Tala a Mātua

Pe afai o oe o se matua o se tamaitiiti e i lalo ifo o le lima tausaga, e mautinoa o le a e fesagaʻia faafitauli. O se faataʻitaʻiga, o le ā le auala o le a e taulimaina ai le uiga faalii? E faapefea ona e aʻoaʻoina lau tama ia iloa le mea saʻo mai i le mea sesē, ma avatu faasaʻoga talafeagai? Seʻi mātau auala na taulima ai e nisi o mātua nei tulaga.

FAALII

“I le lua o tausaga o se tamaitiiti, lea e taʻua o se vaitaimi faigatā, e na te faatalitalia ai o le a ia mauaina mea e manaʻo i ai. O le faafitauli lea o la ma tama tama. Pe afai e lē faia mea e manaʻo i ai, o le a ia tauʻaia solo mea. E leʻi iai so ma malamalamaga i le auala e taulima ai lea uiga o le faalii, ona o la ma tama muamua lea. Ina ua taʻu mai e isi iā i maʻua e faatalitalia lea ituaiga o uiga, e leʻi fesoasoani lenā manatu iā i maʻua.”—Susan, Kenya.

“I le lua o tausaga o la ma tama teine, e masani e na o le taavalevale solo i luga o le fola o le fale, ʻeʻē, tagi ma feaa solo vae . . . O le matuā faaita tagata lava! E lē aogā le taumafai e talanoa atu iā te ia i lenā taimi. O lea e ma te faatonu o ia e alu i lona potu, ma fai atu i ai i se auala filemu, pe a uma lona faalii ona sau lea e matou te talanoa faatasi e uiga i le faafitauli. O le taimi lava e uma ai lona faalii, ona alu lea o se tasi o i maʻua i lona potu e fesoasoani iā te ia, ina ia malamalama i le māfuaaga e lē lelei ai le uiga na ia faaalia. Sa taulau lenei auala. I se tasi taimi, na ma faalogo atu ai o loo ia tatalo i le Atua, ma talosaga atu ia faamagalo o ia. A o faagasolo taimi, na faaitiitia lona uiga faalii ma iʻu lava ina lē toe iai lenā uiga.”—Yolanda, Sepania.

“E taumafai lava tamaiti lāiti e tofotofo po o le ā le tele e mafai ona latou suia ai faaiʻuga a o latou mātua. O le a fenuminumiaʻi le mafaufau o le tamaitiiti pe afai e te faataga o ia e fai se mea ua uma ona e faasā e aua le faia. O mea na tutupu na ma iloa ai, o le maumauaʻi ma le lē toe suia o a ma faaiʻuga na fai, na faasolosolo mālie lava ona aʻoaʻoina ai e la ma fanau, o le ʻeʻē e lē o le auala lenā e maua ai mea o loo mananaʻo i ai.”—Neil, Peretania.

AʻOAʻIGA

“A o leʻi atoa le lima tausaga o se tamaitiiti, e faigatā ona iloa po o uaʻi totoʻa mai o ia. O le auala sili, o le toe taʻua lea o faamatalaga na fai atu. E tatau ona e fai atu ma toe fai atu e tusa lava pe e faafia ona e fai atu, faatasi ai ma gaoioiga, ma ia talanoa atu i se auala mautinoa.”—Serge, Falani.

“E ui ina tausia aʻe la ma fanau e toʻafā i le siʻomaga e tasi, ae e eseese uma o latou uiga. E tagi le isi pe a iloa na ia faia se mea e ma te faanoanoa ai; ae taumafai lava le isi e faia se mea ia suia ai la ma faaiʻuga. I nisi tulaga, e lava le matapaū po o le ote, ae i nisi taimi e manaʻomia ai loa ona avatu se faasalaga.”—Natano, Kanata.

“E tāua ona aua neʻi fesuisuiaʻi faaiʻuga e faia. Ae i le taimi foʻi e tasi, e lē tatau i se matua ona soona inainā pe lē magafagafa. O isi taimi pe a faaalia e le tamaitiiti le salamō moni, e ma te lagona e sili ai ona fetuutuunaʻi ma faamāmā le aʻoaʻiga.”—Mataio, Falani.

“Ou te taumafai lava ia aua neʻi faaopoopo atu ni tulafono se tele, ae o tulafono ua iai e lē toe suia lava. E iloa lelei e laʻu tama tama iʻuga e oo i ai pe a lē usiusitaʻi, ma e fesoasoani lenā mea e pulea ai lana amio. O le mea moni, e faigofie ona ou lē amanaʻia ana gaoioiga sesē pe a ou lagona le lēlavā. Ae ina ia tausisi i faaiʻuga ua uma ona ou faia, ou te taumafai lava e faia ni gaoioiga. E tāua tele le tausisi pea i faaiʻuga ua uma ona fai!”—Natalie, Kanata.

IA MAUMAUAʻI

“E foliga mai e manatua lelei e fanau iti so o se taimi e lē tausisi ai se matua i se faaiʻuga na ia faia.”—Milton, Polivia.

“I nisi taimi e eseese auala e fesili mai ai loʻu atalii i le mea lava e tasi, ona e taumafai lava e vaai pe tutusa a ma tali e avatu. Pe afai e na te mātauina e eseese a ma faamatalaga ma lona tinā, e manatu ai o le avanoa lea e fai ai loa le mea e loto i ai.”—Ángel, Sepania.

“O nisi o taimi ou te lē amanaʻia ai uiga ulavale o loʻu atalii pe a ou fiafia, peitaʻi ou te matuā aʻoaʻia o ia pe a ou ita. Ona o lenā mea, e na o le faateteleina ai o lona ulavale.”—Gyeong-ok, Korea.

“E tāua ona malamalama tamaiti lāiti, afai e sesē se amioga o loo latou faia i le taimi lenei, e mautinoa o le a faaauau ai lava ona sesē.”—Antonio, Pasili.

“Pe afai e lē tausisi mātua i a la faaiʻuga, o le a manatu le tamaitiiti e faigatā ona iloa le mea saʻo, ma faapea ai e faalagolago faaiʻuga a mātua i o la faalogona. Ae afai e maumauaʻi mātua i taʻiala ua uma ona la faataatitia, o le a iloa ai e le tamaitiiti, o amioga e sesē i le taimi lenei e mautinoa e sesē lava i taimi uma. O se tasi lea o auala e avatu ai ma le alofa e mātua le puipuiga.”—Gilmar, Pasili.

“O nisi taimi e foliga mai ua leai se mea e mafai ona fai e mātua pe a iai nisi tagata, ona e faaaogā e fanau lenā avanoa e faia ai mea e lolo atu ai mātua i lo latou manaʻo. Afai ou te fai atu e leai, o le tali lava lenā, ma ou te faailoa atu ma le manino i loʻu atalii ou te lē faia lava le mea o loo tagi mai ai.”—Chang-seok, Korea.

“E manaʻomia ona ioe faatasi mātua uma e toʻalua i se mataupu. Pe afai e iai se mataupu e ma te lē ioe faatasi i ai ma laʻu avā, e ma te talatalanoa na o i maʻua. E mafai ona iloa e le fanau e lē o ioe faatasi mātua i se mataupu, ma o le a latou taumafai ai e faia mea i la latou lava auala.”—Jesús, Sepania.

“E lagona e le tamaitiiti le malupuipuia pe afai e na te iloa o loo ioe faatasi ona mātua i se mataupu, ma e lē mafai ona ia faaseeina i laʻua. E na te iloa le iʻuga e oo i ai, e tusa lava pe e usiusitaʻi pe leai.”—Tamari, Siamani.

“E ma te maumauaʻi ma laʻu avā e faataunuu se mea manaia na ma folafola atu i la ma tama teine. O lenei auala e na te mautinoa ai e mafai ona ia faalagolago i a ma folafolaga.”—Hendrick, Siamani.

“Ou te lagona le ita tele pe a fai ma masani a loʻu pule le fesuisuiaʻi o galuega e manaʻo ou te faia. E faapena foʻi le tulaga o fanau. E latou te lagona le malupuipuia i le iloaina o tulafono, ma iloa foʻi e lē suia tulafono. E manaʻomia foʻi ona latou iloa iʻuga e oo i ai pe afai e lē usiusitaʻi, ma e lē suia lava na iʻuga.”—Glenn, Kanata.

 [Faamatalaga faaopoopo i le itulau 8]

“Ia avea la outou upu o le Ioe, ia Ioe, ma le Leai, ia Leai.”—Iakopo 5:12

 [Pusa/Ata i le itulau 9]

TALAAGA O LE AIGA

Maʻitaga e Leʻi Faatalitalia Fetuutuunaʻiga na ma Faia

Ua faamatalaina e Tom ma Yoonhee Han

Tom: E faatoʻā ono masina talu ona ma faaipoipo ma laʻu avā o Yoonhee, ae iloa ane ua tō o ia. I le vaaiga a tagata, e foliga mai o loo ou toʻa, talu ai sa ou manaʻo e faamautinoa atu iā Yoonhee, e mafai ona ia faalagolago mai iā te aʻu mo faamāfanafanaga ma le malosi. Ae i loʻu loto sa ou lagona le lē mautonu!

Yoonhee: Na ou lagona le lotomafatia ma le fefe! Na o loʻu tagi lava ona ou te leʻi sauni pe agavaa foʻi e avea ma se tinā.

Tom: Ou te leʻi sauni foʻi e avea ma se tamā! Ae ina ua uma ona talatalanoa ma isi mātua, na ma iloa ai o le maʻitaga e leʻi faatalitalia, o se mea e masani ona tupu nai lo o le mea sa ma manatu i ai. Na fesoasoani foʻi iā i maʻua e iloa manatu o isi mātua, e faatatau i le olioli i le avea o se tamā po o se tinā. Sa faasolosolo ona mou mālie atu oʻu lagona o le popole ma le lē mautonu, ae suia i lagona o le faatalitali ma le naunau.

Yoonhee: Na tulaʻi mai foʻi isi faafitauli ina ua fanau mai Amanda. E tagi soo o ia, ma lē mafai ai ona maua saʻu moe mo le tele o vaiaso. Na lē manogi se meaʻai, ma amata ona ou lagona le matua lēlavā. I le taimi muamua ou te leʻi manaʻo e faatasitasi ma isi tagata, ae na mulimuli ane ou iloa, o le faaesea o aʻu lava mai i isi e lē fesoasoani iā te aʻu. O lea na matou faifaimea faatasi ai ma isi tinā faatoʻā fai fanau. Na fesoasoani lenā iā te aʻu e talatalanoa ai foʻi ma isi o loo feagai ma lea tulaga, ma ou iloa ai e lē na o aʻu o loo feagai ma ia popolega.

Tom: Na ou taumafai e tausisi pea i le faasologa masani a lo matou aiga. O se faataʻitaʻiga, i le avea ai ma Molimau a Ieova, na ma maumauaʻi ma Yoonhee ia auai e lē aunoa i le talaʻiga ma sauniga faa-Kerisiano. E lē gata i lea, o le iai o se fanau e tele ai tupe faaalu, ma o nisi o na mea e leʻi faatalitalia. Na ma faamautinoa e ola e tusa ma mea ua maua, ina ia aua neʻi oo ai i se tulaga ua nofo aitalafu ma iʻu atu ai i le tele o popolega.

Yoonhee: I le taimi muamua, na ou manatu e faigatā ona alu i le talaʻiga, ona e ese le faalavelave o pepe. Ae o le mea moni, e fiafia tagata pe a iai faatasi ma pepe. O le iloaina o lenā tulaga, na fesoasoani ai iā te aʻu e faaauau pea ona talaʻi ma iai se vaaiga saʻo e uiga i laʻu tama.

Tom: Ua taʻua i le Tusi Paia o fanau “o le tofi lea mai iā Ieova” ma o se “taui.” (Salamo 127:3) Iā te aʻu, o na upu ua faailoa mai ai o le fanau o se meaalofa e tautele. O so o se tofi lava e te maua, e pule oe i le auala e faaaogā ai: E mafai ona e filifili e faaaogā tatau, pe faamaʻimau foʻi. Ua ou iloa e eseese mea e tutupu i le olaga o se tamaitiiti a o tuputupu aʻe. E tatau ona ou iai a o tuputupu aʻe pea loʻu afafine, ina neʻi lē toe maua lenā avanoa pe a mou atu.

Yoonhee: E iai taimi e faateʻia ai i tatou ona o mea e tutupu i le olaga, ma e lē o se mea leaga se maʻitaga e leʻi faatalitalia. Ua ono nei tausaga o Amanda, ma ou te manatu e lē mafai ona ou ola e aunoa ma ia.

[Ata]

Tom ma Yoonhee ma la la tama teine, o Amanda