1. O le ā ua faailoa mai e le tusi o Faaaliga e faatatau i tagata o le Atua?

 UA FAAILOA mai i le tusi o Faaaliga ua faavaeina le Malo o le Atua i le lagi, ma ua tuliesea Satani mai i le lagi. O le tuliesea o Satani ua filemu ai le lagi. (Faaa. 12:1-9) Ae ua tutupu ai faafitauli iā i tatou. Aiseā? Talu ai ua taulaʻi atu le ita o Satani iā i latou o loo auauna faamaoni iā Ieova i le lalolagi.​—Faaa. 12:12, 15, 17.

2. O le ā e fesoasoani iā i tatou e tumau faamaoni ai iā Ieova?

² E faapefea ona tatou tumau faamaoni iā Ieova e ui i osofaʻiga a Satani? (Faaa. 13:10) O se tasi o mea e fesoasoani iā i tatou o le iloa o mea o le a tutupu i le lumanaʻi. O se faataʻitaʻiga, o loo faamatalaina e le aposetolo o Ioane i le tusi o Faaaliga nisi o faamanuiaga ua lē o toe umi ae tatou maua. O se tasi o na faamanuiaga, o le faaumatia lea o fili o le Atua. Seʻi o tatou talanoaina le auala o loo faamatala ai e le tusi o Faaaliga na fili, ma le mea o le a tupu iā i latou.

3. O ā nisi o faailoga o loo taʻua i le tusi o Faaaliga?

³ O loo taʻu mai i le fuaiupu muamua o le tusi o Faaaliga, o mea o le a tatou faitau i ai o loo faailoa mai i ni “faailoga,” po o se gagana faafaatusa. (Faaa. 1:1) O le a tatou faitau i le tusi o Faaaliga i ni manufeʻai o loo faaata mai ai fili o le Atua. O se  faataʻitaʻiga, e iai se “manufeʻai ua alu aʻe mai i le sami,” “e sefulu ona seu ma ona ulu e fitu.” (Faaa. 13:1) E sosoo mai ai ma “le isi manufeʻai ua alu aʻe mai i le laueleele.” E tautala lenā manufeʻai e pei o se tarako, ma ʻua ia faia foʻi faailoga tetele ina ia alu ifo le afi mai i le lagi i le lalolagi.’ (Faaa. 13:11-13) E sosoo mai ai le “manufeʻai e lanu mūmū sesega” o loo tiʻetiʻe ai se fafine talitane. O na manufeʻai e tolu, o loo faaata mai ai fili o le Atua ua leva ona faasagatau iā Ieova ma lona Malo. O lea, e tatau ona tatou iloa po o ai i latou.​—Faaa. 17:1, 3.

4-5. E faapefea ona fesoasoani iā i tatou le Tanielu 7:15-17 e malamalama ai i le uiga o nei faailoga?

⁴ A o tatou leʻi aʻoaʻoina po o ai nei fili, e manaʻomia ona tatou malamalama i le uiga o lenā gagana faafaatusa. O le auala sili e malamalama ai o le faataga o le Tusi Paia e faamatala mai. O le tele o faailoga o loo i le tusi o Faaaliga o loo faamatalaina i isi tusi o le Tusi Paia. O se faataʻitaʻiga, na fai e le perofeta o Tanielu se miti, na ʻō aʻe mai i le sami ni manufeʻai tetele e fā.’ (Tani. 7:1-3) Na taʻua e Tanielu o loo faaata mai e na manufeʻai tetele e fā “tupu” po o malo. (Faitau le Tanielu 7:15-17.) O lenā faamatalaga manino a Tanielu ua fesoasoani iā i tatou e malamalama ai, o manufeʻai o loo faamatalaina i le tusi o Faaaliga, e tatau foʻi ona faasino atu i malo faapolotiki.

⁵ Seʻi o tatou talanoaina nisi o faailoga o loo faamatalaina i le tusi o Faaaliga. O le a mafai ona tatou malamalama ai i le auala ua faamatala ai i le Tusi Paia uiga o na faailoga. Seʻi o tatou amata i le talanoaina o manufeʻai eseese. Muamua, o le a tatou iloiloina po o ai o loo faaata mai e na manufeʻai, ma o le ā o le a tupu iā i latou. O le a tatou talanoaina foʻi po o le ā le uiga o nei mea mo i tatou.

6. O le ā o loo faaata mai e le manufeʻai e fitu ona ulu o loo taʻua i le Faaaliga 13:1-4?

⁶ O le ā le manufeʻai e fitu ona ulu? (Faitau le Faaaliga 13:1-4.) Ua tatou mātauina o lenei manufeʻai e pei ona foliga o le nameri, o ona vae e pei o vae o le pea, o lona gutu e pei o le gutu o le leona, ma e iai ona seu e sefulu. E tutusa le tino ma foliga o lenā manufeʻai ma manufeʻai e fā o loo taʻua i le Tanielu e 7. I le tusi o Faaaliga, ua tuufaatasi ai manufeʻai e fā o loo i le tusi o Tanielu i se manufeʻai se tasi. E lē o faaata mai e lenā manufeʻai se malo po o se pulega se tasi. Na faamatala mai e Ioane o loo pule lenā manufeʻai i “ituaiga, ma tagata, ma gagana, ma atunuu uma.” O lea la, e tatau ona tele ni malo e faaata mai e lenā manufeʻai nai lo se malo se tasi. (Faaa. 13:7) E tatau ona faaata mai e lenā manufeʻai malo faapolotiki uma na pulea tagata seʻia oo mai i le taimi lenei. *​—Fai. 8:9.

7. O le ā o loo faaata mai e ulu taʻitasi o le manufeʻai?

⁷ O le ā o loo faaata mai e ulu taʻitasi o le manufeʻai? E tatou te iloa le tali i le Faaaliga mataupu 17, o loo faamatalaina ai le faatusa o le manufeʻai lea o loo i le Faaaliga mataupu 13. Ua faapea mai le Faaaliga 17:10: “O loo iai tupu e toʻafitu: ua paʻuʻū le toʻalima, o loo iai nei le toʻatasi, ae e leʻi oo mai le isi, ae pe a oo mai, e matuā puupuu lava le taimi e iai o ia.” E fitu ni malo e sili ona malolosi e pei o ni “ulu” na tulaʻi mai i malo uma o loo faaaogā e Satani, ma na matuā aafia ai tagata o le Atua i a latou pulega. I aso o le aposetolo o Ioane, o le toʻalima o na malo ua paʻuʻū, o Aikupito, Asuria, Papelonia, Metai ma Peresia,  ma Eleni. O Roma le malo lona ono e sili ona malosi, na pule i le taimi na maua ai e Ioane le Faaaliga. O ai le ulu po o le malo lona fitu, le malo mulimuli o le a pule i le lalolagi?

8. O ai o loo faaata mai e le ulu lona fitu o le manufeʻai?

⁸ E fesoasoani valoaga o le tusi o Tanielu e tatou te iloa ai le ulu lona fitu, po o le ulu mulimuli o le manufeʻai. O le ā le malo e sili ona malosi o loo pule i lenei taimi o le iʻuga po o “le aso o le Alii”? (Faaa. 1:10) O malo malolosi e lua o Amerika ma Peretania. O lea, e mafai ona tatou faapea atu o Amerika ma Peretania, o le ulu lona fitu o le manufeʻai o loo taʻua i le Faaaliga 13:1-4.

9. O le ā o loo faaata mai e le manufeʻai e “iai ona seu e lua e pei o le tamaʻi mamoe”?

⁹ Ua taʻua i le Faaaliga mataupu 13 o lenei ulu lona fitu, o malo malolosi o Amerika ma Peretania ua faaata mai ai foʻi se manufeʻai “ua iai ona seu e lua e pei o le tamaʻi mamoe, a ua tautala e pei o le tarako.” Ua faia e lenei manufeʻai faailoga tetele, “ina ia alu ifo le afi mai i le lagi i le lalolagi i luma o tagata uma.” (Faaa. 13:11-15) O loo faamatalaina i le Faaaliga mataupu 16 ma le 19 lenei manufeʻai o le “perofeta pepelo.” (Faaa. 16:13; 19:20) Na taʻua e Tanielu, o le a aumaia foʻi e malo malolosi o Amerika ma Peretania le “matuā faafanoina.” (Tani. 8:19, 23, 24) O le mea lenā na tupu i le Taua Lona Lua a le Lalolagi. Na faia e saienitisi a Amerika ma Peretania ni pomu atomika se lua, lea na faapā ma faaiʻuina ai le taua i le Pasefika. I se uiga faafaatusa, na faia e nei malo malolosi o Amerika ma Peretania ʻle afi ina ia alu ifo mai i le lagi i le lalolagi.’

10. O le ā ua faaata mai e le “faatusa o le manufeʻai”? (Faaaliga 13:14, 15; 17:3, 8, 11)

¹⁰ E iai le isi manufeʻai e sosoo mai ai. E taitutusa lava lenei manufeʻai ma le manufeʻai e fitu ona ulu, seʻi vaganā ai e lanu mūmū sesega. O loo taʻua lenā manufeʻai o le “faatusa o le manufeʻai” ma ua taʻua foʻi o le “tupu lona valu.” * (Faitau le Faaaliga 13:14, 15; 17:3, 8, 11.) O loo faamatalaina i le tusi o Faaaliga na iai lenei “tupu,” na lē toe iai ma na mulimuli ane toe aliaʻe mai. E fetaui lelei lenei faamatalaga i Malo Aufaatasi, lea o loo faaauilumaina faiga faapolotiki i le lalolagi aoao. Na iai muamua ma na taʻua o Malo Sosoo, ae na lē toe iai i le taimi o le Taua Lona Lua a le Lalolagi. Mulimuli ane, na toe aliaʻe mai ma ua taʻua nei o Malo Aufaatasi.

11. O le ā e faatupuina e manufeʻai faapolotiki, ma aiseā e tatou te lē matataʻu ai iā i latou?

¹¹ E uunaʻia e faamatalaga taufaasesē a nei manufeʻai faapolotiki tagata e tetee iā Ieova ma ona tagata. I se uiga faafaatusa, ua latou faapotopoto faatasi “tupu o le lalolagi uma” mo le taua iā Amaketo, po o le “aso tele o le Atua o Lē e ona le malosi uma lava.” (Faaa. 16:13, 14, 16) Ae e leai se mea e tatou te matataʻu ai. O le a vave ona gaoioi lo tatou Atua o Ieova e faasaoina i latou uma e lagolagoina lana pulega.​—Eseki. 38:21-23.

12. O le ā o le a tupu i manufeʻai uma?

¹² O le ā o le a tupu i manufeʻai uma? Ua tali mai le Faaaliga 19:20: “Ona puʻeina lea o le manufeʻai, faatasi ai ma le perofeta pepelo na faia faailoga i ona luma, ia na faasesēina ai i latou na maua le faailoga o le manufeʻai, ma ē na tapuaʻi atu i lona faatusa. Na lafoolaina i laʻua uma i le lepa afi o loo mumū i le teiō.” O lea, a o pule nei malo faapolotiki ua fai ma fili o le Atua, o le a faaumatia e faavavau i latou.

13. O ā luʻi mai i malo o le lalolagi o loo fesagaʻia e Kerisiano?

 ¹³ O le ā lona uiga mo i tatou? E tatau ona tatou faamaoni i le Atua ma lona Malo, ona o i tatou o Kerisiano. (Ioa. 18:36) O lea la, e tatau ona tatou solitū pea i faiga faapolotiki a lenei lalolagi. Peitaʻi, e matuā faigatā ona tatou solitū ona e faamalosia e malo faapolotiki lo tatou lagolagoina o i latou, e ala i a tatou upu ma gaoioiga. O ē e lolo atu i uunaʻiga a malo, o le a latou mauaina le faailoga o le manufeʻai. (Faaa. 13:16, 17) Peitaʻi, o i latou e iai lenā faailoga o le a lē mauaina le finagalo malie o Ieova ma le avanoa e ola ai e faavavau. (Faaa. 14:9, 10; 20:4) Maʻeu le tāua o le tumau ona tatou solitū e tusa lava po o ā omiga e aumaia e malo iā i tatou!

14. O le ā le vaaiga na matuā faateʻia ai Ioane o loo faamatalaina i le Faaaliga 17:3-5?

¹⁴ Na “matuā teʻi” le aposetolo o Ioane i se mea na ia vaaia. O le ā lenā mea? O se fafine o loo tiʻetiʻe i se tasi o na manu matuā feʻai. (Faaa. 17:1, 2, 6) O loo faamatalaina o ia o se “fafine talitane sili” ua faaigoaina o “Papelonia le Aai Tele.” O loo ia faia le “faitaaga” ma “tupu o le lalolagi.”​—Faitau le Faaaliga 17:3-5.

15-16. O ai “Papelonia le Aai Tele,” ma e faapefea ona tatou iloa?

¹⁵ O ai “Papelonia le Aai Tele”? E lē mafai ona faasino atu lenei fafine i se faalapotopotoga faapolotiki, auā o loo ia faia le faitaaga ma taʻitaʻi o malo faapolotiki. (Faaa. 18:9) O le mea moni, o le tiʻetiʻe faafaatusa o lenā fafine i luga o taʻitaʻi o malo, o loo faaata mai ai lona taumafai malosi e pulea i latou. E lē faasino atu foʻi lenei fafine i faiga faapisinisi matapeʻapeʻa a le lalolagi a Satani, ona o loo faamatalaina i latou o ni “ʻaufaatauʻoa o loo femalagaaʻi” i le lalolagi.​—Faaa. 18:11, 15, 16.

¹⁶ I le Tusi Paia, o le faaupuga “fafine talitane” e faasino atu iā i latou e faapea mai e auauna i le Atua, ae aafia i le ifo i tupua po o le avea ma uō a le lalolagi. (1 No. 5:25; Iako. 4:4) Ae o ē e tapuaʻi faamaoni i le Atua, o loo taʻua i latou o ni “taupou mamā.” (2 No. 11:2; Faaa. 14:4) Na avea Papelonia anamua ma taulaʻiga o tapuaʻiga sesē. O lea la, o Papelonia le Aai Tele e tatau ona faaata mai ai tapuaʻiga sesē uma. O le mea moni, o ia o le pule o tapuaʻiga sesē uma i le lalolagi.​—Faaa. 17:5, 18; tagaʻi i le mataupu i le jw.org, “O Ai Papelonia le Aai Tele?”

17. O le ā o le a tupu iā Papelonia le Aai Tele?

¹⁷ O le ā o le a tupu iā Papelonia le Aai Tele? O loo taliina lenā fesili i le Faaaliga 17:16, 17: “O seu e sefulu sa e iloa ma le manufeʻai, latou te ʻinoʻino i le fafine talitane, ma faataugā ma faatelenoa iā te ia, latou te ʻaina foʻi lona tino ma susunu uma o ia i le afi. E tuuina foʻi e le Atua i o latou loto ina ia faataunuu lona finagalo.” Ioe, e uunaʻia e Ieova malo ina ia faaaogā le manufeʻai lanu mūmū sesega po o Malo Aufaatasi, ina ia osofaʻia lotu sesē uma ma faaumatia atoatoa.​—Faaa. 18:21-24.

18. E faapefea ona tatou faamautinoa e leai sa tatou vaega fai iā Papelonia le Aai Tele?

¹⁸ O le ā lona uiga mo i tatou? E tatau ona tatou tausia pea ʻle tapuaʻiga mamā ma lē taʻuleagaina i le silafaga a le Atua.’ (Iako. 1:27) E lē tatau ona taaʻina i tatou i aʻoaʻoga sesē, aso faamanatu faapaupau, le paʻū maulalo o tapulaa tauamio ma faiga faaagaga a Papelonia le Aai Tele. E faaauau pea ona tatou lapataʻia tagata e “ō ese mai iā te ia,” ina ia ʻalofia ai le faia o sa latou vaega i ana agasala i luma o le Atua.​—Faaa. 18:4.

19. O ai le “tarako tele e lanu mūmū”?

¹⁹ O loo faamatalaina foʻi i le tusi o Faaaliga “se tarako tele e lanu mūmū.” (Faaa. 12:3) O loo faasagatau lenā tarako iā Iesu ma ana agelu. (Faaa. 12:7-9) O loo ia osofaʻia foʻi tagata o le Atua, ma avatu le pule i manufeʻai faapolotiki. (Faaa. 12:17; 13:4) O ai lenā tarako? “O le uluaʻi gata lea, ua igoa foʻi i le Tiapolo ma Satani.” (Faaa. 12:9; 20:2) O ia lenā o loo pulea fili uma o Ieova.

20. O le ā o le a tupu i le tarako?

²⁰ O le ā o le a tupu i le tarako? O loo faamatalaina i le Faaaliga 20:1-3 se agelu o loo ia lafoina Satani i le tō, ua faaata mai ai le tulaga o Satani e pei o loo faafalepuipui. A o iai Satani i le tō, e lē mafai ona ia ʻfaasesēina atunuu seʻia uma tausaga e afe.’ O le mea mulimuli o le a tupu iā Satani ma ana temoni, o le a lafoina i le “lepa afi ma le teiō lea o loo faaata mai ai lo latou faaumatiaga atoatoa e faavavau.” (Faaa. 20:10) Seʻi manatu i se lalolagi e aunoa ma taaʻiga a Satani ma ana temoni. Maʻeu le matagofie o lenā taimi!

21. Aiseā e tatou te maua ai le fiafia i mea ua tatou faitauina i le tusi o Faaaliga?

²¹ Maʻeu le faalaeiauina o i tatou i le malamalama i le uiga o faailoga o loo i le tusi o Faaaliga! E lē gata ua mafai ona tatou iloa ai fili o Ieova, ae ua tatou iloa ai foʻi mea o le a tupu iā i latou. Ioe, “e fiafia o lē e faitau leotele, ma i latou e faalogo i upu o lenei valoaga”! (Faaa. 1:3) O ā faamanuiaga o le a maua e tagata faamaoni, pe a aveesea fili o le Atua? O le a tatou talanoaina na faamanuiaga i le suʻesuʻega o loo sosoo mai.