Pe a na o le Filemu e Iai i le Lalolagi

PO UA e tagaʻi i ni tagata e tomai e tāfiti i le ʻea, po o se alii ma se tamaʻitaʻi o faasee i se malae aisa? E mataʻina le sologa lelei ma le manaia o a la gaoioiga. Maʻimau pe a na faapena le olaga i nei aso, e sologa lelei e aunoa ma le feteenaʻi po o le femisaʻi. Ae, o tagata i nei aso, ua tusa lava ma le valoaga a le Tusi Paia e faatatau i o tatou taimi, ua ‘lē ma faaleleia.’—2 Timoteo 3:1-5.

E ui i ia tulaga, e faitau miliona tagata loto lelei ua aʻoaʻoina ia ola fifilemu ma le autasi ma isi tagata. E faapefea? E ala i le talia o le augani mai a le Tusi Paia i le Isaia 48:17, 18. O loo faapea mai: “O aʻu o Ieova, o lou Atua, o loo aʻoaʻo iā te oe i mea e aogā, o loo taʻitaʻiina oe i le ala e te ui ai. E! ana uaʻi mai ou taliga i aʻu poloaʻiga, po ua tusa ma se vaitafe lou manuia; ma lau amiotonu, e tusa lea ma peau o le sami.”

Pe a tatou talia lenā valaau māfana, ua avea ai Ieova ma Lē o loo aʻoaʻoina ma le alofa i tatou. Ua ia faaali mai le auala tatou te “ui” ai i le filemu moni ma le autasi. Auā e lē o se gaoioiga poto le fai e tusa o manatu ma talitonuga o tagata. Ua faamaonia i le tele o taimi mai le talafaasolopito o le tagata le mea moni o loo taʻua i le Ieremia  10:23 e faapea: “E lē o i le tagata lona ala, e lē o i le tagata e savali ona faatonuina le mea e ui ai o ia.” O lona uiga, e lē mafai ona tatou pulea i tatou lava ma faia ni faatulagaga auā le sologa lelei o tagata uma. O lea faaeaga, e a Ieova lea.—Isaia 33:22.

Le Filemu Moni ma le Autasi

Ua toeitiiti ona aumai lea e le Atua le filemu i lo tatou lalolagi. Ua ia folafola mai le taimi o le a ‘tumu ai le lalolagi i le malamalama o Ieova, e pei ona ufitia o le iliti tai i le suāsami.’ (Isaia 11:9) Ioe, o le a tumu le lalolagi i le filemu e faavavau!

O le mea moni, o le filemu lea o le a oo i ai le olaga i le lalolagi, e leʻi iai faapea muamua, auā o le a aʻoaʻoina e le Atua ona tagata ia avea ma ē tausi lelei i le lalolagi. O le a pei ua ia ‘osia se feagaiga’ ma manu feʻai, ma o le a latou ola fifilemu ai ma tagata.—Hosea 2:18; Kenese 1:26-28; Isaia 11:6-8.

O lenei faamoemoe, ua lē o ni moomooga faivavale, auā e faalua ona taʻua e Iesu lea faamoemoe i lana Lauga i le Mauga. Muamua lava, na ia faapea mai: “Amuia ē agamalu; auā e fai mo latou tofi le nuu.” E lē gata i lea, ina ua ia aʻoaʻo ona soo i le auala e tatalo ai, na ia faapea atu: “Lo matou Tamā e . . . , Ia faia lou finagalo, i le lalolagi, e pei ona faia i le lagi.” (Mataio 5:5; 6:9, 10, LT) Ina o le a iʻu lona ola, na fetalai ai e Iesu le uiga o lea mea mo tagata e faapea, o le a iai se “parataiso” matagofie. (Luka 23:43) Ioe, ua avea le taulaga a Iesu ma tulaga ua mautinoa ai le faamoemoe o le ola e faavavau, i le parataiso i le lalolagi!—Ioane 3:16.

[Ata i le itulau 24]

I le Parataiso a le Atua lea o le a oo mai, o le a iloa ai e le lalolagi se filemu e leʻi iai faapea muamua