O faalogona popole o Delphine lea na taʻua i le mataupu ua mavae, na māfua ai ona inu tele i le ʻava malosi. E lē o taʻusalaina i le Tusi Paia le faaaogā tatau o le ʻava malosi, ae o loo taʻua ai e faapea: “Aua neʻi avea oe o sē e inu tele i le uaina.” (Faataoto 23:20) O le inu tele i le ʻava malosi e ono faaleagaina ai le soifua mālōlōina, le va fealoaʻi ma isi, ma ua iʻu ai ina maliliu le faitau miliona o tagata i tausaga taʻitasi. E mafai ona ʻalofia nei faafitauli pe a mulimuli tagata i fautuaga atamai o loo i le Tusi Paia.

Na faia faapea e Delphine. Na faapea mai o ia: “Na ou iloa mulimuli ane e lē mafai e le ʻava malosi ona foʻia ai faalogona popole. Na ou faatatauina le manatu atamai o loo i le Filipi 4:6, 7: ʻAua neʻi popole i se mea, ae ia faailoa atu o outou manaʻoga i mea uma lava i le Atua.’ Pe a oso aʻe nei manatu ma popolega i pō taʻitasi, ou te tatalo iā Ieova. Ou te faamatala atu iā te ia oʻu faalogona e aofia ai le ita, tigā, ma le leai o se faamoemoe, ma ou te talosaga atu ina ia fesoasoani mai ia ou maua se vaaiga saʻo. I le taeao, ou te taumafai e faamautinoa e lē toe iai nei faalogona iā te aʻu. O lenei masaniga o le tatalo, ua mafai ai ona ou uaʻi atu i mea o loo iai nai lo o mea ua lē o toe iai. O lea, na ou filifili ai e lē toe inu i le ʻava malosi, ona e tautele iā te aʻu le filemu na ou maua ma ou te lē manaʻo e toe mou atu.”

O amioga lē mamā o se tasi lea o pogai autū o le lotomafatia ma puapuaga. Peitaʻi, e mafai ona fesoasoani mataupu silisili o le Tusi Paia iā i tatou e ʻalofia ai masaniga, e pei o le faatafai ma le matamata i ata matagā taufeusuaʻiga, lea e iʻu atu ai i le faia o amioga lē mamā. Na faapea mai se talavou e igoa iā Samuel, “Sa faigofie ona ou faatafai. O nisi taimi, e ui ou te lē fia uō i se teine, ae pe afai ou te vaai atu e fiafia mai iā te aʻu, e iʻu ai ina ou faatafai.” E ui lava e lē o lona faanaunauga lenā na iai, ae o le tuuaʻia soo o Samuel i le faia o lenā masaniga, na uunaʻia ai loa o ia e iai se faanaunauga e faatafai. Peitaʻi, e leʻi lelei ona faalogona. Na faapea mai o ia, “O se lamatiaga ona e mafai ona atiaʻe ai faanaunauga manatu faapito.”

Na faitau Samuel i se mataupu mo talavou lea e maua i le jw.org, ma na ia mafaufau ai i le Faataoto 20:11 lea e faapea mai: “E mafai ona iloa le tama i lana amio pe e lelei ma tonu ana mea e fai.” Na faapefea i lenā manatu ona fesoasoani iā te ia? Na iloa mulimuli ane e Samuel e lē lelei ma e lē saʻo le faatafai. Na faapea mai o ia: “Na ou iloa ai foʻi o le faatafai a o talavou, e atiaʻe ai ni uiga lē lelei i le avea ai ma se paaga faaipoipo. Na amata ona ou mafaufau i faalogona o laʻu avā o le a iai, pe a vaai mai o loo oʻu faatafai i se isi fafine. O lenā tulaga, na ou iloa ai e iai āuga leaga o le faatafai. E lē faapea e faigofie le faatafai ona faapea lea e saʻo.” E leʻi toe faia e Samuel lenei uiga. O le ʻalofia o le faatafai na fesoasoani foʻi iā te ia e ʻalofia ai amioga lē mamā.

E sili atu lamatiaga na oo iā Antonio lea na toetoe lava a iʻu atu ai i le faia o amioga lē mamā: Na fai ma ana masani le matamata i ata matagā taufeusuaʻiga. E ui lava na faaipoipo atu i se fafine sa pele iā te ia, ae sa faaauau ona ia faia lenei masaniga. Na fesoasoani iā te ia le mafaufau i le 1 Peteru 5:8 lea e faapea mai: “Ia faaauau ona outou mafaufau lelei ma ia mataala. O loo fealuaʻi lo outou fili, o le Tiapolo lea, e pei o se leona o loo tagi leotele, e saʻili se tasi e na te ʻaina.” Na taʻua e Antonio: “Ua taatele i le lalolagi i aso nei ata matagā taufeusuaʻiga, ma o na ata e faigatā ona aveese mai i o tatou mafaufau. Na fesoasoani tele lenā mau ou te mafaufau ai i lē e puna mai ai nei faaosoosoga. Na tatau ona ou manatua o nei ata matagā e puna mai i le Tiapolo. O lea ua ou iloa nei e na o Ieova e mafai ona fesoasoani mai ia ou ʻmafaufau lelei ma mataala,’ ina ia ou ʻalofia ai lenei faaosoosoga pe a aliaʻe mai i le mafaufau, loʻu loto, ma laʻu faaipoipoga.” Na maua e Antonio le fesoasoani manaʻomia ma ua ia manumalo mai i lenā masaniga lē lelei. O le faia faapea, na fesoasoani iā te ia e ʻalofia ai isi faafitauli matuiā.

Ua manino mai, o loo iai i le Tusi Paia fautuaga aogā e fesoasoani iā i tatou e ʻalofia ai nei faafitauli. Ae faapefea faafitauli ua leva ona iai ma o loo faaauau pea ona iai? Seʻi o tatou iloilo pe faapefea ona fesoasoani mai le Afioga a le Atua ina ia tatou foʻia nei tulaga faigatā.