Le Manatu o le Tusi Paia

Pe e Tatau Ona Totogi se Tupe mo Auaunaga Faalelotu?

I LE tele o atunuu, e foaʻi pe totogi ai e tagata tupe i taʻitaʻi o lotu Kerisiano ma lotu e lē o ni Kerisiano mo auaunaga faalelotu. E aofia ai i nei auaunaga le papatisoga, faaipoipoga, po o tanuga o maliu. E ono oo atu i le faitau selau talā e totogi, ma i nisi taimi e oo atu lava i le faitau afe o tālā.

E totogi e le malo nisi o taʻitaʻi lotu e faia sauniga ma tiute faafaifeʻau, ma faia se tatalo e amata ai se fono faitulafono i aso taʻitasi. E talisapaia tele na sauniga, ma e iai foʻi pili a le lotu e tatau ona totogi. Ae po o faamaonia e le Tusi Paia lenā faiga o le totogi o tupe mo na auaunaga faalelotu, ma avea ai ma avega mamafa i tagata?

“Fale Faatauʻoa”

A o iai Iesu i le lalolagi, na faaaogā ai e taʻitaʻi lotu Iutaia ma isi tagata na sauniga e maua ai tupe, aemaise lava i le taimi o le Paseka. Pe sa fiafia i ai Iesu i lenei faiga? E leai! Ua taʻu mai i le Tusi Paia e faapea, na “ia sasaa foʻi tupe a tagata suitupe ma fuli a latou laulau.” Na ia fetalai atu: “Aua neʻi toe faia le fale o loʻu Tamā ma fale faatauʻoa!”—Ioane 2:14-16.

E faapena foʻi le mea na tupu i aso o le perofeta o Mika, o lē na soifua i lona valu o senituri T.L.M. Ua taʻu mai i le Tusi Paia, o taʻitaʻi lotu o le nuu o Isaraelu, ua “ʻinoʻino i le faamasinotonu,” ma “ua aʻoaʻo atu foʻi ona ositaulaga mo se totogi.” Ae i le taimi lava e tasi, ua latou taʻutino mai o loo lagolagoina i latou e le Atua ma faapea ane: “Pe e lē o faatasi ea Ieova ma i tatou?” (Mika 3:9, 11) Ae e leʻi faatasi pe lagolagoina i latou e Ieova. Peitaʻi, na ʻinoʻino o Ia i a latou amioga, ma na matuā faamanino atu lea mea e ala i lana perofeta.

E toʻatele taʻitaʻi lotu i aso nei ua faia na faiga matapeʻapeʻa, ma faia ai o latou falesā ma ‘fale faatauʻoa.’ O le mea moni, ua tamaoaiga lotu i le faatauina atu o le anoanoaʻi o mea e faia ai tapuaʻiga, ma isi mea faalelotu. *—1 Ioane 5:21.

“Ua Outou Maua Fua, Ia Avatu Fua”

Ina ua faatonuina ona soo e talaʻi le tala lelei, faamālōlō maʻi ma faatutū ē ua oti, na faapea atu Iesu: “Ia outou avatu fua, auā ua  outou maua fua.” (Mataio 10:7, 8) Ioe, e lē tatau ona totogia ona soo moni mo la latou auaunaga. E lē gata i lea, na faia e Iesu se faaaʻoaʻoga i le auauna atu i isi e aunoa ma se totogi.

Na mulimuli le aposetolo o Paulo i le faaaʻoaʻoga a Iesu, i le faia fua o lana faiva e ‘leʻi maua sona totogi.’ (1 Korinito 9:18) Pe a ia manaʻomia se tupe, sa galue i le faia o faleʻie. (Galuega 18:1-3) O lea, na ia faapea mai ai e faatatau iā te ia ma ona uso a misionare: “E matou te lē suʻe tupe i le afioga a le Atua e pei o le toʻatele o isi.” (2 Korinito 2:17) Ae e faapefea ona maua tupe e faagaoioi ai galuega a le faapotopotoga, e pei o le faatauina po o le totogiina o se fale e faia ai le tapuaʻiga?

‘E Alofa le Atua i Lē Foaʻi ma le Lotofiafia’

E maua e Molimau a Ieova tupe e manaʻomia e ala i foaʻi tauofo. E latou te faatatauina le mataupu silisili: “Ia taʻitoʻatasi ma faia e tusa ma le mea ua filifili i lona loto, aua le faia ma le tigā, aua foʻi le faia faamalosi, auā e alofa le Atua i lē ua foaʻi ma le lotofiafia.” (2 Korinito 9:7) O le mea lea, e lē totogiina ai lomiga a Molimau a Ieova, po o a latou auaunaga faalelotu, e pei o le faia o le papatisoga, faaipoipoga, po o falelauasiga o maliu. E lē totogiina foʻi ni sefuluaʻi, pe ao se peleti i a latou sauniga. So o se tasi e fia fai sana foaʻi tauofo i la latou galuega talaʻi i le lalolagi aoao, e mafai ona faia faapea e ala i le tuu o a latou foaʻi i totonu o pusa o loo i le maota e fai ai la latou tapuaʻiga.

E faatupe e Molimau a Ieova i le lalolagi aoao le fausia o o latou Maota mo Sauniga, Maota Fono, o ofisa o lālā ma fale lomitusi faapea a latou fesoasoani mo mala faalenatura, e ala i meaalofa tauofo. E itiiti se meaalofa e mafai e nisi ona foaʻi, e pei lava o le fafine ua oti lana tane lea na taʻuleleia e Iesu. (Luka 21:2) A o isi e mafai ona tele a latou foaʻi. Po o le ā lava le tulaga, a o i latou e usitaʻia taʻiala o loo i le Tusi Paia ma foaʻi e tusa ma mea ua latou maua, e maua le fiafia, le lotomalie moni, ma le faamanuia a le Atua.—Galuega 20:35; 2 Korinito 8:12.

[Faaopoopoga i lalo]

PO O E TAUMĀNATU EA I NISI TAIMI?

● O ā fetalaiga a Iesu i ē na faatau a latou mea i le malumalu?—Ioane 2:14-16.

● Pe na talia e le aposetolo o Paulo se totogi mo ana auaunaga faalelotu?—2 Korinito 2:17.

● O le ā le foaʻi e fiafia i ai Ieova?—2 Korinito 9:7.

[Faamatalaga faaopoopo i le itulau 19]

“Aua neʻi toe faia le fale o loʻu Tamā ma fale faatauʻoa!”—Ioane 2:14-16