E te Silafia?
Sunako i le Uluaʻi Senituri: O le ata lenei o loo faaalia ai nisi o vaega eseese o le sunako i Gamla sa iai i le uluaʻi senituri, e tū i le pe tusa ma le ono maila (10 km) i le itu i mātū i sasaʻe o le Sami i Kalilaia. Atonu o foliga lenā o se sunako i aso anamua
O le ā le amataga mai o sunako?
O LE upu “sunako” e sau mai i le upu Eleni o lona uiga o le “fono” po o le “faapotopoto faatasi.” E talafeagai lenā upu, ona ua leva ona avea sunako ma nofoaga e faapotopoto ai tagata Iutaia mo le aʻoaʻoina o i latou ma fai ai a latou tapuaʻiga, talu mai aso anamua. E lē o taʻua patino i Tusitusiga Paia Eperu se faamatalaga e faatatau i sunako. Ae ua faaalia manino mai i Tusitusiga Kerisiano Eleni, e oo ane i le uluaʻi senituri T.A., ua leva ona faavaeina na nofoaga e faapotopoto ai.
E talitonu le toʻatele o le ʻaufaitofā, na amata mai sunako i le taimi na ave faapagota ai tagata Iutaia i Papelonia. Ua faamatalaina i le lomifefiloi Encyclopaedia Judaica e faapea: “Sa leai se malumalu o tagata Iutaia na faaaunuua i se atunuu ese. Na latou matuā manaʻomia faamāfanafanaga mo o latou mafatiaga. O le māfuaaga lea na latou faapotopoto ai mai i lea taimi i lea taimi atonu i Aso Sapati, ma faitauina Tusitusiga Paia.” Ina ua faasaʻoloto tagata Iutaia mai i Papelonia, e foliga mai na faaauau ona latou faapotopoto faatasi mo tatalo ma le faitauina o Tusitusiga Paia, ma latou fausia ai sunako i so o se vaipanoa na faamautū ai.
E oo ane i le uluaʻi senituri T.A., o tagata Iutaia sa nonofo i Metitirani, Sasaʻe Tutotonu, ma Isaraelu, na faaautū a latou tapuaʻiga ma olaga i aso faisoo i sunako. E pei ona taʻua e le polofesa o Lee Levine mai i le Iunivesite Eperu i Ierusalema: “[O sunako] na fai ai suʻesuʻega, taumafataga paia, faamasinoga, teuga tupe mo ni fuafuaga faapitoa, fono faapolotiki, ma faatasitasiga faasamasamanoa. Ae o le mea e sili ona tāua, na fai ai a latou tapuaʻiga.” E lētioa la auai e lē aunoa Iesu i faatasitasiga na fai i sunako. (Mare. 1:21; 6:2; Luka 4:16) Na faaaogā foʻi e Iesu sunako e aʻoaʻo, faatonu, ma faalaeiau ai tagata. Ina ua faavaeina le faapotopotoga Kerisiano, na tele foʻi ina talaʻi le aposetolo o Paulo i sunako. E fiafia i latou e naunau i mea faaleagaga e ō i sunako. O lea, na masani ona alu muamua Paulo i sunako e fai ai lana talaʻiga, pe a ulu atu i se aai.—Galu. 17:1, 2; 18:4.
E te Ono Fiafia Foʻi
LE OLOMATAMATA
Na Tala‘i Iesu ma Ona Soo i Sunako
IESU—LE ALA, LE UPU MONI MA LE OLA
I le Sunako i Nasareta
O le ā le faamatalaga na fai atu e Iesu na māfua ai ona mananaʻo tagata o lona nuu e fasioti o ia?
