1-2. (a) Aiseā na faapea mai ai Paulo o le uiga “aupito sili” lava o le alofa? (e) O ā fesili o le a tatou iloiloina?

 INA ua taʻua e le aposetolo o Paulo le faatuatua, faamoemoe, ma le alofa, na faaiʻu ana upu i le faapea mai “o le aupito sili o nei [uiga], o le alofa lea.” (1 Kori. 13:13) Aiseā na faia ai e Paulo lenā faamatalaga? Talu ai o le a faataunuuina uma folafolaga a le Atua i le lumanaʻi, o le a lē toe manaʻomia ai la ona tatou faaalia le faatuatua i Ana folafolaga e faatatau i le lalolagi fou, pe faamoemoe foʻi o le a faataunuuina na folafolaga. Peitaʻi, e tatou te faaalia pea le alofa mo Ieova ma tagata. O le mea moni, o le a faaauau pea ona tuputupu aʻe lo tatou alofa mo i latou.

² Talu ai e manaʻomia ona faaalia pea le alofa, o le a tatou iloiloina la fesili nei e tolu. Muamua, aiseā e tatau ai ona faaalia le alofa o le tasi i le isi? Lua, e faapefea ona faaalia le alofa o le tasi i le isi? Tolu, e faapefea ona faamalosia pea le alofa o le tasi i le isi?

3. O ā māfuaaga e tatou te faaalia ai le alofa o le tasi i le isi?

³ Aiseā e tāua ai ona faaalia e le tasi le alofa i le isi? O se tasi o māfuaaga, ona o le alofa ua mātaulia ai i tatou o ni Kerisiano moni. Na fetalai Iesu i ona aposetolo: “O le mea lea e iloa ai e  tagata uma o oʻu soo outou, pe afai ua outou alolofa o le tasi i le isi.” (Ioa. 13:35) O le faaalia foʻi o le alofa o le tasi i le isi, e faatumauina ai pea lo tatou autasi. Na taʻua e Paulo le alofa, ʻo le fusi e atoatoa ona autasi ai.’ (Kolo. 3:14) Peitaʻi, e iai se isi māfuaaga e tāua ai ona faaalia e le tasi le alofa i le isi. Na tusi le aposetolo o Ioane i ona uso talitonu: “O lē e alofa i le Atua e tatau foʻi ona alofa i lona uso.” (1 Ioa. 4:21) Pe a faaalia e le tasi le alofa i le isi, e faaalia ai foʻi e tatou te alolofa i le Atua.

4-5. Aumai se faataʻitaʻiga e iloa ai le fesootaʻiga o lo tatou alofa mo le Atua ma lo tatou alofa mo isi.

⁴ O le ā le fesootaʻiga o lo tatou alolofa i le Atua ma lo tatou alolofa i o tatou uso ma tuafāfine? O se faataʻitaʻiga, mātau le fesootaʻiga o o tatou fatu i isi vaega o o tatou tino. Pe a tago le fomaʻi i lou tapulima e siaki ai le tātā o lou fatu, atonu o le a ia iloa ai po o malosi po o vaivai lou fatu. O le ā le fesootaʻiga o lenei faataʻitaʻiga ma le uiga o le alofa?

⁵ Pe a tago le fomaʻi i o tatou tapulima, o le a mafai ai ona ia iloa po o le ā le malosi o le tātā o o tatou fatu. I se tulaga talitutusa, e mafai ona iloa le malosi o lo tatou alofa mo le Atua, pe a iloilo po o le ā le malosi o lo tatou alofa mo isi. Pe a tatou iloa ua amata ona vaivai lo tatou alofa mo o tatou uso, atonu e faailoa mai ai ua amata foʻi ona vaivai lo tatou alofa mo le Atua. Ae pe afai e faaalia pea le alofa mo o tatou uso, e faaalia ai o loo malosi foʻi lo tatou alofa mo le Atua.

6. Pe afai ua amata ona vaivai lo tatou alofa mo o tatou uso ma tuafāfine, aiseā e lē tatau ona tatou manatu māmā i ai? (1 Ioane 4:​7-9, 11)

⁶ Pe afai ua amata ona vaivai lo tatou alofa mo o tatou uso ma tuafāfine, e lē tatau ona tatou manatu māmā i ai. Aiseā? E faailoa mai ai ua iai i se tulaga lamatia la tatou faiā ma Ieova. Na faamanino mai e le aposetolo o Ioane lenā mea ina ua ia faapea mai: “O lē e lē alofa i lona uso, o lē ua ia vaai atu i ai, e lē mafai ona ia alofa i le Atua, o lē ua ia lē vaai atu i ai.” (1 Ioa. 4:20) O le ā le lesona mo i tatou? E faafiafiaina le finagalo o Ieova, pe afai e tatou te “alolofa o le tasi i le isi.”—Faitau le 1 Ioane 4:​7-9, 11.

7-8. O ā nisi o auala e faaalia ai le alofa o le tasi i le isi?

⁷ E tele taimi o loo taʻua ai i le Afioga a le Atua le poloaʻiga, ia “alofa le tasi i le isi.” (Ioa. 15:​12, 17; Roma 13:8; 1 Tesa. 4:9; 1 Pete. 1:22; 1 Ioa. 4:11) Peitaʻi, o le alofa o se uiga e sau mai i le loto, ma e lē mafai e se tasi ona iloa mea o loo i o tatou loto. O lea, e faapefea ona iloa le alofa o le tasi i le isi? E ala i a tatou upu ma gaoioiga.

⁸ E tele auala e faailoa atu ai e tatou te alolofa i o tatou uso ma tuafāfine. O nisi nei o faataʻitaʻiga: “Ia tautatala i le mea moni o le tasi i le isi.” (Saka. 8:16) “Ia faatupu le filemu i le vā o le tasi ma le isi.” (Mare. 9:50) Ia tausolomua ona “faaaloalo le tasi i le isi.” (Roma 12:10) “Ia talia e le tasi le isi.” (Roma 15:7) ʻIa faaauau ona fefaamagaloaʻi.’ (Kolo. 3:13) “Ia fesoasoani le tasi i avega mamafa a le isi.” (Kala. 6:2) “[Ia] fefaamāfanafanaaʻi pea.” (1 Tesa. 4:18) ʻIa atiaʻe pea e le tasi le isi.’ (1 Tesa. 5:11) “[Ia] tatalo le tasi mo le isi.”—Iako. 5:16.

9. Aiseā e avea ai le fefaamāfanafanaaʻi o se vala tāua e faaalia atu ai lo tatou alofa i isi? (Tagaʻi foʻi i le ata.)

⁹ Seʻi o tatou iloiloina se tasi o faaupuga e faatatau i le alofa lea na taʻua i le palakalafa ua mavae atu, o le apoapoaʻiga a Paulo: “[Ia] fefaamāfanafanaaʻi pea.” Aiseā e avea ai le fefaamāfanafanaaʻi o se vala tāua e faaalia atu ai  lo tatou alofa mo isi? E tusa ai ma se tusitusiga faale-Tusi Paia, o le upu na faaaogā e Paulo mo le “faamāfanafana,” e uiga atu i le “tū i tafatafa o se tagata e faalototele iā te ia a o feagai ai ma se tofotofoga ogaoga.” O lea, pe a tatou faamāfanafana i o tatou uso talitonu o loo mafatia, ua tatou fesoasoani ai iā i latou ia aua neʻi faavaivai, ma ia faaauau pea ona savavali i le ala i le ola. O taimi uma lava e tatou te avatu ai faamāfanafanaga i se uso po o se tuafafine, ua faaalia ai lo tatou alofa mo o tatou uso talitonu.—2 Kori. 7:​6, 7, 13.

10. O le ā le fesootaʻiga o le tigā alofa ma le avatu o faamāfanafanaga?

¹⁰ O le ā le fesootaʻiga o le tigā alofa ma le avatu o faamāfanafanaga? O sē e tigā alofa, e uunaʻia o ia e faamāfanafana i isi ma fesoasoani e tuuitiitia o latou mafatiaga. O lea, pe a tatou lagona le tigā alofa ona tatou avatu lea o faamāfanafanaga. Mataū le auala na faafesootaʻi ai e Paulo le tigā alofa o Ieova i faamāfanafanaga e na te aumaia. Ua faamatalaina e Paulo Ieova o “le Tamā o le alofa mutimutivale, ma le Atua o faamāfanafanaga uma.” (2 Kori. 1:3) O loo faaaogā e Paulo le faaupuga “alofa mutimutivale,” e faamatala ai lagona o le tigā alofa mo isi. O lea, ua taʻua ai le Atua o le Tamā po o le Puna o le alofa mutimutivale, ona e matuā tigā alofa o ia i tagata. O lona tigā alofa, e uunaʻia ai o ia e faamāfanafana i tatou “i o tatou puapuaga uma.” (2 Kori. 1:4) E pei ona faafouina i latou ua galala i le fia feinu i se vai mai i se vaipuna, e faapena foʻi ona faafouina ma faamāfanafana e Ieova i latou ua mafatia. E faapefea ona tatou lagona le tigā alofa ma avatu faamāfanafanaga i isi e pei ona faia e Ieova? O se tasi o auala, o le atiaʻe o uiga lea e uunaʻia ai i tatou e avatu faamāfanafanaga. O ā nisi o na uiga?

11. I le Kolose 3:12 ma le 1 Peteru 3:​8, o ā isi uiga e ao ona tatou atiaʻe e faatumauina ai le alofa lea e uunaʻia ai i tatou e faamāfanafana i isi?

¹¹ O le ā e fesoasoani iā i tatou e faatumauina ai le alofa lea e tatou te manaʻomia ina ʻia fefaamāfanafanaaʻi ai pea’? E manaʻomia ona tatou atiaʻe uiga māfana e pei o le tigā alofa o le tasi i le isi, alofa faaleuso, ma le agalelei. (Faitau le Kolose 3:12; 1 Peteru 3:8.) E faapefea ona fesoasoani na uiga iā i tatou? Pe a tatou lagona le tigā alofa mo o tatou uso ma naunau moni iā i latou, o le a iai iā i tatou se faanaunauga malosi e avatu faamāfanafanaga pe a feagai ma faigatā. Na fetalai Iesu, “o le tele o mea i le loto e tautala mai ai le gutu. E aumaia e le tagata lelei mea lelei mai i ana oloa lelei.” (Mata. 12:​34, 35) O le avatu o faamāfanafanaga i o tatou uso ma tuafāfine, o se vala lea e sili ona tāua e faailoa atu ai lo tatou alofa iā i latou.

12. (a) Aiseā e tatau ai ona tatou mataala pea? (e) O le ā le fesili o le a tatou iloiloina?

¹² E tatou te mananaʻo ina ia “faaauau ona alofa le tasi i le isi.” (1 Ioa. 4:7) Peitaʻi, e tāua ona tatou manatua le lapataʻiga a Iesu, “o le a maalili le alofa o le toʻatele.” (Mata. 24:12) E leʻi uiga atu Iesu e toʻatele ona soo o le a oo i ai lenā tulaga. E ui i lea, e manaʻomia ona tatou mataala pea ina ia aua neʻi taaʻina i tatou i uiga lē alofa o tagata o le lalolagi. O lea, seʻi o tatou iloiloina le fesili tāua lenei: E faapefea ona iloa po o malosi lo tatou alofa mo o tatou uso?

13. O le ā se tasi o auala e iloa ai le malosi o lo tatou alofa?

¹³ O se tasi o auala e iloa ai le malosi o lo tatou alofa, o le mātauina lea o le auala e tatou te taulimaina ai mea e tutupu i le olaga.  (2 Kori. 8:8) O se faataʻitaʻiga, o vaivaiga ma mea sesē a isi e mafai ona tofotofoina ai le malosi o lo tatou alofa mo i latou. O lea, e iloa le malosi o lo tatou alofa pe a faatatau le fautuaga a le aposetolo o Peteru: “Ae e sili i nei mea uma, ia tele le alofa o le tasi i le isi, auā o le alofa e ufiufi ai le anoanoaʻi o agasala.”—1 Pete. 4:8.

14. E tusa ai ma le 1 Peteru 4:​8, o le ā le ituaiga alofa e manaʻomia ona tatou faaalia? Aumai se faataʻitaʻiga.

¹⁴ Seʻi o tatou iloilo totoʻa upu a Peteru. O loo faamatalaina i le vaega muamua o le fuaiupu e 8 le ituaiga alofa lea e manaʻomia ona tatou faaalia, “ia tele le alofa.” O le upu na faaaogā e Peteru mo le faaupuga “ia tele,” o lona uiga i le gagana Eleni ia “faatelē.” O loo taʻua i le isi vaega o le fuaiupu, pe a tele lo tatou alofa mo isi, e mafai ona ufiufi ai agasala a o tatou uso. O se faataʻitaʻiga, seʻi faapea e iai se laulau e tele ni maʻosiʻosia. E mafai ona fofola faatelē se ʻie i luga o le laulau ina ia ufiufi uma ai na maʻosiʻosia. I se tulaga talitutusa, o le tele o lo tatou alofa mo o tatou uso ma tuafāfine, e mafai ona ufiufi pe faamagalo ai “le anoanoaʻi” o a latou “agasala.” E pei lava ona ufiufi i se ʻie ni maʻosiʻosia o se  laulau, e mafai foʻi e le alofa ona ufiufi ai vaivaiga ma mea sesē a isi.

15. O le ā e mafai ona tatou faia pe a matuā malosi lo tatou alofa mo o tatou uso ma tuafāfine? (Kolose 3:13)

¹⁵ E tatau ona matuā malosi lo tatou alofa mo isi, ina ia mafai ai ona tatou faamagalo mea sesē a o tatou uso talitonu, e tusa lava pe faigatā ona tatou faia faapea. (Faitau le Kolose 3:13.) Pe a tatou faamagalo atu i isi, e faailoa atu ai e malosi lo tatou alofa ma e tatou te mananaʻo e faafiafia Ieova. O le ā se isi mea e fesoasoani iā i tatou e lē amanaʻia ai uiga faatigā ma mea sesē a isi?

16-17. O le ā se isi mea e fesoasoani iā i tatou e lē amanaʻia ai mea sesē a isi? Ia faataʻitaʻi. (Tagaʻi foʻi i le ata.)

¹⁶ Ia uaʻi atu i uiga lelei o o tatou uso ma tuafāfine, ae e lē o o latou uiga lē lelei. O se faataʻitaʻiga, seʻi faapea o loo outou olioli faatasi ma uso ma tuafāfine i se faatasiga, ma na e puʻeina se tou ata ina ua uma le faatasiga. Peitaʻi, na e puʻeina isi ata e lua ina neʻi lē lelei le ata na puʻe muamua. O lea, e tolu ata ua e puʻeina. Ae ua e mātauina i se tasi o na ata, e iai se uso e lē o ʻata. O le ā lau mea e fai i lenā ata? E mautinoa e te tapēina ese, auā e iai isi ata e lua o loo ʻata ai le uso.

¹⁷ E faatusaina na ata i mea lelei, e tatou te manatua ai o tatou uso ma tuafāfine i taimi na tatou faatasitasi ai. Sei faapea o se tasi ona faatasiga, na fai ai e se uso po o se tuafafine se tala po o se gaoioiga na e lē fiafia ai. O le ā e tatau ona e faia? (Faata. 19:11; Efe. 4:32) E  tatau ona e faagalo lenā tala po o lenā gaoioiga, e tai pei o le tapē ese o se ata e lē manaia. E mafai ona tatou faagalo lenā mea sesē, ona e tele mea lelei e tatou te manatua ai lenā uso po o lenā tuafafine i taimi na tatou faatasitasi ai. O mea lelei na e tatou te mananaʻo e manatua pea ma faapelepele i ai.

18. O ā manatu autū e faatatau i le alofa na talanoaina i lenei mataupu?

¹⁸ Aiseā e tatou te mananaʻo ai e faamalosia pea le alofa o le tasi i le isi? E pei ona tatou talanoaina, pe a tatou faaalia le alofa i uso ma tuafāfine, ua tatou faaalia foʻi le alofa mo Ieova. E faapefea ona tatou faaalia le alofa mo o tatou uso talitonu? O se tasi o auala, o le avatu lea o faamāfanafanaga. Pe a tatou faaalia le tigā alofa i isi, o le a uunaʻia ai i tatou e “fefaamāfanafanaaʻi pea.” E faapefea ona faamalosia pea le alofa o le tasi i le isi? E ala i le faia o le mea sili e faamagalo ai mea sesē e faia mai e isi.

19. Aiseā e matuā tāua ai i aso nei ona faaalia le alofa o le tasi i le isi?

¹⁹ Aiseā e matuā tāua ai i aso nei le faaalia o le alofa o le tasi i le isi? Mātau le māfuaaga na taʻua e Peteru: “Ua lata mai le iʻuga o mea uma lava. O lea, . . . ia tele le alofa o le tasi i le isi.” (1 Pete. 4:​7, 8) A o lata mai le iʻuga o lenei lalolagi amioleaga, o le ā e faatalitalia e soo o Iesu? Na ia valoia: ʻO le a inosia outou e nuu uma ona o loʻu igoa.’ (Mata. 24:9) Ina ia tatou tumau e ui i le inosia o i tatou, e manaʻomia ona faatumauina pea lo tatou autasi. E ui lava la i taumafaiga a Satani ina ia tatou fevaevaeaʻi, ae e lē taulau o ia ona o le malosi o lo tatou alofa mo o tatou uso, “o le fusi lea e atoatoa ona autasi ai.”—Kolo. 3:14; Fili. 2:​1, 2.