Pulea le Popole

Ua taʻua i se tasi faaliliuga o le Tusi Paia, “taimi faigatā o popolega ma faafitauli.” Atonu e te ioe o lea ua tatou ola nei i le taimi o le tele o popolega.—2 Timoteo 3:1, The Amplified Bible.

E PEI ona e iloa, e faigofie ona tapē se afi laʻitiiti i lo o se afi o loo mū saesae. E faapena foʻi ona faigofie ona pulea nai popolega laiti i lo o popolega faaumiumi. Ua fai mai se tasi fomaʻi, “e tusa pe pisi, ae e tāua ona faaavanoa se taimi i lou aso e pulea ai lou popole.” *

E lua vala o lou faaavanoa o se taimi i aso taʻitasi e pulea ai lou popole. Muamua, e fesoasoani iā i tatou e faaitiitia ai mea e pogai ai le popole. Lona lua, e fesoasoani e pulea ai le auala e tatou te tali atu ai, i popolega e lē mafai ona ʻalofia.

Pe e iai i le Tusi Paia ni taʻiala e aogā e tatou te feagai ai ma le popole?

E Tāua Tele Upu Moni o le Tusi Paia

O le faitau i upu moni mai i le Tusi Paia e tatou te maua ai manatu o Lē na faia i tatou, e faafouina ma faalaeiauina ai. Ua maua i le Afioga a le Atua taʻiala aogā. O loo iai upu moni e faateʻa ai le popole! E  fesoasoani nei taʻiala iā i tatou e aua ai le ‘fefefe pe matataʻu,’ ma taulau ai a o feagai ma popolega i aso taʻitasi.—Iosua 1:7-9.

Ua fesoasoani le Tusi Paia e faaitiitia o tatou popolega i se auala ofoofogia, i le faamautinoa mai o lo tatou Tamā faalelagi o Ieova, e “alofa faapelepele ma alofa mutimutivale.” (Iakopo 5:11) Ua faamatala mai e Patricia, o se polofesa i le iunivesite o Kalifonia, “Na aogā tele iā te aʻu le mafaufau i le finagalo o le Atua, ma mea ofoofogia ua ia faia.”

Ia manatunatu i upu ma feutagaʻiga alofa a Iesu i aso ua mavae, na faafouina ai lana ʻaufaalogologo ua mafatia i popolega. “Ia outou ō mai iā te aʻu o outou uma ua tigāina ma mafatia i avega, ona ou faafouina lea o outou.”—Mataio 11:28-30.

E moni fetalaiga a Iesu, e lē sauā o ia, ae sa faaalia lona magafagafa i faalogona ma manaʻoga faaletino o ona soo, ma fuafua foʻi ia latou maua se mālōlōga mai i la latou talaʻiga pisi. (Mareko 6:30-32) E tatou te mautinoa, ua avea nei Iesu ma Tupu i le lagi, ma e alofa ma malamalama o ia i o tatou popolega. E na te saunia ma le alofa mutimutivale le fesoasoani mo i tatou, “i le taimi e tatau ai.”—Eperu 2:17, 18; 4:16.

E Aogā le Talanoa Lelei

O le lelei o talanoaga, o se auala sili lea e pulea ai le popole. Ua aʻoaʻo mai le Tusi Paia: “E faalēaogāina fuafuaga pe a lē iai ni talanoaga i mataupu faalilolilo, a o le toʻatele o le ʻaufaufautua e taunuu ai mea.” (Faataoto 15:22) Ua iloa e le toʻatele, e faaitiitia le popole pe a talanoa i o latou taʻitoʻalua, se uō, po o sē e faigaluega faatasi.

O le auala e sili ona tāua e talanoa ai, o le tatalo lea i le Atua. O le faia faapea e lē  aunoa, o le a aogā iā te oe e ʻalofia ai le ‘popole i so o se mea.’ Ua iloa e le toʻatele, ua fesoasoani iā i latou le faalagolago i le tatalo, e maua ai “le filemu mai i le Atua, e silisili i mea uma lava e manatu i ai.” E tusa ai ma le folafolaga a le Tusi Paia, ua ‘leoleoina ai o latou loto ma mafaufau.’—Filipi 4:6, 7; Faataoto 14:30.

Ua taʻua i se lomiga e faatatau i le popole, “o tagata e iai a latou uō lelei, e faigofie ona pulea lo latou popole ma maua mafaufauga lelei, i lo o i latou e taumafai e fai e i latou lava mea uma.” E leai se vaega e sili ona lagolagosua i lo o i latou e tapuaʻi iā Ieova le Atua moni. Ua latou usitaʻia apoapoaʻiga a le Atua ma faatasitasi e lē aunoa i sauniga ma faalaeiau le tasi i le isi. (Eperu 10:24, 25) Ua fai mai se tasi e auai i sauniga, “O nisi taimi ou te galue umi ai ma tele ai le popole. Ae a ou alu i sauniga, e oo ane i le tatalo faaiʻu, ua teʻa loʻu popole ma ua faafouina ai aʻu.”

E tāua foʻi le fai o tala malie. Ua faapea mai le Failauga 3:4, e iai “le taimi e tagi ai ma le taimi e ʻataʻata ai.” O le ata, e faafouina ma mālōlō ai, auā ua taʻua e se tasi fomaʻi, “e faamatuu mai ai e le tino vailaau lelei ae taofi vailaau e afāina ai pe a popole.” Na fai mai se tasi fafine: “E fai e loʻu toʻalua tala ma mea mālie i taimi e sili ona ma popole ai, ma e ese le aogā.”

Uiga e Faaitiitia ai le Popole

Ua taʻu mai i le Tusi Paia vala o le “fua o le agaga” o le Atua, e faaitiitia ai le popole, e iai le “alofa, o le olioli, o le filemu,  o le faapalepale, o le agalelei, o le mataalofa, o le faatuatua, o le agamalu, ma le amio pulea.” E lē gata i lea, ua uunaʻia foʻi i tatou e le Tusi Paia e ʻalofia le “ita umi, ma le itaitagofie, ma le lotoa, ma le soona ʻeʻē, ma upu masoā.” Ona toe faapea mai lea: “Ia agalelei le tasi i le isi, ia māfana lo outou alofa, ma ia fefaamagaloaʻi ma le lotoatoa.”—Kalatia 5:22, 23; Efeso 4:31, 32.

Ua faamatala mai e se fomaʻi le tāua o le faatatauina o aʻoaʻoga a le Tusi Paia, aemaise lava le olaga i aso nei. Ua fai mai o ia: “O le feutagaʻi ma le faaaloalo ma tagata, e matuā faaitiitia ai lava le popole.” Ua fesoasoani mai foʻi le Tusi Paia e atiaʻe le lotomaulalo, po o le iloa o mea e gata ai lo tatou mafai.—Mika 6:8.

Ua finagalo le Atua ia tatou lotomaulalo e faailoa atu, e iai mea e gata ai lo tatou mafai, i le tino, mafaufau, ma faalogona, ma e lē mafai ona fai mea uma e tatou te mananaʻo ai. E ui ina faigatā lenei mea, ae e manaʻomia ona tatou iloa le auala ma le taimi e fai atu ai, e lē mafai ona tatou faia se mea.

E lē faapea o le a leai ni o tatou popolega pe a faatatau fautuaga uma mai i le Tusi Paia. Talu ai, ua taulaʻi osofaʻiga a Satani le Tiapolo i ē e tapuaʻi i le Atua, i lona taumafai lea e faamaonia, e tatou te lafoaʻia le tapuaʻiga moni pe a omia i popolega. (Faaaliga 12:17) Ae ua tatou iloa, e tele sauniuniga a le Atua e fesoasoani iā i tatou e faaitiitia ai popolega ma mafai ai ona fesagaʻia. *

[Faaopoopoga i lalo]

[Pusa i le itulau 17]

AUALA E FAAITIITIA AI LE POPOLE

● Aua le faatalitalia e te lelei atoatoa ma e faapena foʻi isi.—Failauga 7:16.

● Ia faatulaga mea e tatau ona faamuamua.—Filipi 1:10, 11.

● Faagaoioi e lē aunoa lou tino.—1 Timoteo 4:8.

● Matamata i le matagofie o foafoaga a Ieova.—Salamo 92:4, 5.

● Ia maua e lē aunoa sou taimi paganoa.—Mataio 14:23.

● Ia lava le taimi e mālōlō ma moe ai.—Failauga 4:6.

[Ata i le itulau 15]

E tāua le faaavanoa o se taimi e talanoa ai, e faaitiitia ai le popole

[Ata i le itulau 15]

O le atiaʻe o uiga faale-Atua e faaitiitia ai le popole