Tala o Mea Tutupu i le Lalolagi

▪ I le ono tausaga ua tuanaʻi, “toeitiiti 100,000 tagata . . . ua fasiotia i le Iunaite Setete.”—Tala mai le NEW YORK TIMES, AMERIKA.

▪ I Eleni, “e 62 pasene o tamaiti e oo atu i le 16 tausaga ua fai mai, e latou te puʻeina ata leaga mai komepiuta ma tuu i a latou telefoni feaveaʻi.”—Tala mai le ELEFTHEROTYPIA, ELENI.

▪ I Peretania, e 82 pasene o tagata na fesiligia ua manatu e faapea, o le “lotu ua pogai mai ai feteenaʻiga ma fevaevaeaʻiga.”—Tala mai le GUARDIAN, PERETANIA.

▪ “I tausaga mai le 1970 seʻia oo i tausaga faasolo mai le 1990, e faatoluina le aofaʻi o faalavelave na tutupu ona o suiga i le tau, e māfua mai le faateteleina o le vevela o le lalolagi po o se isi foʻi māfuaaga.”—Tala mai le ECONOMIST, PERETANIA.

▪ Ua maua e se tamaitiiti e 10 masina lona matua se pemita e faaaogā ai le fana mai le setete o Ilinois i Amerika. O le pemita lea na talosaga e lona tamā, o loo taʻua ai le umi o lea pepe, e lua futu tolu inisi, a o lona mamafa, e 20 pauna. E lē o faatapulaaina po o le ā le matutua o i latou e talosaga mo lea pemita.—Tala mai le CABLE NEWS NETWORK, AMERIKA.

Ua Lesitala Molimau a Ieova i Take

Iā Iulai 31, 2007, na faailoa aloaʻia atu ai i Molimau a Ieova i Take le lesitalaina o le latou lotu. O lea tulaga ua mafai ai ona latou faatauina se fanua, lisi nofoaga e fai ai sauniga, maua tupe foaʻi faameaalofa, ma puipuia o latou aiā e tusa ai ma le tulafono, pe a manaʻomia.

Toe Faamanatu le Saʻolotoga Tautapuaʻiga i Georgia

Ua faia se faaiʻuga a le Faamasinoga a Europa mo Aiā Tatau a Tagata e faasaga i le malo o Georgia ona o le lē faasalaina o tagata na osofaʻia Molimau a Ieova. Na toe faamanatu mai ai e le faamasinoga e faapea, o Molimau o se lotu ua aloaʻia, ma ua iai le aiā tatau e faapotopoto ai e tapuaʻi ma suʻesuʻe, ma na faatonuina ia toe totogi a latou tupe na alu i le faamasinoga faapea ma lo latou afāina ai. I le va o Oketopa 1999 ma Novema 2002, e 138 ni osofaʻiga sauā na faia i Molimau a Ieova, ma e 784 a latou tagi na faaoo atu i le malo o Georgia. Peitaʻi ane, e leʻi faia se taumafaiga iloga e suʻesuʻeina ai nei tagi. Na mumusu foʻi leoleo e ō atu e taofi nei sauāga pe puipui i tagata na lavevea ai. Talu mai Novema 2003, ua matuā faaitiitia le toe tutupu o mea faapea.

E 64 Tausaga o Tigā le Ulu

Faatoʻā iloa e se fafine Saina le māfuaaga o le “tigā pea” o lona ulu mo le silia i le 60 tausaga, ina ua aveese e fomaʻi se pulufana e tolu senitimita (1 inisi) le umi mai lona ulu. Na ala ona lavea le ulu o lenei fafine, ona iā Setema 1943, na osofaʻi ai e Iapani lona nuu i Xinyi County a o le taimi lea o 13 ona tausaga. E leai se tagata na manatu o se pulufana na māfua ai le tigā o le ulu o lenei fafine. Na taʻua e tala mai le Xinhua News Agency, ina ua faatetele le oso soo o le tigā o le ulu o le fafine, na ave e faata ma maua ai le pulufana. Ua 77 nei tausaga o le fafine, ma o loo “malosi” pea o ia.

O se Tafolā Ola Umi

Ina ua fasi e tagata fagogota mai Alaska se tafolā o le ituaiga o le bowhead i le 2007, na maua i lona tino se matatao lapoʻa tuai ma ni ona vaega. Ua faamatala mai i le Boston Globe e faapea o lenei tao, o “se vaega o tao na fana i se fana e fai i New Bedford [Massachusetts, i Amerika] i tausaga faaiʻu mai le 1800. Ua manatu tagata suʻesuʻe o talafaasolopito i le New Bedford Whaling Museum e faapea, atonu “o se taimi i le va o le 1885 ma le 1895” na fana ai le tafolā i le tao, ona e leʻi umi se taimi na faaaogā ai nei fana. O lona uiga la, a itiiti mai, e 115 tausaga o le tafolā i le taimi na mate ai. Ua fai mai le mekasini o le Globe, ua maua mai i lenei mea ni “faamaoniga atili o le talitonuga ua leva ona iai e faapea, o le tafolā (bowhead) o se tasi lea o meaola i le laueleele, e mafai ona oo i le 150 tausaga le umi e ola ai.”