E Mafai Ona E Faaleleia Lou Soifua Mālōlōina

O RUSTAM, e nofo i Rusia, e pisi tele lona olaga. I aso ua mavae, sa iai ni ana masaniga e lē lelei mo le soifua mālōlōina, ma na ia iloa, ua aafia ai o ia. O lea, na tuu ai lana ulaula ma le inu tele i le ʻava malosi. Peitaʻi, o le nofo umi i luma o lana komepiuta, na ia lagona ai le ivā.

E ui lava e amata ona faigaluega Rustam i le valu i le taeao, ae e tā aʻe le sefulu, e lagona pea lona fia moe, ma e maʻi soo foʻi. O lea na sui ai lana masaniga. O le ā le iʻuga? Ua ia faapea mai, “I tausaga e fitu ua mavae, e na o le lua lava oʻu aso maʻi e ave i tausaga taʻitasi. Ua ou malosi, lē fia moe ma mataalia, ua matuā fiafia loʻu olaga!”

O Ram ma lana avā, ma le la fanau lāiti e toʻalua, e nonofo i Nepale. E lē mamā mea e nonofo ai tagata, ma e tele namu ma lago i lea vaipanoa. I aso ua mavae, sa masani ona aafia Ram ma lona aiga i le faalētonu o ālā ʻea, ma le maʻi mata. Ae na latou faia ni suiga ma faaleleia ai o latou soifua mālōlōina.

Ia Tausia Lou Soifua Mālōlōina!

E tusa pe mauʻoa pe matitiva, ae e toʻatele e lē o iloa le fesootaʻiga o a latou masaniga, ma o latou soifua mālōlōina. Latou te ono manatu i le mauaina o se soifua mālōlōina lelei, o se mea e tupu fua po o se mea e lē mafai ona latou pulea. O lenā manatu lē saʻo, ua lē mafai ai ona faaleleia e le toʻatele o latou soifua mālōlōina, ma maua ai se olaga manuia.

O le mea moni, po o ā lava ou tulaga tau tamaoaiga, ae e iai auala faigofie e te faia, e puipuia ma faaleleia atili ai lou soifua mālōlōina, faapea ma lou aiga. Pe e aogā na taumafaiga? Ioe, e aogā! E mafai ona faaumiumi ai lou soifua.

E mafai e mātua ona aʻoaʻo a latou fanau i ni masaniga lelei, e ala i upu ma faaaʻoaʻoga, ma iʻu ai i se soifua mālōlōina lelei. E ui e alu ai le taimi ma tupe, ae e mulimuli ane faaitiitia ai le mafatia, seāseā mamaʻi, ma faaitiitia ai tupe e alu i le totogiina o fomaʻi. E pei o le faaupuga masani, E sili le puipuia i lo le tau togafitia.

I mataupu o loo mulimuli mai, o le a tatou talanoaina ai auala faigofie e lima, na fesoasoani iā Rustam, Ram, ma le toʻatele o isi. E mafai foʻi ona fesoasoani nei auala iā te oe!

[Ata i le itulau 3]

Rustam

[Ata i le itulau 3]

Ua maua e Ram vai mamā e feinu ai lona aiga