Vanila—O se Mea Faamanogi ua Loa Ona Iai

TUSIA E LE TUSITALA O LE ALA MAI! I MEKISIKŌ

E TAʻUA e tagata Aztec le vanila o le tlilxochitl, “fugālaau uliuli,” e faasino atu i le lanu o le fua ua uma ona faamago. E latou te faaaogā le vanila e faamanogi ai la latou meainu e taʻua o le xocoatl, e fai i le koko. E faapea le faamatalaga, na avatu e Montezuma, o le emeperoa o Aztec i Mekisikō, lenei meainu i le fitafita Sepania o Hernán Cortés i le 1520. Ona auina atu ai lea e Cortés fatu koko ma fua o le vanila i Europa. Na taatele le faaaogāina o le koko vevela e faamanogi i le vanila i aiga tautupu i Europa, ae i le 1602 na faatoʻā fautuaina ai e Hugh Morgan, o se tagata e sauniaina vailaau faafomaʻi mo le Tupu Tamaʻitaʻi o Elisapeta I, le faaaogāina o le vanila e faamanogi ai isi mea. I le 1700 seʻia oo i le 1709, na amata ai loa ona faaaogāina le vanila i mea inu malosi, i tapaa, ma mea faamanogi.

Peitaʻi, a o leʻi taitai lava ona iai le Emepaea o Aztec, sa totōina, seleseleina ma faamamago e tagata Initia Totonac o Veracruz i Mexico, ia fua o le vanila. * Peitaʻi, na faatoʻā auina atu le laau o le vanila i Europa e totōina ai i tausaga amata mai le 1800 ma mai i inā na auina atu ai i motu o le Vasa Initia. Peitaʻi, sa lē taulau taumafaiga a tagata suʻesuʻe i mea tau faatoʻaga ina ia mauaina ni fua mai le laau, ona o le leai o ni ituaiga faapitoa o lagomeli e feaveaʻia poleni. O lea sa na o Mekisikō na faatauina atu le vanila mai le senituri e 16 seʻia oo i le senituri e 19. I le 1841, na mauaina ai e Edmond Albius, o se tagata sa avea muamua ma pologa i le motu o Falani e taʻua o Réunion se auala e sili ona lelei e poleni ai fugālaau e ala lea i le faia e tagata ina ia maua mai ai ni fua. O inei na mafai ai ona totōina le vanila mo fefaatauaʻiga i fafo atu o Mekisikō. I aso nei, o nofoaga o loo sili ona maua mai ai fua o le vanila o motu na pulea muamua e Falani, e pei o motu o Réunion ma Comoro, a o Matakasa o le motu autū lea o loo mauaina mai ai le tele o le vanila.

Le Totōina o le Vanila

O le fua o le vanila e maua mai i le oketi. E na o le pau lea o le oketi mai le silia i le 20,000 o ituaiga o oketi e maua ai se mea e mafai ona ʻaina. O lea laau e sosolo ma e tatau ona iai se mea e talitali ai ma e lē tatau ona lāina tele. I togāvao, e masani lava ona sosolo i laau i vaega susū o laufanua laugatasi. I Mekisikō e faaaogā e tagata laau o loo ola ai e pei o le pichoco e fai ma talitali, ae talu ai nei na faaaogāina ai moli mo lea fuafuaga ma sa foliga mai e lelei.

O le oketi o le vanila e molemole lanu meamata samasama ona fugālaau ma e taufuifui ona fua. O fugālaau taʻitasi e na o le tasi le aso o le tausaga e matala ai mo ni nai itula. E mataʻina pe a matamata i tagata Initia Tontonac a o faia lenei galuega faigatā o le poleniina o fugālaau. E latou te poleniina na o ni nai fugālaau mai taufui taʻitasi ina ia aua neʻi maumau le malosi o le laau, lea e ono vaivai ai ma faigofie ona maua i faamaʻi. O fua uumi lanumeamata, o loo iai fatu e matuā ninii lava, ma e faaaogā tagata e aoina fua mai le ono i le iva masina mulimuli ane, a o leʻi oo ina pula atoatoa.

Le Faamamagoina

O le mea e mataʻina ai, o le fua mata o le vanila, e leai sona tofo po o se manogi. E tatau ona faamagoina mo se taimi ina ia maua mai ai le sasala ma le manogi o le vanila. O le auala o loo faamagoina ai ma le manaʻomia o tagata e poleniina le vanila ua avea ai ma mea faamanogi e sili ona taugatā. I Mekisikō o le auala masani e faamago ai le vanila, e fola ia fua i luga o palanikeke uli i le lā e faalā muamua ai, po o le faamamago i le lā. Ae i aso nei ua masani ona faaaogā ogaumu e faamamago muamua ai. Ona tuu lea o vanila i ni pusa faapitoa ma afīfī i ni palanikeke po o ni fala, ina ia faaafu ai fua ia ua mamago. Ona sosoo ai lea ma le feauauaʻi ona faalalā ma faaafu mo ni nai aso seʻia oo ina enaena malosi ona fua. Pe a uma lenā, ona tuu loa lea i pusa pe tuu i faaputuga e faaafu ai ma ufi i pepa maseesee (wax paper) ina ia faifai mālie ai ona mago i le vevela masani o le ʻea pe tusa ma le 45 aso. A uma lenā ona tuu loa lea i pusa ma ufiufi  malu mo le tusa ma le tolu masina, ina ia maua atoatoa lona manogi e tatau ona iai. O lea la e tele gaoioiga e alu ai i le faia o le vanila.

Vanila Maoʻi po o se Vanila Fai?

Ua mafai foʻi ona maua le manogi o le vanila fai e ala i le faaaogāina o mea e maua mai fasi laau ninii. O le faitauina o faamatalaga o loo faapipiiina i tua o mea ia e manatu e fai mai i le vanila, atonu e faateʻia ai oe. Mo se faataʻitaʻiga i le Iunaite Setete, o le aisakulimi lea e tusia ai le “vanilla” e fai mai i le vanila maoʻi po o fua o le vanila, ae o le aisakulimi o loo tusia ai le “vanilla flavoured” e ono iai le 42 pasene o le vanila fai, ae o aisakulimi o loo tusia ai le “artificial flavoured” o loo faia atoa i le vanila fai. Ae e faamaonia e tagata e tele lo latou iloa i meataumafa faapea, e leai lava se mea e mafai ona suia le manogi o le vanila maoʻi.

E ui lava e lē o toe avea Mekisikō ma atunuu autū mo le mauaina mai ai o le vanila—ua aafia lona gaosia ona o tulaga e pei o le faaleagaina o le vaomatua, ma le faaleagaina e lologa talu ai nei—ae o loo iai pea se mea e sili ona faatāuaina, o inā na tupuga mai ai le vanila. * O le vanila lea e fai mai i Mekisikō o loo manatu pea i ai o le vanila silisili lea lona manogi ma lona tofo. E foliga mai o loo ioe iai tagata tafafao mai isi atunuu, ona e masani ona latou ō atu i faleoloa i Mekisikō ma faleoloa i malae vaalele ia e lē totogia se tiute e faatau mai ai vanila maoʻi i se tau maulalo. O le isi taimi e te taumafa ma e fiafia ai i le tofo o aisakulimi e fai mai i le vanila maoʻi, mafaufau i le leva ona iai o lenei mea faamanogi, ma le tele o gaoioiga e alu i lona faiga!

[Faaopoopoga i lalo]

[Ata i le itulau 19]

O loo poleniina e tagata Totonac i Initia fugālaau (agavale) ma le filifilia o fua o le vanila ina ua uma ona faamamagoina (taumatau). Oketi o le vanila (i lalo)

[Ē Ana le Ata]

Copyright Fulvio Eccardi/vsual.com