Saʻili se Fesoasoani

“Afai e manumalo se tasi i le tagata e toʻatasi, e mafai e le toʻalua ona tetee atu iā te ia.”—Failauga 4:12.

E MAFAI ona tatou manumalo i so o se fili e tetee mai, pe a lagolagoina i tatou e isi. O lea, afai e te manaʻo e tuu lau ulaula, o se mea poto le saʻili o le fesoasoani a lou aiga ma au uō, po o nisi e lagolagoina oe ma lava lo latou onosaʻi.

Ia talanoa atu i ē ua mafai ona tuu le ulaula, ona e lē gata e malamalama, ae e fesoasoani atu foʻi. Ua fai mai Torben o se Kerisiano i Tenemaka, “E ese le tāua o le lagolagosua a isi iā te aʻu.” Na tusi mai Aperaamo e nofo i Initia: “O le alofa moni na faaalia e loʻu aiga ma uso Kerisiano, na aogā e tuu ai laʻu ulaula.” Ae e iai foʻi taimi e lē lava ai le fesoasoani a aiga ma uō.

Ua faapea mai se alii e igoa iā Bhagwandas, “E 27 tausaga o oʻu ulaula, ae ina ua ou iloa le mea o fai mai ai le Tusi Paia e uiga i masaniga e lē mamā, na ou manaʻo ai loa e tuu. Sa ou taumafai e faaitiitia aʻu tapaa e ula i le aso, ma sui aʻu uō. Na ou alu foʻi e vaai tagata faufautua, ae e leʻi aogā. I se tasi pō, na sasaa atu ai loʻu loto iā Ieova le Atua i le tatalo, ma ʻaiʻoi atu e fesoasoani mai e tuu laʻu ulaula. Na iʻu ina ou mafaia ona tuu!”

O se isi mea e tāua, o le sauniuni lea mo faafitauli o le a oo mai. O ā faafitauli? O loo faamatalaina i le mataupu lea e sosoo mai.

[Pusa i le itulau 5]

PE E TATAU ONA E FAAAOGĀ FUALAAU?

O fualaau e aogā e tuu ai le ulaula, e pei o mea faapipii e iai le nikotini, ua tele tupe a pisinisi e maua ai. Ae ia iloilo muamua fesili nei, a o leʻi faaaogāina na fualaau:

O ā aogā? E tele togafitiga e aogā e tuu ai lau ulaula, ma faaitiitia ai faalogona tigā pe a tuu. Ae, e lē o mautinoa pe umi ona aogā o na mea.

E iai āuga leaga. E iai āuga leaga o nisi togafitiga, e pei o le faafaufau, lagona mafatia, ma le manaʻo e pule i le ola. Ae ia manatua, o lē e faaaogāina na togafitiga e aafia ai lava i le nikotini, ma afāina ai lona soifua mālōlōina. O lona uiga, o lē e faaaogā na togafitiga, e tusa lava o la e ulaula.

E iai nisi auala e tuu ai. I se tasi suʻesuʻega, na taʻua e le 88 pasene o tagata ua mafai ona tuu le ulaula, na latou faia faapea e ala i le momotu tū e aunoa ma nisi togafitiga.