O LOO faasino atu upu o loo taʻua i le mau i mafaufauga ma faalogona o se tasi. E lē taitai saʻo mafaufauga o se tagata “mafatia,” ma e iʻu atu ai i le “leaga” ma le lotovaivai. E ese mai ai le tagata e “lelei lona loto,” e taumafai e uaʻi atu i mea lelei​—o se uiga e faatupuina ai lona olioli, ma ia faia ai se ʻfaigaʻai e lē aunoa.’

E leai se isi o i tatou e sao mai i faafitauli, ma e mafai ona mou atu ai lo tatou fiafia. Peitaʻi, e iai mea e mafai ona tatou faia ina ia faatumauina ai pea lo tatou fiafia e ui i taimi faigatā. Mātau le faamatalaga a le Tusi Paia.

• Aua neʻi lofitūina oe i popolega o le aso e sosoo ai. Na fetalai Iesu Keriso: “O lenei, ia aua neʻi outou popole mo le aso a taeao, auā e iai foʻi popolega o le aso a taeao. Auā e tofu lava le aso ma mea leaga e tutupu ai.”​—Mataio 6:34.

• Taumafai e taulaʻi i mea lelei na tutupu i lou olaga. Pe a e lagona le lotovaivai, aiseā e lē tusi ai i lalo mea lelei na tutupu iā te oe ma toe mafaufau i ai? Aua le toe mafaufau i gaoioiga sesē sa faia i le taimi ua tuanaʻi. Ia aʻoaʻo se lesona mai na mea ma tepa taulaʻi i le lumanaʻi. Ia pei o se avetaavale e na ona tepa lava i le faata i autafa o le taavale, ae lē taulaʻi pea i ai. Ia manatua, ʻe faamagaloina e le Atua agasala.’​—Salamo 130:4.

• Pe a lofitūina oe i popolega, ia talanoa atu i se tasi e ono mafai ona faalaeiauina oe. Ua faapea mai le Faataoto 12:25, ʻo popolega e faavaivai ai le loto, a o tala lelei e olioli ai le loto.’ Atonu e auala mai na “tala lelei” mai se tauaiga po o se uō maufaatuatuaina, o se tasi e saʻo lana vaaiga i le tulaga o mea, ma “e alofa i taimi uma.”​—Faataoto 17:17.

Ua fesoasoani upu atamai mai le Tusi Paia i le toʻatele ina ia maua le fiafia i le olaga, e ui i tulaga faigatā. Tau ina ia fesoasoani foʻi na upu iā te oe.