I lenā lomiga, na tatou aʻoaʻoina ai e na o le tasi le mataupu e sili ona tāua o loo aafia ai tagata ma agelu uma: o le faapaiaina o le suafa o Ieova. O se tasi o vala o lenā mataupu e sili ona tāua, o le pule silisili ese a Ieova. O se isi vala o le mataupu e sili ona tāua, o le faamaoni o tagata iā Ieova.

Aiseā ua tatou faamatilatila ai o le mataupu e sili ona tāua e faasino atu i le suafa o Ieova ma le faapaiaina o lenā suafa? Seʻi o tatou iloiloina ni māfuaaga se tolu.

Muamua, na taʻuleagaina e Satani le suafa po o le talaaga o Ieova i le faatoʻaga o Etena. Na faasesēina Eva i le fesili na fai atu e Satani, ma manatu ai o Ieova o se Atua e lē aaomafola ma ua faasāsā naʻuā ana tulafono. Ona mimilo sesē lea e Satani o fetalaiga a Ieova, e peiseaʻī ai e pepelo le Atua. O lea, ua ia taʻuleagaina le suafa o Ieova ma avea ai o ia o “le Tiapolo,” o lona uiga, “o lē taufaaleaga.” (Ioa. 8:44) Talu ai na talitonu Eva i pepelo a Satani, ua ia lē usiusitaʻi ai i le Atua ma fouvale ai i lana pule silisili ese. (Kene. 3:1-6) E oo mai lava i aso nei, o loo taʻuleagaina pea e Satani le suafa o le Atua, ma faasalalau pepelo e faatatau i le ituaiga o Atua e iai Ieova. O i latou e talitonu i na pepelo e masani ona lē usiusitaʻi iā Ieova. O lea, o le taʻuleagaina o le suafa paia o Ieova, e vaai i ai auauna a le Atua o se gaoioiga e sili ona lē tonu. O le māfuaaga autū lea o mafatiaga ma mea leaga uma i le lalolagi.

Lua, e mo le lelei o foafoaga uma a Ieova, ua ia maumauaʻi ai e faasilisilia lona suafa ma taʻumamāina mai i tuuaʻiga sesē uma. O le mea lenā e sili ona tāua iā Ieova. O le māfuaaga lenā ua ia fetalai ai: “O le a ou faapaiaina lava loʻu igoa mamalu.” (Eseki. 36:23) Na faailoa mai foʻi e Iesu le mea e sili ona tāua pe a tatalo auauna faamaoni uma a Ieova, ina ua ia fetalai: “Ia faapaiaina lou suafa.” (Mata. 6:9) Ua matuā faamamafa mai foʻi i le Tusi Paia le tāua o le faamamaluina o le suafa o Ieova. Seʻi iloilo ni nai faaaʻoaʻoga: “Ia avatu iā Ieova le mamalu e tatau mo lona suafa.” (1 No. 16:29; Sala. 96:8) “Ia usu viiga i lona suafa mamalu.” (Sala. 66:2) ʻOu te faamamaluina lou suafa e faavavau.’ (Sala. 86:12) I se tasi taimi a o iai Iesu i le malumalu i Ierusalema, na fetalai ai Ieova mai i le lagi ma na faapea atu Iesu: “Loʻu Tamā e, ia faamamaluina lou suafa.” Ona tali mai lea o Ieova: “Ua ou faamamaluina loʻu igoa, ma o le a ou toe faamamaluina.”​—Ioa. 12:28. a

Tolu, e fesootaʻi le finagalo o Ieova i lona suafa po o lona talaaga. Mātau, pe a māeʻa le tofotofoga mulimuli i le iʻuga o le Pulega a Keriso i le Afe Tausaga, o le ā e sosoo ai? O ā lagona o agelu ma tagata e faatatau i le suafa o Ieova i lenā taimi? Ina ia tali lenā fesili, manatua  vala e lua na taʻua i le amataga: o le faamaoni o tagata ma le pule silisili ese a Ieova. I lenā taimi, o le a lē toe manaʻomia ona faamaonia atu e tagata lo latou faamaoni. O le a latou lelei atoatoa, ona ua uma ona tofotofoina atoatoa i latou. O le a latou maua le ola e faavavau. O le a lē manaʻomia foʻi ona faamaonia atu pe e sili le auala e pule ai Ieova. O le a autasi foʻi foafoaga uma i le lagi ma le lalolagi, ma lagolagoina le pule silisili ese a Ieova. Ae e faapefea le suafa o Ieova?

E oo ane i lenā taimi, ua faapaiaina atoatoa le suafa o Ieova ma taʻumamāina mai i tuuaʻiga sesē uma. Peitaʻi, o le a faaauau pea ona avea le suafa o Ieova o se mea e sili ona tāua i ana auauna faamaoni uma. Aiseā? Talu ai o le a latou vaaia le faia pea e Ieova o mea ofoofogia. Mātau, o le a toe tuuina atu ma le lotomaulalo e Iesu le pule uma iā Ieova, “ina ia pule aoao le Atua i le aoao o mea.” (1 Kori. 15:28) Pe a māeʻa lenā, o le a olioli tagata uma i le lalolagi i “le saʻolotoga mamalu o le fanau a le Atua.” (Roma 8:21) O le a faataunuuina atoatoa e Ieova lona finagalo, ina ia autasia foafoaga uma i le lagi ma le lalolagi o se aiga e tasi.​—Efe. 1:10.

O le a faapefea ona aafia ai le aiga o Ieova i le lagi ma le lalolagi? E mautinoa o le a iai pea iā i tatou se faanaunauga malosi e viia le suafa paia o Ieova. Na faagaeeina le faisalamo o Tavita e tusi: “Tau ina ia viia Ieova le Atua . . . Tau ina ia viia lona suafa mamalu e faavavau.” (Sala. 72:18, 19) O le a faaauau pea ona iai māfuaaga mataʻina e tatou te viia ai Ieova seʻia oo i le faavavau.

Ua faaatagia mai e le suafa o Ieova mea uma e faatatau iā te ia. Pe a tatou mafaufau i le suafa o Ieova, e tatou te manatua ai lona alofa. (1 Ioa. 4:8) O le a tatou manatua pea na foafoaina i tatou e Ieova ona o lona alofa, na ia saunia le taulaga togiola ona o lona alofa, ma ua ia faaalia le tonu o le auala e pule ai ona o lona alofa. Ae o le a faaauau pea ona tatou vaaia faamaoniga o le alofa o Ieova i ana foafoaga. E uunaʻia i tatou e mafuta vavalalata atu pea iā te ia lo tatou Tamā, ma usu viiga e faamamaluina ai lona suafa paia e oo i le faavavau.​—Sala. 73:28.