Ua Filemu le Lalolagi!

UA TALITONU nisi, e faatoʻā maua lava le saʻolotoga mai pulega ma tapuaʻiga, pe a tetee malosi i ai. E lē gata i lea, ua pulea e malo o latou tagata e ala i le faamataʻu. Peitaʻi ane, afai e moni e aogā faiga faatupu faalavelave ina ia sui ai pulega, e ao la ona maua mai ai se filemu, fiafia, ma le sologa lelei. Ma e tatau ona iai se taimi o le a lē toe iai le sauā ma le mataʻu. Po o le tulaga lenā o loo tatou vaaia?

O le mea moni, o faiga faatupu faalavelave, ua lē amanaʻia ai ola o tagata, ma tupu ai ma le faamasaatoto ma le sauā. Ua avea le tigā ma mea ua toe taui ma sui ai tagata, ua atili ai ona omia, ma faapena ai lava ona fetauaʻi.

E Lē Foʻia e le Sauā o Tatou Faafitauli

Ua faitau afe tausaga o taumafai tagata e foʻia o latou faafitauli, i malo, i lotu, ma mataupufai a tagata. Ae e leai se taumafaiga o taulau. Ua talafeagai ai le upu mai le Tusi Paia e faapea: “Ieova e, ua ou iloa e lē o i le tagata lona ala, e lē o i le tagata e savali ona faatonuina le mea e ui ai o ia.” (Ieremia 10:23) Na fetalai Iesu: “E tū pe paʻū le poto i ana galuega.” (Mataio 11:19, The New Testament in Modern English, tusia e J. B. Phillips) Ua iloa mai nei manatu o le Tusi Paia, e lē maua mai faiga faatupu faalavelave se vaifofō. Pau lea ua na o le oti, faanoanoa, ma le mafatia, ae leai se saʻolotoga ma se fiafia. Na tumu le 20 senituri i na mea, ma ua tauau foʻi ina lofia ai lenei senituri lona 21. E toʻatele ua fai mai, ua avea faiga faatupu faalavelave ma faafitauli, ae e lē o se vaifofō.

“O aso uma, ou te talosia ai ia leai se isi o loʻu aiga po o aʻu uō e oo i ai le oti . . . Tatou te manaʻomia se vavega.” O upu ia na tusia e se teine talavou na mū lona nuu ona o faiga faatupu faalavelave. Ua faamanatu mai e ana upu le manatu o loo i le toʻatele: E lē mai tagata se vaifofō. Ua na o Lē na faia le tagata e mafai ona foʻia faafitauli, e aofia ai ma le faatupu faalavelave. O le ā le māfuaaga e ao ai ona tatou faamoemoe i le Atua?

Māfuaaga e Faamoemoe ai i le Atua

O se tasi o māfuaaga, ona o Ia na foaʻiina mai le ola, ma o lona finagalo, ia tatou maua le filemu ma le fiafia. Na tusi mai le perofeta o Isaia e faapea: “O lenei, Ieova e, o oe lava lo matou Tamā; o i matou nei o le omea, a o oe le Tufuga; o le galuega a ou aao i matou uma.” (Isaia 64:8) O Ieova le Tamā o tagata uma, ma e tāua iā te ia tagata o nuu uma. E lē tuuaʻia o ia ona o le leai o se faamasinotonu ma le feitagaʻi lea ua māfua ai faiga faatupu faalavelave. Na faapea mai le tupu poto o Solomona: “Na faia e le Atua le tagata e amiotonu, a o i latou ua saʻiliʻili i latou i togafiti e tele.” (Failauga 7:29) O le māfuaaga tonu o faafitauli, o le leaga o tagata ma faiga faatemoni, ae lē o se faalētonu o le Atua.—Efeso 6:11, 12.

O se isi māfuaaga e tatou te faatuatuaina ai Ieova, ona o ia na faia tagata, o lea ua sili lona malamalama i le māfuaaga o faafitauli o tagata ma le auala e foʻia ai. Ua taʻua e le Tusi Paia lea mea moni i le Faataoto 3:19: “O le poto na faavaeina ai e Ieova le lalolagi; ua faatumauina le lagi i le mafaufau.” O se tagata anamua na faatuatua atoatoa i le Atua na ia  tusi mai e faapea: “O loʻu fesoasoani mai iā Ieova lea, o lē na faia le lagi atoa ma le lalolagi.”—Salamo 121:1, 2.

O le māfuaaga lona tolu e ao ai ona tatou faatuatuaina le Atua: Ua iā te ia le mana e faamuta ai le faamasaatoto. I aso o Noa, na “tumu le lalolagi i le sauā.” (Kenese 6:11) Na vave, ma na māeʻa le faaumatiaga o na tagata e le Atua: “E leʻi faasaoina foʻi [e le Atua] le lalolagi tuai, . . . ina ua au mai le lolo i le lalolagi faalēmataʻu.”—2 Peteru 2:5.

Ua aumaia i le Tusi Paia se lesona e tusa o le Lolo i aso o Noa: “Ua silafia e le Alii se mea e laveaʻi mai ai i ē amio Atua ai le tofotofoga, a e taofi i ē amio leaga e oo i le aso faamasino ina ia faasalaina i latou.” (2 Peteru 2:9) E silafia e le Atua i latou o loo mananaʻo moni i se olaga e sili atu, ma i latou e faatigā i isi. Ua ia tuu i latou na mo le aso e “fano ai tagata faalēmataʻu.” Ae o ē mananaʻo i le filemu, ua ia saunia se lalolagi fou, e mau ai le amiotonu.—2 Peteru 3:7, 13.

Filemu e Faavavau i le Lalolagi!

Ua masani ona faaaogā e ē na tusia le Tusi Paia, le upu “lalolagi” e faasino i tagata. O se faaaʻoaʻoga, ua faapea mai le Kenese 11:1, o “le lalolagi uma,” po o tagata i lenā taimi, na tautatala i le gagana e tasi. O le uiga lenā na manatu i ai le aposetolo o Peteru ina ua ia taʻua le “lalolagi fou.” O le a faafouina e Ieova le Atua le lalolagi ina ia lē toe iai se sauā ma le ita, ae o le a “mau” ai le amiotonu ma le faamasinotonu e faavavau. Ua faapea mai le valoaga i le Mika 4:3: “E faamasino foʻi o ia i nuu e tele, e aʻoaʻi atu foʻi i nuu malolosi e mamao; ona latou tuʻi ai lea i a latou pelu e fai ma uʻamea o suōtosina, o latou tao foʻi o fai e fai ma polo teu vine; e lē sii atu foʻi le pelu e le tasi nuu i le tasi nuu, latou te lē toe aʻoaʻo foʻi i taua.”

O le a faapeʻī olaga o tagata pe a taunuu lenā valoaga? Ua fai mai le Mika 4:4: “E taʻitasi ma nofo i lalo o lona vine, ma lalo o lona mati; e leai foʻi se na te faamataʻu mai.” I lenā lalolagi Parataiso, e leai se tasi  e ola ma le mataʻu ina neʻi osofaʻi mai ē faatupu faalavelave. Pe e te talitonu i lenā folafolaga? Ioe, “auā ua faapea ona tulei mai ai le siʻufofoga o Ieova o ʻau.”—Mika 4:4.

O lea, e ui ina tele faamataʻu mai ē faatupu faalavelave, ma tetete nuu ona o faiga sauā, o le vaifofō mo ē naunau i le filemu, o le faamoemoe lea iā Ieova. E leai se faafitauli e na te lē mafaia ona foʻia. O le a ia aveesea tigā, mafatiaga, ma le oti. Ua faapea mai le Tusi Paia: “E faaumatia e ia le oti e faavavau; e soloiesea foʻi e le Alii o Ieova o loimata i mata uma lava.” (Isaia 25:8) O nuu e pele i o latou tagata, lea ua tumu i tigā ma le mataʻu ona o faiga faatupu faalavelave, ua toe o se aga ona tumu lea i le filemu. O loo matuā manaʻomia lava e tagata lenā filemu, lea ua folafola mai e le Atua, o lē “e lē mafai ona tala pepelo.”—Tito 1:2; Eperu 6:17, 18.

[Pusa/Ata i le itulau 17]

E IAI SE ISI MEA E SILI ATU I PULUFANA MA FANAIʻA

O faamatalaga o loo taʻua i lalo, e mai tagata na talitonu o le ala e sui ai pulega, o faiga sauā.

▪ “Ina ua ou faitau i talafaasolopito, na ou iloa ai, e pulea e tupu ma tagata maualuluga i latou e matitiva. Ou te malamalama i le mafatia o tagata vaivai. A ou mafaufau pe faapefea ona faamuta ia mafatiaga, ona ou manatu lea, pau lava le mea e fai, o le faafetaui o fana i fana.”—Ramon. *

▪ “Na ou auai i fetauaʻiga e faaaogā ai auupega. Na ou manaʻo e aveese pulega o loo iai, ae faatū se pulega e mafai ona aveesea tulaga ua faalētonu ai le lalolagi.”—Lucian.

▪ “E mai lava i loʻu laʻitiiti, ou te lē fiafia i faiga lē tonu e iai le mativa, solitulafono, lē lava o aʻoaʻoga, ma le lē lelei o fomaʻi ma falemaʻi. Na ou manatu, e aogā teteega faamalosi e maua ai aʻoaʻoga, le tausiga lelei tau soifua mālōlōina, o fale, ma galuega. Na ou manatu foʻi, e so o se tasi e lē fia ola lelei ma āva i ona tuaoi, e ao ona faasalaina.”—Peter.

▪ “O aʻu ma laʻu tane na iai i se faalapotopotoga faalilolilo e uunaʻia le tetee atu e ala i faiga sauā. Na matou faamoemoe ia faatū se malo e maua ai e tagata le sologa lelei ma ia tutusa tagata uma. Na matou manatu e pau le auala e maua ai se faimeatonu i lo matou nuu, o faiga tetee faapea.”—Lourdes.

Na taumafai nei tagata e fesoasoani i isi e ala i faiga tetee ma le sauā. Ae ina ua latou suʻesuʻeina le Tusi Paia ma Molimau a Ieova, na latou iloa ai e sili atu le faamoemoe o loo i le Afioga a le Atua. Ua fai mai le Tusi Paia i le Iakopo 1:20: “Auā e lē tupu le amiotonu mai le Atua i le ita o tagata.”

Ua na o le pulega a le Atua e mafai ona suia tagata. O valoaga e iai le Mataio mataupu e 24 ma le 2 Timoteo 3:1-5, ua faaalia ai, ua toe o se aga ona faatinoina lea e le malo o le Atua o lea tulaga. E matou te faalaeiauina oe ia e saʻili i nei upu moni e ala i le suʻesuʻeina o le Tusi Paia ma Molimau a Ieova.

[Faaopoopoga i lalo]