E tusa ai ma le gagana Eperu, e mafai ona faatatau atu lenā mau i vaega uma e lua: o tagata o le Atua faapea foʻi ma tagata ese amioleaga. E ui i lea, o nisi nei o māfuaaga ua ala ai ona suia le faaupuga o le mau:

1. E lagolago e le kalama ma upu Eperu le faaupuga fou. O le fesootaʻiga o le Salamo 144:12-15 ma fuaiupu e muamua atu, e faalagolago i le auala e faaliliu ai le upu muamua o le fuaiupu e 12, o le upu Eperu asher. E eseese auala e mafai ona faaliliu ai le upu asher. O se faaaʻoaʻoga, e mafai ona uiga atu i se suinauna e faasino atu i se tasi po o ni tagata, e pei o le faaupuga “o lē” po o “o ē.” Na faaaogā le faaupuga “o ē” i le faaliliuga muamua a le Lalolagi Fou. O lea, na faasino atu ai faamanuiaga o loo i fuaiupu e 12-14 i tagata amioleaga o loo taʻua i fuaiupu e muamua atu. Peitaʻi, o le upu asher e mafai foʻi ona faaalia ai ni iʻuga o se mea, ma e mafai ona faaliliuina i le faaupuga “o lea,” “ina ia,” po o le “ona.” O lea, ua faaaogā nei le upu “ona” i le toe teuteuga o le Faaliliuga a le Lalolagi Fou i le gagana Peretania, faapea foʻi ma isi faaliliuga o le Tusi Paia.

2. E talafeagai lelei le faaupuga fou ma isi manatu o loo taʻua i le Salamo 144. O le faaaogā o le upu “ona” i le fuaiupu e 12, o lona uiga o faamanuiaga uma o loo taʻua i fuaiupu e 12-14 e faatatau atu i tagata amiotonu o ē na ʻaiʻoi atu ina ia ʻfaasaʻoloto ma laveaʻi’ i latou mai i ē e amio leaga (fuaiupu e 11). E talafeagai foʻi lenei suiga ma le fuaiupu e 15, lea o loo taʻua ai ni manatu se lua e ōgatusa lelei. O le iʻuga, o nei faaupuga e lua “e fiafia,” o loo faatatau atu i le vaega lava lea e tasi, “o ē e fai Ieova ma o latou Atua!” O le isi manatu e tatau ona manatua, e leai ni faailoga o le kalama o le uluaʻi gagana Eperu. O lea la, na tatau i tagata faaliliu ona iloilo po o le ā le uiga saʻo o se mau, e ala i le tilofaʻia o le gagana faafatusolo i le faa-Eperu, siʻomaga o le mau, ma isi mau o le Tusi Paia e fesootaʻi atu i ai.

3. O le faaupuga fou e ōgatusa ma isi mau o le Tusi Paia o loo taʻua ai folafolaga a le Atua mo ana auauna faamaoni. Talu ai ua suia le faaliliuga o le upu asher, ua faaatagia mai la e le Salamo 144 le faamoemoe mautinoa o Tavita o le a faamanuiaina e le Atua ona tagata i ni olaga fiafia ma taulau manuia, pe a uma ona laveaʻia e le Atua le nuu o Isaraelu mai i ona fili. (Levi. 26:9, 10; Teu. 7:13; Sala. 128:1-6) O se faaaʻoaʻoga, o loo taʻua i le Teuteronome 28:4: “O le a faamanuia oe i le fanaua mai o ni fanau, i fua o lou fanua ma fanau o au manu lalata, o fanau foʻi o lau lafu povi atoa ma fanau o lau lafu mamoe.” O le mea moni, na olioli le nuu o Isaraelu i le tele o le filemu ma ni olaga taulau manuia i le nofoaiga a Solomona, le atalii o Tavita. E lē gata i lea, e iai vala o le nofoaiga a Solomona o loo faatatau atu i le pulega a le Mesia i le lumanaʻi.​—1 Tu. 4:20, 21; Sala. 72:1-20.

O lea, o le faaupuga fou i le Salamo 144 e lē faapea ai ua suia lo tatou malamalamaga i aʻoaʻoga o le Tusi Paia. Peitaʻi, ua atili faaatagia mai ai e lenei salamo le faamoemoe pupula ua loa ona tulimataʻia e auauna a Ieova, o le olaga filemu ma taulau manuia o tagata amiotonu pe a tafiesea tagata amioleaga.​—Sala. 37:10, 11.