Ua foaʻi mai e le Atua i tagata se meaalofa faapitoa, o le tomai lea e fesootaʻi ai ma ia, ma faailoa atu o latou faalogona e ala i le tatalo. Na tatalo le tupu o Tavita: “Le Faafofoga tatalo e, e ō atu iā te oe tagata uma lava.” (Salamo 65:2) Peitaʻi, o le ā le auala e tatou te tatalo ai ina ia faafofogaina e le Atua ma faamanuiaina ai i tatou?

O au tatalo e mafai ai ona sasaa atu i le Atua mea o loo i lou loto ina ia faaalia ai ou faalogona moni. (Salamo 62:8) E tautele i Lē e ona le malosi uma lava tatalo faamaoni e sau mai i le loto.

E ui e tele faalupega o le Atua, ae e tasi lava lona suafa totino. “O aʻu o Ieova. O loʻu igoa lea.” (Isaia 42:8) E tusa ma le 7,000 taimi o loo taʻua ai le igoa o Ieova i le Afioga a le Atua. O le toʻatele o perofeta na latou faaaogāina ma le faaaloalo le suafa totino o le Atua. Na faapea mai Aperaamo: “Faamolemole Ieova, . . . ae seʻi oʻu fai atu pea.” (Kenese 18:30) E tatau foʻi ona tatou faaaogā le suafa o le Atua o Ieova, pe a tatou tatalo.

E silafia e le Atua o tatou manatu ma faalogona e tusa lava po o le ā la tatou gagana. Ua faamautinoa mai e lana Afioga: “E lē faailogaina tagata e le Atua, ae o lē e mataʻu iā te ia i nuu uma lava, ma fai le amiotonu, e talia e ia.”—Galuega 10:34, 35.

E ui i lea, ina ia maua faamanuiaga a le Atua, e lē lava le tau ina tatalo. I le mataupu o loo sosoo mai, o le a talanoaina ai le mea e manaʻomia ona tatou faia.