagalo. (1 Ioa. 5:3) E lē mafai ona tatou tauia le agalelei o Ieova iā i tatou. (Sala. 116:12) Ae e mafai ona tatou usiusitaʻi iā te ia ma i latou ua ia tuuina i ai le pule e vaavaaia i tatou. Pe a tatou usiusitaʻi, e faailoa atu ai e tatou te atamamai, ma o tagata atamamai, e latou te faafiafiaina le finagalo o Ieova.—Faata. 27:11.