1. O ā faalogona o isi e faatatau i le talanoa i tagata i le talaʻiga? (Tagaʻi foʻi i le ata.)

 I LE avea ai o i tatou ma tagata o Ieova, e tatou te talaʻi atu i isi ona e tatou te alolofa i lo tatou Tamā i le lagi, ma mananaʻo e fesoasoani iā i latou ia iloa o ia. E fiafia le toʻatele o tagata talaʻi e auai i le galuega talaʻi. Ae e faigatā i isi ona maua lenā fiafia. Aiseā? O nisi atonu e matamumuli pe manatu e lē lelei la latou aʻoaʻo atu. O nisi e lē masani i le ō fua i fale o isi aiga. O nisi atonu e lagona le popole ina neʻi teena i latou. Ae o isi na aʻoaʻoina e ʻalofia le finau ma tagata. E matuā alolofa nei uso ma tuafāfine iā Ieova, ae e faigatā ona latou talaʻi atu i tagata e lē masani ai. E ui i lea, ua latou iloa le tāua o lenei galuega, ma ua uunaʻia ai i latou e faia e lē aunoa se sao i le talaʻiga. E mautinoa le matuā faafiafiaina ai o Ieova!

2. Aiseā e lē tatau ai ona e lotovaivai, pe afai o loo faigatā ona e maua le olioli i le talaʻiga?

² Pe e iai ni taimi e oo ai iā te oe na lagona ma faigatā ai ona e maua le olioli i le talaʻiga? Pe afai o lea, aua e te lotovaivai. Atonu o se faailoga lenā o lou lotomaulalo, ma e te lē manaʻo e faauaʻi mai isi iā te oe pe faatupu ni finauga. E leai se tasi e manaʻo e teena o ia e tagata, aemaise pe afai o loo ia taumafai e faia mea lelei mo isi. E silafia lelei e lou Tamā i le lagi luʻi  o loo e fesagaʻia, ma e finagalo e saunia le fesoasoani e te manaʻomia. (Isa. 41:13) I lenei suʻesuʻega, o le a tatou talanoaina ai fautuaga e lima i auala e feagai ai ma na faalogona, ma auala e maua ai le olioli i le talaʻiga.

IA FAAMALOSIA OE E LE AFIOGA A LE ATUA

3. O le ā na fesoasoani i le perofeta o Ieremia e talaʻi atu ai i isi?

³ O le feʻau mai i le Atua, na maua ai e ana auauna i le taimi ua teʻa le malosi e faataunuu ai o latou tofiga faigatā. O se faataʻitaʻiga, o le perofeta o Ieremia. Na ia faatalatū ina ua tofia o ia e Ieova e talaʻi atu. Na ia faapea mai: “Ou te lē iloa tautala, auā ua na o aʻu o se tamaitiiti.” (Iere. 1:6) O le ā na fesoasoani iā te ia e maua ai le lototele e talaʻi? Na ia maua le malosi mai i fetalaiga a le Atua. Na ia faapea mai: “Ua pei o se afi e mumū o loo punitia i totonu o oʻu ivi, ma ua ou lē lavā taofi.” (Iere. 20:​8, 9) E ui e leʻi faigofie le oganuu na tofia i ai Ieremia, ae na ia maua le malosi manaʻomia mai i le feʻau na ia folafola atu, ina ia faataunuu ai lona tofiga.

4. O ā aogā o le faitauina o le Afioga a le Atua ma manatunatu loloto i ai? (Kolose 1:​9, 10)

⁴ E maua e Kerisiano le malosi mai i le feʻau o loo i le Afioga a le Atua. Na taʻua e le aposetolo o Paulo i lana tusi i le faapotopotoga i Kolose, o le aʻoaʻoina o le poto saʻo e uunaʻia ai ona uso e ʻsavavali e tusa ma le finagalo o Ieova,’ a o faaauau ona latou “fua mai fua o galuega lelei uma.” (Faitau le Kolose 1:​9, 10.) O na galuega lelei e aofia ai le talaʻia o le tala lelei. Pe a tatou faitauina la le Afioga a le Atua ma manatunatu loloto i ai, o le a faamalosia ai lo tatou faatuatua iā Ieova, ma iloa lelei ai le tāua o le talaʻia o le feʻau o le Malo.

5. E faapefea ona tatou maua atoatoa aogā mai i le faitauina ma le suʻesuʻeina o le Tusi Paia?

⁵ Ina ia tatou maua atoatoa aogā mai i le Afioga a le Atua, ia faaalu se taimi e faitau, suʻesuʻe, ma manatunatu loloto i ai. Pe a e faitau i se mau e faigatā ona e malamalama ai, ia faaaogā le Tusi Taʻiala mo Saʻiliʻiliga a Molimau a Ieova, e saʻili ai mo nisi faamatalaga e uiga i lenā mau. Pe a lē faatopelauina au suʻesuʻega, o le a faamalosia ai lou maufaatuatuaina o le moni o le Afioga a le Atua. (1 Tesa. 5:21) O le tele lava e te maufaatuatuaina ai le Tusi Paia, o le tele foʻi lenā o lou olioli i le faailoa atu i isi o mea ua e aʻoaʻoina.

 IA SAUNIUNI LELEI MO LE TALAʻIGA

6. Aiseā e tatau ai ona tatou sauniuni lelei mo le talaʻiga?

⁶ Pe a e sauniuni lelei mo le talaʻiga, o le a e lē lagona foʻi la le popole e talanoa atu i tagata. Na fesoasoani Iesu i le sauniunia o ona soo a o leʻi auina atu i latou e talaʻi. (Luka 10:​1-11) Talu ai na faatatauina e soo o Iesu mea na ia aʻoaʻoina ai i latou, na latou lagona la le matuā olioli i mea na mafai ona latou faataunuuina.—Luka 10:17.

7. E faapefea ona tatou sauniuni mo le talaʻiga? (Tagaʻi foʻi i le ata.)

⁷ E faapefea ona tatou sauniuni mo le talaʻiga? E manaʻomia ona faaalu se taimi e mafaufau ai i le auala e faailoa atu ai le upu moni i a tatou lava upu, ina ia pāʻia ai loto o tagata. E fesoasoani foʻi le mafaufau i auala eseese e masani ona tali mai ai tagata i le oganuu, ona manatunatu lea i auala e tatou te tali atu ai. Pe a tatou talanoa atu la i tagata, o le a tatou taumafai ia toʻa, faaalia le laufofoga fiafia, ma ia faaleuō.

8. O le ā le auala e pei ai Kerisiano o ipu omea na taʻua i le talafaatusa a le aposetolo o Paulo?

⁸ Na faamatala e le aposetolo o Paulo la tatou matafaioi i le galuega talaʻi, ina ua ia faapea mai: “Ua iā i matou lenei ʻoa i ipu omea.” (2 Kori. 4:7) O le ā lenā ʻoa? O le galuega faasaoola o le talaʻia o le feʻau o le Malo. (2 Kori. 4:1) O le ā e faasino atu i ai ipu omea? E faasino atu i auauna a le Atua o loo faailoa atu le tala lelei i isi. I aso o Paulo, na faaaogā e le ʻaufaatauʻoa faguʻele e ave ai oloa tāua e pei o meaʻai, uaina, ma tupe. I se tulaga talitutusa, ua maufaatuatuaina e Ieova i tatou e faailoa atu le feʻau tāua o le tala lelei. O le fesoasoani a Ieova e tatou te maua ai le malosi manaʻomia e faaauau ai ona faailoa atu lenei feʻau.

IA TATALO MO LE LOTOTELE

9. E faapefea ona tatou manumalo mai i le fefe i tagata po o le popole ina neʻi teena i tatou e isi? (Tagaʻi foʻi i le ata.)

⁹ E iai taimi atonu e tatou te lagona ai le fefe i tagata po o le popole ina neʻi teena i tatou e isi. E faapefea ona tatou manumalo mai i lenā luʻi? Ia mātau le tatalo a le ʻauaposetolo ina ua faatonuina i latou e aua neʻi toe talaʻi. E latou te leʻi fefefe, ae na latou talosaga iā Ieova mo le fesoasoani ina ia latou  ʻtaʻutaʻu atu lana afioga ma le lototetele.’ Na vave lava ona tali mai Ieova i la latou tatalo. (Galu. 4:​18, 29, 31) E tatau foʻi ona tatou tatalo mo le fesoasoani a Ieova pe a tatou lagona le fefe i tagata. Ia ōle atu iā Ieova e faamalosia lou alofa mo isi ina ia faatoʻilalo ai lou fefe i tagata.

10. Ua faapefea ona fesoasoani mai Ieova ina ia tatou faataunuu la tatou matafaioi o ni ana Molimau? (Isaia 43:​10-12)

¹⁰ Na tofia e Ieova i tatou e avea ma ana Molimau, ma ua ia folafola mai e fesoasoani iā i tatou e maua le lototele. (Faitau le Isaia 43:​10-12.) Seʻi o tatou iloiloina ni auala se fā ua ia faia ai faapea. Muamua, e faatasi Iesu ma i tatou i so o se taimi e tatou te talaʻia ai le tala lelei. (Mata. 28:​18-20) Lua, ua tofia e Ieova agelu e fesoasoani iā i tatou. (Faaa. 14:6) Tolu, ua foaʻi mai e Ieova lona agaga paia e fesoasoani e faamanatu mai mea ua uma ona tatou aʻoaʻoina. (Ioa. 14:​25, 26) Fā, ua saunia e Ieova uso ma tuafāfine e tatou te galulue faatasi. E tatou te taulau ona o le fesoasoani a Ieova ma le lagolagosua a lo tatou ʻauuso alolofa.

IA FETUUTUUNAʻI MA IA IAI SE VAAIGA SAʻO

11. O ā nisi auala e ono maua ai le toʻatele o tagata i le talaʻiga? (Tagaʻi foʻi i le ata.)

¹¹ Pe e te lagona le lotovaivai pe a seāseā maua atu tagata i o latou fale? Ia fesili ifo: ʻFaamata o fea o loo iai tagata?’ (Galu. 16:13) ʻPo o faigaluega po o ō e fai ni faatau?’ Pe afai o le tulaga lenā, pe e mafai ona e talaʻi i ala tetele ina ia maua ai le toʻatele o tagata? Ua faapea mai se uso e igoa iā Joshua, “Ua ou maua avanoa e talaʻi atu ai pe a ou alu i nofoaga e tele ai faleoloa ma isi nofoaga faitele.” Ua la maua foʻi ma lana avā o Bridget le toʻatele o tagata i le fale, pe a talaʻi i afiafi ma aoauli o Aso Sa.—Efe. 5:​15, 16.

12. E faapefea ona tatou iloa talitonuga o tagata ma mea e latou te popole ai?

¹² Pe afai e lē fiafia tagata i la tatou feʻau, ia taumafai e iloa o latou talitonuga ma mea e latou te popole ai. E faaaogā e Joshua ma Bridget le fesili o loo i luma o se tasi o a tatou sāvali e faatomua ai a la taulimaga. O se faataʻitaʻiga, pe a la faaaogā le sāvali O le ā Lau Vaaiga i le Tusi Paia? e la te faapea atu: “O nisi  tagata e vaai i le Tusi Paia o se tusi mai i le Atua, ae e lē o le manatu lenā o isi. Ae o le ā sou manatu?” O lenā auala e masani ona iʻu ai i se talanoaga.

13. Aiseā e lē fua ai lo tatou taulau manuia i le faiva i le tali mai a tagata? (Faataoto 27:11)

¹³ E lē fuaina lo tatou taulau manuia i le faiva i iʻuga e tatou te maua mai ai. Aiseā? Talu ai ua tatou faia le mea e finagalo i ai Ieova ma lona Alo, o le avatu lea o se molimau. (Galu. 10:42) E tusa pe e tatou te lē maua se tasi e talanoa i ai pe e teena foʻi e isi la tatou feʻau, ae e mafai lava ona tatou maua le olioli i le iloaina o loo tatou faafiafiaina lo tatou Tamā i le lagi.—Faitau le Faataoto 27:11.

14. Aiseā e tatou te olioli ai pe a maua e se isi tagata talaʻi se tagata fiafia i le oganuu?

¹⁴ E tatou te olioli foʻi pe a maua e se isi tagata talaʻi se tagata fiafia i le oganuu. Ua faatusa i Le Olomatamata la tatou galuega i le saʻilia o se tamaitiiti ua leiloa. E toʻatele e galulue e saʻilia o ia i vaipanoa eseese. Pe a maua le tamaitiiti, e lē na o le tagata na mauaina o ia e olioli, ae o tagata uma na iai i le saʻiliga o ia. I se tulaga talitutusa, o le faia o isi ma soo o se galuega e fai faatasi. E manaʻomia tagata uma o le faapotopotoga e galueaʻiina se oganuu, ma e olioli tagata uma pe a auai se tagata fou i sauniga.

IA FAAALIA LOU ALOFA MO IEOVA MA OU TUAOI

15. E faapefea i le faatatauina o le Mataio 22:​37-39 ona fesoasoani e faateleina ai lo tatou maelega i le talaʻiga? (Tagaʻi foʻi i le ata .)

¹⁵ E mafai ona faateleina lo tatou maelega i le talaʻiga, e ala i le manatua pea, o le galuega talaʻi o se auala sili lea e faaalia ai lo tatou alofa mo Ieova ma o tatou tuaoi. (Faitau le Mataio 22:​37-39.) Seʻi faaata le fiafia o Ieova pe a silasila mai o loo tatou faia le galuega, ma le fiafia o tagata pe a latou suʻesuʻeina le Tusi Paia. Ia manatua foʻi, o i latou e faalogo i la tatou feʻau ma filifili e auauna iā Ieova, e mafai ona ola e faavavau.—Ioa. 6:40; 1 Timo. 4:16.

16. E faapefea ona tatou maua le olioli i le faiva pe a lē mafai ona tatou tuua o tatou fale? Aumai ni faaaʻoaʻoga.

¹⁶ Po ua lē mafai ona e toe alu ese mai i lou fale ona o nisi o māfuaaga? Pe afai o lea, ia taulaʻi atu i mea e mafai ona e faia e faaalia ai lou alofa mo Ieova ma ou tuaoi. I le vaitaimi  o le KOVITI-19, e leʻi mafai e Samuel ma Dania ona tuua lo la fale. I lenā taimi faigatā, sa la molimau e lē aunoa i le telefoni, tusia tusi, ma faia suʻesuʻega faale-Tusi Paia i le Zoom. Na molimau atu Samuel i ē na feiloaʻi ai i le falemaʻi lea na fai ai ona togafitiga mo le kanesa. Na ia faapea mai: “O na tulaga faigatā na ma lagona ai le mafatia i le mafaufau, i le tino ma le itu faaleagaga. Na manaʻomia ona faatumauina pea lo ma olioli i le auaunaga iā Ieova.” A o feagai ma na tulaga, na paʻū Dania ma faataotolia ai i le fale mo le tolu masina, ma na ia faaaogā ai se nofoa faataavalevale mo le ono masina. Na ia faapea mai: “Na ou taumafai e fai le mea e mafai e tusa ai ma loʻu malosi na iai. Na ou talaʻi i se tamaʻitaʻi tausi soifua na alu atu, faapea i latou na ō atu e avatu mea i le fale. Na manaia foʻi a ma talanoaga i le telefoni ma se fafine e faigaluega i se kamupani e saunia mea mo togafitiga faafomaʻi.” E ui na faatapulaa mea e mafai ona fai e Samuel ma Dania ona o lo la tulaga, ae sa la faia le mea sili ma maua ai pea le olioli.

17. E faapefea ona tatou maua atoatoa aogā mai i fautuaga na tatou talanoaina?

¹⁷ E sili ona aogā pe a taumafai e faatatau uma fautuaga e lima na talanoaina i lenei suʻesuʻega. E tai pei na fautuaga taʻitasi o ni mea eseese e fai ai se kuka. Pe a tuufaatasi na mea, o le a tofo lelei le kuka. O le faatatauina o fautuaga uma e lima, o le a lava saunia ai i tatou e feagai ma faalogona lē lelei ma faateleina ai lo tatou olioli i le talaʻiga.