Le Manatu o le Tusi Paia

Pe e Sesē le Faia o Aiga Fuafuaina i le Silafaga a le Atua?

O LE ā sou manatu? Pe e sesē pe a faia e tagata faaipoipo se aiga fuafuaina? Atonu e faalagolago lau tali i ou talitonuga faalelotu. E aʻoaʻo e le lotu Katoliko, o so o se gaoioiga lava e taofiofia ai le fanau mai o se tagata, e “matuā leaga lava.” O loo faapea mai aʻoaʻoga a le Katoliko, o so o se taimi e faia ai e se ulugalii faaipoipo ni feusuaʻiga, e tatau lava ona faatalitali le maua mai ai o se fanau. E lē taliaina e le Lotu Katoliko le aiga fuafuaina, ma faapea ai “e sesē.”

E toʻatele tagata e faigatā ona taliaina lea manatu. O se tala mai le Pittsburgh Post-Gazzette e faatatau i lea mataupu, na faapea mai, “e sili atu i le tolu kuata o Katoliko i le Iunaite Setete, na faapea mai, e tatau ona faataga e le lotu le aiga fuafuaina. . . . E faitau miliona e lē amanaʻia lenei faasāsāga i aso taʻitasi.” O se tasi o i latou nei o Lina, o se tinā e toʻatolu lana fanau, ma na ia taʻutino mai na ia faaaogāina le aiga fuafuaina, ma na ia faapea mai: “Ou te talitonu, e lē o se agasala ma e lē o afāina loʻu lotofuatiaifo.”

O le ā se vaaiga a le Tusi Paia i lenei mataupu?

E Tāua le Ola

I le silafaga a le Atua, e tāua le ola o se tamaitiiti, e oo lava i le taimi o loo afuafua mai ai. Na faagaeeina le tupu o Isaraelu o Tavita e faapea mai: “Na e ufiufi iā te aʻu i le manava o loʻu tinā. . . . Na silasila mai ou fofoga i oʻu tino uma ina o afuafua; ua tusia foʻi uma lava i lau tusi.” (Salamo 139:13, 16) E amata se ola fou i le taimi e afuafua ai, ma na faapea mai le Tulafono a Mose, e nofosala  se tagata e faamanuʻalia se pepe e leʻi fanau mai. O loo taʻu patino mai e le Esoto 21:22, 23 pe afai e femisaʻi tagata, ma lavea ai se fafine o loo tō, ma faamanuʻalia ai lana tama, e tatau ona avatu le mataupu i luma o ni faamasino tofia. E ao ona latou iloiloina le mataupu e tusa ma lona matuiā, atonu o le faasalaga o le “oti i le oti,” po o le ola i le ola.

E talafeagai lea taʻiala ma le aiga fuafuaina, auā o nisi auala e faia ai le aiga fuafuaina e foliga mai e tutusa ma le faapaʻū tama. O na auala o aiga fuafuaina e lē ōgatusa ma taʻiala a le Atua e faatatau i le faatāuaina o le ola. Ae o le tele o aiga fuafuaina e lē faapena. E iai la se afāina o le faaaogā o ia ituaiga o aiga fuafuaina?

E leai ma se vaega o le Tusi Paia o loo faatonuina ai Kerisiano e fanafanau. Na faatonu e le Atua le uluaʻi ulugalii ma le aiga o Noa: “Ia fanafanau ia, ma ia uluola, ma ia tumu ai le lalolagi.” E leʻi toe tuuina atu lenei faatonuga i Kerisiano. (Kenese 1:28; 9:1) Peitaʻi, e ao i ulugalii faaipoipo ona filifili pe amata se la aiga, pe toʻafia le la fanau o le a fai, ma o afea e mananaʻo ai e maua se fanau. E lē o faasāina mai foʻi e le Tusi Paia aiga fuafuaina. O le vaaiga a le Tusi Paia, o se filifiliga e patino i le tane ma le ava le filifili e fai se aiga fuafuaina. Ae aiseā e taʻusalaina ai e le Katoliko le aiga fuafuaina?

Faatusatusa le Poto Faaletagata i le Poto Mai le Atua

Na faapea mai se lomifefiloi Katoliko, i le senituri lona lua T.A. na faaaogā ai e i latou na faapea o Kerisiano se tulafono mai Setoiko lea na faapea mai, na o le pau le fuafuaga o feusuaʻiga a se ulugalii, ina ia maua ai se fanau. O le māfuaaga i tua o lenei tulafono, e faafilosofia ae lē faavae i le Tusi Paia. Sa faavae i le poto faaletagata ae lē o le poto mai le Atua. Sa faaauau lenei manatu mo le faitau senituri ma na faalauaʻiteleina e nisi aʻoaʻo Katoliko. * O le ʻauga o lenei aʻoaʻoga, o le fiafia e maua e ulugalii faaipoipo mai feusuaʻiga, o le agasala, ma o feusuaʻiga e leai se fuafuaga ina ia maua ai fanau, e lē mamā. Ae e lē o le mea lea o loo aʻoaʻoina i le Tusi Paia.

I le tusiaina faafatusolo, o loo faamatala e le tusi o le Tusi Paia o Faataoto le fiafiaga e maua mai i feusuaʻiga i le va o le tane ma le avā: “Ia e inu vai ai lou lava vailepa, ma vai e tafe mai ai lou lava vaieli. . . . Ia manuia lou vaipuna, ma ia e fiafia i lau avā na fai a o e tauleʻaleʻa. Ia pei o le ʻaila pele o ia ma le ʻoti o le vao e matagofie; ia malie oe i ona susu i aso uma; aua le aunoa ona e matuā fiafia i lou alofa iā te ia.”—Faataoto 5:15, 18, 19.

O se meaalofa mai le Atua feusuaʻiga i le va o le tane ma le avā. Ae lē na o le maua ai o se fanau lona fuafuaga. E mafai e ulugalii faaipoipo ona faaalia o la faalogona māfana i le isi e ala i feusuaʻiga. Afai e filifili se ulugalii e fai se aiga fuafuaina pe lē faia foʻi se la fanau, o le la filifiliga lenā, ma ia aua neʻi faamasinoina e se tasi.—Roma 14:4, 10-13.

PO O E TAUMĀNATU EA I NISI TAIMI?

▪ Po o se agasala le feusuaʻi o se tane ma lana avā?—Faataoto 5:15, 18, 19.

▪ O le ā le mea e ao ona manatua e Kerisiano pe a fai se aiga fuafuaina?—Esoto 21:22, 23.

▪ O le ā le vaaiga a isi e tatau ona iai i se ulugalii faaipoipo e fai se aiga fuafuaina?—Roma 14:4, 10-13.

[Faaopoopoga i lalo]

[Faamatalaga faaopoopo i le itulau 11]

Na faatonu e le Atua le uluaʻi ulugalii ma le aiga o Noa: “Ia fanafanau ia, ma ia uluola, ma ia tumu ai le lalolagi.” E leʻi toe tuuina atu lenei faatonuga i Kerisiano