O LE olaga i aso nei e lē o le auala lea na finagalo i ai le Atua e tatau ona iai. Sa tatau ona tumu le lalolagi i tagata e mananaʻo e faaaloalogia le pule silisili ese a Lē na foafoaina mea, maua aogā mai i lana taʻitaʻiga, ma faaaʻoaʻo i lona alofa ma isi ona uiga matagofie. E latou te fiafia e galulue faatasi a o tausia aʻe se aiga, aʻoaʻo ni mea fou, ma faalautele atu le parataiso i le lalolagi.

• “Ua ia faaiʻuina taua i tuluʻiga o le lalolagi.”​—Salamo 46:9.

• “Le taimi atofaina e . . . faafanoina ai i latou o loo faaleagaina le laueleele.”​—Faaaliga 11:18.

• “E lē fai mai foʻi se tasi ua nofo ai: ʻOu te maʻi.’”​—Isaia 33:24.

• “O le a matuā fiafia uma oʻu tagata ua filifilia i galuega a o latou lima.”​—Isaia 65:22.

O le a faapefea ona faataunuuina nei valoaga? Ua tofia e le Atua lona Alo o Iesu e avea ma Tupu i se faigāmalo lelei atoatoa, lea o le a pule mai i le lagi i le lalolagi. O loo taʻua i le Tusi Paia lenā faigāmalo, o le Malo o le Atua. (Tanielu 2:44) Ua faapea mai le Tusi Paia e uiga iā Iesu: “E foaʻiina atu e Ieova le Atua iā te ia le nofoālii . . . , ma o le a fai o ia ma tupu.”​—Luka 1:32, 33.

Na faia e Iesu galuega mamana a o iai i le lalolagi, ma ua faailoa mai ai se olaga e sili ona lelei o le a ia aumaia, pe a avea ma Tupu.

• Na ia faamālōlōina maʻi eseese uma, ma ua faailoa mai ai le auala o le a ia tafiesea ai maʻi tigāina uma o tagata.​—Mataio 9:35.

• Na ia faatoʻafilemu le sami, ma ua faailoa mai ai le auala o le a ia puipuia ai ona tagata, e ala i le pulea o malosiaga faalenatura.​—Mareko 4:36-39.

• Na ia fafagaina le faitau afe, ma ua faailoa mai ai o le a ia saunia mea e manaʻomia e tagata i le olaga.​—Mareko 6:41-44.

• Na ia liua le vai e avea ma uaina i le ʻaiga o se faaipoipoga, ua faamaonia mai ai o le a ia fesoasoani i tagata ia maua le fiafia i le olaga.​—Ioane 2:7-11.

E faapefea ona e maua le olaga lea ua saunia e le Atua mo i latou e alolofa iā te ia? E iai le “auala” e tatau ona e uia. Ua faamatalaina i le Tusi Paia o le “auala e tau atu i le ola, e toʻaitiiti foʻi i latou o ē e maua.”​—Mataio 7:14.

O le ā le auala i le ola? Ua faapea mai le Atua: “O aʻu o Ieova, lou Atua, o Lē o loo aʻoaʻo oe i mea e aogā iā te oe, o Lē e taʻitaʻiina oe i le ala e ao ona e ui ai.” (Isaia 48:17) Pe a e mulimuli i lenei fautuaga, o le a e maua ai se olaga e sili ona lelei.

 Na fetalai Iesu: “O aʻu o le ala, o le upu moni ma le ola.” (Ioane 14:6) Pe afai e tatou te mulimuli i mea o loo fai mai ai Iesu ma faaaʻoaʻo i lana faaaʻoaʻoga, o le a tatou mafuta vavalalata atu ai i le Atua ma maua ai se olaga e sili ona lelei.

E faapefea ona e maua le auala i le ola? E ui i le tele o lotu, ae na lapataʻi mai Iesu: “E lē ulu atu i le malo o le lagi i latou uma o ē fai mai iā te aʻu, ʻLe Alii e, le Alii e,’ ae e na o lē na te faia le finagalo o loʻu Tamā o i le lagi.” (Mataio 7:21) Na ia fetalai mai foʻi: “Tou te iloa i latou i o latou fua.” (Mataio 7:16) E mafai ona fesoasoani le Tusi Paia iā te oe e te iloa ai le tapuaʻiga moni.​—Ioane 17:17.

E faapefea ona e mulimuli i le auala i le ola? E aofia ai le iloaina o le Puna o le ola: O ai o ia? O ai lona suafa? O ā ona uiga? O ā mea ua ia faia mo i tatou? O le ā o loo ia faafinagaloina mai iā i tatou? *

E finagalo le Atua ia faia e tagata mea e sili atu nai lo o galuega, ʻai, taaloga, ma le tausia aʻe o se aiga. E mafai ona tatou iloa Lē na foafoaina mea ma avea ma ana uō. E mafai foʻi ona faailoa atu lo tatou alofa iā te ia e ala i le faia o lona finagalo. Na faapea mai Iesu: “O le ola e faavavau foʻi lenei, ia latou iloa oe, le Atua moni e toʻatasi.”​—Ioane 17:3.

Pe a tatou iloa le mea o loo faafinagaloina e le Atua mai iā i tatou, o le a uunaʻia ai i tatou e faia ni suiga. Atonu e foliga mai e faigatā. Ae o le mea moni, o le a tatou maua ai se olaga e sili ona lelei pe a tatou mulimuli i le auala i le ola. Ina ia fesoasoani iā te oe e maua tali o fesili autū e faatatau i le Atua, ua ofo atu e Molimau a Ieova se suʻesuʻega faale-Tusi Paia i le taimi ma le nofoaga e talafeagai ma oe. E mafai foʻi ona e asiasi i la matou tuatusi o le www.jw.org/sm.