Le Manatu o le Tusi Paia

Pe Māfua Ou Faafitauli Ona o se Faasalaga Mai le Atua?

Ina ua iloa e se fafine e silia ma le 50 ona tausaga, ua maʻi o ia i le kanesa, fai mai o ia, “Ou te lagona lava ua faasalaina aʻu.” Ua toe manatua e ia se mea sesē na ia faia ua leva, ma faapea ai, Ua taʻu mai e le Atua, o aʻu ua agasala.”

PE A tutupu puapuaga, ona manatu lea o le toʻatele ua faasalaina i latou e le Atua ona o se mea sesē na latou faia i le taimi ua teʻa. Pe a lofitūina i latou i le mau faafitauli, atonu o le a faapea ane: “Ua ou lē iloa pe aiseā ua oo mai ai nei mala?” Pe talafeagai ona tatou faapea ifo, ua saputu mai mala ona ua lē fiafia le Atua iā i tatou? Pe moni ea o nei faafitauli o se faasalaga lea mai le Atua?

Na Oo Faafitauli i Tagata Tapuaʻi Faamaoni

Seʻi mātau mai le tala a le Tusi Paia e uiga iā Iopu. Na faafuaseʻi ona faaleagaina uma ana mea. Ona sosoo ai lea ma le feoti uma o lana fanau ona o se matagi tele. E leʻi umi ae maua foʻi o ia i se maʻi papala leaga. (Iopu 1:13-19; 2:7, 8) Ma na alaga o ia e faapea: “Ua taia aʻu e le aao o le Atua.” (Iopu 19:21, Today’s English Version) Na lagona e Iopu lagona o loo i le tele o tagata i aso nei, ua faasalaina o ia e le Atua.

Ae o loo faaalia i le Tusi Paia, a o leʻi oo nei puapuaga iā Iopu, sa fetalai le Atua e uiga iā te ia, o “le tagata ua sao lana amio ma le amiotonu, o lē ua mataʻu i le Atua, ma ʻaloʻalo ese i mea leaga.” (Iopu 1:8) O lea la, ua iloa mai nei fetalaiga a le Atua, o puapuaga o Iopu, e lē o se faasalaga mai le Atua.

O le mea moni, o loo tele tala i le Tusi Paia e uiga i tagata faamaoni na fesagaʻi ma faafitauli. O Iosefa, o ia o se auauna faamaoni a le Atua, ae na umi se taimi o

 falepuipui ona o faiga lē tonu. (Kenese 39:10-20; 40:15) Na tele “maʻi e tupu soo” i le Kerisiano faamaoni o Timoteo. (1 Timoteo 5:23) E oo foʻi iā Iesu Keriso, na matuā faileagaina o ia a o lumanaʻi lona maliu tigā, ae e leʻi faia e ia se agasala. (1 Peteru 2:21-24) O lea la, e sesē lava le manatu lea e faapea e oo mai puapuaga ona o le lē fiafia o le Atua iā i tatou. Ae afai e lē o le Atua e pogai ai puapuaga, o ai la e pogai mai ai?

Māfuaaga o o Tatou Puapuaga

Ua faailoa mai i le Tusi Paia, o Satani le Tiapolo le pogai o puapuaga o Iopu. (Iopu 1:7-12; 2:3-8) Ma o ia foʻi le pogai autū o o tatou faafitauli i nei aso, auā ua faapea mai le Tusi Paia: “Oi talofa i le laueleele ma le sami, auā ua alu ifo iā te outou le Tiapolo ua lotoa tele, auā ua na iloa ua puupuu lona taimi.” (Faaaliga 12:12) Ua avea Satani ma “pule o lenei lalolagi,” ma ua ia uunaʻia le toʻatele e faia mea leaga ma māfua ai le tele o puapuaga ma tigā.—Ioane 12:31; Salamo 37:12, 14. *

Peitaʻi ane, aua le vave tuuaʻia le Tiapolo ona o mala uma e oo mai iā i tatou. E oo mai foʻi faafitauli ona o filifiliga sesē ua tatou faia talu ai le tulaga agasala ma lē lelei atoatoa. (Salamo 51:5; Roma 5:12) Seʻi fai ma faataʻitaʻiga se tagata e lē ʻai lelei pe lava lana mālōlō. Afai ae maʻi o ia i lona lē filifili lelei, pe tatau la ona ia tuuaʻia le Tiapolo? E leai, ona ua selesele lava e ia āuga leaga o lona lē fuafua lelei. (Kalatia 6:7) Ua fetaui i ai le faataoto a le Tusi Paia a faapea: “O le valea o le tagata e faapiʻopiʻo ai lona ala.”—Faataoto 19:3.

Ma e ao lava ona iloaina, o le tele o mea leaga e tutupu, e māfua ona “o le tausaga ma le mea e tupu ai,” o mea e leʻi faatalitalia. (Failauga 9:11) O se faataʻitaʻiga, e leʻi faatalitalia e se tagata e timu, ae ua faafuaseʻi ona timu ma susu ai o ia. E faalagolago le tele po o le itiiti o lona susū i le mea o iai i le taimi na timu ai. E faapena foʻi nei “aso e sili ona faigatā,” ona o tulaga lē lelei ua iai, e vave lava ona saputu mai ai faafitauli ua pei o se uaga le toʻulu mai. (2 Timoteo 3:1-5) E faalagolago le tele po o le itiiti e tatou te afāina ai, i le taimi ma tulaga o tatou iai, ma atonu e lē tele se mea e mafai ona tatou faia i ai. Po o lona uiga la o le a aafia pea i tatou e faavavau i puapuaga?

Ua Toeitiiti Mavae Puapuaga Uma

E tatou te fiafia ona ua toeitiiti ona faaiʻuina lea e Ieova le Atua o puapuaga uma. (Isaia 25:8; Faaaliga 1:3; 21:3, 4) Ae ua faaalia mai lona alofa tele e ala i le aumaia o ‘faatonuga’ ma le “faamāfanafana mai o Tusitusiga Paia,” ina ia tatou onosaʻia ai puapuaga i lenei taimi a o faamoemoe atu i le lumanaʻi matagofie ua lata mai. (Roma 15:4; 1 Peteru 5:7) I lea taimi, o le a fiafia ai i latou o ē amio saʻo i le silafaga a le Atua, i le lalolagi fou e lē toe iai se puapuaga.—Salamo 37:29, 37.

[Faaopoopoga i lalo]

PO O E TAUMĀNATU EA I NISI TAIMI?

▪ Pe na o tagata fai mea sesē e oo i ai puapuaga?—Iopu 1:8.

▪ Po o le Tiapolo le pogai o faafitauli uma?—Kalatia 6:7.

▪ Po o le a faavavau ona iai puapuaga?—Faaaliga 21:3, 4.

[Faamatalaga faaopoopo i le itulau 15]

“O le tausaga ma le mea e tupu ai e oo iā te i latou uma.”—Failauga 9:11