Ua Fesili Mai Talavou

E Faapefea Ona Ou Talanoa Atu i Oʻu Mātua?

“Sa ou taumafai lava e faamatala atu oʻu lagona, ae la te leʻi amanaʻia mai aʻu. E tele ni taumafaiga na ou faia e faailoa atu ai oʻu lagona, ae na matuā lē mafai lava!”—Rosa. *

A O E laʻitiiti, e lē taumatea o ou mātua o tagata muamua ia na e sulu atu i ai mo ni fautuaga. E tusa lava pe e tele pe itiiti, ae na e faamatala uma atu mea iā i laʻua. Sa e saʻoloto foʻi e faaali atu iā i laʻua ou manatu ma lagona, ma na e faatuatuaina a la fautuaga.

Ae o lea la ua e lagona, ua lē o toe malamalama ou mātua iā te oe. Ua fai mai se teine e igoa iā Eti: “I se tasi pō a o matou aai, na amata ai ona ou tagi ma sasaa atu ou lagona i oʻu mātua. Na faalogo mai oʻu mātua ae e foliga mai, e leʻi malamalama.” O le ā le iʻuga? “Sa ou alu i loʻu potu ma saga tagi ai pea!”

I le isi itu, atonu i nisi taimi, e te lē fia talanoa ai i ou mātua. Na faapea mai se tama e igoa iā Christopher: “E tele mea na ou talanoa ai i oʻu matua. Ae i nisi taimi, ou te fiafia foʻi e aua neʻi o la iloaina uma mea o ou mafaufau i ai.”

Pe e sesē lou lē faailoaina i ou mātua o mea uma o e mafaufau i ai? E leai, pe afai e te lē o faaʻoleʻole i ou mātua. (Faataoto 3:32) E tusa lava pe e lē malamalama ou mātua iā te oe pe e te lē fia taʻuina uma i ai ou manatu, ae e tasi lava le mea o loo mautinoa: E tatau ona e talanoa i ou mātua, ma e tatau lava ona la faalogologo mai iā te oe.

Taumafai Pea e Talanoa!

I se isi itu, o le talanoa ma ou mātua e pei o le aveina o se taavale. Afai e te lua fetaiaʻi ma se faafitauli,  e te lē faavaivai ae saʻili se isi auala. Iloilo faataʻitaʻiga nei.

Faafitauli 1: Ua e fia talanoa ae e lē o faalogo lelei mai ou mātua. Na fai mai se teine e igoa iā Lea: “E faigatā lava ona ou talanoa i loʻu tamā. I nisi taimi, a o ou talanoa atu ai iā te ia, ae faapea mai, ‘O lenā e te fai mai iā te aʻu?’”

FESILI: O le ā e fai e Lea pe afai o manaʻo lava e talanoa i se faafitauli? E tolu ni mea e mafai ona ia faia.

Auala 1

Avau i lona tamā. E ono avau atu Lea ma faapea atu: “Se faalogo mai, e tāua le mea lea ou te fia fai atu ai!”

Auala 2

Ua lē toe talanoa Lea i lona tamā. Atonu ua fiu o ia ma lē toe fia talanoa ai i ona mātua.

Auala 3

Vaai se taimi e fetaui, ona talanoa lea i le mataupu. E mafai ona talanoa faafesagaʻi Lea ma lona tamā, pe tusi i ai e uiga i lona faafitauli.

O lē fea auala e te manatu e tatau ona faia e Lea? ․․․․․

Seʻi o tatou iloiloina auala taʻitasi ina ia iloa ai po o fea e iʻu i ai. E ese le mea o loo mafaufau i ai le tamā o Lea ma ua lē manatu mamafa ai i le mea e lē o fiafia i ai Lea. O lea la, afai e filifilia e Lea le Auala 1, ma avau i ona mātua, e lē iʻu i se lelei. O lenei auala atonu e lē fia faalogo mai ai le tamā o Lea, ma e lē o faaalia ai lona āva ma le faaaloalo i ona mātua. (Efeso 6:2) O lea la, e leai se iʻuga lelei e maua mai i lenei auala.

E ui e faigofie le Auala 2 ae e lē o le auala sili lea ona atamai. Aiseā? Talu ai “e faalēaogāina fuafuaga pe a lē iai ni talanoaga i mataupu faalilolilo, a o le toʻatele o le ʻaufaufautua e taunuu ai mea.” (Faataoto 15:22) Ina ia taulau ona taulimaina e Lea ona faafitauli, e tatau ona talanoa i ona mātua, ma e manaʻomia ona la iloa le mea o loo tupu i lona olaga ina ia mafai ona la fesoasoani iā te ia. E leai se mea e mafai ona fai pe a lē talanoa faatasi.

Ae i le Auala 3, e lē fiu Lea pe a tulaʻi mai se faafitauli. E toe taumafai e talanoa i le mataupu i se isi taimi. Ma afai e faamatala ona faalogona i lona tamā e ala i se tusi, atonu o le a vave ona toe lelei ai ona faalogona. Atonu e aogā foʻi le tusia o se tusi e iloa tonu ai upu e fai atu i lona tamā i le taimi e faalogo mai ai o ia. Pe a faitau le tamā o Lea i le tusi, ona ia iloa ai lea o mea o loo taumafai Lea e faamatala atu, ma atonu e malamalama ai i lona faafitauli. O le a aogā le Auala 3 iā Lea ma lona tamā.

O ā nisi auala e mafai ona fai e Lea? Mafaufau i se auala se tasi ma tusi i lalo. Ona tusi lea i lalo o le iʻuga e ono oo i ai lenā auala.

․․․․․

 Faafitauli 2: Ua fia talanoa ou mātua ae e te lē o fia talanoa. Na faapea mai se teine e igoa iā Sara: “E leai se mea e sili ona leaga i lo o le fesili soo mai, a o lea e ta te lē lavā atu i le aʻoga. Ou te lē o fia talanoa e uiga i le aʻoga, ae o lea ua saputu mai fesili a oʻu mātua: ‘Na ā mai le aso? Na lelei mea uma?’” E lē taumatea e leai se leaga o fesili a mātua o Sara. Peitaʻi, e lē o fia talanoa o ia, ma na ia fai mai, “Ou te lē o fia talanoa e uiga i le aʻoga, o lea ou te vaivai ma lē lavā.”

FESILI: O le ā e mafai ona fai e Sara i lenei tulaga? E pei o le faaaʻoaʻoga muamua, a itiiti mai, e tolu ni mea e mafai ona ia faia.

Auala 1

Lē fia talanoa. Atonu e faapea atu o ia: “Se soia le faalavelave mai. Ou te lē o fia talanoa!”

Auala 2

Talanoa loa i lenā taimi. O loo lē lavā Sara ma ua tali tōaʻi atu i fesili a ona mātua.

Auala 3

Talanoa i se isi taimi e uiga i le aʻoga, ae talanoa i se isi mataupu. Atonu o le manatu o Sara, e lelei pe a talanoa i le aʻoga i se isi taimi pe a toʻafilemu lona mafaufau. Ona ia fai atu lea ma lona naunau moni lava i ona mātua: “Faamatala mai pe na ā mai le lua aso? Sa sologa lelei mea uma?”

O lē fea auala e te manatu e tatau ona faia e Sara? ․․․․․

Seʻi tatou toe iloilo auala taʻitasi ma iloa ai po o fea e ono iʻu i ai.

A o leʻi filifilia le Auala 1, Na lagona e Sara le mafatia ma e leʻi fia tautala. Ae ina ua uma ona filifilia o lenei auala, sa lagona pea e ia le mafatia, ona e pei ua agaleaga ona o le soona avau i ona mātua.—Faataoto 29:11.

E leʻi fiafia mātua o Sara i lona avau atu po o lona lē tautala foʻi. Atonu na masalosalo i laʻua e iai se mea o loo natia e Sara. Atonu o le a la taumafai e faasufi o ia e faamatala atu lona faafitauli, ae e atili ai ona lē fiafia o ia. O le iʻuga, e lē taulau lenei auala.

E manino mai e sili atu le Auala 2 i lo o le Auala 1. Auā o le a mafai ai ona talanoa Sara ma ona mātua. Ae ona o le a lē māfana le talanoaga, e lē mafai ai la ona saʻoloto ma toʻafilemu le talanoaga a Sara ma ona mātua.

Ae peitaʻi i le Auala 3, o le a lelei faalogona o Sara ona o lea ua tolopō le talanoaga. O le a talisapaia e ona mātua ana taumafaiga e latou te talanoa, ma fiafia ai. E foliga e sili ona taulau le auala lea, auā o loo faatatauina e i latou uma le mataupu silisili o loo i le Filipi 2:4: “Ia vaavaai i mea e lelei ai isi ae lē na o lou lava lelei.”—Today’s English Version.

Ua iai isi mataupu i le faa-Peretania o le faasologa “Ua Fesili Mai Talavou” e maua i le Initaneti www.watchtower.org/ype

[Faaopoopoga i lalo]

MEA E MAFAUFAU I AI

▪ O le ā le aogā o le faatali i se taimi talafeagai e talanoa ai?—Faataoto 25:11.

▪ Aiseā e aogā ai le taumafai e talanoa atu i ou mātua?—Iopu 12:12.

[Pusa/Ata i le itulau 20]

LĒ FEMALAMALAMAAʻI

Po o faigatā ona e talanoa atu i ou mātua? Atonu e ese le mea lea e te fai atu ai ma le mea o la mafaufau i ai.

Pe a e fai atu . . .

“Ou te lē fia talanoa i lenā mea.”

Ae ua manatu ou mātua, o le uiga o lau tala . . .

“E sili ona faamatala oʻu manatu ma oʻu lagona i aʻu uō nai lo o oulua, ou te lē o popole tele i o lua manatu.”

Pe a e fai atu . . .

“E te lua lē malamalama.”

Ae ua manatu ou mātua, o le uiga o lau tala . . .

“Ua lua matutua ma e te lua lē malamalama. Aua le taumafai fua e fia malamalama iā te aʻu ma loʻu olaga.”

 [Pusa/Ata i le itulau 23]

TALA A LAU TUPULAGA

“Na ou taʻu i oʻu mātua soʻu faafitauli i le aʻoga ma na ou fiafia ona sa la faalogo mai. O le la fesoasoani na faigofie ai ona foʻia le faafitauli!”—

Natalī.

“E lē faigofie le talanoa i mātua, ae a talanoa atu iā i laʻua, e pei ua matuu atu ai se avega mamafa mai lou mafaufau.”—Devenye.

[Pusa i le itulau 23]

O SE FAUTUAGA I MĀTUA

E lē taumatea o lou manatunatu i lau fanau o le a e fia iloa ai pe faigofie i lau fanau ona talanoa atu iā te oe. Manatu i le mea na taʻua e nisi talavou i le Ala Mai! e uiga i le pogai e faatalatū ai e talanoa i o latou mātua. Ona e fesili ifo lea i fesili nei, ma suʻe mau o loo iai.

“E faigatā ona ou talanoa i loʻu tamā ona e tele naʻuā mea o loo feagai ma ia i le galuega ma le faapotopotoga. Ma e foliga mai e leai se taimi talafeagai e talanoa atu ai iā te ia.”—Andrew.

‘Faamata o le vaai mai a laʻu fanau talavou, ua ou pisi tele e talanoa ma i latou, e ui e lē o loʻu manatu lenā? Afai o lea, e faapefea ona ou faafaigofie le talanoa mai o laʻu fanau iā te aʻu? O ā taimi e mafai ona ou faaavanoa e talanoa ai ma laʻu fanau?’—Teuteronome 6:7.

“Na ou tagi ma taʻu i loʻu tinā la ma taugāupu ma se isi i le aʻoga. Na ou manaʻo e faamāfanafana mai iā te au, ae sa ia aʻoaʻia aʻu. Mai lava i le taimi lenā, ou te leʻi toe fia taʻuina i ai se mea tāua.”—Kenji.

‘O le ā laʻu mea e fai pe a talanoa mai laʻu fanau i se faafitauli? E ui e manaʻomia se aʻoaʻiga, pe mafai ona ou faatali ma faalogologo ma le alofa a o leʻi avatua se fautuaga?’ —Iakopo 1:19.

“E foliga mai o taimi uma e fai mai ai mātua e lē feitai pe a taʻu atu mea o fia talanoa atu ai, a o le mea moni lava, e feitai ma lagona ai e le talavou ua pelogia o ia.” —Rasela.

‘Afai e taʻu mai e laʻu tama se mea e oso ai loʻu ita, e faapefea ona ou onosaia se lagona lē fiafia e mapuna aʻe?’—Faataoto 10:19.

“O le tele o taimi ou te faamatala ai i loʻu tinā ni mataupu ou te manaʻo e na o i maʻua e iloa, ae nofo ma toe taʻu i ana uō. Ma na umi se taimi ou te lē o toe faatuatuaina o ia.”—Chantelle.

‘Po ou te magafagafa i faalogona o laʻu tama i loʻu lē faasalalauina atu o mataupu na manaʻo o ia e na o i maʻua e iloa?’ —Faataoto 25:9.

“E tele mea ou te manaʻo e talanoa atu ai i oʻu mātua. Ou te manaʻomia lava le la fesoasoani ina ia mafai ai ona ou talanoa iā i laʻua.”—Courtney.

‘Pe mafai ona ou tausolomua e talanoa atu i laʻu fanau? O ā taimi e sili ona lelei e matou te talanoa ai?’—Failauga 3:7.

[Ata i le itulau 21]

E lē tatau ona fiu pe a faigatā ona talanoa ae ia saʻili se isi auala e talanoa atu ai i ou mātua!